15/11/2024
修行即係黐咗線❓
呢題問題可圈可點，要視乎遇到係咩修行者！每人有自己修行方法，有啲可能跟師傅或自細有天份學習所得或有宗教信仰，有啲人會以修行之名做騙財騙色之事，或者將信仰掛口邊但做住無恥之事，好比一個和尚日日食狗肉，只係做表面功夫，裡面嗰浸係無改變過。
真正修行同生活掛鉤，叫「做返一個人」，以善行善言善念為本，自我約束自己所思所言所行。修行唔係做和尚尼姑（呢個係刻板印象）簡單咁講管理好自己，不斷覺察自己嘅行為以及反省，喺呢個酒色財氣嘅世界，保留善心係對自己嘅一個交代。
敬天敬地敬眾生，透過修行了解真正嘅自己（呢個係指最內心最原本嘅自己，非肉眼可見）自然會明白呢個世界好大，修煉內在先係修行嘅意義。
