Helga Birgis þerapisti

19/04/2026

Ertu stundum - eða oft - að leika supermen? kannski orðinn þreytt/ur á að reyna að bjarga öðrum? Staldraðu þá við og spyrðu hver er undirliggjandi þörf eða hvati að þessari hegðun. Þú getur breytt þessu mynstri, með kjarki og kærleika, þér og öðrum til góðs. 🥰

17/04/2026

Að vera sáttur við núið og fortíðina og sjá gjafirnar í öllu sem gerist er mun vænlegra til friðar og rólegheita í taugakerfinu. Við verðum skýrari í hugsun og bregðumst við af meiri visku í aðstæðum. Samskipti batna og framtíðin verður meira spennandi.

🌟 The Work er aðferð, sem ég lærði hjá Byron Katie, og hefur gert kraftaverk í mínu lífi. Hún er öflug leið til að skapa nýtt sjónarhorn á erfiðar aðstæður og fólk - og í framhaldi geta kraftaverk gerst.

🍀 Fylgist með þegar næsta námskeið mitt verður haldið um miðjan maí - Nánar auglýst síðar.

thework.com

16/04/2026

Er ofurþörf fyrir velgengi, virðingu og peninga? Hvað erum við að flýja þegar þessi þörf stýrir okkur? 🧐

15/04/2026

Hvernig gengur að reyna að breyta öðrum?

14/04/2026

Ekki óttast að fylgja draumum þínum og sýna hjarta þitt 💚 Þú veist aldrei hver er þinn síðasti dagur!

13/04/2026

Er nýkomin heim eftir geggjaða ferð til Perú. Hún var sambland af andlegum og menningarlegum uppákomun. En hvað er andlegt ferðalag? Andlegur þroski er oft ekki auðveldur og engin halelúja eða bliss tilfinning. Við höfum flest (ef ekki öll) áföll í kerfinu okkar sem valda tilfinningalegum og jafnvel líkamlegum sársauka. . . og hindra að við blómstrum sem best við gætum. Sársaukinn sem innri partar okkar bera, liggur djúpt í undirvitund okkar, og er erfitt að horfast í augu við. Alls lags fíknir hafa það hlutverk að deyfa tilfinningalegan sársauka.

Í Perú voru shamanar og andans fólk með seremoníur sem m.a. opnuðu inn á falinn sársauka og hreinsuðu út erfiða orku. . . og ég hristist og grét óviðbúin. Það kalla ég ANDLEGT FERÐALAG! Að skoða og samþykkja skuggana sína; skömm, sorg og óþægilegar tilfinningar - og læra að elska sig alla/n skilyrðislaust er andlegt ferðalag – þó enginn dans á rósum. Þó fæðing sé dásamlegt kraftaverk þá er hún aldrei átakalaus - hvorki fyrir móður né barn.

Ung kona með fallega sál las fyrir mig í vatn sem tekið var úr heilagri á í Raqchi, þar segir sagan að Jesús hafi komið sem mjög ungur maður. Ég var mjög snortin þegar hún las úr vatninu sannleikann um minn innri sársauka. 🙏💜

Við endurfæðumst á hverju augnabliki, því allt er jú breytingum háð. Besta leiðin að hamingjunni er SKILYRÐISLAUS SJÁLFSÁST! Gefðu þér tíma til að fara inn á við og hlusta á ÞARFIR ÞÍNAR, því innra líf þitt er mun mikilvægara en ytra umhverfi . . .og út frá því skapast framtíð þín! 🥰

12/04/2026

Mæli með að kynna sér thework.com Eins og töfrar og besta leiðin til að öðlast innri frið og upplifa sátt og kærleika. 🥰

03/04/2026

Himinn og jörð gefa gjafir; súrefni fyrir lífsandann og öll þau efni sem við þurfum til að leika okkur og njóta. Klæði, næringu og skjól. Finnum þakklætið streyma og heilunina sem fylgir þeirri tilfinningu! 🙏💖

24/03/2026

Hvað skyldi fólk vera að hugsa um mig? Þarf ég að breyta því? Ef JÁ - af hverju? Er það hægt?

Að sleppa tökunum á því að vilja stjórna öðrum og reyna að breyta þeim er hægara sagt en gert. Það er þó eina leiðin til að öðlast innri frið, róa taugakerfið . . . og geta sofið. Við erum öll frjáls að hugsa og gera það sem við veljum - hvað svo sem öðrum finnst um það - og hvort sem það er talið rétt eða rangt.

Við getum sett reglur og bannað einhverjum að hundsa okkur, stela frá okkur eða öskra. EN við getum ekki ákveðið hvort viðkomandi fer eftir óskum okkar. Þegar við trúum að við höfum það vald kostar það ómælda streitu og pirring.

Til að sleppa tökunum er gott að GEFA MEÐVITAÐ öðrum FRELSI (í huganum) til að hugsa það sem þeir hugsa - og gera það sem þeir gera. Það gefur skýrari sýn og við erum betur í stakk búin að bregðast við á gagnlegan hátt. Allir eru jú með fullt frelsi í reynd. . . á hverju augnabliki.

Við getum líka GEFIÐ OKKUR sjálfum MEÐVITAÐ frelsi til að hugsa það sem við hugsum og gera það sem við gerum. Það er jú hvort eð er raunveruleikinn.

Að segja (í huganum eða upphátt) "Ég gef mér/þér fullt frelsi til að líka illa við . . . . og liggja í leti upp í sófa" þýðir ekki endilega að ég velji það; það þýðir einfaldlega að ég er FRJÁLSBORIN andleg vera. Öll hegðun hefur afleiðingar . . . og í því felst lærdómur.

Þú ert hvorki hugsanir þínar né tilfinningar.

Far í friði . . .

23/03/2026

17/03/2026

Þarf ég á viðurkenningu og ást annarra að halda til að upplifa hamingju? Ef svarið er já . . . get ég verið viss?

Hvernig líður mér þegar ég trúi því? Hvernig kem ég þá fram við aðra . . . og sjálfa/n mig?

Hvernig væri ég í samskiptum við aðra . . . og sjálfa/n mig, ef ég hefði ekki þá trú?

Væri ekki spennandi að gera tilraun í einn dag - án þessarar trúar - og sjá hvað gerist?

14/03/2026

💝 Viltu skilyrðislausa ást? „Já takk!“ Líklega eitthvað sem ekkert okkar myndi afþakka.
En get ég trúað því að ég eigi skilið 100% skilyrðislausa ást? Í alvörunni. . . get ég það?

Get ég mögulega elskað mig 100%, ákkurat eins og ég er og án þess að þurfa að breyta mér? Ef ekki, get ég þá ætlast til að aðrir geri það?

Svo er spurning hvort ÉG geti mögulega elskað annan - án þess að vilja umbreyta honum í annan karakter?

Ef við höfum óslökkvandi þörf fyrir að stjórna öðrum og breyta, þá gæti verið besta gjöfin að yfirgefa sambandið - engum finnst jú gott að vera niðurlægður með særandi aðfinnslum. Sársauki í samböndum getur líst sér í grimmilegri keppni; pílukasti, þar sem markið er hjörtu hvors annars - enginn vinnur og öllum blæðir!

Skilyrðislaus ást er heilandi. Hana finnum við auðveldlega gagnvart börnum okkar og gæludýrum . . . og þar liggja oft mörkin . . . því miður.

"Sælla er að gefa en þiggja!" Amk. öruggara að byrja þar. Þú getur ekki gefið það sem þú átt ekki. Hver fruma í þér er sköpuð með kærleiksorku – ljósi sem hægt er að mæla, og margir greina. Kveiktu á þessu ljósi og leyfðu því að flæða eins og kröftugur foss. Þú munt finna vellíðan og gleði í huga og hjarta. . . sem smitar aðra.

Verum óhrædd við að deila ást. Engu er að tapa, því við missum hvorki sjálfstæði né þurfum að beygja okkur undir aðra. Oft er svarið "nei" kærleikurinn í reynd.

Mæli með mannræktarsamtökunum Al – anon (frítt) eða annari leið til að efla frelsi, kærleika og virðingu gagnvart sjálfum sér og öðrum.

Án FRELSIS er ástin fölsk.

Ljósmynd eftir Helgu Birgis - Geggu