殯儀先生子力/Nic Cheng ，樂齡薈-善終教育義工
30/04/2026
今日生死教育故事：《喪禮上的咒罵》
阿玲今年50歲。
響佢幾歲大，有記憶開始，幾乎所有回憶都充滿恐懼同眼淚。阿爸不斷家暴阿媽，經常醉酒後拳打腳踢、粗口爛舌，令阿媽長期生活在驚恐之中。佢同細佬細細個已經被逼，送到不同親戚屋企寄住，連食飯、讀書、生活費全部靠不同既親戚幫手。阿爸幾十年來，從來冇問過佢哋，讀邊間學校、做緊咩工作？
每逢親友有喜慶日子，阿爸就一出現，基本上一定飲醉酒搞事，喊蛋喊殺，令全場尷尬。親友圈入面，大家私底下都叫佢「廢柴」、「衰人」⋯⋯⋯⋯
今日阿爸終於走了。
在靈堂上，阿玲突然崩潰。佢指住冰冷嘅遺體，邊喊邊大聲鬧：「你終於死咗啦！你虐待阿媽咁多年，害到佢一世人唔開心！你一世人只顧自己，從來冇負過責任！你應該早啲死！」
佢一邊痛哭、一邊將幾十年嘅怨恨、委屈同恐懼全部爆發出來。因為長期家暴，阿媽早已抑鬱成疾，早就離世。阿玲覺得，呢個男人徹底毀咗佢哋一家。
喪禮完後，有人問阿玲：「你咁樣鬧佢，係咪已經放低咗？」
阿玲靜咗好耐，眼泛淚光，聲音沙啞咁話：
「我罵咗佢半個鐘，其實我心入面仲有半個世紀嘅恨。
我以為佢死咗，我就可以徹底一刀兩斷。
但原來……我越係咒罵佢，我就越係同佢綁住一齊。
我一世人最憎恨嘅人，依然喺我心入面，每日都喺度折磨我⋯⋯⋯
🌟小啟發🌟
恨得越深，有時就係被綁得越緊。
咒罵遺體、繼續怨恨，其實係將自己餘下嘅生命，都繼續交畀對方繼續傷害。
真正嘅放低，唔係原諒佢做過嘅事，而係決定：我唔再為你嘅錯既事去埋單，繼續懲罰自己。
當一個人可以平靜地講出「呢段關係，到此為止」，先係真正嘅一刀兩斷。
💛 如果你或身邊人有類似長期怨恨、創傷或情緒困擾，記住唔使一個人面對
可以致電「情緒通」18111（24小時），或明愛向晴軒 18288 傾訴，有人會陪你一齊走過去
#生死教育故事 #殯儀先生子力
#原生暴力家庭 #情緒宣洩
#情緒通 #明愛向晴軒
#傾訴 #你不是一個人面對
