17/09/2025
സംസ്ഥാനത്ത് അമീബിക്ക് മസ്‌തിഷ്‌ക്ക ജ്വരം കൂടുതലായി റിപ്പോർട്ട് ചെയ്യപ്പെടുന്ന സാഹചര്യത്തിലും ജില്ലയിൽ 2 കേസുകൾ റിപ്പോർട്ട് ചെയ്തിട്ടുള്ളതിനാലും ജനങ്ങൾ ജാഗ്രത പാലിക്കേണ്ടതാണെന്ന്ജില്ലാ മെഡിക്കൽ ഓഫീസർ (ആരോഗ്യം) പാലക്കാട് അറിയിച്ചു.
പ്രാരംഭ ലക്ഷണങ്ങൾ
പനി, തലവേദന, ഓക്കാനം, ഛർദ്ദി, കഴുത്ത് തിരിക്കാനുള്ള ബുദ്ധിമുട്ട് /വേദന, നടുവ് വേദന
ഗുരുതര ലക്ഷണങ്ങൾ
അപസ്‌മാരം, ബോധക്ഷയം, പരസ്‌പര ബന്ധം ഇല്ലാതെ സംസാരിക്കുക
പ്രാരംഭത്തിൽത്തന്നെ വിദഗ്‌ധ ചികിത്സ നേടുകയും കുളത്തിലോ മറ്റു ജലാശയങ്ങളിലോ അടുത്തകാലത്ത് കുളിച്ചിട്ടുണ്ടെങ്കിൽ, കാര്യം ഡോക്ടറുടെ ശ്രദ്ധയിൽ പെടുത്താൻ പ്രത്യേകം ശ്രദ്ധിക്കണം.
പ്രതിരോധ മാർഗങ്ങൾ
നിശ്ചലവും ശുദ്ധീകരിക്കാത്തതുമായ ജലാശയങ്ങളിൽ ചാടുന്നത്/മുങ്ങുന്നത് ഒഴിവാക്കുക.
നീന്തുമ്പോൾ അല്ലെങ്കിൽ മുങ്ങേണ്ടി വരുന്ന സാഹചര്യങ്ങളിൽ, നോസ് പ്ലഗ് ഉപയോഗിക്കുക, അല്ലെങ്കിൽ മൂക്ക് വിരലുകളാൽ മൂടുക
ശുദ്ധീകരിക്കാത്ത ജലാശയങ്ങളിൽ നീന്തുമ്പോൾ തല വെള്ളത്തിൽ മുങ്ങാതിരിക്കാൻ ശ്രദ്ധിക്കുക.
ജലാശയങ്ങളുമായി ബന്ധപ്പെട്ട പ്രവർത്തനങ്ങളിൽ ഏർപ്പെടുമ്പോൾ, ചെളി/അടിത്തട്ട് കുഴിക്കുന്നത്/ കലക്കുന്നത് ഒഴിവാക്കുക.
റിസോർട്ടുകൾ, ഹോട്ടലുകൾ, വാട്ടർ തീം പാർക്കുകൾ, നീന്തൽ പരിശീലനകേന്ദ്രങ്ങൾ എന്നിവിടങ്ങളിലെ ജലം മാർഗ്ഗനിർദ്ദേശങ്ങൾ അനുസരിച്ച് ക്ലോറിനേറ്റ് ചെയ്യുകയും ക്ലോറിൻ അളവുകൾ പരിശോധിച്ച് ഉറപ്പ് വരുത്തേണ്ടതുമാണ്.
സ്പ്രിങ്കളറുകൾ, ഹോസുകൾ എന്നിവയിൽ നിന്നും വെള്ളം മൂക്കിനുള്ളിൽ പതിക്കുന്ന സാഹചര്യം ഒഴിവാക്കുക.
ക്ലോറിനേറ്റ് ചെയ്യാത്ത വെള്ളം ഉപയോഗിച്ച് കുളിക്കുമ്പോൾ/ മുഖം കഴുകുമ്പോൾ വെള്ളം മൂക്കിനുള്ളിലേക്ക് പോകാതെ സൂക്ഷിക്കുക.
ജലാശയങ്ങൾ മലിനമാകാതെ സൂക്ഷിക്കുക.
പൊതു ജലാശയങ്ങളിലേക്ക് വീടുകളിൽ നിന്നും സ്ഥാപനങ്ങളിൽ നിന്നും മാലിന്യം ഒഴുക്കരുത്.
ജലവിതരണത്തിനും സംഭരണത്തിനും ഉപയോഗിക്കുന്ന ജല സംഭരണികളും വലിയ ടാങ്കുകളും മൂന്ന് മാസം കൂടുമ്പോൾ നല്ലത് പോലെ കഴുകി വൃത്തിയാക്കണം.
