Thriveni

09/06/2021

🙏🕉️

02/08/2020

*പിള്ളേരോണം.....*

തിരുവോണത്തിന്‌ മുമ്പായും ഒരോണമുണ്ട്‌. ഇപ്പോള്‍ അധികമാരുടെയും അറിവിലില്ലാത്ത എന്നാല്‍, പഴമക്കാരുടെ ഓര്‍മ്മകളിലെന്നും നിലനില്‍ക്കുന്ന ഒരോണം. അതാണ്‌ പിള്ളേരോണം. ഈ വർഷത്തെ പിള്ളേരോണം *(ആഗസ്റ്റ് 3 തിങ്കൾ കർക്കടകം 19 )* ചിങ്ങത്തിലെ തിരുവോണത്തിന്‌ 27 ദിവസം മുമ്പ്‌ കര്‍ക്കിടകത്തിലെ തിരുവോണ നാളിലാണ്‌ പിള്ളേരോണം കൊണ്ടാടിയിരുന്നത്‌. തിരുവോണത്തിന്റെ ഒരു കൊച്ചുപതിപ്പ്‌. എന്നാല്‍ അത്തപ്പൂക്കളമിടലും പുത്തനുടുപ്പുകളുമൊന്നുമില്ലാത്തൊരു ഓണാഘോഷം.

പക്ഷേ, ഇത്‌ ബാല്യകാലത്തിന്റെ അവകാശവും ഉത്സവവുമായിരുന്നു. സദ്യയ്‌ക്കു മാത്രം മാറ്റമില്ല. തൂശനിലയില്‍ പരിപ്പും പപ്പടവും ഉള്‍പ്പെടെ എല്ലാ വിഭവങ്ങളുമുള്ള ഗംഭീരസദ്യ. തോരാതെ പെയ്യുന്ന കര്‍ക്കിടക മഴയ്‌ക്കിടെയാണ്‌ പിള്ളേരോണം വരുന്നത്‌. കള്ളക്കര്‍ക്കിടകത്തിലെ തോരാമഴ മാറി പത്തുനാള്‍ വെയിലുണ്ടാവുമെന്നാണ്‌ പഴമക്കാര്‍പറയുന്നത്‌. ഈ പത്താം വെയിലിലാണ്‌ പിള്ളേരോണം എത്തുന്നത്‌.

മുമ്പൊക്കെ തിരുവോണം പോലെതന്നെ പിള്ളേരോണവും മലയാളികളുടെ ഒരു പ്രധാന ആഘോഷമായിരുന്നു. വലിയ തറവാടുകളിലും മറ്റും വമ്പന്‍ ആഘോഷങ്ങളായിരുന്നു പിള്ളാരോണത്തിനുണ്ടായിരുന്നത്‌. കുട്ടികള്‍ കൂടുതലുണ്ടെന്നതു തന്നെയാണ്‌ ഈ പിള്ളാരോണം ഗംഭീരമാകാൻ കാരണം. പിള്ളേരുകൂട്ടം ഇല്ലാതാവുമ്പോള്‍ പിന്നെന്ത്‌ പിള്ളേരോണം.

ഉള്ളതുപറഞ്ഞാല്‍ ഇന്നത്തെ കുട്ടികളുടെ ഒരു വലിയ നഷ്ടമാണ്‌ ഈ പിള്ളേരോണം. കളികളും ആര്‍പ്പുവിളികളും സദ്യയുണ്ണലുമായി വന്നുപോകുമായിരുന്ന പിള്ളേരോണം ഇന്നത്തെ കുട്ടികള്‍ക്ക്‌ എവിടെ മനസ്സിലാകാന്‍. അവര്‍ക്ക്‌ ഓണമെന്നതും ഏതെങ്കിലും ഹോട്ടലിലോ ഫ്ളാറ്റുകളുടെ നാലുചുവരുകള്‍ക്കുള്ളിലോ ഒതുങ്ങുന്ന, ഉണ്ണാന്‍ വിഭവങ്ങള്‍ കൂടുതലുള്ള ഒരുദിനം മാത്രം. കൂട്ടുകുടുംബ വ്യവസ്ഥിതി മാറി അണുകുടുംബങ്ങളായി. ഓരോ വീട്ടിലും ഒന്നോ രണ്ടോ കുട്ടികള്‍. അവർ മാത്രമായി എന്ത്‌ പിള്ളേരോണം ആഘോഷിക്കാന്‍?

അവരുടെ അച്ഛന്മാര്‍ക്കും അമ്മമാര്‍ക്കും പോലും പിള്ളേരോണമെന്നത്‌ ഒരു കേട്ടുകേള്‍വി മാത്രമായിരിക്കും. മുത്തച്ഛനോ മുത്തശ്ശിയോ ഉണ്ടെങ്കില്‍ ഭാഗ്യം. ഈ കേട്ടുകഥ അവര്‍ക്കും നേരിട്ട്‌ കേള്‍ക്കാം.

*പിള്ളേരോണ ആശംസകൾ...*

(പകർത്തിയത് : കടപ്പാട് )

02/08/2020

ആവണി അവിട്ടം
(3-8-2020 Monday)

ആവണി മാസത്തിലെ അവിട്ടം നാൾ. ഹിന്ദു ആചാര പ്രകാരം പ്രാധാന്യം അർഹിക്കുന്നു. ശ്രീകൃഷ്ണ ജയന്തിക്ക് തൊട്ടു മുന്പ് വരുന്ന പൗർണ്ണമി നാളാണ് ആവണി അവിട്ടം.മഹാരാഷ്ട്രയിൽ ഇത് നാരിയൽ പൂർണ്ണിമ എന്ന പേരിലാണ് ആഘോഷിക്കുക

തെക്കേ ഇന്ത്യയിലാണ് ആവണി അവിട്ടം എന്നപേരിൽ അഘോഷം നടക്കാറുള്ളത്. പ്രത്യേകിച്ച് ബ്രാഹ്മണർ ഇത് ആഘോഷിക്കുന്നു.
ആവണി അവിട്ടത്തിനൊരു രക്ഷാ സങ്കൽപം ഉള്ളതുകൊണ്ടാവാം ഇതേ ദിവസം ദേശ വ്യാപകമായി രക്ഷാ ബന്ധൻ ഉത്സവമായി ആഘോഷിക്കുന്നത്.

ബ്രാഹ്മണർ അന്ന് പൂണൂൽ മാറ്റി പുതിയ പൂണൂൽ ധരിക്കുകയും പൂർവ ഋഷിമാരെ സ്മരിച്ച് അർഘ്യം ചെയ്യുന്നു. ഉപാകർമ്മം എന്നാണ് ഈ ദിവസത്തെ ആചാരത്തിന് പേർ. ഈ ദിവസം വേദോച്ചാരണവും മന്ത്രോച്ചാരണവും നടത്തുന്നത് വളരെ ശുഭകരമായാണ് കണക്കാക്കുന്നത്.
ബ്രാഹ്മണ യുവാക്കൾ വേദ പഠനം തുടങ്ങുന്നതും ആദ്യമായി പൂണൂൽ ധരിക്കുന്നതും ഈ ദിവസമാണ്. പൂണൂൽ ധരിക്കുന്നതോടെ അയാളുടെ അകക്കണ്ണ് അല്ലെങ്കിൽ വിജ്ഞാനത്തിൻറെ കണ്ണ് തുറന്നു എന്നാണ് സങ്കൽപം.
അമൂല്യങ്ങളായ നാലുവേദങ്ങളും മുൻകാലത്ത് ഒന്നായിരുന്നു. അതിനെ നാലായി വിഭജിച്ചത് വ്യാസനാണ്. ഈക്കാരണത്താലാണ് വ്യാസമുനിക്ക് വേദവ്യാസൻ എന്നു പേരുസിദ്ധിച്ചത്. ബ്രഹ്മാവിൻറെ നിർദ്ദേശപ്രകാരമാണത്രേ വേദത്തെ നാലാക്കി പകുത്തത്. പിന്നീട് ഭൈലമാഹാമുനി ഋഗ്വേദത്തേയും, വൈശമ്പായനൻ യജുർവേദത്തിനും, സാമവേദത്തിന് ജൈമിനി മഹർഷിയേയും ശുമന്തുമുനി അഥർവവേദത്തിൻറെയും സംരക്ഷകരായി വേദവ്യാസൻ നിയമിച്ചു. ഈ മഹത്തായ ഋഷികളുടെ കഠിനപ്രയത്നത്താൽ പരിക്കൊന്നും കൂടാതെ തലമുറകൾകൈമാറി അതുപോലെതന്നെ നിലനിന്നുവരുന്നു.
വേദകാലഘട്ടത്തിൽ നിന്നാണ് ഉപനയനാദി കർമ്മങ്ങളെ പിപുലപ്പെടുത്തിയത് എന്നു വിശ്വസിച്ചുവരുന്നു. വേദം സായത്തമാകണമെങ്കിൽ അടിസ്ഥാന തത്ത്വം ഉപനയനം കഴിഞ്ഞ് സന്ധ്യാവന്ദനം ഗായത്രി മുതലായവയെല്ലാം പഠിച്ച് ഉപാസിക്കണം. തുടർന്നാണ് വേദ പണ്ഡിതന്മാരുടെ കീഴിൽ ഗരുകുല വിദ്യാഭ്യാസംചെയ്ത് വേദത്തെ കമ്പോടു കമ്പ് ചൊല്ലിപഠിക്കുന്നു. ഓരോ കുലത്തിനും ഇന്ന ഇന്ന വേദം എന്ന് മുൻകാലത്ത് തിരിച്ചിട്ടുണ്ട്.

ഗുരുമുഖത്തുനിന്ന് തന്നെ വേദം അഭ്യസിക്കണം. അതിനായി ഗുരുകുല രീതിയിൽ പഠിക്കുകയായിരുന്നു ആദ്യകാലങ്ങളിൽ. ചിലയിടത്ത് വേദ പാഠശാലയും നിലനിന്നു വരുന്നു. ഉച്ചാരണ ശുദ്ധി വരുന്നമുറയ്ക്ക് ഏഴ്, ഒൻപത്, പതിനൊന്ന് എന്നീ വയസ്സുകളിൽ ഉപനയനം നടത്തും. പൂണൂൽ പൊട്ടുമ്പോൾ മാറുമെങ്കിലും ഉപാകർമ്മം എന്ന ആവണി അവിട്ടത്തിന് പഴയ പൂണൂലുമാറ്റി പുതിയവ ധരിക്കുന്നു. വേദങ്ങളുടെ അടിസ്ഥാനത്തിൽ ഇതിന് ചില പ്രാദേശിക മാറ്റം നിലനിൽക്കുന്നുണ്ട്. ഉപാകർമ്മം സാധാരണ അമ്പലങ്ങളിലോ ജലാശയ സാന്നിദ്ധ്യമുള്ളിടത്തോ ആണ് ഇതെല്ലാം പതിവ്. മുഖ്യപുരോഹിതൻറെ നേതൃത്വത്തിൽ പ്രധാന വേദ ഭാഗങ്ങൾ ചൊല്ലി കർമ്മങ്ങൾക്ക് തുടക്കം കുറിക്കും.
പഴയ പൂണൂൽ മാറ്റി പുതിയവ ധരിക്കുമ്പോൾ പ്രത്യേക മൂഹൂർത്തത്തിലായിരിക്കും. തുടർന്ന് ഗായത്രി എല്ലാവരും ചേർന്ന് ഉരുവിടുന്നു. അതിനുശേഷമാണ് ബലിതർപ്പണചടങ്ങ്. സമസ്ത ലോകങ്ങളിലും നന്മപുലർന്നുകാണുവാൻവേണ്ടിയാണ് ഗായത്രീ ജപം. ഉപാകർമ്മത്തിനു പിറ്റേന്ന് ഉദയത്തിന് മുൻപായി ആയിരത്തെട്ട് ഗായത്രി ജപിക്കുക(സഹസ്രാവർത്തി) എന്നത് വളരെയേറെ പ്രാധാന്യ മർഹിക്കുന്നു. ലോകത്ത് സമാധാനം നിനിൽക്കുവാൻ ജപിക്കുന്ന ഗായത്രിക്ക് വളരെ വലിയ അർത്ഥ തലങ്ങൾ ഉണ്ട്.
പരുത്തിനൂൽ കൊണ്ടു നിർമ്മിക്കുന്ന പൂണൂൽ ബ്രഹ്മചാരികൾക്ക് മൂന്നിഴയുള്ള പൂണൂലും, വിഹാഹം കഴിഞ്ഞവർക്ക് മൂന്നിഴവീതമുള്ള രണ്ടു പൂണൂലും. അറുപതുവയസ്സുകഴിഞ്ഞ വർക്ക് ഇത്തരത്തിലെ മൂന്നു പൂണൂവും ധരിക്കണം. ഉപാകർമ്മാനന്തരം വീട്ടിലെത്തുന്നവരെ സുമംഗലികളായിട്ടുള്ള സ്ത്രീകൾ ആരതിയുഴിഞ്ഞ് വരവേൽക്കുന്നു.

ശ്രീ ഗുരുവായൂരപ്പൻ
ഓം നമോ ഭഗവതേ വാസുദേവായ
ഓം നമോ നാരായണായ.

21/09/2019

അസുരന്മാർ പാർവതിയുടെ മാനത്തിന് വില പറയുന്ന നേരത്ത് പാർവതി ശിവനോട് ചോദിക്കുന്നു,

"അങ്ങേയ്ക്ക് ഇത് കേൾക്കയിൽ ഒന്നും തോന്നുന്നില്ലേ? എന്തുകൊണ്ട് അവരോടു യൂദ്ധം ചെയ്യുന്നില്ല ?"

ശിവൻ " നിങ്ങൾ സ്ത്രീകൾക്ക് എന്തുകൊണ്ടാണ് എപ്പോഴും ഒരു പുരുഷനെ ആശ്രയിക്കേണ്ടി വരുന്നത് ? എന്തുകൊണ്ട് നിങ്ങൾക്ക് സ്വയം നിങ്ങളെ സംരക്ഷിക്കാൻ കഴിയുന്നില്ല ?

അന്നും തന്റെ ഉള്ളിൽ ഒളിഞ്ഞിരുന്ന കാളിയെ തിരിച്ചറിയാത്ത പാർവതി സങ്കടപ്പെടുകയും , ഒടുവിൽ അസുരന്മാർ യുദ്ധത്തിന് വരികയും,

"നാരി നീയാണോ എന്നോട് എതിർക്കാൻ വരുന്നത്?? നാരി എന്നാൽ പുരുഷന്റെ കിടക്കറയിലെ അലങ്കാരം മാത്രമാണ് എന്ന് പറയുകയും ചെയ്യുന്നു"

കോപം കൊണ്ട പാർവതിയിൽ നിന്നും അവളറിയാതെ അന്തർമുഖിയായ കാളി രൂപംകൊള്ളുകയും , അസുരന്മാരെയൊക്കെയും വധിച്ച് മുന്നേറുന്ന അവസരത്തിൽ, രക്താസുരനെ വധിച്ചാൽ ഓരോ തുള്ളി രക്തത്തിൽ നിന്നും ഓരോ രക്തതാസുരന് ഉടലെടുക്കും എന്നതിനാൽ കാളി രക്തം മുഴുവനും പാനം ചെയ്യുകയും , ഒടുവിൽ അവളുടെ യുക്തി പ്രവർത്തന രഹിതമാകയിൽ, സ്വന്തം സേനയെ പോലും വധിക്കാൻ തുടങ്ങവേ; ഒടുവിൽ കോപം ശമിപ്പിക്കാൻ ശിവൻ സ്വയം തറയിൽ ശയിച്ചു കൊടുക്കുകയും, ശിവന്റെ മാറിടത്തിൽ ആഞ്ഞു ചവിട്ടുന്ന കാളിയിൽ പത്നി ധർമ്മം ഉണരുകയും, പാർവതിയിലേക്ക് രൂപ ഭാവം സംഭവിക്കുകയും ചെയ്യുന്നു.

ഒടുവിൽ കുറ്റഭാരത്താൽ പാർവതി ശിവനോട് ചോദിക്കുന്നു

" എനിക്കായ് എന്തിനു അങ്ങ് ഭൂമിയിൽ ശയിച്ചു, എന്തിനു എന്നെ കൊണ്ട് ഇത്രയും വല്യ പാപം ചെയ്യിച്ചൂ?

ശിവൻ ഇപ്രകാരം ഉത്തരം നൽകി ;

" ലോകത്തിന് മുന്നിൽ നീ ശിവനെ പാദത്താൽ പ്രഹരിച്ചവൾ ആകാം,

പക്ഷെ എനിക്ക് നീ സ്ത്രീകൾക്ക് പുതിയ മാനം നൽകിയവളാണ്,

പുരുഷനില്ലാതെയും മാനത്തിനായി പോരാടാമെന്നു തെളിയിച്ചവളാണ്,

നിന്നിൽ ഞാൻ അഭിമാനിക്കുന്നു !

ആയതുകൊണ്ട് തന്നെ മറ്റു ദൈവീക സങ്കല്പങ്ങളെക്കാൾ ഏറ്റവും മഹത്വമുള്ള സങ്കല്പം...
ശിവോഹം....
ഭാരത സ്ത്രീ ഒരേ സമയം ശക്തിസ്വരൂപിണി ആയും മാതൃഭാവത്തിലും ഭാരതീയ സംസ്കാരത്തിൽ ആരാധിക്കപ്പെടുന്ന സംസ്കാരമാണിത് പറഞ്ഞ് വന്നത് ആധുനിക ഫെമിനിസം എന്ന പദം ഭാരതീയ സംസ്കാരത്തിൽ നിന്നും ഇനിയും ഒരുപാട് പഠിക്കേണ്ടി ഇരിക്കുന്നു. Great words from a great person I respectfully adding this to my time line....

18/09/2019

15/05/2019

കൃഷ്ണവിഗ്രഹം

എല്ലാ വീടുകളിലും കാണുന്ന ഒന്നാണ് കൃഷ്ണവിഗ്രഹം. വാത്സല്യത്തോടെയുള്ള ഒരു തരം ഭക്തിഭാവമാണ് കണ്ണന്‍ എന്ന വിളിപ്പേരില്‍ അറിയപ്പെടുന്ന കൃഷ്ണഭഗവാനോട് പൊതുവെ എല്ലാവര്‍ക്കുമുള്ളത്. കൃഷ്ണന്റെ വിഗ്രഹം വീട്ടില്‍ വയ്ക്കുമ്പോള്‍ ശ്രദ്ധിക്കേണ്ട ചില കാര്യങ്ങളുണ്ട്. ഇക്കാര്യങ്ങളെല്ലാം കൃത്യമായി പാലിച്ചായിരിക്കണം അത് ചെയ്യേണ്ടത്. എങ്കില്‍ മാത്രമേ കൃഷ്ണപ്രീതി നേടാന്‍ സാധിക്കൂ എന്നാണ് ശാസ്ത്രം പറയുന്നത്.

കൃഷ്ണപ്രതിമയുടെ കൂടെ ഓടക്കുഴല്‍ വയ്ക്കുന്നത് വീട്ടുകാരെ ഒന്നിപ്പിയ്ക്കാന്‍ നല്ലതാണ്. എന്തെന്നാല്‍ ഓടക്കുഴല്‍ വായിച്ചായിരുന്നു കൃഷ്ണന്‍ ഗോക്കളേയും ബന്ധുമിത്രാദികളേയും ആകര്‍ഷിച്ചു തനിയ്ക്കടുത്തെത്തിച്ചിരുന്നതെന്നാണ് ചരിത്രം. പശുവുമൊത്തുള്ള കൃഷ്ണവിഗ്രഹമോ വിഗ്രഹത്തിനു സമീപത്തായി പശുവിന്റെ രൂപമോ വയ്ക്കുന്നത് നല്ലതാണ്. പശു 33 കോടി ദേവതകളെ പ്രതിനിധാനം ചെയ്യുന്നുവെന്നു പറയാം.

കൃഷ്ണന്റെ അലങ്കാരമായാണ് മയില്‍പ്പീലി കണക്കാക്കുന്നത്. അതിനാല്‍ മയില്‍പ്പീലി കൃഷ്ണവിഗ്രഹത്തോടൊപ്പം വയ്ക്കുന്നതു സന്തോഷം പ്രധാനം ചെയ്യുമെന്നാണ് വിശ്വാസം. കൃഷ്ണന് ഏറെ പ്രിയങ്കരമായ ഒന്നാണ് കല്‍ക്കണ്ടം. അതുകൊണ്ടുതന്നെ കല്‍ക്കണ്ടം ഒരു ടിന്നിലടച്ച് കൃഷ്ണപ്രതിമയ്ക്കു സമീപം വയ്ക്കുന്നതും ഉത്തമമാണ്. കൃഷ്ണനാമം അടയാളപ്പെടുത്തിയ വൈജയന്തി മാല വിഗ്രഹത്തില്‍ ചാര്‍ത്തുന്നതും ഏറെ നല്ലതാണ്.

വെണ്ണക്കണ്ണന്റെ വിഗ്രഹം വീട്ടില്‍ വയ്ക്കുന്നത് സന്താനഭാഗ്യം കൊണ്ടുവരുമെന്നാണ് വിശ്വാസം. ലഡു തിന്നുന്ന കണ്ണനായാലും മതിയെന്നും ശാസ്ത്രം പറയുന്നു. തറയിലോ കിടക്കയിലോ കട്ടിലിലോ മേശപ്പുറത്തോ ഒന്നും കൃഷ്ണവിഗ്രഹം വയ്ക്കരുത്. ലോഹം കൊണ്ടുളള വിഗ്രഹമാണെങ്കില്‍ ഇത് പോളിഷ് ചെയ്യണം. ഹരേ രാമ ഹരേ കൃഷ്ണ മന്ത്രങ്ങള്‍ ദിവസവും ഉരുവിടുന്നതും കൃഷ്ണനെ പ്രസാദിപ്പിയ്ക്കാന്‍ ഏറെ നല്ലതാണ്

15/05/2019

നരസിംഹ മൂർത്തി

മഹാവിഷ്ണുവിന്റെ ദശാവതാരങ്ങളിൽ ഏറ്റവും പ്രധാനമാണ് നരസിംഹാവതാരം. പേരുപോലെതന്നെ സിംഹത്തിന്റെ മുഖവും മനുഷ്യന്റെ ഉടലുമാണ് ഈ അവതാരത്തിന്റെ പ്രത്യേകത. കൃതായുഗത്തിലെ ഭഗവാന്റെ നാല് അവതാരങ്ങളിൽ ഏറ്റവും അവസാനത്തെയാണ് നരസിംഹാവതാരം. ശത്രുസംഹാരത്തിനായി ഉടലെടുത്ത ഉഗ്രമൂർത്തിയാണെങ്കിലും ഭക്തരിൽ ക്ഷിപ്രപ്രസാദിയാണ് നരസിംഹമൂർത്തി. പ്രഹ്ലാദന്റെ വിളികേട്ട നിമിഷം തന്നെ തൂണ് പിളർന്നു നരസിംഹമൂർത്തി പ്രത്യക്ഷനായി.

നരസിംഹമൂർത്തി ക്ഷേത്രങ്ങളിൽ മനഃശുദ്ധിയോടെയും ഭക്തിയോടെയും നെയ്‌വിളക്ക് കത്തിച്ചു പ്രാർത്ഥിച്ചാൽ അഭിഷ്ടസിദ്ധിക്കൊപ്പം തൊഴിൽ വിവാഹ തടസ്സങ്ങൾ നീങ്ങും. തുളസിമാല സമർപ്പണം മറ്റൊരു പ്രധാന വഴിപാടാണ്. ഇഷ്‌ടപുഷ്‌പം ചുവന്ന ചെത്തിയും, നിവേദ്യം പായസവുമാണ്‌. പഞ്ചഭൂതങ്ങളിൽ വായുദേവന്റെ നാളായ ചോതിനക്ഷത്ര ദിനത്തിൽ ഭഗവാനെ തൊഴുതു പ്രാർത്ഥിച്ചാൽ ആപത്തുകളിൽ നിന്ന് രക്ഷനേടാം. കടബാധ്യത നീക്കി കുടുംബത്തിൽ ഐശ്വര്യം നിലനിൽക്കാൻ പതിവായി ചോതിനക്ഷത്ര ദിവസം നരസിംഹ ക്ഷേത്ര ദർശനം നടത്തുകയോ ഭവനത്തിലിരുന്നു നരസിംഹമൂർത്തി പ്രീതികരമായ ഭജനകൾ നടത്തുകയോ ചെയ്യുക.

നരസിംഹമൂർത്തി മന്ത്രം

ഉഗ്രവീരം മഹാവിഷ്ണും

ജ്വലന്തം സർവ്വതോ മുഖം

നൃസിംഹം ഭീഷണം ഭദ്രം

മൃത്യു മൃത്യും നമാമ്യഹം.

അകാരണഭയമകറ്റാനും ദുരിതമോചനത്തിനും ഈ മന്ത്രം പതിവായി മൂന്ന് തവണയെങ്കിലും ചെല്ലുന്നത് ഉത്തമമാണ്. നരസിംഹാവതാരം ത്രിസന്ധ്യാനേരത്തായതിനാൽ ആ സമയത്ത്‌ ഭക്തിയോടെ നരസിംഹമൂർത്തി മന്ത്രം ചൊല്ലുന്നതും ക്ഷേത്ര ദർശനം നടത്തുന്നതും ഇരട്ടിഫലം നൽകുമെന്നാണ് വിശ്വാസം.

ആന്ധ്രാപ്രദേശിലെ അഹോബിലം എന്ന സ്ഥലത്താണ് നരസിംഹാവതാരം നടന്നതെന്ന് കരുതപ്പെടുന്നു. അഹോബിലം എന്നാൽ സിംഹത്തിന്റെ ഗുഹ എന്നാണ് അർഥം. കോട്ടയം ജില്ലയിൽ പ്രധാനമായും നാല് നരസിംഹസ്വാമി ക്ഷേത്രങ്ങളാണ് ഉള്ളത്. പടിഞ്ഞാറ് ഭാഗത്തായി അയ്മനം നരസിംഹസ്വാമി ക്ഷേത്രവും കിഴക്കു ഭാഗത്തായി കാടമുറി, മാങ്ങാനം നരസിംഹസ്വാമി ക്ഷേത്രവും സ്ഥിതി ചെയ്യുന്നു. കേരളത്തിലെ സ്വയംഭൂവായ ഏക നരസിംഹക്ഷേത്രമാണ് കുറവിലങ്ങാട്‌ കോഴ ദേശത്തെ ശ്രീ നരസിംഹസ്വാമി ക്ഷേത്രം. സഹസ്സ്രാബ്ദങ്ങളുടെ പഴക്കമുള്ള ഈ ക്ഷേത്രത്തില്‍ ലക്ഷ്മീസമേതനായ നരസിംഹമൂർത്തിയാണ് കുടികൊള്ളുന്നത്. കണ്ണൂർ ജില്ലയിലെ തലശ്ശേരി ശ്രീ ലക്ഷ്മി നരസിംഹ ക്ഷേത്രം, ആലപ്പുഴ ജില്ലയിലെ ചേർത്തല റൂട്ടിൽ തുറവൂർ മഹാക്ഷേത്രം, കൊല്ലം ജില്ലയിലെ ആനയടി പഴയിടം ശ്രീ നരസിംഹസ്വാമി ക്ഷേത്രം എന്നിവ കേരളത്തിലെ പ്രസിദ്ധമായ നരസിംഹസ്വാമി ക്ഷേത്രങ്ങളാണ്. നരസിംഹമൂർത്തിയെ നിത്യേന ഭക്തിയോടെ സ്മരിച്ചാൽ ശത്രുനാശം, ആരോഗ്യം, രോഗശാന്തി, പാപനാശം എന്നിവയാണ് ഫലങ്ങൾ.

15/05/2019

*ശ്രീ കൃഷ്ണ കഥകൾ*

ഭക്തി സത്യമാകണമെങ്കിൽ ഭഗവാൻ ഭക്തനിലേക്ക് അടുക്കുക തന്നെ വേണം. ഭഗവാനെ കാണുന്ന ഭക്തർക്ക് ഭഗവാനല്ലാതെ മറ്റൊന്നും ഈ ലോകത്തിൽ കാണേണ്ടതായി വരില്ല.

അമർ രാജ്യം ഭരിച്ചിരുന്ന രാജാവ് പൃഥ്വീരാജ് ജി വലിയ കൃഷ്ണഭക്തനായിരുന്നു. ഭഗവാൻ അദ്ദേഹത്തിനു ദർശനം നൽകിയ ഒരു കഥ വളരെ പ്രസിദ്ധമാണ്.

അദ്ദേഹത്തിന്റെ ഗുരു പയൊഹാരി ജി ഇടക്കിടെ ദ്വാരകയിൽ പോയി ദ്വാരകാധീശന്റെ അനുഗ്രഹം തേടാറുണ്ടായിരുന്നു. ഇതു കണ്ടു രാജാവിനും ദ്വാരകാധീശനെ കാണാൻ മോഹമായി.

അദ്ദേഹം തന്റെ ഗുരുവിന്റെ ശരീരത്തിൽ ദ്വാരകാധീശന്റെ അടയാളങ്ങളായ ശംഖവും ചക്രവും കണ്ടിരുന്നു. ദ്വാരകാധീശനെ ദർശിച്ചു വരാനുള്ള മോഹം ഗുരുവിനെ ധരിപ്പിച്ചപ്പോൾ അദ്ദേഹം അതിനെ വിലക്കി രാജാവിനോട് പറഞ്ഞു .

താങ്കൾ രാജാവാണ് .ദ്വാരകയിൽ പോയാൽ അമർരാജ്യത്തിൽ അരാജകത്വം എന്ന അവസ്ഥ വരുമെന്നും രാജാവിന്റെ അഭാവത്താൽ രാജ്യത്തിൽ ക്ഷേമ ധർമ്മപ്രവർത്തനങ്ങൾ നടക്കാതാവുമെന്നും ദ്വാരകയിൽ പോവാതെ സ്വന്തം ദേശത്ത് ഇരുന്നു കൊണ്ടു ദ്വാരകാധീശനെ കൃഷ്ണഭക്തി ചെയ്യാനും ഭജിക്കാനും ഉപദേശിച്ചു.

തന്റെ ഗുരുവിന്റെ വാക്കിനെ മാനിച്ചു അദ്ദേഹം അമറിൽ തന്നെ ഇരുന്ന് രാജ ഭരണവും കൂടെ ശ്രീകൃഷ്ണ ഭജനവും ശീലമാക്കി. ശ്രദ്ധ മുഴുവൻ ദ്വാരകാ ധീശനിലുള്ള ഭക്തിയിലുമായി .ഒരു ദിവസം രാത്രിയിൽ ഉറക്കത്തിൽ സ്വപ്നത്തിൽ ഒരു വലിയ തേജസ്സ് പ്രത്യക്ഷപ്പെട്ടതായി അനുഭവപ്പെട്ടു.

തന്റെ മുന്നിൽ ഭഗവാൻ ദ്വാരകാധീശൻ പ്രത്യക്ഷപ്പെട്ടു. ഭക്തിയോടെ ഭഗവാനെ നമസ്കരിച്ചു പ്രദക്ഷിണം ചെയ്തു. ഭഗവാൻ അദ്ദേഹത്തോട് പറഞ്ഞു. ഇനി അങ്ങു ഈ ഗോമതീസoഗമത്തിൽ തീർത്ഥ സ്റ്റാനം ചെയ്തു കൊള്ളു.

രാജാവിന് താൻ ഗോമതീസ oഗമത്തിൽ പ്രവേശിച്ചതായി അനുഭവപ്പെട്ടു. പ്രഭാതത്തിൽ രാജാവ് ഉണർന്നെഴുന്നേൽക്കുന്നതിന് മുമ്പേ റാണി ശയനമുറിയിൽ പ്രവേശിപ്പോൾ രാജാവ് ഉറങ്ങുന്നതായും ശരീരമെല്ലാം നനഞ്ഞിരിക്കുന്നതായും സ്‌നാനം ചെയ്തു വന്ന പോലെയും കണ്ടു.

അതു പോലെ രാജാവിന്റെ ശരീരത്തിൽ ദ്വാരകാധിശന്റെ അടയാളങ്ങളായ ശംഖചക്രങ്ങൾ കാണുകയും ചെയ്തു. അത്ഭുതത്തോടെ രാജാവിനെ ഉണർത്തി. രാജാവിന്റെ ആനന്ദത്തിന്നതിരില്ലാതായി. തന്റെ അഭീഷ്ടം മനസ്സിലാക്കിയ ഭഗവാൻ തന്റെ അരികിൽ വന്നു ദർശനം നൽകുകയും പോരാത്തതിന് തനിക്കു ഗോമതീ തീർത്ഥസ്നാനവും സാധിപ്പിച്ചു തന്നു
അതിലുപരി ഭഗവാന്റെ അടയാളങ്ങൾ തന്റെ ശരീരത്തിൽ കാണിച്ചു തരികയും ചെയ്തു. സ്വപ്നത്തെ യഥാർത്ഥമാക്കിയ അനുഭവം സാധിപ്പിച്ചതും ഓർത്ത് ആനന്ദപരവശനായി.ഗുരുവിന്റെ കാരുണ്യത്തെയും ഭഗവാന്റെ അനുഗ്രത്തേയും വാഴ്ത്തി. അദ്ദേഹത്തിന്റെ ആഗ്രഹ സഫലീകരണം അദ്ദേഹത്തെ മുഴുവനായ ഒരു കൃഷ്ണഭക്തനാക്കി .

ഈ കലികാലത്തു നടന്ന ഈ അനുഭവ ഗാഥ നമ്മെ ഒരു പാഠം പഠിപ്പിക്കുന്നു .യഥാർത്ഥമായ ഭഗവത് ഭജനം ഭഗവാനെ നമ്മുടെ അരികിലെത്തിക്കയാണ് ചെയ്യുന്നത്. ആ കാരുണ്യത്തിന് സജ്ജനങ്ങളുടെ അമൃത വാക്കുകളെ മാനിക്കുകയാണ് വേണ്ടതെന്ന് മനസ്സിലാക്കിത്തരുന്നു. അതു കൊണ്ട് ഭഗവത്കാരുണ്യത്തിനായി കൃപാസാഗരത്തിലലിയാൻ ശ്രദ്ധയുണ്ടാവട്ടെ .

29/01/2019

പദ്മനാഭ സ്വാമി കേസിൽ അന്തിമ വിചാരണ തുടങ്ങിയിരിക്കുകയാണ് . ക്ഷേത്ര ഭരണം സർക്കാരിന് വേണമെന്നും രാജകുടുംബം ക്ഷേത്ര ഭരണം ഒഴിയണമെന്നുമുള്ള ഹൈ കോടതി വിധിയോടുള്ള അതൃപ്തി മൂലം രാജകുടുംബം സുപ്രീം കോടതിയെ സമീപിച്ചതാണ് .എന്നാൽ യഥാർത്ഥ വിഷയം അതൊന്നുമല്ലെന്നു ഇന്നത്തെ കോടതിയിൽ നടന്ന സംഭവം തന്നെ വ്യക്തമാക്കും . കേസിലെ വിഷയത്തിലേക്കു കടക്കുന്നതിനു മുൻപ് തന്നെ സർക്കാർ അഭിഭാഷകൻ ചാടി പറഞ്ഞത് ബി നിലവറ തുറക്കുന്ന കാര്യമാണെന്നത് ശ്രദ്ധേയമാണ് . അതിനുത്തരമായി ജഡ്ജ് ശ്രീ യൂ ലളിത് പറഞ്ഞത് കേസിൽ വാദം നടക്കട്ടെ , നിലവറയുടെ കാര്യം പിന്നീട് തീരുമാനിക്കാമെന്നാണ് . മതേതരത്വത്തിന്റെയും , ഭരണഘടനയുടെയും മറവിൽ പദ്മനാഭനെ കൊള്ളയടിക്കൽ ആണ് യഥാർത്ഥ ഉദ്ദേശം എന്ന് സാരം . ലോകത്തിലെ പട്ടിണി മാറ്റാൻ പദ്മനാഭന്റെ സ്വത്തെടുത്തു വീതം വച്ചു കൊടുക്കുന്ന സോഷ്യലിസ്റ്റ് കിനാശ്ശേരിയിൽ ആണ് നമ്മളിപ്പോൾ ജീവിക്കുന്നത് എന്ന് മറന്നു കൂടാ .

ഭാരതത്തിലെ തന്നെ പ്രധാനപ്പെട്ട വൈഷ്ണവ ക്ഷേത്രങ്ങളിൽ ഒന്നാണ് ശ്രീ പദ്മനാഭസ്വാമി ക്ഷേത്രം .തിരുച്ചിറപള്ളിയിലെ ശ്രീരംഗം ക്ഷേത്രത്തിലും പദ്മനാഭസ്വാമി ക്ഷേത്രത്തിലും അടക്കം ചുരുക്കം ചില ക്ഷേത്രങ്ങളിൽ മാത്രമാണ് അനന്തശയനത്തിലുള്ള മഹാവിഷ്ണു പ്രതിഷ്ഠകൾ ഉള്ളത് എന്ന് ശ്രദ്ധേയമാണ് .അയ്യായിരം വര്ഷങ്ങള്ക്കു മുൻപ് കലിയുഗ ആരംഭത്തിൽ ആണ് ക്ഷേത്രം പ്രതിഷ്ഠിക്കപ്പെട്ടത് എന്നാണ് വിശ്വാസം .ക്ഷേത്രം വക ഗ്രന്ഥവരിയില്‍ കാണപ്പെടുന്നതും അനന്തശയന മാഹാത്മ്യം എന്ന ഗ്രന്ഥത്തില്‍ വിസ്തരിക്കപ്പെട്ടിട്ടുള്ളതുമായ ഐതീഹ്യ പ്രകാരം കലിവര്‍ഷം തുടങ്ങി 950-ാമത്തെ ദിവാകരമുനി എന്ന ഒരു തുളു സന്യാസിയാണ് വിഗ്രഹ പ്രതിഷ്ഠ നടത്തിയത് .അതല്ല വില്വമംഗലം സ്വാമിയാരാണ് പ്രതിഷ്ഠ നടത്തിയതെന്നും പ്രബലമായ ഐതീഹ്യമുണ്ട് . രണ്ടു ഐതീഹ്യങ്ങളും തമ്മിൽ സന്ദർഭത്തിൽ സാമ്യവുമുണ്ട് . രണ്ടിലും മഹാവിഷ്ണു മരത്തിന്റെ സ്വയംഭൂവിഗ്രഹമായി പ്രകടമാവുകയാണ് .ഭാഗവതം ദശമസ്‌കന്ധം 79ാം അദ്ധ്യായത്തില്‍ ബലരാമന്റെ തീര്‍ത്ഥയാത്രയില്‍ അ സ്യാനന്ദപുരം എന്ന അനന്തപുരം സന്ദര്‍ശിച്ചതായും പദ്മതീർത്ഥത്തിൽ കുളിച്ചതായും ക്ഷേത്രത്തിൽ പൂജകൾ അർപ്പിച്ചതായും പറയുന്നുണ്ട് .ബ്രഹ്മാണ്ഡപുരാണത്തിലും സ്യാനന്ദപുരത്തെപ്പറ്റി പ്രസ്താവനയുള്ളതായി കാണുന്നു . AD 1127-1150 കാലഘട്ടത്തിൽ ഭരിച്ചിരുന്ന കോത കേരളവർമ പദ്മനാഭ സ്വാമി ക്ഷേത്രം പുനരുദ്ധാരണം നടത്തിയതായി സ്യാനന്ദൂര പുരാണ സമുച്ചയവും പറയുന്നു .

പദ്മനാഭനും ക്ഷേത്രവും ഇത് മൂന്നാം തവണയാണ് ആക്രമിക്കപ്പെടുന്നത് . ആദ്യത്തെ തവണ എട്ടര യോഗമെന്ന എട്ടുവീട്ടിൽ പിള്ളമാരുടെ നാലു നൂറ്റാണ്ടോളം നിലനിന്ന ദുര്ഭരണവും അധികാര മോഹവും വാണിരുന്ന സമയത്താണ് .അനേകം രാജകുമാരന്മാർ വധിക്കപ്പെടുകയും രാജാവിന് സ്വൈര്യമായി ഭരണം നടത്താൻ പോലും സാധിക്കാത്ത അവസ്ഥ നിലനിൽകുകയും ചെയ്തിരുന്ന ആ സമയത്ത് പിള്ളമാർ ക്ഷേത്രം അഗ്നിക്കിരയാക്കുകയും നിത്യ പൂജകൾ വരെ മുടങ്ങുകയും ചെയ്തു . പതിനെട്ടാം നൂറ്റാണ്ടിൽ അനിഴം തിരുനാൾ മാർത്താണ്ഡവർമ യുവരാജാവായി സ്ഥാനമേറ്റു .എട്ടുവീട്ടിൽ പിള്ളമാരുടെ വധ ശ്രമം വരെ അതിജീവിച്ച അദ്ദേഹം പിള്ളമാരെ സ്ഥാനഭ്രഷ്ടരാക്കി പൂർണമായ രാജവാഴ്ച സ്ഥാപിച്ചു .വേണാട് താവഴികളെ ഒരുമിപ്പിക്കുകയും കായംകുളം ,വടക്കുംകൂർ , തെക്കുംകൂർ ,അമ്പലപ്പുഴ , മീനച്ചിൽ തുടങ്ങിയ സ്ഥലങ്ങൾ എല്ലാം രാജ്യ പരിധിയിലാക്കി കൊച്ചിരാജ്യത്തിന്റെ അതിർത്തി വരെ രാജ്യാധികാരം വ്യാപിപ്പിച്ചു . ദിവാൻ രാമയ്യ ദളവയുടെയും കരുത്തുറ്റ തിരുവതാംകൂർ നായർ പടയുടെയും പിൻബലത്തോടെ തിരിച്ചെടുത്ത രാജ്യം അനീഴം തിരുനാൾ 1750 ജനുവരി മൂന്നാം തീയതി പദ്മനാഭന് തൃപ്പടിദാനം ചെയ്തു . രാജ്യാധികാരി പദ്മനാഭനും തിരുവതാംകൂർ രാജാക്കന്മാർ ഭഗവാന് വേണ്ടി രാജ്യം ഭരിക്കുന്ന പദ്മനാഭ ദാസന്മാരുമായി .

പദ്മനാഭസ്വാമി ക്ഷേത്രത്തിനു നേരെ അടുത്ത ആക്രമണം 1789 ഡിസംബർ മാസത്തിൽ ടിപ്പുവിന്റെ പടയോട്ട സമയത്തായിരുന്നു . ചിറക്കലും , സാമൂതിരിയുടെ കോഴിക്കോടും , പാലക്കാടും പിടിച്ചടക്കിയ ടിപ്പു മൈസൂരിന്റെ എക്കാലത്തെയും സ്വപ്നമായ തിരുവതാംകൂറും , അതിനു കാരണമായ പദ്മനാഭന്റെ നിധി ശേഖരവും ലക്ഷ്യമാക്കി പടനയിച്ചു . മലബാർ പടയോട്ടത്തിൽ നെടുംകോട്ട യുദ്ധത്തിൽ ആദ്യമായി ടിപ്പു തോൽവിയറിഞ്ഞു പിൻവാങ്ങി .

ഭഗവാന്റെ നിധിയോടുള്ള കൊതിയും ആർത്തിയും ഇന്നും ശത്രുക്കൾക്ക് അത് പോലെ നിലനിൽക്കുന്നു . പതിനാലാം നൂറ്റാണ്ടു മുതൽ നിധി ക്ഷേത്രത്തിൽ സൂക്ഷിച്ചിരുന്നതായി ക്ഷേത്രം മതിലകം രേഖകൾ പറയുന്നു .ക്ഷേത്രമതിൽക്കെട്ടിനകത്തു സൂക്ഷിച്ചിരിക്കുന്ന താളിയോലകളിൽ രേഖപ്പെടുത്തിയ ചുരുണകളാണ് മതിലകം രേഖകൾ. ഈ അടുത്ത കാലം വരെ ക്ഷേത്രത്തിന്റെ പടിഞ്ഞാറേനടയിൽ മുഖപ്പിന്റെ ഒന്നാം നിലയിൽ രേഖാസമുച്ചയം ഭദ്രമായി സൂക്ഷിച്ചിരുന്ന രേഖകൾ ഇപ്പോൾ പദ്മനാഭനെതിരെയും രാജവംശത്തിനെതിരെയും പട നയിക്കുന്ന സർക്കാർ മേൽനോട്ടത്തിൽ digitize ചെയ്യപ്പെടുകയാണ് എന്നതും ആശങ്കാജനകമാണ് .

അനിഴം തിരുനാൾ മുതൽ 12ഭരണാധികാരികൾ ആണ് തിരുവതാംകൂറിൽ ഉണ്ടായത് .1729ൽ തിരുവിതാംകൂറിന്റെ ഭരണം ഏറ്റെടുത്ത അനിഴം തിരുനാൾ അഗ്നിനാശവും എട്ടര യോഗത്തിന്റെ ഭരണ ന്യൂനതകളും കാരണം ദുർഗതിയിൽ ആയിരുന്ന ക്ഷേത്രത്തിന്റെ പുനരുദ്ധാരണ പ്രവർത്തനങ്ങൾക്കു തുടക്കംകുറിച്ചു. നേപ്പാളിലെ കാളിഖണ്ഡകി നദിയിൽനിന്ന് എത്തിച്ച 12008 സാളഗ്രാമത്താൽ കടുശർക്കരയോഗത്തിൽ അനന്തശയനനായ 18 അടി നീളമുള്ള ശ്രീപത്മനാഭന്റെ പ്രതിഷ്ഠ പണിതു. ഒറ്റക്കൽ മണ്ഡപം, രണ്ടു നിലകളൊഴിച്ചുള്ള ക്ഷേത്രഗോപുരം, ശീവേലിപ്പുര തുടങ്ങിയവയൊക്കെ ഇന്നു കാണുന്ന അവസ്ഥയിൽ പുനർനിർമിച്ചു. 1748ൽ കൽക്കുളം കൊട്ടാരം പുതുക്കിപ്പണിതു പത്മനാഭപുരം എന്നു പുനർനാമകരണം ചെയ്തു ശ്രീപത്മനാഭനു സമർപ്പിച്ചു.

1750 ഇൽ മുകളിൽ പറഞ്ഞ പ്രകാരം തൃപ്പടി ദാനവും നടന്നു .അതിനു ശേഷം രാജാവിന്റെയും രാജകുടുംബാംഗങ്ങളുടെയും എല്ലാ പിറന്നാളിനും ശ്രീപത്മനാഭന് സ്വർണമായിട്ടോ നാണയമായിട്ടോ ആഭരണങ്ങളായിട്ടോ സമർപ്പണങ്ങൾ നൽകാൻ തുടങ്ങി. മുറജപം, ലക്ഷദീപം, ഭദ്രദീപം എന്നീ ചടങ്ങുകൾക്കു തുടക്കം കുറിച്ചു. തുലാ പുരുഷധാനവും ഹിരണ്യഗർഭവുമുൾപ്പെടെയുള്ള ചടങ്ങുകളോടൊപ്പം ശ്രീപത്മനാഭനു തത്തുല്യമായ സമർപ്പണങ്ങൾ അർപ്പിച്ചുപോന്നു.

മീനമാസത്തിലെ ഉൽസവം പുനരാരംഭിക്കുകയും ഓരോ ഉൽസവത്തിനും രണ്ടു സ്വർണക്കുടങ്ങൾ വീതം സമർപ്പണമായി നൽകാൻ തുടങ്ങുകയും ചെയ്തു. രാജാക്കന്മാരുടെ ഓരോ ആട്ടപ്പിറന്നാളിലും 72 പവൻ സമർപ്പണമായി കാണിക്കവച്ചുതുടങ്ങി. പള്ളിവേട്ടയ്ക്കു നക്ഷത്രമാല സമർപ്പിക്കാൻ തുടങ്ങി .അനിഴം തിരുനാൾ തുടങ്ങി തിരുവിതാംകൂർ ഭരിച്ച 12 രാജാക്കന്മാരും ഇവയൊക്കെ സ്ഥിരം സമർപ്പണമായി തുടർന്നു.

1758 ന് ശേഷം കാർത്തികതിരുനാൾ രാമവർമ രാജ്യഭരണം ഏറ്റെടുത്തു .അദ്ദേഹം ക്ഷേത്രത്തിന്റെ ഗോപുരത്തിന്റെ ശേഷിച്ച രണ്ടു നിലകൾ കൂടി പൂർത്തിയാക്കി. ഗോപുരത്തിനു മുകളിൽ ഏഴു സ്വർണത്താഴികക്കുടങ്ങൾ സ്ഥാപിച്ചു. സപ്തസ്വരങ്ങളെ പുറപ്പെടുവിക്കാൻ കഴിയുന്ന ഏഴു തൂണുകളോടു കൂടിയ അതിവിശിഷ്ടമായ കുലശേഖരമണ്ഡപം പണിതു. സ്വർണംകൊണ്ടു ശിവേലി എഴുന്നള്ളിപ്പിനുള്ള ഇന്ദ്രവാഹനം നിർമിച്ചു. 1767ൽ അനന്തനുള്ള അങ്കി നിർമിച്ചു. ഹിരണ്യഗർഭവും തുലാപുരുഷദാനവും നടത്തി.

അതിനു ശേഷം 1798ൽ അധികാരമേറ്റ അവിട്ടം തിരുനാൾ ബാലരാമവർമ 1802ൽ ഏഴുനിലകളുള്ള സ്വർണ ദീപാരാധനത്തട്ട് ശ്രീപത്മനാഭനു സമർപ്പിച്ചു. ഹനുമാൻ വിഗ്രഹം ഭാഗികമായി ഇളകിയപ്പോൾ പിഴയായി സ്വർണം നടയ്ക്കുവച്ചു. ബ്രിട്ടിഷ് ഗവൺമെന്റ് പ്രതിനിധി കേണൽ മൺറോയുടെ പിന്തുണയോടെ 1811ൽ അധികാരമേറ്റ ആറ്റിങ്ങൽ മൂത്തറാണി ആയില്യം തിരുനാൾ ലക്ഷ്മി ബായി പെരുന്തമൃതേത്ത് പൂജ നടത്തിയതായും ഒരു ആനയെയും പല സ്വർണാഭരണങ്ങളും നടയ്ക്കുവച്ചതായും രേഖകളിൽ പറയുന്നു. കൂടാതെ ഭഗവാനു കണ്ഠാഭരണവും പതിവുള്ള പണവും.

ലക്ഷ്മി ബായ് കാലംചെയ്തശേഷം ഉത്തൃട്ടാതി തിരുനാൾ റാണി ഗൗരി പാർവതി ബായി ശ്രീപത്മനാഭനു പൊന്നുകൊണ്ട് അങ്കിയും അനന്തനു വെള്ളികൊണ്ടു പാമ്പണയും തീർക്കാൻ കാണിപ്പയ്യൂർ നമ്പൂതിരിപ്പാടിനോടു കൽപ്പിച്ച് ഏൽപ്പിച്ചു. കൂടാതെ മൂന്നു പ്രതിഷ്ഠകൾക്കും , ഒന്ന് സ്വർണത്തിലും മറ്റു രണ്ടെണ്ണം വെള്ളിയിലുമായി കൊത്തിയുണ്ടാക്കിയ കമലവാഹനങ്ങൾ സമർപ്പിച്ചു .

സ്വാതി തിരുനാൾ രാമവർമയുടെ കാലത്താണു കേണൽ മൺറോ പച്ച സ്ഫടികക്കല്ലുകൾ ചുറ്റും തൂക്കിയിട്ട, സ്വർണം പൂശിയ വലിയ കുട ക്ഷേത്രത്തിൽ വഴിപാടായി സമർപ്പിച്ചത്. ‘മൺറോ കുട’ എന്നറിയപ്പെടുന്ന ഈ കുട ഇന്നും ഉൽസവങ്ങളിൽ ശീവേലി ഘോഷയാത്രകളിൽ ദേവവിഗ്രഹങ്ങളെ അനുഗമിച്ചുവരുന്നു.അനിഴം തിരുനാൾ കഴിഞ്ഞാൽ ഭഗവാന് ഏറ്റവും സമർപ്പണങ്ങൾ നടത്തിയത് സ്വാതി തിരുനാളാണ് .
അമൂല്യരത്നങ്ങളും പട്ടുകളും തുകയും ആഭരണങ്ങളും ഇതിൽ പെടുന്നു .വലിയകാണിക്കയായി ഒരു ലക്ഷം സൂററ്റ് നാണയങ്ങളായിരുന്നു സമർപ്പിച്ചത് . അനേകം സഞ്ചികളിലെത്തിച്ച നാണയങ്ങൾ സ്വാതി തിരുനാൾ നേരിട്ടു വെള്ളിപ്പാത്രങ്ങളിലിട്ടാണ് സമർപ്പിച്ചത്. പണമായി 30 ലക്ഷം വഴിപാടായി സമർപ്പിച്ചുവെന്നും രേഖയിലുണ്ട്. ശ്രീപത്മനാഭനു ദീപാരാധന നടത്താൻ സ്വർണത്തട്ടവും, നരസിംഹസ്വാമിക്കും ശ്രീകൃഷ്ണനും വെള്ളിത്തട്ടുകളും നടയ്ക്കുവച്ചു. രത്നകവചിതമായ മനോഹര സിംഹാസനവും സമർപ്പിച്ചു. 1846ൽ സ്വർണത്തിൽ പുതിയ ശീവേലി വിഗ്രഹവും പണിയിച്ചു എന്നും മതിലകം രേഖകൾ പറയുന്നു .

1847ൽ സ്വാതി തിരുനാളിനുശേഷം അധികാരമേറ്റ ഉത്രം തിരുനാൾ മാർത്താണ്ഡവർമ 1849ൽ തുലാപുരുഷദാനവും 1854ൽ ഹിരണ്യഗർഭവും നടത്തി. 1860ൽ അധികാരമേറ്റ ആയില്യം തിരുനാൾ രാമവർമ തനി പട്ടും പതക്കവും തുടങ്ങി അമൂല്യമായ ആഭരണങ്ങളുടെ സമർപ്പണമാണു നടത്തിയത്.1880ൽ വിശാഖം തിരുനാൾ രാമവർമ ശ്രീഹനുമാൻ സ്വാമിയുടെ ബൃഹത്തായ പ്രതിമയ്ക്ക് അതേ വലുപ്പത്തിൽ മനോഹരമായ വെള്ളി അങ്കി സമർപ്പിച്ചു. 1885ൽ അധികാരമേറ്റു 39 വർഷക്കാലം രാജ്യം ഭരിച്ച ശ്രീമൂലം തിരുനാൾ രാമവർമ ക്ഷേത്രത്തിലേക്കു സ്വർണം, വെള്ളി, ദന്തം ഇവയിൽ സിംഹാസനങ്ങൾ പണിയാൻ കൽപ്പന കൊടുത്തു. 1891ൽ തുലാപുരുഷദാനവും 1894ൽ ഹിരണ്യ ഗർഭവും നടത്തി. വില്വമംഗലത്തു സ്വാമികൾ ശ്രീപത്മനാഭന് ആദ്യമായി കണ്ണിമാങ്ങ നിവേദ്യമർപ്പിക്കാനുപയോഗിച്ച ചിരട്ട സ്വർണംകൊണ്ടു പൊതിഞ്ഞു.

1924 മുതൽ ഏഴു വർഷക്കാലം ഭരിച്ച റീജന്റ് റാണി സേതു പാർവതി ബായ് എല്ലാ സമർപ്പണങ്ങളും തുടർന്നു. അവസാനത്തെ കിരീടാവകാശിയായി 1931ൽ അധികാരമേറ്റ ശ്രീചിത്തിര തിരുനാൾ രാമവർമ സ്വന്തം വരുമാനത്തിൽനിന്ന് അസംഖ്യം നേർച്ചകളാണ് സമർപ്പണമായി നൽകിയത്. രത്നപായസം നിവേദിക്കുന്നതിന് ഉപയോഗിച്ചു കൊണ്ടിരിക്കുന്ന രത്നങ്ങൾ പൊതിഞ്ഞ ബലിഷ്ഠമായ സ്വർണപ്പാത്രം പുതുതായി നിർമിച്ചു.
ഒറ്റക്കൽ മണ്ഡപത്തിലെ പതിനാലു തൂണുകളും സ്വർണത്തകിടുകൾ കൊണ്ടു പൊതിഞ്ഞു. മണ്ഡപത്തിനു ചുറ്റും സ്വർണംകൊണ്ടുള്ള ചിത്രത്തുന്നൽ വച്ചുപിടിപ്പിച്ചു. വേട്ടയ്ക്കും ആറാട്ടിനും ഉപയോഗിച്ചിരുന്ന ദിവ്യവിഗ്രഹത്തിനു രണ്ടടി പതിനൊന്നിഞ്ച് ഉയരമുള്ള സ്വർണ അങ്കി നിർമിച്ചു. ശ്രീകോവിലിനു ചുറ്റുമുള്ള പല ബലിക്കല്ലുകളും സ്വർണംകൊണ്ടും വെള്ളികൊണ്ടും പൊതിഞ്ഞു. ഗരുഡ വിഗ്രഹത്തിനടിയിൽ സ്വർണത്തളിക, സ്വർണ ദീപാരാധനത്തട്ട് തുടങ്ങി ഒട്ടേറെ പൂജാദ്രവ്യങ്ങളും സമർപ്പണമായി നൽകി. 1991 ഇൽ അദ്ദേഹം നാടുനീങ്ങി .

ശേഷം സഹോദരൻ ഉത്രാടം തിരുനാൾ മാർത്താണ്ഡവർമ ക്ഷേത്രഭരണം ഏറ്റെടുക്കുകയും ആചാരങ്ങൾക്കും സമർപ്പണങ്ങൾക്കും മുടക്കംകൂടാതെ ഭരണം നടത്തിപ്പോരുകയുമുണ്ടായി. പരമ്പരാഗത സമർപ്പണങ്ങൾക്കു പുറമെ ക്ഷേത്രത്തിലെ പ്രതിഷ്ഠകൾക്കു കേടുപാടുകൾ തീർക്കാനും അറ്റകുറ്റപ്പണികൾക്കും ലക്ഷദീപം, മുറജപം തുടങ്ങിയ ചടങ്ങുകൾ നടത്താനുമായി 1,88,79,000 രൂപ ശ്രീപത്മനാഭനു സമർപ്പിച്ചതായി രേഖകൾ പറയുന്നു. മരിക്കുന്നതിനുമുൻപേ തയാറാക്കിയ വിൽപത്രത്തിൽ തന്റെ സമ്പത്തിൽ നിന്നു ശ്രീപത്മനാഭനു സമർപ്പിക്കണമെന്നു രേഖപ്പെടുത്തിയ തുകയും യഥാസമയം പുതിയ ഭരണസമിതിക്ക് കൈമാറിയിട്ടുണ്ട്. ഇപ്പോൾ ക്ഷേത്രത്തിൽ നടന്നുവരുന്ന അന്നദാനം പൂർണരീതിയിൽ നടത്തിപ്പ് ഉൾപ്പെടെ രാജകുടുംബത്തിന്റെ സംഭാവനയാണ്.

കൂടാതെ മറ്റു സാമന്ത രാജാക്കന്മാരും അനേകം സമർപ്പണങ്ങൾ നടത്തിയതായി രേഖകൾ പറയുന്നു . 1539 മേടം 12–ാംതീയതി ഇരവിവർമ രാജാവ് 12 ഇതളുള്ള പൊന്നിൻപൂവും ഇടവം 31ന് അർച്ചനാ മൂർത്തിക്ക് ആറ് പലം ഭാരമുള്ള സ്വർണവും സമർപ്പിച്ചു.‘കൊല്ലവർഷം 1548ൽ ദേശിങ്ങനാട് (കൊല്ലം) രാജാവ് രാമവർമ ക്ഷേത്രത്തിൽ എത്തി 101. നടയ്ക്കുവച്ചു. തെക്കേടത്ത് (നരസിംഹമൂർത്തിക്ക്) 12 സ്വര്ണനാണയവും സമർപ്പിച്ചു .1579 കന്നി 18–ാം തീയതി വേണാട്ടധിപൻ ഇരവി ഉദയ മാർത്താണ്ഡവർമ സ്വർണ താമരപ്പൂവ് പദ്മനാഭന് സമർപ്പിച്ചു.1580 ഇൽ ചിങ്ങം ഒൻപതിന് ഉത്തൃട്ടാതി നാളിൽ വീര ഇരവിവർമ പൊൻതളികയിൽ മരതകക്കല്ലുകൾ പതിച്ച പതക്കം ഉൾപ്പെടെ ചന്ദ്രമാല സമർപ്പിച്ചു.1583 ഇൽ അദ്ദേഹം ഇതളുള്ള ഞെട്ടോടുകൂടിയ പൊൻപൂവ് സമർപ്പിച്ചു. കൂടാതെ ആറ്റിങ്ങൽ മൂത്തറാണി ഉമയമ്മ റാണിയും ഇരവിവർമയും ക്ഷേത്രത്തിലെത്തി വീരാളിപ്പട്ടും ആഭരണങ്ങളും നടയ്ക്കുവച്ചു.എഡി 1638രാജകുടുംബം പൊന്നുംപൂവ്, പൊന്നാൽ ആൾരൂപം, ചന്തിരമാല എന്നിവ കാണിക്കയായി സമർപ്പിച്ചു.

ഇതെല്ലാം മതിലകം രേഖകൾ പറയുന്ന വിവരങ്ങളുടെ ഒരംശം മാത്രമാണ് . പദ്മനാഭന്റെ നിധി പദ്മനാഭന്റെ സ്വത്താണ് . തിരുവതാംകൂർ രാജ്യ വംശവും , ഹിന്ദുക്കളായ പദ്മനാഭ ഭക്തരായ സാമന്ത രാജാക്കന്മാരും , ജന്മികളും ഭഗവാന് സമർപ്പിച്ച കാണിക്കയാണ് . അതെങ്ങനെ ആണ് മതേതര ജനാധിപത്യത്തിന്റെ പരിധിയിൽ വരുന്നത് ? രണ്ടാമത്തെ ന്യായം ജനങ്ങളുടെ നികുതി ആണെന്നാണ് . ജനങ്ങൾ കൊടുത്ത നികുതി ഒന്നും പദ്മനാഭന്റെ സ്വത്തിന്റെ ഒരു അംശം വരില്ലെന്നത് യുക്തിയോടെ ചിന്തിച്ചാൽ മനസ്സിലാക്കാം . ആ ന്യായം മുഖവിലക്കെടുത്താൽ തന്നെ അന്ന് അനേകം നാട്ടു രാജ്യങ്ങൾ ഉണ്ടായിരുന്നു . തിരുവതാംകൂറിനു കപ്പം കൊടുത്തത് ആ നാട്ടുകാരാണ് . വള്ളുവനാടോ , കോലത്തുനാടോ , സാമൂതിരിയോ , പാലക്കാടോ , കോട്ടയമോ , കൊച്ചിയോ തിരുവാതംകൂറിൽ കപ്പം കൊടുത്തിട്ടില്ല . അത് കൊണ്ട് തന്നെ മതേതര സുന്ദര കേരളത്തിലെ എല്ലാവര്ക്കും ആ നികുതിയുടെ അവകാശം പറയാൻ ഉള്ള യോഗ്യതയുമില്ല . അന്ന് തിരുവിതാംകൂറിൽ ജീവിച്ചവർക്കേ ഉള്ളു . അതൊക്കെ താവഴിയും പൈതൃകവും മതവും ഒക്കെ നോക്കി എണ്ണി തിട്ടപ്പെടുത്തി തിരിച്ചു കൊടുക്കുകയാണെങ്കിൽ എതിർപ്പു പദ്മനാഭനും കാണില്ല . പക്ഷെ ദേവസ്വം ഭണ്ഡാരത്തിൽ കുമിയുന്ന വിശ്വാസിയായ ഹിന്ദുവിന്റെ പണമെടുത്തു അവർക്കും അയ്യപ്പനുമെതിരെ വാദിക്കാൻ വക്കീലിനെ വയ്ക്കുന്നവർ പദ്മനാഭന്റെ സ്വന്തതെന്തിനാണ് ഉപയോഗിക്കുക എന്നതും വ്യക്തമാണ് . മറ്റൊരു ശ്രദ്ധേയമായ കാര്യം , കഴിഞ്ഞ വര്ഷം ഇൻഡിക് collective എന്ന സാംസ്കാരിക സംഘടന ഫയൽ ചെയ്ത RTI പ്രകാരം 12800 ഏക്കർ പദ്മനാഭ സ്വാമിയുടെ ക്ഷേത്ര ഭൂമിയാണ് ഭൂപരിഷ്കരണത്തിന്റെ ഭാഗമായി സർക്കാർ ഏറ്റെടുത്തത് . അതിനു പകരമായി വർഷത്തിൽ നല്‌കുന്ന annuity വെറും അൻപത്തി എട്ടായിരം രൂപ . അതാവട്ടെ കഴിഞ്ഞ രണ്ടു വർഷമായി നൽകുന്നുമില്ല . ഇങ്ങനെ ക്ഷേത്ര ഭൂമി കൈവശപ്പെടുത്തി , ഇനി പദ്മനാഭന്റെ സ്വത്തും കൂടി പൊതു ഗജനാവിലെത്തിച്ചു കൊള്ളയടിക്കുക എന്ന ലക്ഷ്യത്തിലാണ് കേസ് നടക്കുന്നത് .

കേരളം മുഴുവൻ നാശം വിതച്ച ടിപ്പുവിന് കാലു കുത്താൻ സാധിക്കാത്തതു പദ്മനാഭന്റെ പവിത്ര ഭൂമിയിൽ മാത്രമാണ് .അയാൾക്ക്‌ തൊടാൻ കഴിയാതിരുന്നത് പദ്മനാഭ ദാസന്മാരുടെ സിംഹാസനവും പദ്മനാഭന്റെ ജനങ്ങളെയും മാത്രമാണ് . അവർക്കിടയിൽ നെടുംകോട്ടയായി നിന്നതു പദ്മനാഭൻ തന്നെ ആണ് .മൈസൂർ ആക്രമണത്തിൽ മലബാർ വിട്ടു പലായനം ചെയ്ത അനേകായിരം ഹിന്ദുക്കൾക്ക് സംരക്ഷണം കൊടുത്തതും ധര്മ രാജയും പദ്മനാഭന്റെ മണ്ണുമാണ് . ടിപ്പുവിന്റെ വീഴ്ച തുടങ്ങിയതും നെടുംകോട്ട യുദ്ധത്തോടെ ആണെന്നത് മറ്റൊരു കൗതുകമാണ് . ഇന്ന് ജനാധിപത്യത്തിന്റെ കുതിരയിലാണ് ടിപ്പുമാർ പദ്മനാഭന്റെ സ്വത്തിനായി പടയൊരുക്കം നടത്തുന്നത് .

പദ്മനാഭ ദാസന്മാർ പടിയിറങ്ങുമോ എന്ന തലക്കെട്ടോടെ ഇറങ്ങുന്ന പത്രവാർത്തകൾ ചമച്ചുള്ള ആഘോഷങ്ങൾ ധാരാളം കാണാറുണ്ട് . അവർക്കറിയാത്ത ഒന്ന് പദ്മനാഭ ദാസന്മാർ പദ്മനാഭന്റെ തൃപ്പാദത്തിലാണ് തങ്ങളുടെ സിംഹാസനം ഇട്ടിരുന്നിരുന്നതെന്നാണ് . കമ്മ്യൂണിസ്റ്റ് കൊടി കൊട്ടാരത്തിൽ പാറിയപ്പോൾ അമ്മ മഹാറാണി സേതു പാർവതി കയ്യിൽ ഒന്നുമെടുക്കാതെ കൊട്ടാരത്തിൽ നിന്നിറങ്ങി പദ്മനാഭനെ കണ്ടു കാണിക്ക നൽകി യാത്രപറഞ്ഞാണ് മദ്രാസിലേക്ക് വണ്ടി കയറി തന്റെ അജ്ഞാത വാസം ആരംഭിച്ചത് . തന്റെ രാജ്യം അനിഴം തിരുനാൾ പദ്മനാഭനാണ് സമർപ്പിച്ചത് . സരസിജനാഭനായും , അംബുജനാഭനായും സ്വാതി തിരുനാൾ കൃതികളിൽ പദ്മനാഭൻ ഇന്നും വിളങ്ങുന്നു .അവരുടെ ഭക്തിയും സമർപ്പണവുമാണ് അവിടെ കുമിഞ്ഞ സ്വത്ത് . അവർ പിടിയിറങ്ങിയാൽ പിന്നെ പദ്മനാഭൻ ഒരു സ്വത്തു സമാഹരണ യന്ത്രം മാത്രമാണ് . സ്വത്തിനെല്ലാം അവകാശി പദ്മനാഭൻ മാത്രമാണെന്നും ക്ഷേത്ര ഭരണം പദ്മനാഭ ദാസന്മാരായ തങ്ങളുടെ അവകാശമാണെന്നുമാണ് രാജ്യകുടുംബം മുന്നോട്ടു വെക്കുന്ന നിലപാട് . അത് തികച്ചും ന്യായവുമാണ് . നീതിയുക്തമായ ഒരു തീരുമാനം ബഹുമാനപ്പെട്ട സുപ്രീം കോടതിയിൽ നിന്നും ഉണ്ടാവുമെന്ന് പ്രതീക്ഷിക്കാം .

നാരായണായ നമഃ

Bodhi Dutta
മതിലകം രേഖകൾക്കു കടപ്പാട് :മനോരമ ലേഖനം (April 10, 2016)