問問Dr Friend - 長頸鹿醫生

14/04/2026

娛樂升級時事台

本來諗住唔講唔講， 都講兩句

就outcome 個觀感，係好震驚同失望嘅。

不過思前想後 ,睇返佢呢十幾廿年做過嘅嘢，呢個動作真係好唔make sense。

為搵人仔嘅話， 要跪，晨早喺十年前2017畀人封殺就應該即刻跪啦。
錢佢而家又有大把， 不知幾多廣告商鍾意搵佢
為自己利益完全冇必要， 仲要揀個咁差嘅時間先嚟跪， 佢咁醒真係冇乜可能。

同埋都叫近距離接觸過佢好幾次， 雙魚嘅我不嬲啲感覺都幾準㗎。佢對其他人同事好真誠，要數到假有排未輪到佢。

廿年辛苦 build up嘅形象佢實知咁做會一舖清袋，要扮都唔駛扮咁耐啦。為乜？

除咗非自願，我都諗唔到有其他可能性🥲

當然揣測有好多。 好likely永遠都唔會知道 個原因

只可說, 批評同踩人好易， 不過可能個個都有自身嘅難處 . 我贊成睇嘢幾時都要諗深入啲， 諗遠啲，諗大啲個picture先睇到個事件嘅全貌。
永遠唔好淨係睇表面睇個title就算

大家唯有好好照顧自己向前行 ～ 祝位位平安


#都打晒暗號啦下話有咩可能
#留意到個計劃係邊個財團主導嗎
#係英皇呀
#成件事都好鬼

15/03/2026

波波日記 （三）
「呀爸爸！講咗幾多次呀我！」 有日如常帶波波去接長太收工。 長太大發雷霆。
「？咩事」
「 bb仔出街要著襪呀！ 唔冚住隻腳會冷親呀😤😤」
「吓？ 咪著咗囉. 明明著咗對熊仔襪先出街㗎」
「 你盲嘅咩？ 邊度有襪呀？」
我再望下波波，真係冇著襪喎。
唉
我真係老了
繼上次放咗個銀包喺車頂之後 我已經相信冇乜嘢唔可以再發生喺長爸爸身上😮‍💨只怪自己記性太差了
。
。
。
不過奇就奇怪在

我發覺我同長太每次講緊冇著襪鬧交嘅話題嗰陣時， 波波都永遠好留心做其他嘢。望下風景呀，dup低頭玩玩具呀. 🤔我硬係覺得佢有心迴避我同長太嘅眼神。
有次仲畀我𥄫到佢拎轉面睇風景嘅時候。。。嘴角喺度偷笑😙
。
。
。
我同長太對望🤨

係你喇！！！！

真係畀佢笑死 佢有鋪掹嘢癮
乜都掹得一餐
最叻就係襯人哋唔知偷偷地掹走人哋啲飾物
掹完仲要慌死你唔知咁，好得戚咁樣拎住物件fing fing fing😂😂😂

一唔係就收埋啲戰利品😑 搞到爸爸成日畀人屈

爸爸唯有期望你乖乖，大個咗唔好週街見到啲女仔著住件衫又走去掹咗人哋件衫fing fing fing 就好了🙏🙏🤣🤣🤣

#波波日記
#波仔真係好好笑
#我可以輕易搵到幾廿條佢掹襪嘅片😂

15/03/2026

急症室奇趣鹿 （一百一十八） - mankind vs AI?

最近幾個星期，接連睇咗幾個症都係咁。。。

「有咩唔舒服呀？」

🧒「我條頸呢，呢個位痛。另外上次星兩星期流過一次鼻血。我唔知關唔關事。不過。。。」

「不過？」

🧒「不過我問過人。。。話驚似鼻咽癌所以睇睇醫生。。。」

😱「問邊個？」

「AI.我同佢好friend㗎 成日搵佢傾計嘅。比錢嗰個version嚟㗎」

😑

通常講唔夠幾句，問下問下就會出到呢啲嘢

5年10年前，就“我上網search”

而家順應潮流，就變咗“問AI”

其實咪即係一樣😆不過好似聽落“勁啲” 。

說到尾，只不過方便咗,個database大咗咁解。

同埋你問AI, 仲簡單過自己上網search,佢幫你search埋咁囉～

方便就一定方便喇。

但係你話係咪真係準確偵測到你嘅醫學問題呢？

就真係有待商榷

問AI自身嘅健康問題, 其實有一定嘅準繩度嘅。

佢對於分析一啲事實性嘅問題，或者係病徵組合嘅分析係幾準的。
或者對於影像分祈，即係睇片嘅能力，係好強的。

不過again, 我哋醫學上嘅嘢始終係要睇個病人。 而唔係睇住一堆data數字 好似考試咁去寫個答案出嚟。

AI 始終係缺少咗 “individual” 嘅元素。

呢一堆病徵套用喺 “呢一個病人”身上會唔會有唔同呢？

又或者同一堆病徵，喺一個食煙嘅病人同唔食煙嘅病人分別有幾大呢？

又或者某個病人個家族有啲特別嘅遺傳病歷，咁個結果又會唔會唔同呢？

AI 幾乎暫時唔會問得咁深入。

病人亦都未必知道要畀幾多資料先為之足夠。

同埋AI 學習嘅base係嚟自大數據, 即係都係放喺網路上access得到嘅資訊
係咪真係百分百可靠呢?

早排睇到單有趣嘅新聞

BBC一個記者 用咗20分鐘時間寫咗篇文放上網,就成功欺騙咗AI

佢寫咗篇文章， 似層層咁講緊話有個“全球科技記者熱狗大食王” 嘅排名榜。
但其實呢個排行榜係假嘅。 佢搵埋幾個行家記者一齊玩， 用咗佢哋個真名放咗落個排行榜度 。寫咗個假嘅比賽，放咗啲假嘅數據入個 排行榜道話自己係全球食熱狗最勁嘅。

24小時之後佢再問返AI全球科技記者食熱狗邊個最大食， 跟住AI就引用咗佢呢篇假嘅“新聞”講咗出嚟 。
佢問咗幾個主流嘅AI,包括chat gpt ,Google AI ,gemini, 都畀佢欺騙咗, 好肯定咁話畀呢個記者聽 佢就係全球熱狗大食王number one😂

當然都有AI冇中招,不過係小數.

由一個簡單嘅實驗可以見到，AI 未必會識分事實嘅真假。

當然無雙大雅嘅小事就冇問題。

但係若果喺醫學嘅範都係咁就好大鑊。

當然，AI嘅學習方式係傾向用啲權威性，多人引用嘅研究文章嚟作準。

咁喺醫學嘅範疇上暫時應該守得住的。

因為網路上有海量高質素嘅正式醫學研究去support。

但係難保有有心人，因為種種嘅原因，放啲假醫學資料上網溝淡咗個data pool.

而萬一有AI學壞手勢開咗個頭 , 咁結果可想言之。

去到呢度，就更加顯得醫護人員人手把關嘅重要。

因為專業嘅醫護人員就會過濾到，究竟邊啲資訊係有根據， 邊啲資訊係noise

所以暫時睇要AI取代 醫護人員, 路途應該都仲好遙遠

但係作為一個助手, 叫AI 睇CT X光, 跟住醫生再人手double check 個report , 又或者叫AI robot 做啲好精細嘅手術，就會非常有用。

依家科技發展嘅速度真係好快, 話唔定過幾年又會有急劇變化～ let’s see

#急症室奇趣鹿 #長頸鹿醫生

10/03/2026

爸爸的煩惱

有日趕時間送波波去nursery 跟住返工

好趕好趕

左手抱住波波
右手拎住小書包
pat pat袋住電話銀包車匙

波波又掙扎 pat pat電話就跌

拿拿臨 求其放低銀包電話
。
打開前後車門
。
右手掉低書包
。
雙手抱返放低波波
。
整好car seat
。
冚返後車門
。
閂返副駕車門
。
入返駕駛座
。
開車走人

趕趕趕趕趕

跟住去到nursery門口
咦？點解冇咗電話銀包嘅

唔通喺屋企冇拎到？

但係又記得好似拎咗

唔見是但一樣都簡單啲

唔見曬兩樣真係好大鑊

打返自己電話又通㗎喎
但係問過家人喺屋企又冇聽到電話響

跟住諗諗下
。
。
。
頭先揸揸下車。。。。。。

好似聽到車頂有啲噹噹聲😱😱😱

撞
。
鬼
。
囉

即係大家想像到嘅卡通片情節

有個可愛嘅電話先生同銀包小姐
一路喺車頂遊車河

之後few一聲~~~ 噹。噹。。噹。。 跟住就大車輪形式轆咗喺街😅

自從做咗爸爸之後。。。。。。真係人都懵啲，記性又差啲， 更年期咁款😂😂😂

所以若果早排你見到有人喺條高速公路嘅路邊位行嚟行去

你放心
佢唔係癲嘅 （雖然個行徑好似） 咁就即係你見到我喇🤣

我屋企去nursery 差唔多20公里
你估我喺邊度搵到個銀包同電話？

電話 ： 2km 外嘅高速公路入口

銀包 ： 如圖示。 唔係喺伊朗搵到。
係喺5km外嘅高速公路 快線

我覺得好幾間公司要搵我做代言人囉😂

BMW : 行車穩定性一流 . 我喺停車場轉90度彎屋苑上下過壆 dun咗幾廿次。 行車穩定舒適。 物理學上喺車上面的物件都穩如泰山

Samsung fold 地獄級撞擊實測 : 試後睇返車後cam（ 長太英明提議睇，真係睇到 . 我已經心情低落到冇諗到呢個線索。
當然佢嘅英明好大程度係因為個銀包係佢親手做畀我嘅。 為咗個銀包嘅性命同我嘅性命著想，佢點都要搵返條屍骸😆😆)

電話先從車頂轆到車後面玻璃 ，80km/hr跌落地下, 再打中後車嘅頭泵把 ，跟住炒起反開咗變samsung unfold 碌咗幾個圈去到路邊著地。

登登

外mon係仲可以著到正常運作 。
上到網打到電話叉到電 。gps 藍牙3.0一應俱全
係個內mon熄咗啫。都冇爆到添

簡直係勁

手做銀包嘅皮革都黏力一流。
喺個車頂咁耐啜實咗去到老遠先跌落街

唔搵我做代言仲可以搵邊個😌

天呀～～～～～ 我嘅大懵幾時先回復正常

PS
我極端高度提議大家要諗下後備方案.
因為兩樣同時唔見曬真係好大鑊.
例如銀行嘅app 想reg返,要身份證認證.一唔係就要電話認證. 但係兩樣都冇曬就極端麻煩

真係非常好彩我個舊電話仲開得返，先無咁多煩惱

#急症室奇趣鹿 #長頸鹿醫生
#相中銀包的狀態係我喺高速公路執返嚟嘅樣完全冇郁過
#入面本來放滿曬卡飛到一張不剩全部車到爛曬

27/01/2026

醫療資訊台

去印度旅行者要留意了

印度有尼帕病毒（nipah virus)集體感染嘅個案。

尼帕病毒 係一隻相對 新發現 嘅病毒。 主要嘅宿主係蝙蝠類，尤其係果蝠。（ 其他動物也可以受影響，包括豬，馬，羊，貓狗等）

患者可以透過 接觸受感染動物嘅飛沫/分泌物 ,或食咗受感染動物食過的水果感染， 亦可透過人同人之間傳播。 印度馬來西亞比較興嘅 生椰棗源汁 （date palm juice) 亦係源凶， 有患者飲用後受感染。

佢係一種相對罕有嘅傳染病，但係死亡率極高 （50-75% ， 即中咗招有一半以上機會會死）。
生還者亦有機會有後遺症例如抽筋 。 （因會感染腦部）

若果會到相關疫區 ，要小心留意！

印度東部的西孟加拉邦近期出現尼帕病毒疫情，至今5人確診，其中一人危殆，近百人被要求隔離。 印度傳媒引述衛生官員說，西孟加拉邦首府加爾各答附近一間私立醫院的兩名醫護人員，是最早確診的患者，他們極可能是被一....

17/01/2026

急症室奇趣鹿 （一百一十七） / 波波日記 （special） - 有個做SCBU的太太

又係呢個 franc franc 私家 drip stand. 上次長太佗住波波嘅時候用過。
我估唔到佢會再次出場，而且仲要咁快又用返😓

波波病倒了。

早兩日仲搞搞笑咁食菜出po扮兔仔。 十二個鐘頭後就斷崖式跌watt.

忽然間一發高燒，轉個頭就成口爛晒

原來係手足口病 （hand foot mouth disease）.
手足口病有唔同形態，full borne 嘅手足口病，就手，腳，口都會出晒水泡。有啲就淨係喺口/喉嚨入面有 （ herpangina ）, 有唔同譯名。
我自己就比較鍾意叫佢 “類手足口”，。 類似手足口呀，同病人解釋易明呀。

手足口病細路仔之間好常見，係高度傳染嘅傳染病。最麻煩係口腔入面嘅潰瘍，會令到小朋友唔肯食嘢。
試想像我哋生一粒飛滋都痛成個星期。
手足口病講緊啲痱滋係喺個喉嚨深處，係一堆堆咁生。所以每次吞口水都好痛。

有啲細路仔飲第一啖奶痛完之後，就唔再敢飲奶食嘢。。。

波波都唔例外。佢好肚餓，一見到奶樽就去拎。但係一啖都飲唔到，一掂就大喊🥲
連續幾餐都係咁，嚇到我哋呢。。。 整天飲少咗5，600ml奶,絕食咁樣。
加上手足口病通常係由於腸病毒入侵引致，可以有痾嘔，就會易脫水。（腸病毒都好多款。最毒嗰隻腸病毒ev-71可以上埋腦攞命，不過罕見的）

一唔夠水份，高燒就控制唔到。跟著燒得越高越耐就流失更多水份，惡性循環。

漏屋兼逢連夜雨。。。 見波波跌watt嘅速度同個高燒怪怪哋，心血來潮做下快測穩陣啲確保無其他問題。
點知一做
中埋甲型流感。

Double infection, 唔怪得。 （ 以前嘅年代，我哋通常講緊one man one disease。其實唔太常見同一時間有幾個細菌病毒入侵身體。 但係唔知點解 近十年嚟都成日見到。可能因為啲檢測勁咗都唔奇嘅。。。世界變）

有埋double / triple problem 就唔係講笑，可以好大獲😓

兩隻都幾毒嘅病毒一齊嚟，仲要唔食嘢燒到成40度，見到個樣真係有啲驚驚哋。

長太話： 不如趁啲血管仲脹，快快趣隊條drip頂一頂先啦

我正想討論下邊個打嘅時候。。。
二話不說
波波都未嚟得切嗌，隻手掌就癡晒嘢喇🥹
😅我都醒唔起長太曾幾何時係喺 SCBU ( special care baby unit)度做過一排。。。當堂無咩事我7返廳訓先 🙇‍♂️

多謝長太

波波真係幾tough. 第一日我未知佢中埋甲流嘅時候，應該都高燒咗成日。隻眼dup到得返三份一成日想訓個樣係有啲恐怖。
結果香港市民長生長太差唔多連續兩晚無訓，睇住個成晚訓唔到嘅波仔（？關節痛），終於捱過咗（香港市民中間當然仲要返工）。 見佢肯食返少少奶真係感動到😭。

波波就私家房ICU級服務，仲係咁研究手背嗰舊係咩嚟
真係比佢笑死🤣

呢兩三個月手足口病真係多，大家都要小心
細路仔若果忽然之間食量大幅下降，或者發高燒就快啲帶佢睇醫生吖～

#波波睇嚟身教想自己主持急症室奇趣鹿
#波波日記
#手足口病

#急症室奇趣鹿 #長頸鹿醫生

04/01/2026

波波日記 （二）

我家有個怪爸爸

佢有啲喜好好古怪 ，例如佢啲車

首先，佢部車穿窿的。

下雨天會入水，在我看來，好唔方便

但係爸爸好似又覺得無乜嘢，仲樂此不疲。
又威逼我坐佢呢架車。

搞到我要雙手按住頂帽帽唔好比風吹走，好麻煩。

此外，我見其他人的車車好靜

但係爸爸的車都唔係嘅

佢的車上面成日寫住有個V字。。。就好似我家裏的die神吸塵機一樣。。。又V8 又V10V12

我估可能係呢個原因,結果部車真的同我家的吸塵機一樣咁嘈

阻住我訓覺，好困擾

但again,爸爸又好似樂此不疲



大人的世界真的很難明哦

#波波日記

29/12/2025

波波日記 （一）

啲大人成日話生活簡單就開心。通通得個講字～

你睇下我

爸爸比咗飲奶嗰條紗巾我之嘛，我就可以玩足30分鐘

好忙㗎，又要睇下上面有咩顏色， 又要睇下有幾多條摺紋。

仲駛乜打機上網睇新聞比啲世俗嘢污染我心靈呢～

我見到爸爸有日曾經將佢個頭哄埋嚟，同我同一個方向望住條紗巾，睇下會唔會從此望到一個不一樣的世界。

結果佢望咗30秒就話頂唔順走咗去。

唉～而家啲凡夫俗子真係冇乜恆心。 都領略唔到乜嘢係簡單人生就是美。

仲唔知典解，第二日就見佢買咗48條紗巾放咗喺個櫃桶添。

人生本來就要咁簡單先開心 right ? 😙大家得閒學下我波波啦

#波波日記
#我家波波真係好好笑

29/12/2025

急症室奇趣鹿 （一百一十六） - heavy metal 只可聽

👩「😱中毒喇中毒喇中毒喇」
有日，有個家長帶咗個小朋友衝咗入嚟診症室。

「中咩毒？」

👩「水銀」

咁醒嘅？ 自己即刻診斷到水銀中毒？ 有趣
通常牽涉細路仔而又同水銀中毒有關嘅。。。得一樣嘢。。。

「打爛探熱針？」

👩「😭yes」

佢嘅故仔就有啲特別。

通常喺屋企打爛探熱針，都係即時發現同見得到。
有碎片有嘢散喺地度嘅話，通常清得快一般都唔會好大嘅問題。

咁點解佢會覺得中埋毒呢？🤔

👩「佢食咗落肚」

「食咗？？？」

👩「小朋友自己探熱嘅時候，跣手打爛咗技探熱針。最大問題係當時食緊嘢。。。」
「佢食緊碗粥，我行一行開拎啲嘢，返嚟就已經見到啲探熱針爛咗。跟住問個小朋友，佢話有啲銀色嘢跌咗入個碗度」

咁梗係即刻拎走碗嘢啦right?

👩「咁我問小朋友點做。。。。。。😭」

你估下小朋友咩反應？

👩「 佢好誠實咁話我聽，佢打爛咗嘢，有啲顏色嘢跌咗入個碗入面。但係佢驚屋企人鬧又好，驚嘥咗碗嘢食又好，佢自己拎隻羹𢳂走咗啲銀色嘢。。。」

「跟著就繼續食？」

👩「🤦‍♀️」

見到個細佬好無辜咁望住我哋兩個嘅對話， 真係慘。 其實佢好乖

咁就梗係盡幫啦～

即刻快快趣就話畀佢聽一句匪夷所思嘅金句先

「好彩佢食咗入肚咋」

👩「吓？？？」

原來真係有所不知
我都係讀完中毒科課程先知

原來水銀分好幾個狀態。 佢咁樣將液體嘅水銀金屬兜口兜面咁食落肚，呢啲水銀我哋叫 elemental mercury ingestion。相對嚟講其實毒性最少。 因為我哋條腸好難直接吸收液體金屬。

對人體比較毒啲嘅水銀，通常係一啲已經蒸發，氣化咗（vapourised）嘅水銀, 吸入肺部，我哋身體就會比較吸收得多。

再唔係嘅，就係食咗一啲受水銀污染嘅魚類 （organic mercury） ，又或者經皮膚直接吸收水銀離子 （例如女仔鍾意用嘅美白產品，有啲都會含水銀。以前都試過出過事）

水銀中毒可以引發好多問題，可以傷腎，影響神經系統，甚至可以致命。

當然，都要證實咗小朋友係唔係真係有食到水銀落肚先啦～ 唔話唔定好彩佢隻羹已經𢳂走曬呢

由於水銀係金屬， x光可以輕易睇到。 咁就拿拿淋走去做張x光先

點知x光返嚟真係見到有水點形金屬喺個肚入面。 好彩份量算好少

「 媽媽， x光返嚟。真係見到小朋友食咗少少水銀落肚（見留言附圖。網上圖片，並不是我的病人）。不過好彩份量少。 而且就咁食落去吸收反而係最少，相對比較安全。 所以冇乜特別治療要做。等佢過幾日屙返出嚟就可以了。一星期後返嚟照張X光睇下排走晒未就ok」

👩「 所以。。。即係走得？」

。
。
。
。
我話 ：「梗係唔係」
。
。
。
。
👩「咁又話冇治療要做冇藥食？」

。
。
。
。
「比錢。。。 visa 現金最新aliPay都得。走數就唔得」

👩「你玩嘢下話醫生😂」 你睇下媽媽家陣幾開心

今日又知多啲喇🙆🏻‍♂️

#急症室奇趣鹿
#長頸鹿醫生
#水銀中毒

30/11/2025

同醫療事故一樣。 swiss cheeze model 嘅印證 。 單一嘅mistake , 一般不足以造成嚴重嘅事故。 往往都係一連串嚴重嘅mistake同一時間發生，先會造成如此局面。一場大火，揭露咗好多引申嘅制度，系統同人為嘅問題。 要檢討同追究嘅 ，唔會係單一個人或者係單一個事件。 善後嘅路好漫長。香港人齊努力💪

27/11/2025

火災無情 ， 人間有愛

好感動 見到一度地方香港人有事， 五湖四海全香港市民都齊心出手幫助。 不停都有海量嘅好人好事發生， 嚟自唔同界別嘅朋友支援support。

亦都對喺現場救援嘅醫護人員工作人員 同埋 消防員 致意最高嘅respect

善後嘅工作亦預計到好漫長。

兩間大學醫學院都有組織起medical support team ， 以下係 CUHK 我地醫學院校友 circulate嘅資料。

HKU嗰邊嘅資料 個post有

有時間幫手嘅朋友都可以contact 有關人仕

💪全港齊心 守望相助


#大埔宏福苑火災支援

26/11/2025

新聞台

🥲🥲

身為半個大埔人， 睇到新聞個心真係唔安樂

同時間，真係唔好怪我， 我其實好憎人食煙。。。

似乎有唔少人見到或者影到， 有棚架工人喺棚架食煙。。。

人命嚟㗎

仲要撞啱呢幾日勁乾燥

好難唔令人將兩樣嘢link埋一齊

希望場火快啲救熄唔好再有人命傷亡。。。

🙏🙏天佑大埔