20/02/2026
رجعت للروب الأبيض بعد ما تركته قبل 10 سنين 😊
ما تخيلت انه بعد 22 سنه رح يضل عندي شغف وقدرة على اكتشاف نفسي من جديد مهنياً!
قبل 3 أيام أنهيت عملي في أسترازينيكا وقررت أرجع بشكل كامل لمهنتي في العلاح الوظيفي. لما اتخذت خطوة في ترك وظيفتي في وزارة الصحة سنة 2023 قررت اني بدي امارس مهنتي فقط كمستقلة وأبحث عن أفق جديد للعمل كأجيرة، وهيك وصلت لعالم شركات الأدوية. ال3 سنوات اللي قضيتهن في هذا العالم أضافوا لي أدوات ومهارات كتير وحصلت على اثراء كبير في جانب آخر ومختلف من العالم الطبي. تابعت ممارسة مهنتي في العلاج الوظيفي بشكل جزئي كمستقلة، وما تخيلت أبداً اني ارجع للعمل في اطار طبي. لكن في صوت خافت رافقني في كل لقاء مع طبيب وكل نقاش اكلينيكي عن المرضى كان هذا الصوت يرتفع ويذكرني وين فعلاً شغفي موجود..!!
كل حياتي أصغيت لصوتي الداخلي، وفي الفترات اللي كنت اتجاهله كنت أعاني كتير! واحنا مش المفروض نعاني في عملنا اليومي، ال wellbeing / سلامتنا الذهنية والنفسية بتتعلق بشو منعمل كل يوم، بأني أصحى الصبح متحمسة اعمل اشي بحبه وبكسب منه رزقي.
الكون بسمعنا لما منسمع نداءنا الداخلي:
لما قررت انهي طريقي في شركة الادوية حصلت على وظيفتي الجديدة في المركز الطبي للمسنين Golden Care נאות התיכון في يافا تل ابيب كمسؤولة عن طاقم العلاج الوظيفي، وقررت انها تكون وظيفة جزئية عشان اتفرغ لعملي كمستقلة برواق اكثر بدون ضغط الوظيفة الملانه! واليوم في وظيفتي الجديدة بعمل أكثر اشي بحبه: ارشاد المعالجين والطواقم، وتأسيس اطار عمل في العلاج الوظيفي بعطي استجابة بمستوى مهني في اقسام اعادة التأهيل والشيخوخة 🙏
اخر مرة لبست الروب الأبيض كانت في مستشفى العائلة المقدسة قبل 10 سنين واليوم سعيدة جداً ارجعله!
ممتنة على كل الفرص المتاحة في الحياة لفتح افاق عمل جديدة، لتطوير نفسي مهنيا وشخصيا وممتنه اكثر على قدرتي اتخذ قرارات صحية لحياتي ولعملي 🫶
وحتى بعد 22 سنه، دايماً في وين نتقدم ونتحسن ونتغير 🙏
