21/08/2025
《撕破面皮嘅勇氣：成年人嘅尊重，靠互有底線》
你驚衝突，人哋就專恰你。
上個禮拜我去咗個分享會，有位高層分享話，以前佢喺公司好勤力，從不拒絕OT，點知上司唔單止冇多謝，仲將最難搞嘅項目全部塞俾佢，理由係：反正你都唔識say no。
直到有一次佢忍唔住爆咗出嚟，直接講「我唔接」，上司先至收斂，佢亦終於有空間發揮。
成年人嘅世界，忍讓最易被辜負。
你越係顧全大局、遷就包容，就越冇人當你係一回事。你唔識維護自己，人哋就代你決定你值幾多錢。
📍衝突能力先係真正嘅實力
心理學上有個「登門檻效應」（得寸進尺）
當一個人習慣咗你嘅退讓，就會不斷試探你嘅底線；你退一步，佢就進一步；你退一丈，佢亦覺得理所當然。
但係當你有一日，開始夠膽鬧交、衝突、強硬、甚至唔客氣，佢反而會尊重你。
因為佢從你嘅表達入面，睇到你嘅情緒同需求，知道你唔係好惹嘅人。
我初初出嚟社會做嘢嗰陣，都係盡量避開衝突，驚小事變大事，而大事自己搞唔掂，於是就養成「小事唔出聲，大事忍一忍」嘅習慣。
直到有一日，公司嚟咗個新人，我心諗就算論資排輩，我都算有啲輩份，點都輪到佢忍啦啩？點知新同事都將啲雜嘢推俾我做，仲一臉驚訝咁反問我：你唔係負責呢啲咩？
發現未？當我哋抱住「冇所謂」、「我都得」、「蝕底當行運」嘅態度做人處事，唔係喺度維繫關係，而係喺度話俾人知：我哋嘅需求係可以被睇低嘅。
📝你發出要俾人尊重嘅訊號，人哋先唔敢睇小你。
成日話00後整頓職場，聽過呢個故事：Sam有次發燒請假，上司喺WhatsApp group度暗諷佢：而家啲後生真係矜貴。Sam直接將張醫生證明發上group，話：老闆如果你覺得燒到39度都唔算病，聽日我返公司咳俾你睇。從此，成間公司冇人夠膽惹佢，仲覺得佢好有型有格。
成人世界，冇邊個可以完全理解邊個。撕破面皮，唔係為咗破壞關係，而係為咗保護自己。
喺咁多年嘅職場困局諮詢入面，我發現90%嘅打工仔承認自己會刻意避開衝突，但同時有80%嘅人，非常後悔冇及時表達自己嘅立場。
📍真正叻嘅人都識得有技巧咁得罪人
活得通透嘅人，從來唔係冇脾氣，而係識得將脾氣用喺啱嘅地方。
1⃣️第一次俾人冒犯就表明態度
有時，就算係好小嘅事，都要企硬。
因為所有人一開始都係試探緊，試探你會唔會認真、你嘅底線喺邊。呢個時候你黑面，人哋會心甘情願道歉。
一旦你忍咗，到你下次有情緒，人哋就會話係你嘅問題，因為你第一次俾咗佢哋「好面色」。人性就係咁。
對於唔尊重你嘅人，千祈唔好忍，要講策略。智取、硬碰、疏遠都係策略。打得過就出擊，唔好怕得罪人 —— 你根本得罪唔起嘅人，你根本冇機會認識；你識得嘅人，就係你得罪得起嘅人。
2⃣️對自己嘅唔高興負責
如果你覺得俾人冒犯咗，咁你就係俾人冒犯咗。唔係你太敏感、玻璃心、諗多咗。感受係真實嘅。先肯定自己嘅內在感受，然後睇吓發生咗咩事，再講咩平和同共情。
3⃣️越驚衝突，越要主動製造小衝突
職場上，真正嘅實力，在於夠膽製造衝突，同有能力收拾殘局。
好多人潛意識覺得，衝突就等於「關係破裂、形象受損」。但實際上，衝突唔係關係嘅終點，而係檢驗關係嘅關鍵所在。
真正嘅朋友，唔會因為一場衝突就離開你，反而會因為你展現出真實嘅一面而更加尊重你。
就好似我嘅學員，都成日會針對我嘅觀點，堅定咁講出自己嘅立場，表達不滿或者質疑。人越夠膽開口，越能夠喺關係中感受到平等同分寸。
📍好嘅狀態都帶住鋒芒
世上嘅尊重，都係靠實力贏返嚟嘅。當你圍繞自己嘅目標一步一步咁行，你會發現一啲人同事根本無關痛癢。
最重要嘅係，你會感受到自主性帶嚟嘅愉悅。
呢份收穫先係人生路上嘅正面、反面feedback，能夠激勵你、滋養你。你會越來越自洽，越來越自信。
當然，咁樣嘅你，會俾人覺得「唔易掌控」而討厭你，亦會有人羨慕你可以我行我素。你會因為高價值而得到敬畏 —— 但呢啲先至係返工應有嘅姿態。
人喺職場，就係要有啲自己嘅性格同特色。唔係為咗壓住邊個，而係要話俾個世界知：你有底線、有原則、有還擊嘅能力。
成年人嘅尊重，係靠互相有底線、唔越界。
圖片：韓國插畫師studio_ke.y
