غرس للإرشاد النفسي والأسري

27/09/2025

كل يوم بنركض… شغل، التزامات، مطالب ما بتخلص..
والضغط صار جزء من روتين حياتنا اليومي…
الحقيقة إنه الضغط إذا ما تفرغ بطريقة صحية بيتحول لانفجار..!
في ناس بتفرغ بصرخة… في ناس بمرض… وفي ناس بانعزال..
تعلّم توقف توخذ بريك، تتنفس، وتقول: (أنا مش آلة)
لأنه صحتك النفسية مش رفاهية…
هي أساس قدرتك لحتى تكمّل..

23/09/2025

أصعب جملة بنسمعها:
(أنا هيك وما رح أتغير)
لكن الحقيقة إنه التغيير مش مستحيل…
المستحيل إنك تضل على حالك وتستنى نتائج مختلفة..
زي اللي بحفر بنفس الحفرة وبستنى يشوف إشي جديد.
التغيير مؤلم لأنه بيكسر عادات قديمة وبجبرك تواجه نفسك..
بس كل خطوة صغيرة نحو التغيير..
هي بمثابة انتصار..
تذكّر منيح:
التغيير مش حدث… التغيير رحلة..!
#التغيير

#صحةنفسية

20/09/2025

الوحدة إلها نوعين:
وحدة بتعزلك وبتكسر قلبك…
ووحدة بتعلمك تحب نفسك..
أخطر شيء إنك تدور على أي علاقة بس عشان تهرب من الوحدة الأولى… فتوقع بوحدة أعمق..!
الوحدة مش عدو…
الوحدة مرآة بتورجيك مين أنت من دون ضجيج الناس..
استغلها لتبني نفسك…
قبل ما تبني علاقتك مع غيرك..
#وحدة
#عزلة
#تجنب

08/09/2025

في أوقات بتكون كلمة (أنا جنبك) أهم من ألف نصيحة بالنسبة للزوجة..
مساندتك الها كزوج مش إنك تحل مشاكلها..
المساندة إنك تكون موجود، حاضر، سامع...
الزوجة ما بدها قاضي يحكم، بدها صدر يحتوي..
والدعم النفسي بهيك حالات مش محتاج تخصص
قد ما هو محتاج قلب ❤ يحس وآذان تسمع..
#مساندة
#دعم
#احتواء
#حب

07/09/2025

رحلة الشفاء مش خط مستقيم…
الشفاء طريق فيه صعود ونزول..
فيه أيام قوة وأيام ضعف..
المهم إنك ما توقف.. حتى لو خطوتك صغيرة..
الماضي ما رح يختفي..
بس رح يتحول لجزء من قصتك البطولية بدل ما يسيطر على حاضرك..
والشفاء مش إنك ترجع زي قبل…
بالعكس..!
الشفاء إنك تبني نسخة أقوى وأوعى وأفضل من نفسك..
تذكر دائماً:
إنت بتستاهل تطلع من جراحك النفسية لسلامك النفسي..

#تشافي

01/09/2025

الماضي مش زنزانة…
الماضي مدرسة..
لكن المشكلة إنه في ناس رافضين يتخرجوا من هالمدرسة، وعايشين بدرس واحد طول حياتهم..
بتسمعهم دايمًا بقولوا: (لو ما صار كذا… حياتي كانت أفضل)..
الحقيقة؟ اللي صار صار، واللي جاي هو الأهم..
العيش في الماضي بيخليك تخسر الحاضر والمستقبل سوا..
حرر نفسك من قيود الماضي…
وخلي الماضي صفحة.. مش كتابك كله..!!

31/08/2025

أقسى إنسان ممكن تقابله بحياتك..
أحيانًا بيكون نفسك..!!
جلّد الذات بيدمر ثقتك بنفسك وبيخليك سجين أخطائك..
ضروري تعرف إنه الخطأ مش نهاية العالم..
بل هو بداية ودرس..
راقب نفسك وتأكد هل اللي بصير معك هو مجرد جلّد للذات
ويلا الأمور اطورت عندك ووصلت لوسواس تأنيب الضمير؟؟
تذكر تعامل نفسك بنفس الرحمة اللي بتعامل فيها غيرك
الحياة مش بس أبيض وأسود
تذكر إنه في منطقة رمادية بالوسط..!!

#وسواس

30/08/2025

السلام النفسي مش إنك تبطل تواجه مشاكل بالحياة..
السلام هو إنك تتعامل معها بهدوء..
والهدوء مش غياب الضجيج من راسك..
الهدوء هو قوة داخلية كامنة..
السلام مش مكان توصله..
السلام قرار تتخده بحياتك..
ابحث عنه جواك، مش حواليك..

24/08/2025

الوظائف الرقمية والعمل عن بعد.. مرونة مبهجة أم عزلة قاتلة؟
************
ويبين الاستشاري النفسي الأسري الدكتور أحمد سريوي، أن العمل عبر الإنترنت يساهم في توفير الوقت والجهد مقارنة بالعمل التقليدي، إذ يختصر ساعات التنقل المرهقة، ويقلل من الاستنزاف الجسدي والذهني الناتج عن الازدحام أو الانتظار.
وهذا يمنح الموظف طاقة أكبر للتركيز على مهامه، ويتيح له استثمار الوقت في الراحة أو التطوير الذاتي.
كما يوفر العمل عن بعد مرونة عالية في اختيار بيئة العمل الأنسب للفرد، سواء في المنزل أو في أي مكان آخر مريح له، ويمنحه حرية تنظيم ساعات العمل بما يتناسب مع نمط حياته وإيقاع يومه، مما يعزز شعوره بالاستقلالية الوظيفية.
ووفق سريوي، يزيد هذا النمط من فرص العمل للأشخاص في المناطق النائية أو لذوي الإعاقة، إذ يزيل الحواجز الجغرافية والبدنية التي كانت تحد من إمكاناتهم.
فيستطيع ذوو الإعاقة أو سكان المناطق البعيدة الوصول إلى فرص عمل تناسب مهاراتهم من دون الحاجة إلى التنقل أو مواجهة صعوبات البنية التحتية.
ويوضح سريوي، كذلك يساعد العمل عبر الإنترنت في تقليل التكاليف على الموظف وصاحب العمل؛ فالموظف يوفر مصاريف النقل والوجبات خارج المنزل، بينما يقلل صاحب العمل من تكاليف المكاتب والتجهيزات. وهذه المعادلة تخلق بيئة أكثر استدامة من الناحية الاقتصادية للطرفين.
أما تأثير العمل عبر الإنترنت على التوازن بين الحياة الشخصية والحياة المهنية، فهو يتحقق بالطبع إذا أدير بوعي؛ إذ يمكن أن يعزز التوازن عبر منح الموظف وقتا أكبر للعائلة والهوايات. بحسب سريوي، لكن في حال غياب الحدود الواضحة، قد يحدث تداخل بين العمل والحياة الشخصية، مما يسبب إجهادا إضافيا.
ويقول "إن العمل عبر الإنترنت يقلل بدرجة ملحوظة من التفاعل الوجاهي، وهو ما قد يؤثر على روح الفريق وبناء العلاقات المهنية العميقة. ومع ذلك، يمكن تعويض ذلك من خلال الاجتماعات الافتراضية الفعالة والأنشطة التفاعلية عبر الإنترنت".
ويذكر سريوي، أن من أبرز المخاطر التي تواجه العاملين عبر الإنترنت: تسريب البيانات، والاختراقات الإلكترونية، أو إساءة استخدام المعلومات الشخصية. لذلك، من الضروري الالتزام بإجراءات الأمان الرقمي والتدريب المستمر على حماية المعلومات.

تغير شكل العمل في السنوات الأخيرة، فلم يعد حبيس المكاتب ذات الجدران الزجاجية والممرات الطويلة، بل أصبحت الشاشة هي المكتب الجديد. فالعمل عبر الإنترنت فتح الباب أمام ...

20/08/2025

القلق مش ضعف…
القلق جهاز إنذار بيحاول يحميك من الخطر..
المشكلة بتصير لما يتحول الإنذار لجرس شغال 24 ساعة، حتى وانت آمن..
القلق بيستنزف الطاقة، بيمنعك من الاستمتاع باللحظة، وبيخليك أسير فكرة ما صارت..
العلاج يبدأ لما تفهم: إنه (مش كل فكرة حقيقة)
وأنه (80 - 90% من مخاوفك لا تتحقق أبدا)
وأنه (مهم جداً نسترخي لنهدى ومُخنا يرتاح)
#القلق

19/08/2025

أسهل كلمة ممكن تقولها: (أنا منيح)…
وأصعب كلمة: (أنا محتاج مساعدة)..!!
مجتمعنا للأسف لساته بيشوف اللي بروح لمعالج نفسي إنه ضعيف…
مع إنه أذكى إنسان..
لأنه القوة الحقيقية مش إنك تتحمل وجعك لوحدك…
القوة إنك تدور على علاج قبل ما يكسرك..

16/08/2025

العلاقة اللي بتخليك تحس إنك قليل…
مش حب، هاي استنزاف..
لما تتحول كلمات الطرف الآخر لسكاكين، ونقده لجرح شبه يومي…
اعرف إنك عايش
الحب مش امتحان قوة ولا معركة إثبات…
الحب الحقيقي بيكبرك، ما بيكسر ظهرك..
انسحابك مش خسارة…
هو استعادة نفسك..