30/09/2024
نوێترین توێژینەوەی پزیشکی ڕوونیکردۆتەوە، کە خواردنەوەی "چا" بە شێوەی ڕۆژانە، بە ڕادەیەکی گەورە مرۆڤ دەپارێزێت لە تووشبوون بە وەستانی مێشك.
توێژەرەکان بۆیان ڕوونبووەوە، کە خواردنەوەی چوار کوپی "چا" بە شێوەی ڕۆژانە، بە ڕێژەی (٢١%) کار دەکات لەسەر کەمکردنەوەی دەرفەتەکانی تووشبوون بە وەستانی مێشك، بە تایبەت لای ئەو کەسانەی کە بە شێوەیەکی ڕێك و پێك "چا" دەخۆنەوە، هاوکات توێژەران دووپات لەوە دەکەنەوە، کە خواردنەوەی "چا" بە ئەندازەی کەمتر لە چوار کوپ، ئەو ئەنجامەی سەرەوە وەدیناهێنێت.
توێژینەوەکە بەسەر زیاتر لە (٧٥٠٠٠) هەزار کەس لە ژن و پیاو تاقیکراوەتەوە و، بۆ دەستکەوتنی دەرەنجامی سەرەوەش، پشتبەستراوە بەو تاقیکردنەوەیە.
شایەنی باسە، لێکۆڵینەوە پزیشکییەکان ئاماژە بۆ ئەوە دەکەن، کە وەستانی مێشك، ڕۆژانە کۆتایی بە ژیانی (٢٠٠) بەڕیتانی دەهێنێت، هەروەکو ئەو کەسانەشی کە لەو گرفتە تەندروستییە دەربازیان دەبێت، لە ترس و دڵەڕاوکێ بەردەوامدان، چونکە دەترسن جارێکی تریش دووچاری ببنەوە.
