د.مصطفى غالي الجبوري

01/04/2026

الف مبروووك تاهل العراق الى كأس العالم .. #العراق🇮🇶

31/03/2026

من اصعب المواقف على البيبيه والجد من يتمرض حفيدهم ..
والي يزيد الموضوع صعوبه من يكون الحفيد امه منفصله عن ابوه وباقي يمهم .. او امه متوفيه ..
هنا تصير الصخونه البسيطه للطفل كفيله بادخالهم حاله ان ذار ويراجعون الطبيب مباشره ..النوب اجي اني الخير اكلها حجيه لعد هو امه وين ؟ هنا يبدي البجي وتنهار الحجيه والله يا دكتور عافته وراحت تزوجت والله يسامحها ..او مو امه متوفيه ..والى نهايه القصه .. ابحاصل التعامل مع الحراره للطفل يختلف من حاله لحاله بس بالعاده اذا كان عمر الطفل اكبر من سنتين وماعنده تاريخ مرضي لشمره مال صخونه فنتعامل وياه باريحيه وخافض حراره براستول ونغسله ونشوف الوضع ..اما الاعمار الصغيره الاقل من سنتين او اكو شمره عند الطفل مال صخونه او الطفل وضعه مو مريح زكلش خامل او تعبان يفضل ينفحص من طبيب الاطفال فورا حتى لتتفاقم الحاله وسلامتكم ..

30/03/2026

عند فحصي لاحد الاطفال بعد ان تم ارساله من صديق صيلاني وكله ..لتضل تفرفر حدزك لطبيب اطفال هو يحل المشكله ..
الحاصل اني ذوله الاطفال الي يجوني بعد ان افتروا اطباء احبهم لان بالعاده تكون شغلتهم صعبه وتنشط الدماغ مال الطبيب للتفكير بالحالات النادره .. يعني مو مثل الحالات الكلاسيكيه مصخن ويصير زين ورا يومين او ماكل لفه من بره وصاير اسهال ..
مع احترامي للطفل المصخن وابو الاسهال لان هم ذوله مراجعينا الدائميين ..
الحاصل كعدنا وسولفنا ويه الاهل وحاله الطفل الي كان يعاني من الام البطن المتكرره والتقئ الي يصير بين فتره وفتره ..الحاصل الطفل كلشي مسوي سونار واشعه وتحاليل وحساسيه حنطه وجرثومه المعده ودايخين بيه ..
الحاصل شخصت الحاله شقيقه البطن cyclical vomiting syndrome
الحاصل
الام البطن عند الاطفال موضوع شائع وبيها هوايه تفاصيل راح نكتب بعض الاسئله بالتعليقات ونشوف معلوماتكم عالموضوع ..

د.مصطفى غالي
اختصاص طب الاطفال والخدج
*وجبه صحيه بعد ان تم تفعيد مود الرجيم 😄

27/03/2026

اهميه اعطاء ابره فيتامين K لكل الاطفال حديثي الولاده خلال اليوم الاول من الولاده
للوقايه من نزيف الدماغ .. #خدّج #أطفال

26/03/2026

في احد الايام جابولنا طفل عمره ٤٠ يوم ..
ويرضع حليب الام فقط ..
وولادته طبيعيه ومحتاج دخول خدج ..
وجان الطفل يعاني من فقر دم حاد مفاجئ وخمول ..
ومن فحصه المقيم الاول شافه شاحب وعنده خمول سواله تحاليل وحطله مغذي وتحضير دم وهالتفاصيل ..
ومن شافني بالصدفه كلي عمي (مصطلح يطلق بالمستشفيات للطبيب الاكثر قدما من الطبيب الثاني) ..
هذا عنده فقر دم وحضرتله دم ننطيه دم لو شتكول ؟؟
فاني كتله منين اجاه فقر الدم ؟؟؟
كال ماادري اهله يكولون جان مابيه شي زين فجأه هيج صار ..
فاني كتله انت جيكت عيونه ؟؟
كال ليش ؟؟
كتله مو احتمال يكول نزف بالدماغ (ICH)
طبعا هاي حاله تصير بهيج اعمار بالاطفال الي مماخذين فيتامين K عند الولاده وخاصه للاطفال الي يرضعون طبيعي ..وتصير فجاه ..
الحاثل فعلا الطفل طلع عنده نزف بالدماغ والحمد لله تعالج بدون عمليه ومشت الامور ..
الحاصل ابره الفيتامين K مهمه لكل طفل عند الولاده
الانتباه للموضوع لطفا لطفا ..
الامهات والاباء تأكدون على الكوادر الطبيه بالمستشفيات والقابلات على اعطاءها ..وسلامتكم ..صوره لكليجه طيبه جدا عاشت ايد ام ابراهيم عليها ..جابولياها كالوا د.انت من حجيت عالكليجه سوينا وذكرناك كلت خوش شغله هاي بعد كل كم يوم احجيلي باكله بلكي مراجعيني يجيبولي 😜 ..

د.مصطفى غالي
اختصاص طب الاطفال والخدج
م.الفرح الاهلي

26/03/2026

بانتظار الحالوب

25/03/2026

متواجدين اليوم في عياده المعالف من ٥ لل ٧ وفي مستشفى الفرح من ٨ لل ١٠ مساء

24/03/2026

التربيه ينطون عطله ..
الجهال تكعد بالبيت واهلهم دوام ..
زين وين يحطوهم ..
والبصمه راكضه ورا الموظفين ..
وتاخير وقطع راتب والاجايز ٣ بالشهر ..
الله يكون بعون الاخوه والاخوات الموظفين الي حايرين باطفالهم بمثل هيج ايام خصوصا الي ماعدهم بيت بيبي وجدو ينقذون الموقف بهيج اوقات ..
الحاصل
الانتباه لموضوع الامطار من شغله النتلات الكهربائيه ..
كلش هوايه شايف حالات اطفال وحتى كبار انتلوا بمثل هيج اوقات بسبب المطر اما بالتيل او بالباب مال البيت او اكو بيوت يطبلهم الماء ..
الانتباه الانتباه لهذا الموضوع فدوه مابينا حيل صدمات وقلبنا خلصان ..
والله يحفظ الجميع ..

د.مصطفى غالي
اختصاص طب اطفال وحديثي ولاده

24/03/2026

23/03/2026

الفيتامين D مهم جدا للاطفال منذ الولاده الى عمر سنه لتجنب مشاكل تقوس العظام ونقص المناعه . # #أطفال

22/03/2026

مع اقتراب انتهاء عطله العيد ..
لابد من الالتفات الى كروبات المدارس والواجبات الي دازيها المعلمات ونلحك على جهالنا باجر وكلمن يلزم جهاله يقريهم ..
وعلى سياق متصل بالدراسه والتعليم ..
مشاكل الدراسه مو كلها بسبب الذكاء اوالطفل كسلان ..
مرات الطفل عنده مشكله صحيه او قله انتباه او خمول غده درقيه او فقر دم او غيرها من الاسباب الي تسبب نتائج غير جيده على مستوى المدرسه ..

د.مصطفى غالي
اختصاص طب اطفال وحديثي ولاده
*صوره لصوغه جميله من اهل الطفل عز على سلامته ..تحياتنا الهم وان شاء الله يبعد عنه الامراض

21/03/2026

كل عام وانتم بخير ..
الانتباه الى الاطفال رجاء # # # # # #عيدالفطر