31/05/2019
Khawpui nula !
A thlalak chu ka ena ka ennawn leh ţhin. Model nalh tak, hun leh tha senga lan nalh dan zawng zawng zir chhuak tawh ang maiin a hmuhnawm tlat.
A din danah sawisel tur a awm lo, a ţhut paha a k*t dah dan leh a hmui leh mit a lantir dan thlengin a fuh vel vek a ni ber. Hei zet chu belhchian a châkawm tlat.
Han biakin a mawi tawk leh zahawm fahran, ngainatawm deuh sia mi chhante chu, a zira zir chhuak ni mai awma mawiin zu thiam leh zel a. A taka hmuh chi!
A takah han hmuh takah chuan ni hnih khat chhûng na nâ nâ chuan beisei ang thlap ngeiin a nungin a che vel a. Hmuhnawm tak a ni, lungtiawii hi.
Tichuan, kei lah kohhran nena inhnimhnaih loh lai nunina min bual lai tak niin a bulah lemchan tih vel peih ve ta lo chu ka nihna ang angin ka awm mai a. Kawm ka nuam em em tho.
Hun a kal deuh takah chu nula chuan a inthup mawina hmaikâwr a han hlip ta a. Chu ta a nun zet chu a hmaa a nun nen khan inang lo tawh tak a ni! Mahse, mamawh nei mihring a nihzia a inlantir mai a ni zawk.
Chu nun taka chu khawvel hmaah a theihtawpa thup tuma beiin a nih loh ang tawpa lan tum mah se, a inchhûngkhur nun leh nitina a chenpuite lakah a inthup tak tak thei chuang lo.
Mahse, amah hrethiama kawng engkima ţawiawm thiam thei tur ai chuan a lemchanna khawvel hlutpuitu zawk chu mi hmuhah ropuina leh mi bik nihnaah ngaiin a mipa duh a zawng beidawng ţhin. Khawpui lanu tam zawkte chu lemchangtu mai an ni si a!
Lalremliana Pachuau
