12/11/2025
完美主義的陷阱：讓你永遠覺得自己 「不夠好」 的內心鐵三角
係咪成日覺得，點努力都好似未夠？
交完份Assignment，做完個PRESENT， 唔係覺得鬆一口氣，而係不斷諗返邊度可以做得更好？
睇Social Media見到朋友又去旅行、又升職，即刻覺得自己比唔上人好失敗？
心裡面成日有把聲逼你做到更好，跟著轉個頭有另一把聲鬧你做得唔夠，仲話其他人都好過你。你以為鞭策自己做得好係必然，但係你有無想過，呢D其實係「完美主義」既特徵？
完美主義有個「鐵三角」：完美主義者 （the perfectionist)、批評者 (the critic) 、同審判官 (the judge):
完美主義者 (the perfectionist) : 訂立啲高到離地嘅標準 ; 而個標準制會無限升高，等你一直都達唔到
批評家 (the critic): 毫不留情地指出每一個瑕疵同錯誤，永遠都唔會見到你做得好既地方
審判官 (the judge): 將你同人比較，然後話你「永遠唔夠人好」
好多時候，佢哋三個合作無間，聯手形成一個強大嘅保護系統。
點解會咁？ 細個嘅時候，可能試過因為做得唔夠好而被責怪、嘲笑，忽視 ; 呢D經驗可能會令我地成日擔心假如唔自己完美，就唔值得被愛，其他人就會唔鍾意自己。
呢啲受傷嘅感受同內在嘅恐懼——例如被拒絕嘅痛苦、覺得自己好差嘅羞恥 、怕自己不值得愛 ——對於細個時嘅你，實在太過難受了。於是內心只好將呢D被傷痛「放逐」到內心深處，再用強大嘅「鐵三角」保護系統鎖住 ，儘量等你以後都唔再感受到呢D傷痛。
「鐵三角」嘅任務？
就係用「不斷追求、嚴厲批評、同人比較」呢個方法，嚟製造一層厚厚嘅保護罩。 佢哋單純地相信，只要做到「完美」，你就可以永遠避開失敗、拒絕同失望。
呢三位保護者雖然盡心盡力，但佢哋嘅方法往往太過rigid 欠靈活性，令你長期處於作戰狀態，難以放鬆。
好消息係，你唔需要一直活喺佢哋嘅保護模式入面。
你係可以攞返個主導權的。
當你開始學習覺察佢哋嘅存在，能夠認出邊把聲係「完美主義者」、邊把係「批評者」同「審判官」時，你已經行出咗最重要嘅一步去攞返個主導權。
你可以學習與佢哋共存，甚至溫柔咁同佢哋講：「我知道你哋想保護我，不過我哋可唔可以試吓放鬆少少？」
呢份覺察，就係放過自己嘅開始——學習接納「足夠好」嘅結果，明白有時「完成」比「完美」更重要，畀自己一個空間去呼吸、去成長。
* 想更了解自己的完美主義特質嗎？或想透過「完美主義量表」來更認識探索自己？敬請期待下一篇文章！
#內心家庭系統 #完美主義 #自我關懷 #心理健康 #內在批評者
