Medical news for Cambodia

25/10/2025

ដំណឹងជ្រើសរើសបុគ្គលិក
មន្ទីរពេទ្យកាល់ម៉ែតត្រូវការជ្រើសរើសបុគ្គលិក ដែលមានលក្ខណៈសម្បត្ដិ ដូចដែលបានភ្ជាប់ជូន។

23/10/2025

អ្វីជាជំងឺរមួលទងពងស្វាស ( Testicular torsion ) ?

ការរមួលទងពងស្វាស ភាគច្រើនកើតលើបុរសដែលមានវ័យជំទង ឬទើបតែពេញវ័យ ត្រូវបានចាត់ទុកជាជំងឺបន្ទាន់ ដែលទាមទារការធ្វើរោគវិនិច្ឆ័យឆាប់រហ័ស ដើម្បីអោយការព្យាបាលមានប្រសិទ្ធិភាពខ្ពស់ ។

១) តើអ្វីជាជំងឺរមួលទងពងស្វាស?
ការរមួលទងពងស្វាសជាការរមួលនៃរចនាសម្ព័ន្ធខ្សែមេជីវិតឈ្មោល និងសរសៃឈាមរបស់ពងស្វាសដែលនាំអោយមានការកកស្ទះសរសៃឈាមទៅចិញ្ចឹម ពងស្វាស(ischemia) ។

២) រោគសញ្ញានៃជំងឺរមួលទងពងស្វាស
- ការចាប់ផ្តើមឈឺ ភ្លាមៗ បន្ទាប់ពីលេងកីឡា រឺ លំហាត់ប្រាណ
- ឈឺចុកចាប់ខ្លាំងនៅត្រង់ពងស្វាសម្ខាង
- ពងស្វាស មានសភាពកន្ទ្រាក់ទាញទៅលើបើប្រៀបធៀបនឹងម្ខាងទៀត
- ពងស្វាសហើមធំ រឹង ប្រែពណ៍ខុសធម្មតា
- អាចមានសញ្ញាចង្អោរ ចង់ក្អួត ក្តៅខ្លួន ជាដើម។

៣) រោគវិនិច្ឆ័យអមគ្លីនិក
- អេកូនៅតំបន់ទងពងស្វាស ដើម្បីរកមូលហេតុច្បាស់លាស់ (Testicular Ultrasound)
- អេកូសរសៃឈាមទៅចិញ្ចឹមពងស្វាស (Doppler Testicular Ultrasound)

៤) ការព្យាបាល
ការវះកាត់ ត្រូវធ្វើឡើងបន្ទាន់ ក្នុងករណី រកឃើញថាមានជំងឺរមួលទងពងស្វាស ។
ក្នុងការវះកាត់ យើងអាចវាយតម្លៃជាក់ស្តែងលើស្ថានភាពនៃពងស្វាស ៖
- រយៈពេលក្រោម ៦ម៉ោង អាចនៅមានឈាមមកចិញ្ចឹមវិញ បន្ទាប់ពីពន្លានៃការរមួល យើងអាចដេរផ្ជាប់នឹងថង់ពងស្វាស (surgery detorsion + Orchidopexy) ។
- រយៈពេលលើសពី៦ ទៅ១២ម៉ោង ក្នុងលក្ខខណ្ឌ បើក្នុងការវះកាត់ពងស្វាសមិនមានឈាមទៅចិញ្ចឹមវិញទេ យើងនឹងធ្វើការកាត់ពងស្វាសដែលខូចនោះចេញតែម្តង (Orchidectomy)។

បើបងប្អូន មានបញ្ហាឈឺចុកចាប់នៅតំបន់ពងស្វាស សូមប្រញាប់អញ្ជើញមកជួបជាមួយក្រុមគ្រូពេទ្យឯកទេស នៅមន្ទីរពេទ្យ ដើម្បីពិគ្រោះ និង ព្យាបាលទាន់ពេលវេលា ប្រកបដោយគុណភាព និងប្រសិទ្ធិភាពខ្ពស់។

Source:calmettehospital
Medical news for Cambodia

22/10/2025

ការឈឺនៅកដៃ ចាំបាច់ត្រូវតែព្យាបាល!

ក) មូលហេតុនៃជំងឺនេះវាធ្វើឲ្យមាន៖
- ការឈឺចាប់នៅកដៃ
- ម្រាមដៃចាប់កាន់អ្វីៗមិនបាន
- គាំងចលនាសន្លាក់
- ស្វិតសាច់ដុំ

លោកអ្នកគួរតែមានការចាប់ផ្ដើមព្យាបាលដោយចលនាឲ្យបានឆាប់រហ័ស ក្នុងគោលបំណងពត់ចលនាសន្លាក់កដៃដែលគាំង បង្កើនចលនាកដៃ និងម្រាមដៃ ការចាប់កាន់វត្ថុផ្សេងៗ និងស្ដារចលនាការងារប្រចាំថ្ងៃឡើងវិញ ដែលអាចបម្រើការងារបានដូចធម្មតា។

ខ) វិធីព្យាបាល៖
- ព្យាបាលដោយស្អំសរសៃម៉ាស៊ីន Micro Thermy
- ព្យាបាលដោយម៉ាស៊ីន Ultrasound
- ព្យាបាលដោយបន្ទន់ជាលិកាសាច់ដុំដែលជាប់ស្អិត
- ព្យាបាលពត់សន្លាក់កដៃ

គ) តើត្រូវធ្វើចលនាលំហាត់ដោយខ្លួនឯងយ៉ាងដូចម្ដេចខ្លះ?
- ការបត់និងលា កដៃ
- ត្រឡប់បាតដៃផ្កាប់ និងផ្ងារ
- ប្រអប់ដៃងាកទៅខាងមេដៃ និងទៅខាងកូនដៃ
- ទាញពន្លាតដោយបត់កដៃ
- ទាញពន្លាតដោយច្រត់កដៃ
- ចលនាបត់លាម្រាមដៃ

ការតាមដាន ការពិគ្រោះ ការពិនិត្យព្យាបាល ការស្ដារចលនាប្រចាំថ្ងៃឡើងវិញ ជាមួយគ្រូពេទ្យព្យាបាលដោយចលនាជាការចាំបាច់។ ដូចនេះ នៅពេលលោកអ្នកមានបញ្ហាឈឺនៅកដៃ លោកអ្នកគួរតែអញ្ជើញ ទៅជួបគ្រូពេទ្យជំនាញព្យាបាលដោយចលនានៅមន្ទីរពេទ្យដើម្បីទទួលការព្យាបាល និងការណែនាំលម្អិតបន្ថែមពីបញ្ហានេះ។

Source:calmettehospital
Medical news for Cambodia

21/10/2025

រោគសញ្ញាដុំពកនៅរន្ធទ្វារបាត Les boules anales !

១ តើដុំពកនៅបរិវេណទ្វារបាត (គូថ) សុទ្ធតែជាជំងឺឬសដូងបាតមែនដែរឬទេ?
ដុំពកនៅបរិវេណទ្វារបាតមិនមែនសុទ្ធតែជាជំងឺឬសដូងបាតនោះទេ ដូច្នេះហើយអ្នកជំងឺគួរតែមកពិគ្រោះនិងពិនិត្យរន្ធបាត Examen proctologique ដើម្បីធ្វើរោគវិនិច្ឆ័យអោយបានច្បាស់លាស់ និងធ្វើការព្យាបាលអោយបានទាន់ពេលវេលា។

២ ជំងឺផ្សេងៗដែលធ្វើអោយមានដុំពកនៅតំបន់រន្ធបាត មានដូចជា ការលានចេញនៃឫសដូងបាតខាងក្នុង ឬសដូងបាតខាងក្រៅដែលហើមខ្លាំង បូសនៅបរិវេណរន្ធបាតនិងបូសអន្ទង់ សាច់ដុះនៅបរិវេណរន្ធបាត និងក្នុងរន្ធបាត ជំងឺកាមរោគ (រួមមានជំងឺសិរមាន់ ដំបៅនៃជំងឺស្វាយ ជំងឺពងបែក) គីសក្រពេញខ្លាញ់និងក្រពេញគល់រោម មហារីករន្ធបាត ការលានធ្លាក់ក្រសាលគូថ។

៣ រោគសញ្ញាសំខាន់ៗបន្ថែម ដែលតំរូវអោយអ្នកជំងឺប្រញាប់មកពិគ្រោះជាមួយក្រុមគ្រូពេទ្យឯកទេស ៖
-ដុំពកដែលមានលក្ខណៈរំខាន និងមានសភាពឈឺចាប់
-ដុំពកដែលមានលក្ខណៈងាយហូរឈាម ឬមានកំនកឈាមចេញមកក្រៅ
-ភាពសើមនៅបរិវេណរន្ធបាត ឬកន្ទួលដែលមានសភាពឈឺចាប់ ឬធ្លាយហូរទឹករងៃ អាចមានក្លិនចំលែកចេញមកក្រៅ

៤ ការព្យាបាល៖
វិធីព្យាបាលគឺប្រែប្រួលទៅតាមមូលហេតុនៃជំងឺនីមួយៗ
- ករណីជំងឺឫសដូងបាតដែលហើមឈឺ អ្នកជំងឺអាចត្រូវបានព្យាបាលដោយប្រើថ្នាំគ្រាប់បំបាត់ហើម បំបាត់ការឈឺចាប់ និងថ្នាំបន្ទន់លាមក ក្នុងពេលជាមួយគ្នានោះអ្នកជំងឺអាចប្រើក្រែម សំរាប់លាបទៅលើដុំនោះ។ ករណីខ្លះគ្រូពេទ្យអាចធ្វើការចោះយកកំណកឈាមដែលធ្វើឲ្យអ្នកជំងឺ បានធូរស្បើយពីការឈឺចាប់ភ្លាមៗ។
- ករណីបូសដែលមានការរំខាន ឬឈឺចាប់ស្រួចស្រាល គេអាចធ្វើការវះបង្ហូរខ្ទុះបន្ថយការឈឺចាប់បណ្តោះអាសន្ន ដោយប្រើថ្នាំស្ពឹក និងចំហរមុខរបូសដែលត្រូវអោយមានការតាមដានមួយរយះ។ ចំនែកឯបូសអន្ទង់ដែលមានផ្លូវពីខាងក្នុងរន្ធបាតចាក់ចេញមកខាងក្រៅ តម្រូវអោយមានការវះកាត់ផ្ដាច់ផ្លូវរូង និងប្រភពដើមនៃបូសដែលស្ថិតនៅខាងក្នុងរន្ធបាត។ ការវះកាត់នេះអាចនឹងត្រូវធ្វើឡើង២ឬ៣ដង ប្រសិនបើបូសនោះស៊ីរូងប៉ះពាល់សាច់ដុំខ្ចិបបាតធ្ងន់ធ្ងរ។
- ករណីជំងឺសិរមាន់នៅរន្ធគូថ យើងត្រូវធ្វើតេស្តបន្ថែមដូចជា Sérologies VHB, VHC, VIH, syphilis ព្រមទាំងរកជំងឺប្រមេះទឹកបាយ និងប្រមេះទឹកថ្លា ក្នុងល័ក្ខខ័ណ្ឌដែលមានវិជ្ជមានទៅលើមេរោគណាមួយ យើងត្រូវព្យាបាលវាអោយបានឆាប់រហ័ស។ រីឯការព្យាលជំងឺសិរមាន់ គឺត្រូវធ្វើឡើងដោយការកាត់ចេញ ឬដុតកំទេចដោយកម្តៅនៅក្នុងបន្ទប់វះកាត់។
- ករណីសាច់ដុះនៅបរិវេណរន្ធបាត និងក្នុងរន្ធបាតដែលមិនមានរោគសញ្ញា ឬករណីខ្លះរំខានដល់ជីវភាពប្រចាំថ្ងៃ គួរតែមានការមកជួបពិគ្រោះជាមួយនឹងក្រុមគ្រូពេទ្យឯកទេសជាមុនសិន ដើម្បីពិនិត្យនិងធ្វើរោគវិនិច្ឆ័យអោយបានច្បាស់លាស់ មុននឹងឈានទៅដល់ការព្យាបាល។

ប្រសិនបើលោកអ្នកមានមានបញ្ហា ឬរោគសញ្ញាដូចដែលបានរៀបរាប់ខាងលើ សូមអញ្ជើញរួសរាន់មកជួបពិគ្រោះជាមួយក្រុមគ្រូពេទ្យឯកទេស នៃមន្ទីរពេទ្យ ដើម្បីទទួលបានការធ្វើរោគវិនិច្ឆ័យ និងវិធីសាស្ត្រព្យាបាល ប្រកបដោយប្រសិទ្ធភាពខ្ពស់អោយបានទាន់ពេលវេលា។

Source:calmettehospital
Medical news for Cambodia

20/10/2025

សេចក្តីជូនដំណឹង​ ស្តីពីការជ្រេីសរេីសបុគ្គលិកជាប់កិច្ចសន្យា

20/10/2025

04/10/2025

#ការបាក់ខ្ទង់ច្រមុះនិងការព្យាបាល !
Nasal fracture management !

ការបាក់ខ្ទង់ច្រមុះជាជំងឺមួយដែលជួបប្រទះញឹកញាប់នៅពេលបច្ចុប្បន្ននេះ ជាពិសេសនៅមន្ទីរពេទ្យកាល់ម៉ែត ដែលឈរនៅលេខរៀងទី ៣ នៃការបាក់ឆ្អឹងទូទៅនៅលើដងខ្លួនមនុស្ស ហើយជាញឹកញាប់ ការបាក់នេះពុំសូវបានទទួលការព្យាបាលសមស្របឡើយ ជាផលវិបាកបណ្តាលអោយមានការប៉ះពាល់ដល់ការដកដង្ហើម និងខូចទម្រង់មុខជាដើម។

ក) មូលហេតុ បណ្តាលអោយបាក់ខ្ទង់ច្រមុះ ៖
- ការប៉ះទង្គិចផ្ទាល់ទៅលើផ្ទៃមុខដែលងាយនឹងបាក់ខ្ទង់ច្រមុះ
- បច្ចុប្បន្នគ្រោះថ្នាក់ចរាចរណ៍ដោយម៉ូតូ ឬរថយន្តមានប្រហែល ៨០%នៃការបាក់ខ្ទង់ច្រមុះ
- គ្រោះថ្នាក់ដោយកីឡា ជាពិសេសកីឡាប្រដាល់
- គ្រោះថ្នាក់ការងារជាងសំណង់ជាដើមដោយការធ្លាក់ពីទីខ្ពស់
- អំពើហឹង្សាក្នុងគ្រួសារជាពិសេសអ្នករងគ្រោះជាស្រ្តី ឬកុមារ

ខ) តើមានរោគសញ្ញាអ្វីខ្លះនៅពេលបាក់ខ្ទង់ច្រមុះ?
- មានការឈឺចាប់នៅលើច្រមុះ
- ហើម ហើយឡើងក្រហមនៅជុំវិញច្រមុះ
- មានហូរឈាមពីច្រមុះ
- មានជាំច្រមុះ ឬរង្វង់ភ្នែក
- ការប្រែប្រួលទ្រង់ទ្រាយខ្ទង់ច្រមុះ
- មានការពិបាកដកដង្ហើម
- រន្ធច្រមុះម្ខាង ឬសងខាងហាក់ដូចគេចុកជិត

គ) ការធ្វើរោគវិនិច្ឆ័យ៖
- ការសាកសួរ និងការពិនិត្យដោយគ្លីនិកអាចធ្វើរោគវិនិច្ឆ័យការបាក់ខ្ទង់ច្រមុះបាន ដោយយើងអាចដឹងថាវៀច ខ្ទង់ច្រមុះ ឬស្នូរឆ្អឹងប៉ះគ្នាពេលស្ទាប។
- ប៉ុន្តែបច្ចុប្បន្ននេះ ការថតស្កែនដោយម៉ាស៊ីន CT-Scan ទំនើបនៅមន្ទីរពេទ្យកាល់ម៉ែតអាចអោយយើងដឹងពីការបាក់បែក នៅផ្នែកផ្សេងទៀតនៃមុខ ឬបញ្ហាផ្សេងទៀតនៃការប៉ះទង្គិច។
- យើងត្រូវបញ្ជាក់អោយច្បាស់ដែរថាតើច្រមុះអ្នកជំងឺ ពីមុនត្រង់ធម្មតាឬទេ?

ឃ) ការព្យាបាល៖
- គោលបំណងសំខាន់របស់យើង គឺការព្យាបាលទាន់ពេលវេលា សម្រាប់សម្រួលមុខងារដកដង្ហើម និងកែទ្រង់ទ្រាយផ្នែកសម្ជស្ស។
- ការគាស់តម្រង់ខ្ទង់ច្រមុះបាក់ ដែលល្អប្រសើរបំផុត គឺចន្លោះ ៣ម៉ោងបន្ទាប់ពីការប៉ះទង្គិច។
- បើមិនដូច្នេះទេ យើងអាចរង់ចាំចន្លោះ ៣ ទៅ ៧ថ្ងៃនៅពេលដែលហើមជាំស្រកយើងមានភាពងាយស្រួលក្នុងការ ដាក់ឆ្អឹងចូលតាមលំនាំដើមវិញ។
- បើមិនបានតម្រង់ក្នុងចន្លោះ ៧ ទៅ១០ថ្ងៃទេ ឆ្អឹងបាក់ក៏អាចរឹងជាប់បានដែរ តែជាប់ទាំងវៀច និងពិបាកដកដង្ហើម។
- នៅពេលនោះការព្យាបាលទាមទារអោយមានការ បំបាក់ឆ្អឹងឡើងវិញ ហើយមានភាពស្មុគ្រស្មាញ។

ង) តើមានផលវិបាកអ្វីខ្លះនៅពេលបាក់ខ្ទង់ច្រមុះ?
- វៀចជញ្ជាំងខណ្ឌរន្ធច្រមុះ មិនអាចដកដង្ហើមបាន
- មានឈាមដក់នៅនឹងជញ្ជាំងច្រមុះធ្វើអោយស្ទះរន្ធច្រមុះដែរ
- បាក់រហូតដល់ឆ្អឹងខ្ចីខ្ទង់ច្រមុះ
- ធ្លាយ ឬលេចទឹកក្នុងស្រោមខួរ (Cerebrospinal fluid)

«ប្រសិនបើបងប្អូនទាំងអស់ មានការប៉ះទង្គិចលើផ្ទៃមុខ ឬសង្ស័យមានការបាក់ខ្ទង់ច្រមុះ សូមអញ្ជើញមកជួបជាមួយ គ្រូពេទ្យជំនាញឯកទេសនៃមន្ទីរពេទ្យ ដើម្បីធ្វើការពិគ្រោះ និងព្យាបាលអោយទាន់ពេលវេលា ដើម្បីជៀសវាងផលវិបាក មុខងារដកដង្ហើម និងផលវិបាកផ្នែកសម្ជស្ស។»
Source:calmettehospital
Medical news for Cambodia

09/09/2025

កង្វះវីតាមីនD និងផលប៉ះពាល់ទៅលើខួរក្បាល និងប្រព័ន្ធប្រសាទ!

វីតាមីនDមានតួនាទីសំខាន់ណាស់នៅក្នុងការលូតលាស់និងដំណើរការរបស់ប្រព័ន្ធប្រសាទ។ នេះបើតាមការបង្ហាញលើការសិក្សាស្រាវជ្រាវជាច្រើនកន្លងមក វីតាមីនDគឺជា secosteroid ដែលបានមកពីការបំលែងរបស់ 7-dehydrocholesterol នៅក្រោមស្រទាប់ស្បែកអេពីដែម ក្រោមឥទ្ធិពលរបស់កាំរស្មីអ៊ុលត្រាវីយ៉ូឡេ B(UVB)។ ការផ្លាស់ប្តូរបរិស្ថានសង្គមដែលកាត់បន្ថយការប៉ះត្រូវកាំរស្មីព្រះអាទិត្យ ជីវិតក្នុងទីក្រុង ការបំពុលបរិយាកាស របៀបស្លៀកពាក់ បាននាំឲ្យមានកង្វះវីតាមីន D ទោះបីជាយើងរស់នៅតំបន់ត្រូពិចដែលចែងចាំងទៅដោយរស្មីព្រះសុរិយាក៏ដោយ។ កាលណានិយាយពីវីតាមីន D មជ្ឈដ្ឋានទូទៅនឹងគិតភ្លាមដល់ជំងឺពុកឆ្អឹង(Osteoporosis) និងមិនបានដឹងថាវីតាមីន D នៅមានតួនាទីច្រើនទៀតសម្រាប់សារពាង្គកាយយើង។

ក) តើជំងឺប្រព័ន្ធប្រសាទកណ្តាលអ្វីខ្លះដែលអាចណ្តាលមកពីកង្វះវីតាមីនD?
1) ប្រព័ន្ធប្រសាទ កណ្ដាល(Central Nervous System)
- មានការថយចុះទំហំរបស់ខួរក្បាល
- ជំងឺក្រិនប្រព័ន្ធប្រសាទ(Multiple Sclerosis)
- ជំងឺរលាកសរសៃភ្នែក
- ជំងឺអេពីឡឹបស៊ី
- ការប៉ះពាល់ដល់សរសៃឈាមខួរក្បាលនិងការស្ទះសរសៃឈាម
- ជំងឺប៉ាកគិនសុន ( Parkinson)
- ជំងឺស្វិតប្រព័ន្ធសាច់ដុំបញ្ជា(Amyotrophic lateral sclerosis)
- អាចប៉ះពាល់ដល់ការចងចាំនិងជំងឺAlzheimer
2) ប្រព័ន្ធប្រសាទខាងក្រៅ(Peripheral Nervous System)
- ប៉ះពាល់ដល់សាច់ដុំ(ឈឺចុកចាប់ ខ្សោយ)
- ប៉ះពាល់ដល់សរសៃប្រព័ន្ធប្រសាទ

ខ) តើវីតាមីន D មាននៅក្នុងអ្វីខ្លះ?
- អាហារប្រភេទសាច់(ខ្លាញ់ ថ្លើមត្រី ស៊ុតក្រហម ថ្លើមសត្វ ប័រ…)
- អាហារប្រភេទរុក្ខជាតិ(ផ្សិត គ្រាប់ធញ្ញជាតិ បន្លែបៃតងឆៅ ប្រេងបន្លែ…)
ការដែលមិនបានត្រូវពន្លឺថ្ងៃគ្រប់គ្រាន់ កង្វះការទទួលទានអាហារដែលមានវីតាមីន D គឺជាមូលហេតុសំខាន់ដែលនាំឲ្យខ្វះវីតាមីន D

គ)តើធ្វើយ៉ាងណាទើបដឹងថាយើងខ្វះវីតាមីន D ?
សូមទៅជួបពិគ្រោះជាមួយគ្រូពេទ្យជំនាញបើអ្នកមានរោគសញ្ញាដែលសង្ស័យដូចបានរៀបរាប់ជូនខាងលើ។ គ្រូពេទ្យជំនាញនៃមន្ទីរពេទ្យនឹងស្នើសុំការពិនិត្យឈាមមើលកម្រិតវីតាមីន D នៅក្នុងឈាមរបស់យើង ព្រមជាមួយវិធីសាស្ត្រព្យាបាលដែលត្រឹមត្រូវនិងមានប្រសិទ្ធភាព។

Source:calmettehospital
Medical news for Cambodia

04/09/2025

#ជំងឺគីសបបូរមាត់ Mucocele of lip!
(មិនមែនជាជំងឺមហារីកមាត់ធ្មេញទេ)

នៅក្នុងប្រអប់មាត់សម្បូរទៅដោយក្រពេញទឹកមាត់តូចៗ (Minor salivary glands) រាប់លានដែលស្ថិតនៅក្រោមភ្នាសស្តើងសើមក្នុងមាត់។ នៅពេលដែលមានការស្ទះ ឬដាច់រហែកនៃក្រពេញនេះ ធ្វើឲ្យមានកំណើនទឹកដក់ (Mucin) ទៅជាជាលិកាជុំវិញបង្កើតជាគីសក្រពេញទឹកមាត់។
ប្រភេទគីសនេះវាអាចកើតឡើងគ្រប់កន្លែងក្នុងមាត់ លើកលែងតែលើអញ្ចាញធ្មេញ ហើយភាគច្រើនកើតឡើងញឹកញាប់លើបបូរមាត់។

១. មូលហេតុ៖
- ការស្ទះនៃក្រពេញទឹកមាត់តូចៗ
- មូលហេតុចំបងមកពីការខាំបបូរមាត់ ឬប៉ះទង្គិចបបូរមាត់

២. រោគសញ្ញា៖
- មិនមានការឈឺចាប់នោះទេ
- មានពណ៌ក្រហមថ្លា ឬខៀវ
- មានសភាពឡើងប៉ោង និងពេលប៉ះជាដុំទន់រអិល ក្រឡាច់

៣. ការព្យាបាល៖
- ក្នុងករណីមានទំហំតូច វាអាចបាត់ទៅវិញដោយឯងៗ
- ក្នុងករណីឡើងប៉ោងទំហំលើសពី ១cmឡើង ត្រូវការវះកាត់យកចេញ

៤. ភាពងាយកើតឡើងវិញ៖
- បច្ចេកទេសវះកាត់ត្រូវយកចេញទាំងស្រុងនូវដុំនោះ និងក្រពេញទឹកមាត់នៅជុំវិញ បើមិនដូចនោះទេ វានឹងកើតឡើងវិញ
-ការខាំបបូរមាត់កន្លែងដដែល

***បញ្ជាក់៖ ការលេបថ្នាំ មិនអាចព្យាបាលដុំគីសនេះបានទេ។

សូមអញ្ជើញមកពិគ្រោះ និងប្រឹក្សាផ្ទាល់ជាមួយទន្តបណ្ឌិតឯកទេសនៃមន្ទីរពេទ្យ ពីជំងឺ ឬដំបៅផ្សេងៗក្នុងមាត់ និងទទួលបានសេវាព្យាបាលមាត់ធ្មេញ ប្រកបដោយគុណភាព និងប្រសិទ្ធភាពខ្ពស់។

Source:calmettehospital
Medical news for Cambodia

02/09/2025

#ជំងឺរលាកប្រព័ន្ធសរសៃប្រសាទដៃជើង

ស្វែងយល់អំពីជំងឺរលាកប្រព័ន្ធសរសៃប្រសាទដៃជើងដែលបណ្តាលមកពីគ្រឿងស្រវឹង
និងអត្ថប្រយោជន៍នៃម៉ាស៊ីនវាស់សរសៃប្រសាទដៃជើង និងសាច់ដុំ!

ក) កត្តាប្រឈម៖
ការសេពគ្រឿងស្រវឹងលើសកម្រិត ដែលគេសង្កេតឃើញភាគច្រើនលើបុរសដែលមានអាយុចាប់ពី ៤០ឆ្នាំឡើងទៅធ្វើឲ្យមានផលប៉ះពាល់ច្រើនទៅលើសុខភាពរាងកាយទាំងមូល ជាពិសេសធ្វើឲ្យមានបញ្ហាប៉ះពាល់ទៅលើសរសៃខួរក្បាល សរសៃដៃ សរសៃជើង និងសាច់ដុំជាដើម។

ខ) រោគសញ្ញា៖
- ភាពចុករោយសាច់ដុំ ឬ ក៏រមួលក្រពើ (Crampes Musculaires)
- ភាពចុះខ្សោយនៃរាងកាយ / អស់កំលាំង (Asthénie/fatigue)
- ភាពស្ពឹក ស្រពន់ដៃជើង ដូចស្រមោចវារ (Paresthésie des extrémités à type de picotement et fourmillements)
- ភាពក្តៅក្រហាយបាតដៃ បាតជើង (Hypersensibilité à type de brûlure)
- ភាពចុះថយទំហំ ឬស្វិតសាច់ដុំ (Amyotrophie)

គ) ការធ្វើរោគវិនិច្ឆ័យ៖
- ជួបពិគ្រោះ និងប្រឹក្សាជាមួយវេជ្ជបណ្ឌិតឯកទេស
- ធ្វើការវាស់មុខងារសរសៃប្រសាទ និងសាច់ដុំ (L’étude de l’activité électrique des nerfs et des muscles) ដោយម៉ាស៊ីនវាស់សរសៃ និងសាច់ដុំ (ENMG, électroneuromyogramme)

ប្រសិនបើលោក លោកស្រី មានភាពស្ពឹកស្រពន់ដៃជើង ភាពចុះខ្សោយនៃសាច់ដុំ សូមរួសរាន់អញ្ជើញមកជួបពិគ្រោះ ប្រឹក្សាជាមួយក្រុមការងារជំនាញ សាស្ត្រាចារ្យ វេជ្ជបណ្ឌិតឯកទេសប្រសាទសាស្ត្រ ដើម្បីការសំរេចធ្វើរោគវិនិច្ឆ័យ និងឈានទៅរកការព្យាបាលមួយដ៏មានប្រសិទ្ធភាពខ្ពស់ តាមរយៈការវាស់មុខងារសរសៃប្រសាទដៃជើង និងសាច់ដុំ ជំនួយបច្ចេកវិទ្យាENMG។

Source:calmettehospital
Medical news for Cambodia

30/08/2025

#ការប្រតិកម្មថ្នាំឬចំណីអាហារ(អាណាហ្វីឡាក់ទិច)!
១) និយមន័យ៖
- គណៈកម្មាធិការប្រតិកម្មអាណាហ្វីឡាក់ស៊ីរបស់អង្គការអាឡែហ្ស៊ីពិភពលោកបានអោយនិយមន័យប្រតិកម្មអាណាហ្វីឡាស៊ីថាជាប្រតិកម្មជាប្រព័ន្ធធ្ងន់ធ្ងរដែលជាធម្មតាចាប់ផ្តើមយ៉ាងឆាប់រហ័សហើយអាចបណ្តាលអោយស្លាប់។
- ប្រតិកម្មអាណាហ្វីឡាក់ទិចធ្ងន់ធ្ងរ គឺជាការគំរាមកំហែងដល់អាយុជីវិតដោយមានការប៉ះពាល់ផ្លូវដង្ហើម ដកដង្ហើម ចរន្តឈាមរត់ និងស្បែក។ ហើយអាចកើតឡើងដោយស្បែកនៅធម្មតា ឬមានវត្តមានស្យុកតែម្តង។

២) មូលហេតុ៖
ប្រតិកម្មអាណាហ្វីឡាក់ទិកវាអាចកើតឡើងភ្លាមៗបន្ទាប់ពីប៉ះពាល់នឹងសារធាតុអាលែហ្យែនច្រើនប្រភេទរួមមាន៖ ចំណីអាហារ ថ្នាំពេទ្យ វ៉ាក់សាំង (ថ្នាំបន្សាបពិសពស់) និងពិសរបស់សត្វល្អិតទិច ឬខាំ។

៣) សញ្ញា និងរោគសញ្ញា៖
សញ្ញា និង រោគសញ្ញានៃប្រតិកម្មអាណាហ្វីឡាក់ទិច ជាទូទៅកើតឡើងក្នុងរយៈតែប៉ុន្មានវិនាទី ឬនាទីបន្ទាប់ពីប៉ះពាល់សារធាតុអាលែហ្យែន។
ក) ប៉ះពាល់ផ្លូវដង្ហើម (Airway)៖
- ហើមផ្លូវដង្ហើមខាងលើ ហើមបំពង់ករ ហើមអណ្តាត ដែលធ្វើអោយអ្នកជំងឺពិបាកដកដង្ហើម និងពិបាកលេប។
- សំឡេងស្អក (hoarse)
- សំឡេងស្រមុក (stridor)

ខ) ប៉ះពាល់ដង្ហើម (Breathing)
- ហត់ពិបាកដកដង្ហើម ដកដង្ហើមលឺសូរសំឡេងហួច (wheeze) ឬ ក្អកជាប់។
- អ្នកជំងឺឡើងស្វាយ និងវង្វេងស្មារតីដោយខ្វះអុកស៊ីសែនក្នុងឈាម។
- អ្នកជំងឺអស់កំលាំងខ្លាំងដោយការខំដកដង្ហើមពេក។
- គាំងដង្ហើម (respiratory arrest)
គ) ប៉ះពាល់ចរន្តឈាមរត់ (Circulation)
- មានសញ្ញាស្យុក៖ ស្បែកស្លេក បែកញើសស្អិតត្រជាក់ បេះដូងដើរញាប់ សម្ពាធឈាមចុះ ដួលសន្លប់។
- បេះដូងដើរលឿនខុសចង្វាក់ ឬ គាំងបេះដូង។

ឃ) ប៉ះពាល់ប្រដាប់រំលាយអាហារ៖ ចុកពោះ រាគ ក្អួត
ង) ប៉ះពាល់ប្រព័ន្ធប្រសាទ៖ រើបំរះ វង្វេងស្មារតី កំរិតស្មារតីធ្លាក់ចុះ
ច) ប៉ះពាល់លើស្បែក៖
- ចេញកន្ទាលត្រអាក រម៉ាស់ ហើមបបូរមាត់ ហើមមុខ ហើមភ្នែក ចេញទឹករងៃ។

៤) រោគវិនិច្ឆ័យ
រោគវិនិច្ឆ័យផ្អែកលើ៖
- ការចាប់ផ្តើមរហ័ស និងចេញរោគសញ្ញា
- ការគំរាមកំហែងដល់អាយុជីវិតដោយប៉ះពាល់ទៅលើផ្លូវដង្ហើម ដកដង្ហើម ចរន្តឈាមរត់
- ការប្រែប្រួលនៃស្បែកមានចេញកន្ទាលត្រអាក កន្ទួលក្រហម រម៉ាស់

«ប្រសិនបើបងប្អូនជួបបញ្ហា ឬមានអាការៈដូចបានរៀបរាប់ខាងលើ សូមបងប្អូនប្រញាប់មកមន្ទីរពេទ្យដែលនៅជិតលោកអ្នក ដើម្បីពិគ្រោះ ព្យាបាលបានបន្ទាន់ ទាន់ពេលវេលា និងប្រសិទ្ធភាពខ្ពស់។»

Source:Calmettehospital
Medical news for Cambodia

30/08/2025

#ជំងឺមហារីកសុដន់(Breast cancer)
រោគសញ្ញា និងវិធីបង្ការ ពីជំងឺមហារីកសុដន់!

តាមការសិក្សាជាច្រើនបានបង្ហាញថា មានស្ត្រីម្នាក់ក្នុងចំណោម ៨ នាក់អាចប្រឈម និងកើតជំងឺមហារីកសុដន់ជារៀងរាល់ឆ្នាំ។ ជំងឺមហារីកសុដន់ គឺជាជំងឺដែលកើតឡើងដោយសារការមានបំរែបំរួលខុសធម្មតានៅក្នុងកោសិការសុដន់។ ការប្រែប្រួលនេះលេចចេញដំបូងជាចំណុចតូចៗ បន្ទាប់មកផ្តុំជាដុំ ហើយសាយភាយទៅតំបន់ទាំងមូលរបស់សុដន់ និងអាចរាលដាលទៅសរីរាង្គផ្សេងៗនៃតួរខ្លួនរបស់អ្នកជំងឺ។

ជំងឺមហារីកសុដន់ភាគច្រើនកើតលើស្ត្រី តែបុរសក៏អាចប្រឈមមុខនឹងជំងឺនេះផងដែរ។

យើងបែងចែកជំងឺមហារីកសុដន់នេះជា២ប្រភេទ
១- មហារីកដែលកើតចេញពីបំរែបំរួលកោសិកានៅក្នុងបំពង់ទឹកដោះ
២- មហារីកដែលកើតចេញពីបំរែបំរួលកោសិកានៅក្នុងកន្សោមដោះ

កត្តាហានិភ័យដែលអាចអោយកើតជំងឺមហារីកសុដន់រួមមាន៖
១- កត្តាប្រវត្តិក្រុមគ្រួសារ (ម្តាយបង្កើត បងស្រី ប្អូនស្រីបង្កើត) កត្តាហ្សែន ៥-១០%
២- អ្នកលើសទំងន់ច្រើនជាងគីឡូស្តង់ដា (BMI) និងអ្នកមានលើសគីឡូច្រើនក្រោយអស់រដូវ
៣- កត្តារបបចំណីអាហារ (អាហារសំបូរដោយជាតិខ្លាញ់)
៤- អ្នកដែលពិសារគ្រឿងស្រវឹងច្រើន
៥- អ្នកដែលប្រើពពួកអ័រម៉ូនយូរឆ្នាំ
៦- អ្នកមិនមានកូន សុដន់តឹងណែន
៧- អ្នកមានកូនដំបូងនៅអាយុច្រើនលើសពី ៣0ឆ្នាំ និងស្ត្រីមិនបំបៅដោះកូន
៨- ស្ត្រីដែលមានរដូវដំបូងមុនអាយុ ១២ឆ្នាំ និងអស់រដូវក្រោយ ៥៥ឆ្នាំ

ដើម្បីធ្វើរោគវិនិច្ឆ័យរកជំងឺមហារីកសុដន់យើងត្រូវ៖
១- ពិនិត្យសុដន់ និងក្លៀក
២- ថតគៀបសុដន់ mammography
៣- អេកូសុដន់
៤- ច្រិបយកដុំសាច់ដែលសង្ស័យយកទៅវិភាគ (microbiopsy)
៥- ថតសុដន់ដោយម៉ាស៊ីន MRI និងម៉ាស៊ីន scanner

រោគសញ្ញានៃជំងឺមហារីកសុដន់មាន៖
១- ប្រែប្រួលទំហំ និងទំរង់សុដន់
២- សញ្ញាឈឺសុដន់
៣- ស្បែកសុដន់ប្រែប្រួល ក្រហម ហើម រឺមានលក្ខណះដូចសំបកក្រូចពោធិសាត់
៤- មានចេញឈាម រឺទឹករងៃពីក្បាលសុដន់
៥- មានដុំស្អិតនៅក្នុងសុដន់
៦- ក្បាលសុដន់លឹបចូលក្នុង
៧- មានឡើងហើមកូនកណ្តុរក្រោមក្លៀក

វិធីបង្ការពីជំងឺមហារីកសុដន់៖
១- ពិនិត្យ គៀប និងអេកូសុដន់ជារៀងរាល់ឆ្នាំចាប់ពីអាយុ ៣៥ឆ្នាំឡើង
២- ធ្វើលំហាត់ប្រាណអោយបានទៀងទាត់ដើម្បីរក្សាទំងន់អោយនៅស្តង់ដា (BMI)
៣- កុំជក់បារី និងបន្ថយការពិសារគ្រឿងស្រវឹង
៤- បន្ថយការប្រើប្រាស់អ័រម៉ូនរយៈពេលយូរលើសពី ១០ឆ្នាំ
៥- បំបៅដោះកូន ចន្លោះ ១ឆ្នាំកន្លះទៅ ២ឆ្នាំ

ប្រសិនបើបងប្អូនមានរោគសញ្ញាដូចបានរៀបរាប់ខាងលើ សូមបងប្អូនប្រញាប់មកជួបពិគ្រោះជាមួយគ្រូពេទ្យ ដើម្បីទទួលបានការព្យាបាលទាន់ពេលវេលា និងប្រកបដោយប្រសិទ្ធភាព។

Source:calmettehospital
Medical news for Cambodia