24/03/2026
إزاي تقنع الناس بنظام بيعالج جميع الأمراض؟
مضاعفات السكر من النوع الأول بتبدأ تظهر بعد خمس سنين من التشخيص..
السكر من النوع التاني ممكن يتم اكتشافه بعد عشر سنين من بدايته..
مرضى ضغط كتير بنلاقيهم في الطوارئ أول مرة بفشل كلوي من الضغط المرتفع اللي بقاله سنين وهما ميعرفوش..
مريض القلب أما يوقف النهارده أدوية السيولة والدهون مش هتجيله جلطة تآني يوم ..
فأنت هتلعب على إن مضاعفات الأمراض المزمنة بتاخد وقت طويل عشان المريض يحس بيها ..
زائد إن الإنسان بطبعه مش بيحب إحساس انه محتاج علاج مستمر والتكلفة المادية للعلاج والفحوصات بقت حمل كبير على الناس..
فأنت هتطلع تقول للناس مفيش حاجة اسمها مرض مزمن..
امشي على النظام بتاعي هتخف ..
بس لو انت مريض مزمن الأحسن تتواصل مع اللي عامل النظام في استشارة مدفوعة بالدولار عشان يقولك تعمل ايه..
ومبروك عليك انت كده خفيت من الضغط والسكر والقلب والكلى وكل حاجة..
لكن هنا هتقابلك مشكلة مع المرضى ..
إن المريض هيقيس السكر بعد ما وقف العلاج هيلاقيه عالي..
يشوف الضغط يلاقيه في السما..
يعمل تراكمي ودهون ووظايف كلى يلاقي كل حاجة ملخبطة..
وبكده مش هيلاقي نفسه خف ولا حاجة.. وممكن ميقعش في الفخ..
بس دي ليها حل شيطاني ..
هتقنع المريض إن السكر العالي دليل إن الكبد بتاعه شغال كويس..
والضغط بيعلى عشان يفتح الشرايين..
والتراكمي ملوش دعوة بالسكر..
والدهون ملهاش علاقة بالجلطات..
والكرياتنين ملوش دعوة وظايف الكلى لأن مفيش كلى بتفشل أصلاً ..
والكلام سهل محدش هيدور وراك أهم حاجة تقوله وانت بتزعق عشان الناس تحس إنك واثق من نفسك..
وكده كده انت بتقول نص الحقيقة والنص التاني بيبقى تأليف فمحدش يقدر يكشفك غير المتخصصين اللي هتقول عليهم كلهم منتفعين وبيتاجروا بأمراض الناس..
المشكلة التانية إن بعض المرضى ممكن على النظام برضه ويتعبوا؟
مريض سكر يجيله خراج أو غيبوبة مثلاً أو مريض قلب يتحجز في العناية بجلطة..
لكن الحل برضه موجود ..
هتقوله انت اللي لخبطت في النظام..
لقيته ماشي على النظام بالحرف.. هتقوله تلاقيك في آخر شهر كلت لحمة واللحوم اللوقتي وحشة أو جبت سمكة من أحمد عيسى أو اتعزمت بره وحد حط لك فص توم من غير ما تحس.. مش هتغلب يعني..
ولو عرفت تشوف كام أدمن يعملك شوية جروبات ع النت وشوية لجان يقعدوا يكتبوا إن كان عندهم كل أمراض الدنيا وخفوا وبقوا زي الفل الناس هتصدق فعلاً إنها خفت وحتى اللي صحته هتتدهور هيخاف يتكلم..
والبلوك والاتهامات موجودة لأي حد هيقول إنه تعب على النظام لأن النظام شفاء لجميع الأمراض ويناسب جميع البشر ولا يأتيه الباطل من بيد يديه ولا من خلفه..
طب لو المريض مات؟
فده أجله اللي ربنا كاتبه ليه من بداية الخلق.. هنكفر ولا إيه! والنظام مش سبب ولا حاجة..
ده قضاء وقدر..
وعلى أما يفوت عشر سنين ولا عشرين سنة وتكون المضاعفات ظهرت على أغلب الناس اللي كان سكرها ٥٠٠ وضغطها ٢٠٠/١٠٠ والدهون بتاعتها فوق الـ ٣٠٠ تكون عملت لك كام مليون من الميديا والاستشارات وشفت لك نصباية جديدة.
#الطيبات
