30/01/2023
تحجيلي :
الجهال يحبون الافخاذ مال دجاجه فقط
بحيث ما ياكلون غيرها و ناكل الباقي مال دجاجه اني و ابوهم
اجه الاب قبلهم و اكل الافخاذ و نسى و راح طلع لشغله مره ثانيه
جوي من الدوام و بديت اطبطب و ادلع مثل نانسي عجرم ما تكول
و الله ابوكم اكلهن
و الله اسفه
و الله اخر مره
و هم عادي بدوا يعاندون و يزيدون
مليت بصراحه و كلت خل افكر بطريقه اكثر واقعيه
احمبائي عيوني تاكلون لو لا؟
كالوا لا
جمعت الغدا كله هو و التمن و طلعت للباب انتظر اي محتاج او اي احد بياع متجول يمر حتى انطيه الغده
و مر محتاج الحمد لله و انطيته الغده و كلتله الف عافيه
مرت ساعتين و ٣ و اربعه
راسا نزلوا من فوك
ماما جوعانين و الله
اني كاعده رجل على رجل كلتلهم و الله يا حبايب شفتوا الغده وين راح و اني ما فاتحه مطعم
ابني الصغير رد :
ماما اي شي دزيلنا دلفري !
كلتلهم معزلين
بنتي كالت زين احمي اي شي ؟
كلتلهم اي صح اكو مرك باميه و تمن بايت بالثلاجه خل اكوم احميه
توا الكبير دا يكول ما احب الباميه
اخته سكتته و كالتله اوكي احنا نحب الباميه
و حميت الاكل
اما منظرهم و هم ياكلون التمن و مركه الباميه بلا تواسيل آلا اسرت قلبي أسر!
عبالك عازمتهم على عصير بعصير تايم
اي صح ما لازم نحرم أولادنا
بس البطر على النعمه لازم ناخذ بالنا منه
و انت و اني نركض وره هذه الدنيا حتى نجيبلهم متطلباتهم بس لازم تخليهم حاسين بهذه النعمه و عمرهم ما يتبطرون على النعمه
دا تشوفون وضع البلد الاقتصادي
و لازم يفهمون انه اليوم أكدر اجيب و انه ثاني يوم ما عندي و لا تجيب بنعم لكل الطلبات حتى يقدرون نعمتهم
"اخشوشنوا فان النعم لا تدوم" احسن تعبير عن الحاله اللي واصليلها اليوم
