16/03/2026
أكو طلاب تقرأ هواية بس متركز..
بداية لازم نفرق بين شغلتين:
◇ألجلوس على ألكتاب والتركيز ألفعلي..
كثير من الطلاب يدرس لمدة 4_5 ساعات ،يفتح ألكتاب،يقلب الصفحات،يظن نفسه ديدرس لكن دماغه:
☆يتنقل بين ألافكار
☆يفكر بالمستقبل
☆يخاف من ألرسوب
☆يقارن نفسه بغيره..
ليش ديصير هيج؟؟
أولا :قلق داخلي مستمر..
ألقلق يأخذ جزء من ألذاكرة ألعاملة(working memory)،من راح يقرأ المعلومة مراح تنخزن زين...
ثانيا:أرهاق ذهني..
ألمخ مثل العضله،أذا تدرس بدون فواصل راح يصير overload ,ألنتيجة قراءة بدون أستيعاب
ثالثا:ألتعلم السلبي أو ألدراسة ألسلبيه(passive learning),شنو معناه؟
معناه انه احنا نستقبل ألمعلومة بدون منشغل الدماغ بشكل فعال،شلون؟
مثلا نقرأ فقط بدون حفظ، ،بدون تلخيص،او نسمع محاضرة بدون منسجل ملاحظات،أو نشوف فيديو تعليمي بدون تطبيق..
نعيد الصفحة أكثر من مرة ألمشكله نحس انه احنا دندرس لكن بالحقيقه ألدماغ مديشتغل بجهد كافي حتى يخزن المعلومة بعمق،لانه دماغنا يحب ألجهد الفعلي ،يحتاج أسئلة،تلخيص،قراءة بصوت عالي،حتى يصير خزن وتسجيل للمعلومات بصورة صحيحة(encoding).
رابعا:ألتشتت ألرقمي..
حتى لو كان ألموبايل بعيد ،المخ متعود على ألدوبامين ألسريع،فالكتاب يصير ممل بالمقارنه مع الموبايل..
خامساADHDغير مشخص..
بعض ألطلاب اذكياء،لكن يواجهون صعوبة انه يبقون منتبهين ،خصوصا أذا المادة مو محفزة..
أذا تدرس ساعات طويلة وتحس نفسك متستفيد،ألمشكلة مو بالذكاء،يمكن تحتاج طريقة مختلفة مو جهد أكبر.
