28/07/2025
ប៉ុន្មានថ្ងៃនេះ ភ្នែករបស់ខ្ញុំនៅជាប់ជាមួយអេក្រង់ទូរស័ព្ទ។
ពីពត៏មានមួយទៅមួយ ជាមួយនឹងអារម្មណ៍ ក្តុកក្តួល ភ័យខ្លាច ក្រៀមក្រំ ជ្រួលច្របល់ ភាពមិនប្រាកដ ដោយសារតែចោរសៀមធ្វើសង្គ្រាមឈ្លានពាន ដ៏ឃោឃៅ ប្រើគ្រប់កលល្បិច មកលើប្រទេសខ្ញុំ ជាពិសេសការពលីជីវិតរបស់វរៈជនរបស់ជាតិយើង។ ពត៌មាននីមួយៗប្រៀបដូចដំុថ្មដ៏ធ្ងន់សង្កត់មកលើដើមទ្រូង រូបភាពនីមួយៗចាក់ចូលដួងចិត្តយ៉ាងឈឺចាប់។
ខ្ញុំនៅតែអូសចុះឡើង ដោយគិតថាអាចបន្ទាប់ទៅនឹងមានដំណឹងប្រសើរកើតឡើង។ ប៉ុន្តែជំនួសមកវិញ វានាំមកនូវភាពភ័យខ្លាចកាន់តែច្រើនឡើង។ ដៃខ្ញុំចាប់ផ្តើមត្រជាក់ បេះដូងខ្ញុំចាប់ផ្តើមបុកលោតខុសចង្វាក់ កន្ត្រាក់ញាប់ ពិបាកដកដង្ហើម។ ភាពតានតឹង ថប់បារម្ភ ចាប់ផ្តើមចូលមក ដែលមិនមែនស្ថិតតែក្នុងចិត្តទេ វាស្ថិតក្នុងរាងកាយខ្ញុំ សង្កត់រាងកាយខ្ញុំជាប់សឹងតែរើមិនរួច។
ខ្ញុំដឹងថា ខ្ញុំមិនមែនមានអារម្មណ៍នេះម្នាក់ឯងទេ។ ជនរួមជាតិយើងជាច្រើន ក៏ប្រហែលកំពុងមានអារម្មណ៍នេះ ដូចគ្នា ហើយសួរខ្លួនឯងថា៖ តើខ្លួនឯង ឬមនុស្សជាទីស្រឡាញ់របស់យើង កំពុងមានរឿងអ្វី?
បន្ទាប់មក…
ខ្ញុំចាប់ផ្តើមពីការអនុញ្ញាតឲ្យខ្លួនឯងព្រមដាក់ទូរស័ព្ទចុះ ហើយចំណាយពេលប៉ុន្មាននាទីដោយផ្តោតទៅលើដង្ហើមរបស់ខ្ញុំ។ ខ្ញុំរំលឹកខ្លួនឯងថា ខ្ញុំមានអ្នកដឹកនាំដ៏ឆ្លាតវៃ ពពេញទៅដោយសមត្ថភាព យុទ្ធសាស្រ្តនិងបទពិសោធន៍ ព្រមទាំងកងកម្លាំងដ៏មោះមុតកំពុងតែការពារទឹកដីមួយនេះ ខ្ញុំជឿជាក់ថាពួកយើងនឹងអាចឆ្លងផុត និងទទួលបានសន្តិភាពត្រលប់មកវិញ។
ទោះវាជាសង្គ្រាមឈ្លានពាន ជាភាពភ័យខ្លាច ជាក្តីទុក្ខសោក តែយើងត្រូវតែការពារសន្តិភាពក្នុងចិត្ត ពីព្រោះសន្តិភាពនេះហើយដែលជួយឲ្យយើងរស់រាននិងភាពស្ងប់សុខអាចរួមសាមគ្គីគ្នាបានដើម្បីសង្គមជាតិទាំងមូល។
ជូនដល់អ្នកគ្រប់គ្នាដែលកំពុងតែតានតឹង ថបបារម្ភ៖
✨ ចូរអ្នកសម្រាក ដកដង្ហើមឲ្យបានវែងៗ មួយៗ
✨ គេង និង បរិភោគអាហារ ឲ្យបានទៀងទាត់ និងគ្រប់គ្រាន់
✨ ផ្សាភ្ចាប់ខ្លួនឯងជាមួយមនុស្សជាទីស្រឡាញ់
"ថែរក្សាផ្លូវចិត្តខ្លួនឯង ដើម្បីភាពស្ងប់សុខនិងសន្តិភាពផ្លូវចិត្តជនរួមជាតិយើង"
