06/08/2019
Copy paste
ਸਾਡੇ ਸ਼ਾਮ ਦੇ ਖਾਣੇ ਵਿੱਚ ਹਮੇਸ਼ਾ ਦਹੀਂ ਜਾਂ ਯੌਗਰਟ ਹੁੰਦਾ ਹੈ। ਕਈ ਵਾਰ ਤਿੰਨ ਟਾਈਮ ਸਵੇਰੇ ਦੁਪਹਿਰੇ ਤੇ ਸ਼ਾਮ ਨੂੰ ਵੀ ਅਸੀਂ ਦਹੀਂ ਖਾਂਦੇ ਹਾਂ। ਸਾਡੇ ਘਰ ਚਾਟੀ ਦੀ ਲੱਸੀ ਵੀ ਅਕਸਰ ਬਣਦੀ ਰਹਿੰਦੀ ਹੈ ਜਾਂ ਦਹੀੰ ਦੀ ਹੀ ਲੱਸੀ ਬਣਾ ਲੈਂਦੇ ਹਾਂ।
ਅਸਲ ਵਿੱਚ ਸਾਨੂੰ ਪਹਿਲੀ ਵਾਰ 1995 ਚ ਪਤਾ ਲੱਗਾ ਸੀ ਕਿ ਰਾਤ ਦੇ ਖਾਣੇ ਚ ਦਹੀਂ ਨਹੀਂ ਖਾਣਾ। ਇੱਥੋਂ ਹੀ ਅਸੀੰ ਇਸ ਗੱਲ ਨੂੰ ਅੰਨੇਵਾਹ ਮੰਨਣ ਦੀ ਬਜਾਏ ਇਸਦੀ ਤਹਿ ਤੱਕ ਜਾਣ ਦਾ ਫੈਸਲਾ ਕੀਤਾ। ਸਭ ਤੋਂ ਪਹਿਲਾਂ ਅਸੀਂ ਬਹੁਤ ਸਾਰੇ ਯੋਗ ਮਾਹਿਰਾਂ ਨੂੰ, ਹਕੀਮਾਂ, ਵੈਦਾਂ ਨੂੰ ਮਿਲਣਾ ਸ਼ੁਰੂ ਕੀਤਾ ਲੇਕਿਨ ਉਹਨਾਂ ਸਭ ਨੇ ਦਹੀਂ ਸ਼ਾਮ ਨੂੰ ਵਰਤਣ ਤੋਂ ਸਖਤ ਮਨਾਂ ਕੀਤਾ। ਫਿਰ ਅਸੀਂ ਨਿਉਟਰੀਸ਼ਨਿਸਟਸ ਅਤੇ ਪੇਟ ਦੇ ਮਾਹਿਰ ਡਾਕਟਰ ਸਾਹਿਬਾਨ ਨੂੰ ਮਿਲਣਾ ਸ਼ੁਰੂ ਕੀਤਾ। ਇਹਨਾਂ ਚੋਂ ਕੁੱਝ ਕੁ ਨੇ ਖਾਣ ਲਈ ਕਿਹਾ, ਕੁੱਝ ਨੇ ਮਨਾ ਕੀਤਾ ਅਤੇ ਕੁੱਝ ਨੇ ਕਿਹਾ ਕਿ ਜੇ ਖਾਣ ਨੂੰ ਦਿਲ ਕਰੇ ਜਾਂ ਫਿੱਟ ਬੈਠੇ ਤਾਂ ਖਾ ਸਕਦੇ ਹੋ ਨਹੀਂ ਤਾਂ ਰਹਿਣ ਦਿਉ।
ਲੇਕਿਨ ਅਸੀਂ ਇਸ ਗੱਲ ਨਾਲ ਵੀ ਸਹਿਮਤ ਨਹੀਂ ਸਾਂ। ਫਿਰ ਇਸ ਤੋਂ ਬਾਅਦ ਅਸੀਂ ਲਗਾਤਾਰ ਤਿੰਨ ਸਾਲ ਤੱਕ ਵੱਖ ਵੱਖ ਫੂਡ ਯੂਨੀਵਰਸਿਟੀਆਂ ਨਾਲ ਸੰਪਰਕ ਕਰਨਾ ਸ਼ੁਰੂ ਕੀਤਾ। ਇਹਨਾਂ ਵਿੱਚ ਲੌਸ ਏਂਜਲਸ ਦੀ ਯੂਨੀਵਰਸਿਟੀ ਆਫ ਕੈਲੀਫੋਰਨੀਆ, ਸੇਂਟ ਲੁਈਸ ਦੀ ਵਾਸ਼ਿੰਗਟਨ ਯੂਨੀਵਰਸਿਟੀ, ਯੂਨੀਵਰਸਿਟੀ ਆਫ ਜੌਰਜੀਆ, ਯੂਨੀਵਰਸਿਟੀ ਆਫ ਓਰੇਗੌਨ, ਯੂਨੀਵਰਸਿਟੀ ਆਫ ਨਿਊ ਹੈਂਪਸ਼ਾਇਰ ਆਦਿ ਦੇਸ਼ ਵਿਦੇਸ਼ ਦੀਆਂ ਮੰਨੀਆਂ ਪ੍ਰਮੰਨੀਆਂ ਯੂਨੀਵਰਸਿਟੀਜ਼ ਦੇ ਮਾਹਿਰ ਪ੍ਰੋਫੈਸਰ ਸਾਹਿਬਾਨ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਸਭ ਨੇ ਦਹੀਂ ਜਾਂ ਯੌਗਰਟ ਨੂੰ ਖਾਣੇ ਦਾ ਜ਼ਰੂਰੀ ਹਿੱਸਾ ਦੱਸਿਆ। ਅਤੇ ਕਿਸੇ ਵੀ ਵੇਲੇ ਖਾਣ ਤੋਂ ਮਨਾਂ ਨਹੀਂ ਕੀਤਾ ਤੇ ਨਾਂ ਹੀ ਕਿਸੇ ਖਾਸ ਟਾਈਮ ਖਾਣ ਨਾਲ ਨੁਕਸਾਨ ਜਾਂ ਫਾਇਦਾ ਦੱਸਿਆ।
ਇਸਦੇ ਨਾਲ ਅਸੀਂ ਅਲੱਗ ਅਲੱਗ ਦੇਸ਼ਾਂ ਦੇ ਖਾਣ ਪੀਣ ਬਾਰੇ ਅਧਿਐਨ ਕਰਨਾ ਸ਼ੁਰੂ ਕੀਤਾ। ਸਾਨੂੰ ਪਤਾ ਲੱਗਾ ਕਿ ਪੁਰਾਣੇ ਜ਼ਮਾਨੇ ਵਿੱਚ ਦਹੀਂ ਜਾਂ ਲੱਸੀ ਸ਼ਾਮ ਨੂੰ ਵੀ ਖਾਣੇ ਚ ਹੁੰਦੇ ਸੀ। ਅਸੀਂ ਹੈਰਾਨ ਸੀ ਕਿ ਬਹੁਤ ਕੌਮਾਂ ਦੁੱਧ, ਦਹੀਂ, ਯੌਗਰਟ, ਅਧਰਿੜਕ, ਲੱਸੀ, ਮੱਖਣ ਆਦਿ ਬਹੁਤ ਜ਼ਿਆਦਾ ਵਰਤਦੀਆਂ ਸੀ। ਇਸਤੋਂ ਵੱਧ ਸਾਨੂੰ ਉਦੋਂ ਹੈਰਾਨੀ ਹੋਈ ਕਿ ਜੋ ਜੋ ਕੌਮਾਂ ਪਸ਼ੂ ਖੁਦ ਪਾਲਦੀਆਂ ਸੀ ਤੇ ਖੁਦ ਹੀ ਖੇਤੀ ਕਰਦੀਆਂ ਸੀ, ਉਹ ਜ਼ਿਆਦਾ ਦੁੱਧ, ਦਹੀਂ, ਲੱਸੀ ਵਰਤਦੀਆਂ ਸੀ ਤੇ ਉਹ ਤੰਦਰੁਸਤ ਵੀ ਜ਼ਿਆਦਾ ਸੀ। ਲੇਕਿਨ ਜਦੋਂ ਉਹਨਾਂ ਕੌਮਾਂ ਨੇ ਹੀ ਦੁੱਧ, ਦਹੀਂ, ਲੱਸੀ ਵਰਤਣਾ ਘੱਟ ਕਰ ਦਿੱਤਾ ਤਾਂ ਉਹਨਾਂ ਕੌਮਾਂ ਚ ਵੀ ਰੋਗ ਵਧ ਗਏ।
ਇਸ ਤੋਂ ਬਾਅਦ ਅਸੀਂ ਭਾਰਤੀ ਖਾਣ ਪੀਣ ਦਾ ਅਧਿਐਨ ਸ਼ੁਰੂ ਕੀਤਾ। ਬਹੁਤੀਆਂ ਭਾਰਤੀ ਬਰਾਦਰੀਆਂ ਵੀ ਸ਼ਾਮ ਨੂੰ ਲੱਸੀ ਜਾਂ ਦਹੀਂ ਵਰਤਦੀਆਂ ਸੀ। ਲੇਕਿਨ ਜਿਹਨਾਂ ਕੋਲ ਦੁੱਧ ਹੁੰਦਾ ਸੀ ਉਹ ਰਾਤ ਨੂੰ ਸਾਰੇ ਹੀ ਦੁੱਧ ਜ਼ਰੂਰ ਪੀਂਦੇ ਸੀ। ਅਸਲ ਵਿੱਚ ਜੇ ਕੋਈ ਦੁੱਧ ਪੀਂਦਾ ਹੈ ਤਾਂ ਉਹ ਵੀ ਪੇਟ ਚ ਜਾਕੇ ਦਹੀੰ ਬਣਕੇ ਹੀ ਹਜ਼ਮ ਹੁੰਦਾ ਹੈ। ਬਲਕਿ ਦੁੱਧ ਨਾਲੋੰ ਦਹੀਂ ਜ਼ਿਆਦਾ ਹਾਜ਼ਮੇਦਾਰ ਹੁੰਦਾ ਹੈ ਅਤੇ ਜਲਦੀ ਹਜ਼ਮ ਹੁੰਦਾ ਹੈ। ਇਸ ਲਈ ਦੁੱਧ, ਦਹੀਂ, ਲੱਸੀ, ਯੌਗਰਟ, ਅਧਰਿੜਕ ਆਦਿ ਹਰ ਖਾਣੇ ਚ ਸ਼ਾਮਲ ਕੀਤਾ ਜਾ ਸਕਦਾ ਹੈ। ਲੇਕਿਨ ਜੇ ਕਿਸੇ ਨੂੰ ਅਲੱਰਜੀ ਹੋਵੇ ਤਾਂ ਉਸਨੂੰ ਪ੍ਰਹੇਜ਼ ਕਰਨਾ ਚਾਹੀਦਾ ਹੈ। ਜਾਂ ਕਿਸੇ ਰੋਗ ਕਾਰਨ ਪ੍ਰਹੇਜ਼ ਕਰਵਾਇਆ ਗਿਆ ਹੋਵੇ ਤਾਂ ਉਸ ਨੂੰ ਵੀ ਨਹੀਂ ਖਾਣਾ ਚਾਹੀਦਾ। ਉਂਜ ਹਰ ਇੱਕ ਨੂੰ ਜੇ ਹਰ ਖਾਣੇ ਨਾਲ ਥੋੜਾ ਦਹੀਂ ਦਿੱਤਾ ਜਾਵੇ ਤਾਂ ਖਾਣਾ ਜਲਦੀ ਹਜ਼ਮ ਹੁੰਦਾ ਹੈ।
2003 ਤੋਂ ਬਾਅਦ ਅਸੀਂ ਬਹੁਤ ਲੋਕਾਂ ਨੂੰ ਸ਼ਾਮ ਦੇ ਖਾਣੇ ਚ ਦਹੀੰ ਸ਼ਾਮਲ ਕਰਵਾ ਕੇ ਅਨੇਕ ਰੋਗਾਂ ਤੋਂ ਬਚਾਇਆ ਹੈ। ਅਸਲ ਵਿੱਚ ਦਹੀਂ, ਯੌਗਰਟ ਜਾਂ ਖੱਟੀ ਲੱਸੀ ਖਾਣੇ ਵਿਚਲੇ ਕਿਸੇ ਵੀ ਨੁਕਸਾਨਦਾਇਕ ਤੇਜ਼ ਰੰਗ, ਕੈਮੀਕਲ, ਮਿਰਚ, ਮਸਾਲੇ ਆਦਿ ਨੂੰ ਅੰਦਰੂਨੀ ਅੰਗਾਂ ਦਾ ਨੁਕਸਾਨ ਨਹੀਂ ਕਰਨ ਦਿੰਦੇ। ਇਹ ਹਾਜ਼ਮਾ ਬਣਾਉਣ ਚ ਵੀ ਮਦਦ ਕਰਦੇ ਹਨ ਸਗੋਂ ਸਰੀਰ ਵਾਸਤੇ ਸਸਤਾ ਤੇ ਵਧੀਆ detox food ਵੀ ਬਣ ਜਾਂਦੇ ਹਨ। ਖਾਸ ਕਰਕੇ ਜਿਗਰ, ਤਿਲੀ, ਪੈਂਕਰੀਆਜ਼, ਅੰਤੜੀਆਂ ਆਦਿ ਚੋਂ ਜ਼ਹਿਰੀਲੇ ਅੰਸ਼ ਕੱਢਣ ਚ ਮਦਦ ਵੀ ਕਰਦੇ ਹਨ। ਹੁਣ ਹਰ ਖਾਣੇ ਵਿੱਚ ਕਿਸੇ ਨਾ ਕਿਸੇ ਤਰ੍ਹਾਂ ਦੇ ਜ਼ਹਿਰ ਮਿਲੇ ਹੋਏ ਹਨ। ਕੁੱਝ ਦਵਾਈਆਂ ਵੀ ਐਸੀਆਂ ਹਨ ਜੋ ਹਾਜ਼ਮਾ ਵਿਗਾੜ ਰਹੀਆਂ ਹਨ। ਯਾਨਿ ਕਿ ਪੇਟ ਅੰਦਰ ਪਲਣ ਵਾਲੇ ਗੁੱਡ ਬੈਕਟੀਰੀਆ ਦਾ ਹੁਣ ਦੇ ਗਲਤ ਮਲਤ ਖਾਣ ਪੀਣ ਕਾਰਨ ਬਹੁਤ ਨੁਕਸਾਨ ਹੁੰਦਾ ਹੈ ਲੇਕਿਨ ਦਹੀਂ ਜਾਂ ਯੌਗਰਟ ਇਹਨਾਂ ਸੂਖਮ ਜੀਵਾਣੂੰਆਂ ਦੀ ਸੁਰੱਖਿਆ ਕਰਦੇ ਹਨ। ਇਸੇ ਤਰ੍ਹਾਂ ਯੌਗਰਟ ਵਿੱਚੋਂ ਮਿਲਣ ਵਾਲੇ probiotics ਖਾਸ ਕਰਕੇ Lactobacillus acidophilus, Lactobacillus casei ਅਤੇ Bifidus ਦਾ ਪਾਚਣ ਪ੍ਰਣਾਲੀ ਅਤੇ ਰੋਗਾਂ ਨਾਲ ਲੜਨ ਵਾਲੇ ਇਮਿਉਨ ਸਿਸਟਮ ਨੂੰ ਬਹੁਤ ਹੀ ਜ਼ਿਆਦਾ ਫਾਇਦਾ ਹੁੰਦਾ ਹੈ। ਜਿਹਨਾਂ ਲੋਕਾਂ ਨੂੰ ਦੁੱਧ ਜਾਂ ਹੋਰ ਡੇਅਰੀ ਪ੍ਰਡਕਟਸ ਘੱਟ ਫਿੱਟ ਬੈਠਦੇ ਉਹਨਾਂ ਨੂੰ ਯੌਗਰਟ ਅਸਾਨੀ ਨਾਲ ਹਜ਼ਮ ਹੋ ਜਾਂਦਾ ਹੈ। ਇਵੇਂ ਹੀ ਰੋਜ਼ਾਨਾ ਸ਼ਾਮ ਦੇ ਖਾਣੇ ਨਾਲ ਯੌਗਰਟ ਜਾਂ ਦਹੀਂ ਲੈਣ ਨਾਲ ਪਿਸ਼ਾਬ ਲੱਗਕੇ ਆਉਣਾ, ਮਿਹਦਾ ਜਲਣ, ਕਮਜ਼ੋਰ ਹਾਜ਼ਮਾ, ਪੇਟ ਗੈਸ, ਪੇਟ ਭਾਰੀਪਨ, ਹਿਚਕੀ, ਕਬਜ਼, ਪੇਟ ਕੀੜੇ, ਭੁੱਖ ਘੱਟ ਲੱਗਣੀ ਆਦਿ ਤਕਲੀਫਾਂ ਤੋਂ ਰਾਹਤ ਮਿਲਦੀ ਹੈ। ਬੱਚਿਆਂ, ਬਜ਼ੁਰਗਾਂ, ਗਰਭਵਤੀ ਔਰਤਾਂ, ਗਰਭ ਧਾਰਨ ਕਰਨਾ ਚਾਹੁੰਦੇ ਜੋੜਿਆਂ ਜਾਂ ਕਿਸੇ ਕਿਸਮ ਦੀ ਕਮਜ਼ੋਰੀ ਵਾਲਿਆਂ ਲਈ ਤਾਂ ਇਹ ਟੌਨਿਕ ਦਾ ਕੰਮ ਕਰਦਾ ਹੈ। ਉਂਜ ਕੁੱਝ ਕੁ ਲੋਕਾਂ ਨੂੰ ਦਹੀਂ ਫਿੱਟ ਨਹੀਂ ਬੈਠਦਾ ਉਹਨਾਂ ਨੂੰ ਵੀ ਬਹੁਤ ਥੋੜ੍ਹੀ ਮਾਤਰਾ ਵਿੱਚ ਸਵੇਰ ਵੇਲੇ ਦਹੀਂ ਲੈਣਾ ਚਾਹੀਦਾ ਹੈ ਤੇ ਜਿਵੇਂ ਜਿਵੇਂ ਫਿੱਟ ਬੈਠਣ ਲੱਗ ਜਾਏ ਉਵੇਂ ਉਵੇਂ ਵਧਾਉਂਦੇ ਜਾਣਾ ਚਾਹੀਦਾ ਹੈ। ਲੇਕਿਨ ਦਹੀਂ, ਯੌਗੱਰਟ ਜਾਂ ਲੱਸੀ ਚ ਨਮਕ, ਮਿਰਚ, ਮਿੱਠਾ ਆਦਿ ਕੁੱਝ ਵੀ ਨਾ ਪਾਉ। ਬਲਕਿ ਜਿਵੇਂ ਕੁਦਰਤ ਨੇ ਬਣਾਇਆ ਹੈ ਉਵੇਂ ਹੀ ਫਿੱਕਾ ਹੀ ਤੇ ਰੂਮ ਟੈਂਪਰੇਚਰ ਵਾਲਾ ਹੀ ਖਾਉ।
ਡਾ ਬਲਰਾਜ ਬੈਂਸ ਡਾ ਕਰਮਜੀਤ ਕੌਰ ਬੈਂਸ
ਨੈਚਰੋਪੈਥੀ ਕਲਿਨਿਕ ਰਾਮਾ ਕਲੋਨੀ ਆਰਾ ਰੋਡ ਮੋਗਾ
9463038229
