صيدلية البيان

22/07/2022

#الجبن 🧀
🚫 قبل ما ابلش كلام .. هاي اللي راح تكول الجبن يسوي غباء خل تطفي الراوتر وتچفيني شرها

✅ تگدرين تبلشين باعطاء الجبن للبيبي بعمر

✅ يعتبر من الخيارات الجيدة .. لان يحبون طعمه وغني بالكالسيوم والفسفور والفيتامينات A, B12 والدهون 💪

✅ اختاري الجبن اللي يكون :

كامل الدسم
مبستر
قليل الصوديوم
مابي مواد صناعية

✅ الانواع اللي افضلها :

الشيدر
الموزريلا
الجبنة السويسرية

د. أحمد ماجد موسى
أخصائي (دكتوراه) بطب الاطفال

11/07/2022

شهر السابع
هو شهر الختان حسب العرف العراقي اللي ماله اساس من الصحه
فالختان الابكر هو الأفضل
صحيا يفضل الختان ثاني يوم بعد الولاده
او على الاقل ان ما يتجاوز الشهر الأول
بعد التأكد من اخذ الطفل فيتامين K عضلي بعد الولاده مباشرة
طيب و سوينا الختان و كملنا شنو علينا نسوي :
❤ اذا لاحظت ان الطفل يتألم فابدي بباريستول شراب او قطرات بمختلف الأسماء العلميه
اذا عمر الطفل أكبر من 6 اشهر ممكن استخدام البروفين
❤ شوكت اغسل للطفل ؟
ثاني يوم عادي اغسل للطفل كامل و ماكو اي مشكله
بس اذا طهرته قبل ما توكع الصره انتبه انه ما يوصل اي ماء للسره و الحبل السري
❤ كيفيه رعايه الضماد ؟
الضماد بالغالب ثاني يوم يوكع
و هو الطبيعي
اذا ما وكع فبالحمام اللي راح تسويه راح ينفتح
و اذا ما انفتح انت افتحه
و خلي طبقه فازلين او مرهم اسمه bactricin
و عرضه قدر الإمكان للهواء
وراها وره كل تغيير حفاظ خلي من هذه المراهم حتى لا تلتصق حافات الطهور بالحفاظه
❤ اذا الطفل يلعب شوكت يرجع يلعب ؟
مباشره ماكو اي مشكله باللعب بس بحذر لحد الاسبوع
❤ شوكت اراجع الطبيب اللي سوه عمليه الختان ؟
بعد شهر من العمليه اراجعه للاطمئنان
نذكر بالاساسيات
- مسكن ألم قبل الختان ضروري مثل بندول او ادول او انتي بايرول
-ملهيه ممكن تساعد لتخفيف الالم اذا ما سويتوا تخدير موضعي
- احسن مسكن ألم هو رضعه من صدرك قبل الختان ب ٥ دقايق
-افضل ختان هو الجراحي و الأفضل يم طبيب جراح
اما جراح مسالك بولية
او جراح اطفال
- كلما أبكر احسن و ثاني يوم هو الأفضل و الموضوع ماله علاقه بصيف او شتاء اله علاقه بالعمر بس الأفضل يشوفه طبيب قبل الختان
يستثى من الختان المبكر :
الاطفال الغير مكتملي النمو
الاطفال اللي عدهم تشوه بالعضو الذكري
الاطفال اللي حالتهم الصحيه ما تسمح بالختان مثل عسر التنفس الولادي او تسمم الدم الجرثومي

د. سيف سمير البياتي اخصائي طب الاطفال

16/05/2022

في حال شعور مريض الربو بضيق تنفس وسعال ..

يستخدم البخاخ الرصاصي (Ventolin Inhaler)

٤ بخات

بخة ونفس ..
بخة ونفس ..
بخة ونفس ..
بخة ونفس ..

ينتظر وراها ٤ دقايق .

شاف ماكو استجابه ؟

يعيد من جديد ٤ بخات .

ينتظر وراها ٤ دقايق .

شاف ماكو استجابة ؟

يتوجه لاقرب مستشفى .

وبالطريق كل ٤ دقايق يكرر نفس العملية
الى أن يوصل الطوارئ .

والله يكون بعون مرضى الربو .

الدكتور حذيفة الحديثي
اختصاصي الامراض الباطنية والقلبية

07/05/2022

كثر الحديث عنها.. وكثرت المنشورات على الصفحات بخصوصها

بس خلو ببالكم شغلة (المرض هذا مو جديدة وانما من السبعينات العراق يسجل سنوياً مجموعة من الاصابات والوفيات) ومو بس بالعراق .. وانما بعدة دول عالمية ودول مجاورة

والوقاية منها سهلة (النظافة الشخصية ولا تشتري لحوم من مصادر مو موثوقة لان ينتقل من الحيوان المصاب للانسان)

#وبالمناسبة .. تره الحمى النزفية مو مرض واحد .. وانما هي عبارة عن عائلة (ولد عم) عبارة مجموعة من الاعراض لامراض فيروسية عديدة مثل:
- الايبولا
- ماربورغ
- حمى لاسا
- هانتا فايروس
- الحمى الصفراء

الى الان #رسمياً العراق مسجل خلال هاي السنة 8 حالات وفاة و 40 اصابة (نصهم من ذي قار)

مشكلة هالمرض انه نسبة الوفيات بي عالية وقد تصل الى 50% (يعني من كل شخصين مصابين احتمال واحد منهم يتوفى)
وماكو علاج محدد او متوفر لقاح للحماية منه..

ليش انتشر هالسنة بالعراق اكثر من قبل؟


- غياب الحملات التوعوية عن المرض بسبب الانشغال بكـ ـورونــا

- عدم متابعة محلات القصابة وبيع اللحوم من قبل الجهات المختصة

- عدم الاهتمام بالاطباء البيطريين كون لديهم دور مهم جداً بالمتابعة وحمايتنا من الامراض الانتقالية (ماكو اي تعيين للخريجين من سنوات)

وسلامتكم
الصيدلاني الاختصاص
قتيبة اكرم

26/04/2022

الحمى النزفية …الخطر القادم
سجلنا لحد الان في ذي قار ٣٠ حالة مؤكدة للحمى النزفية من شهر حزيران /٢٠٢١ لحد الان نصفها تقريبا خلال الشهر الجاري وبمعدل وفيات ٣٠٪؜ اي الثلث تقريبا وهذا ينذر بخطر جديد يستوجب منا الحدز واخذ الاحتياطات
١.ما هو المرض؟
مرض فايروسي معدي يسبب علامات عامة ك الحمى والم العظلات والعظام والصداع وبعد عدة ايام يسبب نزف في مناطق متعددة من الجسم كالجلد ومكان الكانيولا وملتحمة العين والانف والجهاز الهظمي واحيانا الدماغ والجهاز التنفسي وهنا يصبح قاتلا
٢.كيفية انتقاله؟
عن طريق حشرة القراد من المواشي للانسان ومن انسان الى اخر عن طريق سؤال الجسم والدم
٣.اين يكثر؟
في المناطق الريفية التي تعتمد على تربية المواشي والاغنام او القصابين او اصحاب المطاعم وذلك لعدم اتباع التعليمات الصحية الصحيحة في التعامل مع الحيوانات وفي اماكن الجزارة
٤.التحاليل؟
نقص بكريات الدم البيض والصفائح الدموية واضطراب في حهاز التخثر وزيادة انزيمات الكبد
٥.هل يوجد علاج؟
ليس هناك علاج محدد له عادة يعتمد على نقل مكونات الدم والعلاج التحفظي وهناك تجارب سريرية لاستخدام عقار الريبافرين
٦.الوقاية ؟
١.اتباع شروط الذبح في اماكن القصابة الخاصة
٢.التحري عن المناطق المؤبوة واستخدام قاتلات القراد
٣.التعامل بحذر عند الاحتكاك باللحم وذلك بلبس الكفوب خصوصا ربات البيوت
٤.طهي اللحوم جيدا قبل الاكل
رمضان كريم ونتمنى للجميع الصحة والسلامة

د ازهر الاسدي
اخصائي أمراض دم

26/03/2022

🤔 مرض الضغط اله اسباب لو لا ؟؟؟

🔴 اول شي لازم نعرف أنه اكو اسباب واكون عوامل خطورة.

الأسباب هي الشغلات اللي تسبب المرض و عوامل الخطورة هي الشغلات اللي اذا كانت عند الشخص إمكانية أنه يصير بيه المرض تكون أكثر من اللي ما عندهم عوامل الخطورة هاي.

💢 اليوم نحجي عن الأسباب والايام الجاية عن عوامل الخطورة مال مرض الضغط:

٩٠ -٩٥٪ من حالات مرض الضغط ما الها اي سبب وتسمى مرض الضغط الأساسي.

٥ -١٠٪ من حالات مرض الضغط الها سبب ويكون السبب حالة أو مرض أو دواء يكون هو سبب ارتفاع ضغط الدم وبهالحالة يتسمى مرض الضغط الثانوي، من أسبابه:

١. مرض توقف التنفس وقت النوم.
٢. أمراض الكلى و شرايين الكلى.
٣. أمراض الغدد الكظرية.
٤. خمول أو فرط نشاط الغدة الدرقية.
٥. تضيق الشرايين منذ الولادة.
٦. اورام الغدة النخامية.
٧. بعض الادوية مثل: حبوب منع الحمل، أدوية النشلة، مضادات الاحتقان، بعض المسكنات... الخ.
٨. المشروبات الكحولية.
٩. الكوكايين والمخدرات الأخرى.

شتريدون احجيلكم بالمنشورات الجاية ؟

د. سوران حسن زنكنة
طبيب اختصاصي باطنية ( الأمراض القلبية و الصدرية والجهاز الهضمي والغدد )

26/03/2022

القولون العصبي والصيام

⭕⭕ اغلب اللي عدهم مرض القولون العصبي يقولون إن أعراضهم تخف عند الصيام، لكن الدراسات أثبتت أنه ممكن الاعراض تزيد أو تقل حسب الاعراض اللي همه يعانون منها يومياً قبل الصيام، بحيث أنه بعضهم يتحسنون مع الصوم والبعض الآخر تسوء حالتهم

⭕⭕ يمته ممكن الصوم يزيد من اعراض القولون العصبي ؟؟ ⭕⭕

⭕ اذا المريض بعد ساعات الصوم الطويلة بدأ ياكل كميات كبيرة من الاكل والمشروبات

⭕ اذا المريض هو اصلا أعراضه تزيد وقت الجوع مثل الام المعدة، الغثيان، ارتجاع المريء - الحموضة - ... الخ

⭕⭕ يمته يكون الصوم مفيد للي عندهم القولون العصبي ؟؟ ⭕⭕

⭕ اللي أعراض المرض تبدي عدهم ورا الاكل مثل الانتفاخ، غازات، أو الإسهال بعد الكل مباشرة، هذوله الاعراض مالتهم راح تخف ويا الصوم

⭕⭕ شلون ممكن أنه الصوم يحسن من اعراض القولون العصبي: ⭕⭕

⭕ الصوم يساعد في زيادة عملية الموت الطبيعي للخلايا المتضررة واستبدالها بخلايا جديدة وهذا يؤدي إلى تجديد خلايا الامعاء وتقليل حالة الالتهاب فيها وبالتالي تحسن مرض القولون العصبي

⭕ الصوم يساعد على زيادة نسبة البكتيريا المفيدة في الجهاز الهضمي وهذا يساعد في تخفيف اعراض القولون المتهيج

⭕ الصوم يساعد في تقليل الإجهاد النفسي وبالتالي نتيجة أنه الإجهاد قل فاعراض القولون العصبي هم راح تقل

⭕ الصوم بطريقة صحية قد يعالج الاسهال، الإمساك والانتفاخ

⭕ يساعد الصوم في تنشيط موجات كهرباائية معينة في العضلات الملساء في الأمعاء وبالتالي بدورها تقوم بتحريك المواد التي لا يمكن هضمها لطرحها خارج الجسم مثل الالياف والبكتيريا الضارة

⭕⭕ نصائح لتقليل اعراض القولون العصبي في رمضان ⭕⭕

⭕ شرب كميات وافرة من المي أقل شي لترين بين الإفطار والسحور

⭕ الابتعاد عن المشروبات السكرية مثل العصائر والمشروبات الغازية

⭕ الابتعاد عن المشروبات الي بيها كميات كافايين كبيرة مثل الشاي والقهوة والمشروبات الغازية و مشروبات الطاقة مثل التايكر و مثيلاتها

⭕ اكل ما لا يقل عن ٣٠ غرام من الألياف الغذائية يومياً

⭕ الابتعاد عن الاكلات الدهنية والمقلية

⭕ وقت الإفطار اكل تمرة وشوية مي ، روح صلي وارجع كمل الإفطار على قسمين قسم ورا الصلاة والقسم الثاني وراها بفترة

⭕ الابتعاد عن الأطعمة الحارة أو المتبلة بكثرة خاصة البهارات الحارة

⭕ الرياضة ساعتين ورا الافطار

⭕ النوم لمدة ٧-٩ ساعات يومياً

⭕ الابتعاد عن الاكلات والمشروبات اللي نعرف أنه تسبب النا أعراض القولون العصبي

⭕ الابتعاد عن العادات اللي نعرف نفسنا أنه تزيد اعراض القولون العصبي عدنا

⭕ مضغ الطعام جيدا و عدم الاستعجال

د. سوران حسن زنكنة

01/03/2022

و بدا الربيع
و بدينا الطقس اللطيف لتشميس الاطفال
الموضوع اللي اتمنى يستمر و يستمر و يستمر
خلينا نحجي عن علاقه الشمس بفيتامين دي و كيف و لماذا و اي وقت التعرض لفيتامين دي يفيد :
❤ فيتامين دال اسمه فيتامين الشمس
هو شون ينصنع من الشمس ؟
الكولسترول اللي موجود بجلدنا بعد ما يتعرض للاشعه الفوق البنفسجيه راح يتحول إلى فيتامين دال
❤ فيتامين دال موجود ببعض انواع الأغذية بالأخص الأسماك و منها السلمون و السردين و التونا و البيض و الكبد
❤ اي وقت هو الأفضل للتعرض للشمس ؟
الوقت الممتد من ١١ صباحا إلى ٣ ظهرا
هو أفضل وقت للحصول على فيتامين دال
❤ زين شكد نتعرض للشمس ؟
هنا الجواب يعتمد على لون البشره
كلما الشخص بشرته بيضاء كلما يحتاج فتره اقل
❤ يعني الاسمر يحتاج شمس اكثر ؟
اي نعم لان صبغه الميلانين تعيق امتصاص الضوء بنسبه عاليه
❤ طيب شكد يحتاج الطفل الابيض البشره للشمس؟
من ١٠ إلى ٣٠ دقيقه بوقت الظهر و يكون ثلث جسمه مكشف ٣ مرات اسبوعيا و الاسمر يحتاج إلى اكثر من هذا الشي
❤ هل يؤثر استخدام الواقي الشمسي على امتصاص فيتامين د؟
اي نعم و بنسبه عاليه تتجاوز ٩٠ بالميه
❤ هل يفيد تعرض الطفل للشمس خلف الزجاج ؟
لا
❤ شون نتعرض للشمس مو لوننا يسمر ؟
ابدا مو ضروري تعرض الوجه لفيتامين دي فالوجه يشكل مساحه سطحيه صغيره مقارنه مع باقي أجزاء الجسم الاخرى
❤ أكدر البس قبعه على راسي ؟
مثل ما جاوبت فوك الراس مساحته صغيره فاي تكدر ة كشف باقي الأجزاء
❤ هل التعرض للشمس خالي من المخاطر ؟
لا طبعا التعرض للشمس قد يسبب
1. حروق شمسيه
2. أذى للعينين
3. التعرض المزمن للشمس قد يصيب الجلد بالشيخوخه
4. تغييرات بالجلد مثل التشققات بالتعرض المزمن للشمس
5. التعرض الطويل الأمد يزيد خطر الاصابه بسرطان الجلد
❤ اخر ملاحظه
التعرض المنتظم للشمس يفيد جدا في تنظيم نسبه فيتامين دال بدون الحاجه للمقويات و الفيتامينات
احرص على التعرض للشمس لفتره ١٠ إلى ٣٠ دقيقه ٣ او ٤ مرات اسبوعيا و اذا كنت اسمر البشره قد تحتاج الى فتره اطول
كلما ابتعدت عن محور الأرض كلما احتجت لشمس اكثر فالناس في كندا يحتاجون لشمس اكثر
دمتم بود
و لا تنسون تشمسون الجهال
و تنطوهم فيتامين دال بالأخص الرضع اللي يرضعون طبيعي او اغلب رضاعتهم طبيعي
د. سيف سمير البياتي اخصائي طب الاطفال

01/03/2022

الاندومي !
اشاعات من هنا و هناك عن الاندومي مو بس بالعراق بكل الدول
الاشاعات تكول الحامل ما يصير تاكل اندومي
و المرضع ما يصير تاكل اندومي
و الاندومي يسوي سرطان
و غيرها من الاشاعات
🙄هل هذه الاشاعات حقيقيه؟
الجواب لا
الاندومي و غيره امينه بصورة عامه ما تسوي هذه الاشياء
😉 لكن هل هي صحيه؟
يعني وجبات الاندومي امينه اوكي بس يصير تصير غداء او عشاء ؟
الجواب لا
الاندومي مو صحي
و ما تعادل بالقيمه الغذائيه اي فطور او غداء او عشاء من اكل البيت اللي تسويه و يكون متوازن بيه بروتين و دهون و نشويات
نفس الشي من ما نقبل يكون الحليب هو وجبه و هو كلشي و الطفل سمين و اصفر و مناعته صفر !
🙄 بس دكتور هم يحبوه ولو كم مره بالاسبوع؟
شوفي الغرض من البوستات و كل الصفحه انه نوصل لمرحله الكمال و اللي ما نكدر نوصلها و الكمال لله
يعني اذا انطيتي مره او مرتين اندومي بالاسبوع شكو بيها
بس زيدي قيمته الغذائيه
ضيفي لحم
ضيفي بيض
شويه خضراوات
بدلي اللي يجي وياها من زيوت و ملح باشياء من البيت
ضيفي خبرتك على الاكل
قابل اني اعلمك شون تطبخين الاندومي و تسويه بيه فائده ؟
و هم لو اعرف كان كتبتلك
استمري و الله يساعدك
الامومه صعبه بس نحاول نسهلها
د. سيف سمير البياتي اخصائي طب الاطفال

01/03/2022

كميه الاطفال اللي كاعد تاخذ مشهيات و وزنها طبيعي او فوك الطبيعي مخيفه
كميه الاطفال اللي كاعد تفوت بالسمنه بعد ما اهلهم يفتحون معداتهم بالمشهيات بطفولتهم بازدياد
كميه الاطفال اللي دا يصير بيها سكر و ضغط من وره السمنه بازدياد
كميه البنات اللي دا يصير عدها تكيس مبايض و متلازمه الأيض كلش كبيره من كثر الوزن
كميه الاطفال اللي كاعد تشرب عصير و جبس و نستله و ما تاكل غير شي كبيره
كميه الاطفال اللي راح تصيبوهم بالسكر و الضغط من وره حرصكم عل تسمينهم بالمشهيات دا تزيد و تزيد و تزيد
اللهم هل بلغت؟
اللهم فاشهد
د. سيف سمير البياتي اخصائي طب الاطفال

05/02/2022

02/02/2022

سألني اب شنو رايك بالعصير الطبيعي بدون سكر للاطفال ؟
جاوبت على اساس علمي مشتق من جمعيات متعدده و كلت :
العصير من اسوء الخيارات لاطعام الاطفال
فالجمعيه الامريكيه لطب الأطفال منعته قبل عمر السنه
و بعد السنه سوت جدول ملخصه انه الطفل ما يشرب باكيت العصير كاملا الا بعد عمر ٧ سنوات
و نروح و نعبر المحيط و نروح لبريطانيا و نقرأ بموقع الصحه البريطاني NHS انه العصير الطبيعي لازم نخففه بعشر أمثال ماء !!!
و نكمل الدوره حول العالم و نروح لاستراليا و حسب تصريحات التغذيه الأسترالية اللي تكول بيها ان اضافه العصير للغذاء اليومي للطفل ما يجيب اي فائده تذكر للطفل بالعكس فانها تقلل شهيته!
نروح قريب هالمره و نروح للسعوديه و نقرأ بكتيب خاص بتغذيه الاطفال ان العصير ممنوع قبل عمر السنه !
و هسه ؟
القرار يمك
عصر الفاكهه يزيل الألياف المهمه لجهاز هضمي صحي و يؤثر على صحه الاسنان و يسد الشهيه
ما جبنا سيرة العصير الصناعي و لا المشروبات الغازية لأنها سيئة جدا و جدا و جدا
د. سيف سمير البياتي اخصائي طب الاطفال