Victor Ching - 註冊心理學家

23/07/2025

有冇人嚟緊會劏車？我想要一換一Quota～

22/07/2025

夢の系列

www.Victor-Ching.com
www.MindfulKidsHK.com
www.PositKids.com

#解夢 #精神分析 #潛意識 #心理學 #心理學家 #程衞強

📌 專業提示：夢境分析唔等同臨床診斷。呢個系列並唔代表任何心理治療建議，純粹以歷史及心理分析學派理論為靈感作分享，內容未必有足夠實證支持。如對夢境內容感到困擾，建議尋求專業心理協助。

12/07/2025

愉快學習

成日聽愉快學習，加上見咁多學童情緒問題，家長就困惑：練琴、做功課、寫字、操卷，算唔算愉快學習？有壓力就唔愉快？有要求就唔開心？點算？

愉快學習 ≠ 無功課、無練習、無要求
任何技能都要靠重複練習先可以掌握到。你睇小朋友打機，佢哋可以死一百次都繼續「玩」落去，關鍵唔係無難度，而係心態。

所以第一個重點係：學習係為咩？
學琴係因為小朋友鍾意？定係你想佢學？如果佢根本一開始就唔想學，點會愉快？（同你返工差唔多啫😏）

第二：父母用咩態度陪練？
如果父母當練琴係任務，「未練完唔準玩」咁，當然反感。反而係「父母能明白過程中會有困難，容讓適當休息、放低」，節奏掌握得好，感覺就會好唔同。

第三：容許不完美
你要求每次上堂都要熟哂之前教嘅歌，務求每堂都學新嘢，唔好浪費金錢，老師以為小朋友資質非常高，然後再教多啲新嘢，原來小朋友已經係臨界點！

最後補充：愉快學習唔代表無挫折。
有啲挑戰、有啲唔順利，正正係建立挫折忍耐力嘅機會。但重點係你點樣陪佢過程入面面對挫敗，而唔係即刻收起來。

#愉快學習 #親子關係 #學習心理學 #成長型心態 #家庭教育 #程衞強 #心理學家

11/07/2025

關心青少年情緒健康嘅朋友 快啲報名啦～
希望當日見到你！

#情緒健康 #青少年情緒健康 #心理學 #靜觀 #心理學家 #程衞強

10/07/2025

你以為全世界都喺度望住你？其實大家都忙住望自己。

著咗兩日同一件衫、講咗一句怪聲英文、IG story出得唔夠靚，都以為全世界記住自己個醜樣。

根據心理學有個現象，叫 Spotlight Effect（焦點效應），意思係：我哋往往高估咗其他人對自己行為或外表嘅注意程度。簡單講：你以為自己企喺鎂光燈下，其實人哋個燈根本未開。

下一次當你以為全世界都係度睇你著咗兩日同一件衫⋯⋯放心啦，佢哋連你叫咩名都未必記得。

#焦點效應 #心理學 #職場心理 #社交焦慮 #自我意識 #心理學家 #程衞強

04/07/2025

請幫忙分享比應屆DSE考生

一個好有心的輔導心理學家主持嘅活動，近乎免費（只收$10仲有茶點有冷氣有分享有支持，想點😂）💪🏻

DSE 放榜同學, 過黎 Chill 吓 Chat 吓 Relax 吓喇🤗🤗

放左榜後好緊張？！等出Jupas心情忐忑不安！唔知點算好！又驚又怕身邊嘅人有說話聽。。。“天啊我太難了！！”

由心萌天地, 源流文化中心及安静一刻舉辦嘅
“DSE放榜後群Chill Chat 減壓站” 啱晒你！！！

*現場有應屆及前屆DSE團隊同學作朋輩支援同你傾
*在場更會有分享舒緩緊張及焦慮心情的技巧環節
*心理學家更會同你大玩卡牌, 走入同學迷霧裏, 共同找出方向

適合參與人群：應屆DSE放榜同學

日期及時間：
7月20日(Sun) 1500-1800
7月26日(Sat) 1500-1800
8月2日（Sat) 1500-1800

地點： 尖沙咀柯士甸路20號寶發商業大廈13樓1302室： 安靜一刻
https://maps.app.goo.gl/SCUmtbhzVYuPNAhU9?g_st=com.google.maps.preview.copy
收費$10到場繳交
查詢 WhatsApp: 46948019
網上登記: https://forms.gle/z6jdNrrFUSPhbHnm6

**場外提供免費飲品及小食首30位網上登記同學更可以到場繳費時獲得精美紀念品一份**

**到時見🤗**

#放榜 #唔知點好 #放鬆

04/07/2025

好人好事

有個舊同事，搵我傾緊一個學生嘅拒學問題（School Refusal）。近年，呢個情況好似嚴重咗。

長話短說，佢想我幫學生做輔導（學生都願意），但因為學生家庭情況，未必有能力支付私人心理學家嘅費用，舊同事同我講「張單俾我，記得唔好同個學生講呀！我見佢其實好有能力，唔想浪費咗一個大好青年」。

呢啲老師好到咁，邊度搵！

以前識佢，一直都知佢對學生好上心，咁多年都無變，呢個世界仲有好多好人㗎！

#教學熱誠 #好老師 #老師唔止係一份工

01/07/2025

「反芻思維」與大腦的死循環

有冇試過件事明明已經過咗，自己仲會不停咁回想、重播、分析、自責、幻想更差嘅後果？越諗越唔開心，仲瞓唔着、做唔到嘢？

呢個現象，心理學上叫「反芻思維」（Rumination）。

當我哋不停重複諗同一件負面事件，大腦會進入一種「自我餵食負能量」嘅模式，令情緒越嚟越低，仲會增加抑鬱、焦慮嘅風險，甚至有人話會增加身體發炎嘅風險添（睇嚟我都可以賣保健品）！

✅ 可以點做？

✔️ 標籤情緒
用語言講出嚟：「我好嬲／我驚失敗／我好自責」，可以減低情緒反應。

✔️ 設定「擔心時段」
每日預留幾分鐘，專心諗「煩惱」；時間一過就做其他嘢，幫助控制反芻的時間框。

✔️ 身體郁動
行樓梯、做家務、出街行下，郁動可以打斷反芻回圈，亦有助轉移注意力。

✔️ 寫出煩惱
寫出嚟，有助將腦中不停loop嘅聲音「拎出嚟」，寫完之後嘅腦袋，會比較「乾淨」。

✔️ 靜觀練習
試下觀察自己腦海裡出現咩念頭，唔需要即刻分析或改變，只係帶住好奇心睇住就可以。

#反芻思維 #自我對話 #靜觀 #情緒健康 #心理學 #心理學家 #程衞強

25/06/2025

6月16號出咗篇文，講錯別字重覆扣分嘅問題，今日就見到呢段新聞！

雖然而家只係「提醒」，但希望都可以起到作用，喚醒大家對學童情緒同學習嘅察覺。

再者，生活技能真係重要過寫啱隻字！

小學人文科｜
課程指引倡評估不計分、寬容處理錯別字
有學校教執書包當平時分
https://news.hket.com/article/3969404?r=cpstni

#兒童情緒 #兒童學習 #兒童成長 #兒童心理 #心理學家 #程衞強

教育局今日（24日）公布小學人文科課程指引，除了就學與教提供指引，學生評估和學與教資源方面，教育局建議學校評估時，可考慮「只置評而不予分」，避免學生只求分數等級，忽視教師回饋。其中一項評估示例指出，有

22/06/2025

決策疲勞

尋日先講過，大腦係得咁多電㗎啦，而每一個決策都係耗電嘅，所以會有決策疲勞。但原來，我哋都可以幫大腦叉電㗎！

心理學研究指出，以下幾種方法，對於提升大腦能量、集中力、自控力都有幫助：

✅ 靜觀
每日幾分鐘，觀察呼吸、感受當下。研究指出，靜觀可以降低壓力、強化前額葉皮質，幫助我哋冷靜面對問題。

✅ 運動
快步行10分鐘，已經可以提升腦內啡與多巴胺，幫你提神、增強注意力。

✅ 幫人一下
無論係陪小朋友做功課（會唔會呢個先係情緒激發點？）、幫同事一個忙，研究指出「Helper’s High」能釋放幸福激素，令自己情緒更穩定。

✅ 寫感恩
每日寫低3件感恩小事，持續3星期，可以提升正向情緒與心理韌性，減少煩躁感。

✅ 發呆一陣
唔係叫你hea，而係真係讓腦袋留白，等思緒自由流動。研究顯示，放鬆狀態下，大腦反而更易產生創意與解決方案。

唔一定要等瞓覺先至回電，日常生活中，都可以用以上方法，幫自己 reset 大腦，再次上路！

#大腦充電 #心理能量 #靜觀 #感恩日記 #運動提神 #發呆的力量 #心理學 #心理學家 #程衞強

21/06/2025

決策疲勞

你有冇試過，成日糾纏喺一件事度，搞咗一大輪，跟住果日脾氣越嚟越差、自制力、意志力、決策或者腦轉數都變得慢？

呢個，可能係「決策疲勞」（Decision Fatigue）。

腦袋一日只得咁多電，每一個決策都會消耗我哋嘅一啲電量，意志力、自制力等等，全部要電。所以如果當日你好忙、好攰的話，忍唔住口嘅機率都會高啲！

解決方法：
✔️ 建立Routine，減少每日重覆決定
✔️ 將重要決策放朝早
✔️ 準備一份「無腦選項清單」（例如每星期三食飯盒、遇到X就直接Y）
✔️ 減少社交媒體資訊轟炸，唔駛事事反應

保留腦力，先有餘力應對真正重要嘅事！

#決策疲勞 #心理學 #家庭心理 #職場心理 #父母日常 #自我管理 #程衞強