22/03/2025
=================================
বৰপেটা চিভিল হস্পিতালৰ শ্ৰদ্ধাৰ ফটিক
কম্পাউণ্ডাৰ _এজন বেকবেঞ্চাৰৰ স্মৃতিকথা
=================================
আজিৰ পৰা ষাঠি বছৰ মান আগৰ কথা। তেতিয়া মই তৃতীয়মান শ্ৰেণীত। বছৰেকীয়া পৰীক্ষা হৈ যোৱাৰ পিছত আমাৰ ঘৰৰ পিছ পিনে থকা ঘাহঁনিৰ পৰা পোহনীয়া গৰু কেইটাৰ কাৰণে কাচিখন লৈ ঘাহঁ কাটিব গৈছিলোঁ। মই বাওঁহতীয়া। কিছু সময় ধৰি ঘাঁহ কাটি থকাৰ পিছত অকস্মাতে কাচিখন ঘাহঁৰ পৰা পিছলি সোঁহাতৰ কেঞা আঙুলিটো ৰেপি দিলো নহয়। কোনোমতে অকণমান চালত লাগি থকা আঙুলিটো আকৌ ঠিক ঠাইত লগাই হাতেৰে টিপি ধৰি ঘৰলৈ দিলোঁ দৌৰ। ঘৰৰ পৰা কোনোবাই ৰিক্সা এখনেৰে মোক লৈ গ'ল চিভিল হস্পিতাললৈ। খৱৰ পোৱা মাত্ৰেই বৰপেটা বিদ্যাপীঠ উচ্চতৰ মাধ্যামিকৰ শিক্ষক ডাঙৰ ভিনিহিদেউ স্বৰ্গীয়া কৃষ্ণকান্ত দাসেও লগে লগে আহি পালে।
তেতিয়া বহুত ৰোগীৰ ড্ৰেচিং কৰাত ব্যস্ত সকলোৱে পৰিচিত ফটিক কম্পাউণ্ডাৰ । ডেকা বুঢ়া যাকে সোধক, চিভিল হস্পিতালৰ ড্ৰেচিংৰ ৰুমৰ এটাই পৰিছিত নাম "ফটিক কম্পাউণ্ডাৰ"।
দুজনমানৰ জৰুৰী ড্ৰেছিং কৰিব লগা আছিল সেয়ে অলপ ৰব লগা হ'ল। আঙুলিটো জোৰা লগাবলৈ চিলাই কৰিবৰ কাৰণে যিটো বেজি লৈ আহিলে দেখিয়ে মোৰ জীউ উৰি গ'ল। এনাষ্টেচিয়া আদি একো নিদিয়াকৈ চিলাই কৰোতে যেতিয়া চিয়ঁৰ বাখৰ আৰম্ভ কৰিলো, তেতিয়া মোকেই আকৌ ধমক দি ক'লে, " আৰো ঘাহঁ কাট্বা যাবি (আৰু যাবা ঘাহঁ কাটিবলৈ) যেন মই কিবা অপৰাধ কৰি আহিছোঁ । তেখেতৰ শাসনৰ সুৰতো মৰম থাকে আৰু নিষ্ঠাৰে সেৱা আগবঢ়াইছিল কাৰণেই সকলোৱে মানুহজনক খুব ভাল পাইছিল।
শ্ৰদ্ধাৰ ফটিক কম্পাউণ্ডাৰৰ ঘৰ আমবাৰি হাটীৰ আমাৰ মামাহঁতৰ একেবাৰে কাষতেই, গতিকে আগৰ পৰাই আমাক চিনি পায়। তেখেত এতিয়া এই পৃথিৱীত নাই যদিওঁ সুন্দৰ স্মৃতি অন্তৰত ৰৈ গৈছে
🙏🙏🙏
Babul Pathak
