13/04/2025
آدم يگمز على القنفات 🐒، كرم ميگعد بمكانه من أدرسة🤸🏻 ، ليان اربعة و عشرين ساعة ملاعيبها مطشرة 🤹🏻، إبراهيم حتة بالليل عندة طاقة 🏋🏻. هذولة عدهم اضطراب فرط الحركة و نقص الانتباه لو لا ؟
هواية من الاطفال طبيعتهم (حركين , وكحين , اندفاعيين, و هوسة) و قليلين منهم گاعدين عقال و مچتفين🧘🏻.
- الطاقة لازم تكون عالية عند الطفل حتى تدفعة يستكشف و يتعلم ، لو تكون طاقتة مثل الچبير (24 ساعة متمدد و و ظهره يوجعة) كلشي ما راح يتعلم🧠.
- الملل من الأشياء و حب التجديد ضروري حتة يجمع شگد ما يگدر من معلومات مختلفة👀.
- بالنسبة للحوصة بالدراسة ، اذا مسويلة أجواء ضغط فأكيد ينهزم👊🏻🩴 .
- يندفع و يعصب لأن بعدة ما متعلم يسيطر على مشاعرة و احنة مدا نحتويه🤬.
لعد شنو اضطراب فرط الحركة و نقص الانتباه ؟ من تكون هاي الأمور مأثرة تأثير چبير على حياته (هلگد ما مشتت ما يكدر يسوي الامور اللي بعمره, هلكد ما حركتة زايدة متعب الاهل بحيث من الصبح لليل يراقبوه , هلكد ما اندفاعي يسوي امور كلش خطرة ... الخ) . و يكون بأكثر من مكان همين (يعني مو بس بالبيت و گدامنا گاعد و مستحي).
هواية يجونا و نگللهم طبيعي مابي شي , و قسم يجونا نكللهم ما ينطبق عليهم التشخيص لكن لازم نتابعة , و القسم الآخر يتشخصون رأساً.
بكل الاحوال لازم نعرف حتى لو تشخص بال ADHD , ف نسبة كبيرة يتحسنون و يطلعون من التشخيص , ولكن هاي السنين راح تضيع عليه و تأثر على تطوره و ما يلحگ بأقرانه ، فلازم يتعالج .
د.صادق الكويتي
أخصائي الطب النفسي
