12/06/2025
بەسەرهاتێکی خۆمتان بۆ دەگێڕمەوە، ئنجا دەڵێم نا بۆ پشتگوێخستنی نەخۆشخانەکانی هەرێمی کوردستان!
ساڵی دووەمم بوو لە ئەمریکا. ڕۆژێک لە زانکۆ بووم و ژانەسەرێکی بەهێز تینی بۆ هێنام و هیچی دیکە تاقەتی بەرگەگرتنم نەبوو. هەر بە خەیاڵی کوردستانەوە چوومە ناو سەیارەکەم و ملم نا بۆ ئیمێرجێنسی شار. نزیکەی دوو کاتژمێری پێ چوو هەتا سەرەم هات و توانیم موقیمێک ببینم. بەڵام هەر خۆم دوای دوو کاتژمێر چاوەڕوانی و هەندێکیش تووڕەیی، سەرئێشەکەم بیر چووبۆوە. بە هەر حاڵ، کاکی دکتۆر هەندەک تەماشای کردم و دواتر گوتی هیچ نییە! حەبێکی پاراستۆڵی دامێ و هاتمە دەرەوە. هەتا ئێرە هەموو شتێک ڕێکوپێک بوو.
مانگێکی پێ چوو ڕۆژێک دەبینم پسووڵەی نەخۆشخانەم بۆ هاتووە. پسووڵە چ پسووڵە! حەقی سەردانییەکەم بۆ لای دکتۆر ١٨٨٢ هەزار و هەشت سەد و هەشتا و دوو دۆلار! بە کوردەوارییەکەی خۆمان، هەژدە وەرەقە و هەشتا و دوو دۆلار. لەسەر پسووڵەکەش نووسرابوو، ئەگەر پارەکە لە کاتی خۆیدا نەدەی، ڕۆژانە بڕە پارەیەکی زیادەی دێتە سەرێ! چونکە لە ئەمریکا سیستەمی تەندروستی سیستەمی کەرتی تایبەتە. هەرگیز بە خەونیش خەڵکی هەژار ئەو خزمەتە نابینێ کە لە کوردستان هەیە، سەرباری هەموو تێبینییەکان. من کە گوایە لە چینی ناوەندی کۆمەڵگەم، داهاتی کۆکراوەی ساڵێکم لەسەر یەک سەردانی دکتۆر دانا. سەرتان نەهێشێنم، دوای بینینی پسووڵەکە و پارەدانەکە، سەرئێشەیەکی تووندترم گرت، بەڵام ئەم جارە خۆم هەندێک سەری خۆمم شێلا و نەموێرا جارێکی دیکە بیر لە نەخۆشخانە بکەمەوە.
بەڕێزان، هاووڵاتییانی کوردستان! ئێوە نابینن هەرچی لە ئەمریکا و ئەوروپاوە دێتەوە لە کوردستان خەریکی قژچاندنەوە و ددان پڕکردنەوە و نەشتەرگەرییەکانییەتی؟ قەت نەتانپرسیوە هۆکاری ئەوە چییە؟! بە سادەیی پێتان دەڵێم ئەو سیستەمەی لە عێراق و هەرێمی کوردستان هەیە کە بنەماکەی لە سۆشیالیزمەوە سەرچاوەی گرتووە و دەگەڕێتەوە بۆ شۆڕشی ١٩٥٨، لە جیهاندا کەموێنەیە. کەموکوڕی هەیە؟ بەڵێ، بێگومان! بەڵام گۆڕینی سیستەمەکە، واتە کۆتاییهاتنی سەردانیکردنی دکتۆر بۆ خەڵکی هەژار و کەمدەرامەت. ئەوەی کە وایکردووە تێیدا کەرتی ئەهلییش هەرزانتر بێت، هەبوونی سیستەمە حکوومییەکەیە.
بەخۆشحاڵییەوە نامەی سزادانی دکتۆر هەژاری برام و هاوسەرەکەیم بینی کە بەهۆی بایکۆت بۆ هێشتنەوەی سیستەمی حکوومی سزادرابوون و ناوەکانیان بڵاو کرایەوە. سوپاسی هەڵوێستی ئەوان و هەموو هاوکارەکانیان دەکەم. بەڵام ئەو بابەتە هەڵوێستی گشتی پێویستە، ئەگەر نا هەموو تاکێکی هەژار و چینی مامناوەند باجەکەی زۆر بە خراپی دەدات. ئەو کەسانەی لە سیستەمە ئەهلییەکانی تەندروستی تێ ناگەن و نەیاندیوە، لە مەترسیی ئەو کارەی حکوومەت تێ ناگەن و خەیاڵیان بۆی ناچێت. بەڵام کاتێک هەست بەو واقیعە دەکەن کە خوانەخواستە دوپشکێک بە منداڵێکیانەوە بدات، یان ژانەسەرێک بگرن...
hewa salam
