12/12/2022
پێشتر بە کورتی باسی مەترسیەکانی زیادبوونی ڕێژەی شەکرمان کرد لە جەستەدا و ڕێگاکانی زیادبوونی ، لێرەدا پێویستە بزانین ڕێگاکانی چارەسەری و بگرە خۆپاراستن چین
پیاوان لە دوای تەمەنی ٣٠ ساڵی و ئافرەتانیش دوای تەمەنی ٤٠ ساڵی پێویستە ئاگاداری خۆیان بن لە پەیدابوونی ئەم مەترسیە و هێرشەکانی چونکە ئەم دوژمنە سەرسەختە زۆر بە بێ دەنگی هێرش دەکات و جەستەمان داگیر دەکات کاتێک پێی دەزانین کە لەوانیە زۆر جار درەنگ بووبێت و فریای نەکەوین ئیتر دەبێت تەسلیمی ببین و ژیان و خۆشیەکانمان بەرزەفت دەکات و دەبینە دیلی ژێردەستەی
بۆیە وا پێویست دەکات لەم تەمەنانە هەر هیچ نەبێت زوو یان ڕوونتر بڵێین ٣-٦ مانگ جارێک پشکنینی خۆمان بکەین
پشکنینەکانیش بریتین لە:
- پشکنینی شەکرەی هەرەمەکی
- پشکنینی شەکرەی خەزنکراوی سێ مانگی
- پشکنینی چەوری یەکانی خوێن وەک ترایگلیسراید و کۆلیسترۆل و چەوری باش و چەوری خراپ
- پشکنینی ئەنزیمەکانی جگەر
- پشکنینی سۆنار بۆ جگەر
لەبەرئەوەی شەکری زیادە لە تەمەنی گەنجیدا کاتێک بەکارنایێت وەک ووزە و ناسوتێندرێت لەبەرکەمی جوولەدا ڕوودەکاتە جگەر و بەشێوەی چەوری ژێر پێست یان چەوری سەر جگەر خەزن دەبێت بۆیە تەنها پشکنینی ڕێژەی شەکر لەخوێندا دڵنیایمان پێنابەخشێت و ناچار دەبین کە هەموو پشکنینەکانی تر بکەین کە ئاماژەمان پێدا ، بۆ چارەسەری و ڕێگەگرتن لەم باروودۆخە مەترسیدارە پێویستە ئەم ڕێگایانە بگرینە بەر:
- دابەزاندنی کێشی زیادە
- ڕێکخستنی ژەمە خۆراکیەکانمان بەشێوەیەک کە خۆراکە سەرچاوە شەکریەکان و چەوریەکان کەمتر بەکاربێنین
- زیادکردنی بە پێ ڕۆیشتن چونکە پەنکریاس چاڵاک دەکات و زیاتر ئینسۆلین دەردرێت و ووزەی زیادەش دەسوتێنێ
- ڕاهێنانە وەرزشیەکان زیاتر بکرێت و ببنە ڕۆتینی ڕۆژانە چ یاریە ئاسنیەکان بێت یان وەرزشەکانی تر کە ئەمەش بێجگە لەوەی کاڵۆری و ووزە دەسوتێنێت بەڵکو هەستیاری خانەکان بۆ ئینسۆلینیش زیاد دەکات کە لەئێستادا زۆربەی خەلک بەدەستیەوە دەناڵێنێت
- وەرگرتنی دەرمان کە ئەمەش لەڕێگای سەردانیکردنی پزیشکی پسپۆڕەوە بڕیاری لەسەر دەدرێت.
بەهیوای تەندروستیەکی باش بۆ هەموو لایەک
دەرمانخانەی ئاڤژەن - هەولێر -جووتسایدی دارەتوو -ترافیک لایتی یەکەم
