30/09/2025
《第一格入面嘅，到底係邊個？》
喺中一果年，學校發生過一件事~
學校地下有個女更衣室同女廁所，由我入學到依家都長期鎖住，幾乎冇人入過去
無人知發生過咩事，因為個廁所同更衣室係喺地下最多人行既地方，無理由鎖住唔比人用
直到有一日體育堂，阿Sir突然話：「今日比你哋用地下嗰個更衣室換衫啦。」
佢拎左一抽鎖匙出黎，喺入面有一條有特別標記既鎖匙，插落門鎖，「咔嚓」一聲，門就慢慢開咗
下一秒，一股濃烈嘅怪味就撲面而來——
唔止係霉味，仲摻住啲腐肉臭、酸臭，好似啲味道黏住咗空氣咁，喉嚨一縮，差啲反胃。
有啲同學捏住鼻硬衝入更衣室，但我真係頂唔順，轉身決定去廁所換。
女班長拎另一條鎖匙去開廁所門，但扭咗好耐都開唔到。
感覺唔係鎖壞咗，而係入面有人拉住門。
佢手都扭到發白嗰陣，我忍唔住伸手「咚、咚、咚」敲咗幾下。
門忽然鬆咗，慢慢自己打開，同時一陣冰涼到入骨嘅風飄出嚟，吹到我起晒雞皮
大家冇多諗，就走咗入去
廁所好乾淨，起碼無臭味，總共有四格，大家都好奇怪點解一直鎖住唔比人用
我啱啱行到第一格門口，突然有個長頭髮女仔「刷」一聲閃過我身邊，一手「啪」咁閂咗門上鎖
全班女仔笑：「嘩！使唔使咁急呀？」
我冇理，繼續排隊
但過咗好一陣，隔離幾格都換完兩三轉人，
第一格入面嗰個仲未出嚟
後面開始有人細細聲講：「邊個呀黎架？換衫定開大呀？」
我腦入面閃過嗰個背影——好似係我朋友 A
於是我一路拍門，一路叫：「喂 A！你搞咩呀？快啲啦～」
結果後面傳嚟一句：「吓？我出咗嚟好耐啦喎。」
我心臟「咚」一聲，僵住咗
一轉頭——A 正喺我後面，笑笑口梳緊頭
我地估係咪有人喺入面暈左，開始係咁拍門
有個比較大膽啲既女仔行過黎，烏低身從廁格下面望入去
佢望完，面青唇白慢慢擰轉頭同我講：「無人喎……」
我再推下度門，門慢慢打開，入面空無一人。
廁所一陣靜得出奇，只聽到水喉「滴、滴、滴」聲同心跳聲。
我喺嗰刻，終於明白點解呢度一直冇人用。
#靈交流 #親身經歷 #校園怪談 #靈異故事 #恐怖故事 #都市傳說 #真實靈異 #恐怖經歷 #神秘事件 #恐怖短篇 #恐怖日常 #詭異事件 #故事時間 #夜晚唔好睇 #膽小勿入 #真人真事 #未解之謎 #背後發冷 #毛骨悚然 #恐怖時刻
