Medical news for Cambodia

06/02/2026

សេចក្តីជូនដំណឹង​ស្តីពីការជ្រេីសរេីសបុគ្គលិកជាប់កិច្ចសន្យា

30/01/2026

បញ្ហាឈឺចង្កេះ ដែលយើងតែងជួបញឹកញាប់!

អាការៈឈឺចង្កេះ គឺជារោគសញ្ញាមួយដែលកើតមានឡើងជាញឹកញាប់ និងទូទៅមិនមានសភាពធ្ងន់ធ្ងរទេ តែជាមូលហេតុចម្បងដែលធ្វើអោយអ្នកជំងឺភាគច្រើនធ្វើការងារមិនបាន ឫរំខានញឹកញាប់កិច្ចការប្រចាំថ្ងៃ។ ការឈឺចង្កេះអាចកើតលើមនុស្សគ្រប់វ័យ ហើយភាគច្រើននៅក្នុងអាយុចន្លោះពី ៤៥ ទៅ ៥០ ឆ្នាំ។ ប្រសិនបើយើងមិនបានធ្វើការព្យាបាលអោយបានត្រឹមត្រូវនោះទេ បញ្ហាឈឺចង្កេះនេះ នឹងអាចវិវត្តន៍ទៅជាជំងឺរ៉ាំរ៉ៃ ឬធ្ងន់ធ្ងរ។

ក) មានមូលហេតុជាច្រើនដែលបណ្តាលអោយឈឺចង្កេះរួមមាន៖
- វិបត្តិសាច់ដុំ សរសៃពួរតឆ្អឹងត្រង់សន្លាក់
- ការសឹកសន្លាក់ឆ្អឹង ឬដោយសារការពុកឆ្អឹងចង្កេះ
- ការរលាកសន្លាក់ឆ្អឹង និងឆ្អឹងចង្កេះ
- ភាពចុះខ្សោយ និងការលូនមកក្រៅនៃទ្រនាប់ឆ្អឹង
- ការបាក់បែកឆ្អឹងចង្កេះដែលបណ្តាលមកពីគ្រោះថ្នាក់ ប៉ះទង្គិច ធ្លាក់ពីទីខ្ពស់ និងរអិលជាដើម
- ការគាប ឬសង្កត់ទៅលើសរសៃប្រព័ន្ធប្រសាទ
- ជំងឺមហារីក ។ល។

*បញ្ជាក់៖ មូលហេតុភាគច្រើនបណ្ដាលមកពីការលូនមកក្រៅនៃទ្រនាប់ឆ្អឹង ហើយប្រសិនបើមិនបានធ្វើរោគវិនិច្ឆ័យឲ្យបានឆាប់រហ័ស និងព្យាបាលឲ្យបានត្រឹមត្រូវ វាអាចផ្ដល់ផលវិបាកដូចជា ពិការជើង វិបត្តិបន្ទោរបង់ និងការឈឺចាប់ខ្លាំងរហូតមិនអាចធ្វើការបាន។

ខ) កត្តាប្រឈមមុខនឹងបញ្ហាឈឺចង្កេះមានដូចជា៖
- អ្នកធ្វើការងារដោយប្រើកំលាំងកាយខ្លាំងដូចជា លីសែងរបស់ធ្ងន់ៗ
- អ្នកធ្វើការងារដែលអង្គុយ ឬឈរដោយប្រើរយៈពេលយូរ
- ស្ត្រីមានផ្ទៃពោះ មនុស្សធាត់ មនុស្សចាស់ជរា
- អ្នកដែលពុំសូវបានហាត់ប្រាណជាប្រចាំ
- ស្ត្រីដែលចូលចិត្តពាក់ស្បែកជើងកែងខ្ពស់ៗ

គ) ការធ្វើរោគវិនិច្ឆ័យត្រូវពឹងផ្អែកលើ៖
- ការសាកសួរពីរោគសញ្ញា និងការពិនិត្យមើលអ្នកជំងឺ
- ការពិនិត្យមើលឈាមមួយចំនួនទៅតាមប្រភេទជំងឺ
- ការថតឆ្លុះឆ្អឹងខ្នងដោយម៉ាស៊ីន កាំរស្មីអ៊ិច អ៊ឹមអរអាយ ស្កាន់នែរ (X-Ray, MRI, Scanner) ជាដើម។

ឃ) ការព្យាបាល៖
ការព្យាបាលគឺអាស្រ័យទៅលើការធ្វើរោគវិនិច្ឆ័យច្បាស់លាស់ និងការពិភាក្សាជាមួយគ្រូពេទ្យទៅតាមជំនាញឯកទេសពិតប្រាកដ ព្រមទាំងមានឧបករណ៍ពិនិត្យទំនើបដើម្បីទទួលបាននូវប្រសិទ្ធភាពខ្ពស់ និងប្រកបដោយការជឿទុកចិត្ត។
ការព្យាបាលគឺទៅតាមប្រភេទជំងឺមានដូចជា៖
- ការព្យាបាលដោយប្រើប្រាស់ថ្នាំ
- ការវះកាត់
- ការព្យាបាលដោយចលនា
- ការសម្រាកពីការងារទៅតាមសភាពធ្ងន់ធ្ងរនៃជំងឺ
- ការអប់រំពីរបៀបរស់នៅដែលល្អសម្រាប់អ្នកមានបញ្ហាឈឺចង្កេះ

«សូមកុំទុកអោយបញ្ហាឈឺចង្កេះនេះរំខានដល់ការរស់នៅរបស់លោកអ្នកតទៅទៀត ដោយសូមឆាប់មកពិនិត្យជាមួយក្រុមគ្រូពេទ្យឯកទេសនៃមន្ទីរពេទ្យ ដើម្បីជៀសវាងផលវិបាកធ្ងន់ធ្ងរទៅថ្ងៃក្រោយ។»

Sources:calmettehospital
Medical news for Cambodia

29/01/2026

សេចក្ដីជូនដំណឹងស្ដីពីការជ្រើសរើសបុគ្គលិក

14/01/2026

សេចក្តីជូនដំណឹងស្តីពីការជ្រើសរើសបុគ្គលិក
==========================
មន្ទីរពេទ្យតេជោសែនកោះធំមានកិត្តយសសូម
ជម្រាបជូនបេក្ខជនដែលមានបំណងមកបំពេញ
ការងារនៅមន្ទីរពេទ្យតេជោសែនកោះធំឱ្យបាន
ជ្រាបថាៈ មន្ទីរពេទ្យត្រូវការជ្រើសរើសបុគ្គលិក
គិលានុបដ្ឋាក ចំនួន៣រូប ជាបុគ្គលិកកិច្ចសន្យា
របស់មន្ទីរពេទ្យ។ ដូច្នេះបើបេក្ខជនមានបំណង
បំពេញការងារ សូមធ្វើការដាក់ពាក្យរាល់ម៉ោង
ធ្វើការនៅផ្នែករដ្ឋបាលនៃមន្ទីរពេទ្យ។ សូមអរគុណ

14/01/2026

ការជួយសង្រ្គោះបឋមចំពោះពស់ចឹក!

I. ការណែនាំ
ប្រទេសកម្ពុជាមានពស់ ៨៦ប្រភេទ៖
- ១៧ ប្រភេទមានពិស
- ៦ ប្រភេទ ដែលពិសរបស់វាបណ្តាលឱ្យមានភាពធ្ងន់ធ្ងរបន្ទាប់ពីចឹក
- ៥ ប្រភេទទៀតបណ្តាលអោយស្លាប់បន្ទាប់ពីចឹក

តាមអ្នកជំនាញឯកទេសពស់បានអោយដឹងថា៖ ៨០ % នៃពស់ចឹកកើតឡើងនៅខែវស្សាពីខែមិថុនា កក្កដា សីហា និង ខែកញ្ញា។ នៅប្រទេសកម្ពុជាយើងពីចុងខែឧសភា ដល់ខែសីហា ជាពិសេសនៅតាមបណ្តាខេត្តតាមដងទន្លេមេគង្គ និងទន្លេសាប «ខែទឹកឡើងលិចព្រៃ»។

II. រោគសញ្ញាពស់ចឹក
ក) រោគសញ្ញាទូទៅ៖
- ចង្អោរ ក្អួត ឈឺពោះ
- ឡេះឡះ ខ្សោយ ងងុយដេក

ខ) រោគសញ្ញានៅនឹងកន្លែងចឹក៖
- ស្នាមរបួសមានរន្ធពីរ (ស្នាមចង្កូម២)
- មានហូរឈាមនៅកន្លែងចឹក
- មានការឈឺចាប់ ជាំ ហើម ក្រហម ក្តៅ

III. ការជួយសង្រ្គោះបឋម
១- កំណត់ប្រភេទពស់ (មានសារៈសំខាន់ក្នុងការព្យាបាលដោយប្រើថ្នាំបន្សាប)
២- ផ្លាស់ទីឆ្ងាយពីកន្លែងពស់ចឹក (សែង)
៣- ចំពោះអ្នកពស់ចឹកតាំងចិត្តនៅអោយស្ងៀមកុំភ័យស្លន់ស្លោ។ កាលណាភ័យស្លន់ស្លោនាំអោយបេះដូងដើរលឿននាំអោយពិសពស់ជ្រាបលឿនបណ្តាលអោយគ្រោះថ្នាក់ធ្ងន់ធ្ងរ។
៤- ហាមលើកដៃឬជើងកន្លែងពស់ចឹកខ្ពស់ជាងបេះដូង (បេះដូងនៅក្រោមដោះខាងឆ្វេង)
៥- បញ្ជូនអ្នកត្រូវពស់ចឹកទៅមន្ទីរពេទ្យដែលនៅជិតអ្នកជាបន្ទាន់
៦- ត្រូវដោះគ្រឿងអលង្ការ ឬ សម្លៀកបំពាក់ដែលតឹងចេញពីកន្លែងពស់ចឹកចេញ
៧- លាងសម្អាតមុខរបួសកន្លែងពស់ចឹកដោយសាប៊ូ និងទឹក ឬ នឹងទឹកថ្នាំសម្លាប់មេរោគ
៨- រុំមុខរបួសដោយបង់ ដោយចាប់ផ្តើមពីក្រោមមុខរបួសឡើងទៅលើ។

IV. វិធានការណ៍ការពារ
- អប់រំប្រជាជនក្នុងសហគមន៍អោយចេះដឹងពីវិធានការណ៍ការពារ និងហានិភ័យពស់ចឹក និង ការសង្គ្រោះបឋមបន្ទាប់ពីពស់ចឹក
- ពាក់ស្បែកជើងកវែងពេលធ្វើដំណើរកាត់ព្រៃ ឬកាត់វាលបឹង (៥០% នៃពស់ចឹកគឺចឹកជើងក្រោមជង្គង់)
- ចំពោះអ្នកនៅជនបទស្រែចំការសំរាន្តលើគ្រែចងមុង
- ហាមសម្រាន្តផ្ទាល់ដី ឬលើស្មៅ
- ធ្វើដំណើរពេលយប់ប្រើភ្លើងពិល
- សម្អាតទីធ្លាជុំវិញផ្ទះកុំអោយមានស្មៅ
- ហាមចាប់ពស់
Source:calmettehospital

Medical news for Cambodia

08/01/2026

ធ្វើដូចម្តេច ទើបអាចដឹងថា លោកអ្នកកំពុងលើសជាតិប៉ូតាស្យូម?

សូដ្យូម និងប៉ូតាស្យូម ជាអ៊ីយ៉ុងដែលមានបរិមាណច្រើនជាងគេនៅក្នុងខ្លួនមនុស្ស។ សូដ្យូមភាគច្រើនស្ថិតនៅខាងក្រៅកោសិកា ចំណែកប៉ូតាស្យូមភាគច្រើនស្ថិតនៅក្នុងកោសិកា។ ប៉ូតាស្យូមដែលយើងវាស់ដោយពិនិត្យឈាម ជាចំណែកប៉ូតាស្យូមដែលនៅក្រៅកោសិកា គឺនៅក្នុងប្លាស្មាឈាម។

ប៉ូតាស្យូមមានតួនាទីដ៏សំខាន់សំរាប់អោយសាច់ដុំទាំងឡាយ រួមទាំងសាច់ដុំបេះដូងផង មានដំណើរការជាប្រក្រតី។

ដើម្បីដឹងថា លោកអ្នកកំពុងមានបញ្ហាលើសជាតិប៉ូតាស្យូម សូមលោកអ្នកសង្កេតលើរោគសញ្ញាសំខាន់ៗដូចខាងក្រោម៖

- ហត់
- ក្អួតចង្អោរ
- ចុះខ្សោយនៃភាពរំញោច
- ទន់សាច់ដុំ (ស្លាប់ដៃជើង paralysis)
- ស្ពឹក ឬស្រពន់
- ចុកទ្រូង ញ័រទ្រូង
- ខ្សោយអស់កម្លាំង
- បេះដូងដើរខុសសង្វាក់ (អាចឈានទៅដល់បេះដូងឈប់ដើរ ឬ ការបាត់បង់ជីវិត)

មានមនុស្សជាច្រើនដែលមានកម្រិតប៉ូតាស្យូមក្នុងឈាមលើស ក៏ប៉ុន្តែគ្មានចេញរោគសញ្ញាអ្វីសោះ។ ខ្លះទៀតមានរោគសញ្ញាច្រឡំជាមួយជំងឺទូទៅ។
រោគសញ្ញាដែលពាក់ព័ន្ធជាមួយការលើសកម្រិតប៉ូតាស្យូម ជាទូទៅគឺជាបញ្ហាសាច់ដុំ និងបញ្ហាបេះដូង។ ក្នុងកម្រិតដូចគ្នា ការកើនឡើងជាតិប៉ូតាស្យូមយ៉ាងលឿន នាំអោយមានរោគសញ្ញាធ្ងន់ធ្ងរជាងការកើនឡើងសន្សឹមៗ។

ប្រសិនបើលោកអ្នកមានរោគសញ្ញាដូចបានរៀបរាប់ខាងលើ សូមលោកអ្នកប្រញ៉ាប់មកជួបពិគ្រោះជាមួយគ្រូពេទ្យ ដើម្បីទទួលបានការព្យាបាលទាន់ពេលវេលា និងប្រកបដោយប្រសិទ្ធភាព។

“ក្នុងករណីខ្លះ ការយឺតយូរតែប៉ុន្មាននាទី ឬកង្វះសម្ភារៈ ឧបករណ៍ និងខ្វះជំនាញណាមួយ អ្នកជំងឺនឹងអាចបាត់បង់ជីវិត។”

Source:calmettehospital
Medical news for Cambodia

08/01/2026

07/01/2026

បន្ទោរបង់មកមានឈាមក្រហម សុទ្ធតែបណ្តាលមកពីជំងឺឫសដូងបាត?

នេះគឺជាផ្នត់គំនិត និងការគិតខុសដែលតែងតែមានសម្រាប់ប្រជាជនទូទៅភាគច្រើនរបស់យើងកន្លងមក ហើយយើងគួរតែព្យាយាមធ្វើការស្វែងយល់បន្ថែម និងផ្លាស់ប្ដូរចំពោះការគិតខុសមួយនេះដើម្បីជៀសវាងនូវការធ្វេសប្រហែសក្នុងការយកចិត្តទុកដាក់ថែទាំសុខភាព ឬព្យាបាលជំងឺបានទាន់ពេលវេលា។

ជាការពិតណាស់ដែលការបន្ទោរបង់មកមានឈាមក្រហម គឺមូលហេតុភាគច្រើនអាចបណ្តាលមកពីជំងឺឫសដូងបាត (Hemorrhoids bleeding) ឬអាចជាបញ្ហាផ្សេងនៅម្តុំបាតដូចជា ការដាច់រហែកភ្នាសបាត (Bleeding from a**l fissure) ក៏ប៉ុន្តែយើងមិនបានដឹងទេថានៅពីក្រោយមូលហេតុទាំងពីរនេះ ក៏នៅមានមូលហេតុដ៏គ្រោះថ្នាក់ជាច្រើនទៀតដែលអាចអោយមានឈាមក្រហមពេលបន្ទោរបង់នេះផងដែរ ហើយវាអាចបង្កភាពគ្រោះថ្នាក់ធ្ងន់ធ្ងរដល់សុខភាព និងអាយុជីវិតទៀតផង។ ជាពិសេសគឺឈាមដែលបណ្តាលមកពីបញ្ហារលាកពោះវៀនធំ (Bleeding from the colon) ដែលក្នុងនោះមានមូលហេតុចម្បងៗដូចជា : ដុំសាច់មហារីក (Colon cancer), ដុំសាច់ Polyp (Colonic polyp bleeding), ដំបៅពោះវៀនធំ (Colonic ulcer), ដំបៅពោះវៀនតូច (Typhoid Fever or other infection causes to the bowel part), ការហូរឈាមដែលបណ្តាលមកពី Colonic Diverticula ។ ល។

ដូច្នេះហើយទើបការដែលបន្ទោរបង់លាមកមានឈាមក្រហមនេះសម្រាប់ក្រុមវេជ្ជបណ្ឌិតឯកទេសផ្នែកជំងឺក្រពះ ពោះវៀន ថ្លើម និង ឫសដូងបាតយើង តែងតែមានការប្រុងប្រយ័ត្នជាប់ជានិច្ច ហើយពេលខ្លះតម្រូវអោយមានការពិនិត្យ និងធ្វើរោគវិនិច្ឆ័យអំពីមូលហេតុនៃការធ្លាក់ឈាមនេះអោយបានច្បាស់លាស់បំផុតដោយការពិនិត្យឆ្លុះសុងពោះវៀនធំ (Total colonoscopy) ដើម្បីរកមូលហេតុពិត និងបែងចែកថាការធ្លាក់ឈាមនេះមកពីពោះវៀនធំ ឬបញ្ហាបាតដូចបានបកស្រាយនៅខាងលើពីព្រោះថា ត្រឹមតែការពិនិត្យមើលឫសដូងបាត គឺយើងមិនអាចដឹងអំពីបញ្ហាពោះវៀនធំនេះឡើយ ហើយម្យ៉ាងមួយទៀត បើទោះជាមានជំងឺឫសដូងបាត ក៏នៅតែមិនប្រាកដដែរថា ឈាមនោះមកពីផ្នែកខាងក្រោម ឬមកពីពោះវៀនធំនោះទេ។

* ចំពោះការបន្ទោរបង់មានឈាមដែលតម្រូវអោយធ្វើការឆ្លុះពិនិត្យពោះវៀនធំនេះ គឺមានកក្តា និង រោគសញ្ញារួមផ្សំដូចជា៖
- អាយុលើសពី ៤៥ឆ្នាំឡើងទៅ (old age)
- បាត់បង់គ្រាប់ឈាមក្រហមច្រើន (Hb < 9g/l)
- មានអការ:ឈឺពោះរ៉ាំរ៉ៃ (Chronic abdominal pain)
- មានការស្រកទម្ងន់លឿន ឬ ខុសប្លែកពីធម្មតា (Weight lost or alteration)
- ក្រោយការពិនិត្យរាង្គកាយរបស់វេជ្ជបណ្ឌិត រកឃើញ ឬ ស្ទាបប៉ះដុំក្នុងពោះ (after physical examination)
- មានប្រវត្តិគ្រួសារដែលមានបញ្ហាដុំសាច់កាច ឬមហារីក (Family history of any cancer).

ជាសារដាស់តឿនចុងក្រោយជូនដល់បងប្អូនប្រជាជនយើងទាំងអស់គ្នា ពីក្រុមវេជ្ជបណ្ឌិតឯកទេសនៃមន្ទីរពេទ្យ ចំពោះបញ្ហានៃការបន្ទោបង់មកមានឈាមក្រហម សូមអោយមានការប្រុងប្រយ័ត្នអោយបានខ្ពស់ និងមិនត្រូវភ័យខ្លាចក្នុងការធ្វើការពិនិត្យឆ្លុះពោះវៀនធំដើម្បីរកមូលហេតុ និង រោគវិនិច្ឆ័យនៃជំងឺអោយបានច្បាស់លាស់ ក្នុងគោលបំណងជៀសវាងភាពធ្ងន់ធ្ងរ ព្រមទាំងធ្វើការព្យាបាលបានចំគោលដៅ និងទាន់ពេលវេលាផងដែរ ។

Source:calmettehospital
Medical news for Cambodia

30/12/2025

ជំងឺមហារីកច្រមុះ!
(Nasopharyngeal Cancer)

Nasopharyngeal Cancer ជាជំងឺមហារីកដែលកើតឡើងនៅផ្នែកខាងក្រោយច្រមុះ និងខាងលើបំពងក ដែលពាក្យបច្ចេកទេសឲ្យតំបន់នេះថា “Nasopharynx”។

ក) រោគសញ្ញា៖
នៅដំណាក់កាលដំបូង ជំងឺមហារីកច្រមុះ ពុំស្ដែងនូវសញ្ញាអ្វីដែលគួរឲ្យកត់សំគាល់ទេ។ រោគសញ្ញាមួយចំនួនដែលតម្រូវឲ្យអ្នកជំងឺមកពិគ្រោះជាមួយគ្រូពេទ្យជំនាញ មានដូចខាងក្រោម៖
- មានឡើងកូនកណ្តុលនៅក
- ឈាមច្រមុះ
- តឹងច្រមុះភាគច្រើនមួយចំហៀង
- សណ្តាប់មានការធ្លាក់ចុះនៅត្រចៀកម្ខាង
- ហឹងត្រចៀក
- ឈឺក្បាល

ខ) មូលហេតុបង្ក៖
មូលហេតុបង្កឲ្យកើតជំងឺមហារីកច្រមុះ នៅមិនទាន់ដឹងពិតប្រាកដ ប៉ុន្តែមានកត្តាមួយចំនួនដែលជំរុញឲ្យកើតមានជំងឺនេះ ៖
- ទីតាំងភូមិសាស្រ្ត ដូចជាប្រទេសចិនភាគខាងត្បូង ឬអាស៊ីខាងកើត
- ការបរិភោគអាហារដែលសម្បូរជាតិ Nitrosamine : អាហារដែលមានកម្រិតអំបិលខ្ពស់ ប្រលាក់ហាលឲ្យស្ងួតរួចអាំង (សាច់ ឬត្រី)
- អ្នកប្រកបរបរដែលទាក់ទងជាមួយឈើ-ជាងឈើ
- Epstein-Barr Virus
- ប្រវត្តិក្រុមគ្រួសារដែលកើតជំងឺនេះ(Nasopharyngeal Cancer)

គ) ការធ្វើរោគវិនិច្ឆ័យ៖
- ការឆ្លុះដោយម៉ាស៊ីនអង់ដូស្គប់ ប្រើកាំមេរ៉ាឆ្លុះចូលក្នុងច្រមុះរហូតដល់ផ្នែកខាងក្រោយ Nasopharynx
- ការច្រិបសាច់ : ត្រូវច្រិបសាច់នៅផ្នែកខាងក្រោយច្រមុះ ដើម្បីធ្វើការពិសោធន៍កោសិកាមហារីក Pathology and Immmuno-histo-chemistry
- ធ្វើ CT-Scan ឬ MRI
- Panendoscopy

ឃ) ការព្យាបាល៖
- ការព្យាបាលដោយកាំរស្មី តាមវិធីសាស្ត្រទំនើប (Modern Radiotherapy)
- ការចាក់ថ្នាំគីមី(Chemotherapy)
- ការវះកាត់ក្នុងករណីខ្លះ

មិនមានវិធានការសម្រាប់ការពារមិនឲ្យកើតជំងឺមហារីកច្រមុះទេ ប៉ុន្តែយើងអាចកាត់បន្ថយដោយកត្តាមួយចំនួន ដែលជំរុញឲ្យកើតជំងឺនេះ ដូចដែលបានរៀបរាប់ខាងលើ។ ដូចនេះក្នុងនាមជាគ្រួពេទ្យជំនាញ អំពាវនាវដល់បងប្អូនទាំងអស់ ដែលមានប្រវត្តិឈាមច្រមុះ ឬតឹងច្រមុះជាប្រចាំ សូមអញ្ជើញមកទទួលការពិគ្រោះ ពិនិត្យ និងព្យាបាលឲ្យទាន់ពេលវេលា ជាមួយក្រុមវេជ្ជបណ្ឌិតជំនាញត្រចៀក ច្រមុះ បំពង់ក និងជម្ងឺមហារីកនៅមន្ទីរពេទ្យ។

Source:មន្ទីរពេទ្យកាល់ម៉ែត
Medical news for Cambodia

26/12/2025

ជំងឺដុំសាច់នៅភ្នាសក្នុងនៃស្បូន!

ដុំសាច់នៅភ្នាសក្នុងនៃស្បូន គឺជាដុំសាច់ដែលកើតឡើងនៅក្នុងស្រទាប់សាច់ដុំស្បូន ដែលដុះចូលទៅក្នុងប្រហោងស្បូន ដែលចែកចេញជា៣កម្រិត៖

- ទី១(Grade 0): ដុំសាច់ដែលដុះនៅភ្នាសក្នុងនៃស្បូន (Endometrial fibroma pedunculated) មានទងច្បាស់លាស់ មានទំហំមិនលើសពី ៣សង់ទីម៉ែត្រ

- ទី២(Grade 1): ដុំសាច់ដែលដុះនៅភ្នាសក្នុងនៃស្បូន (Partial intramural endocavity angle of protrusion < 90o) ដែលមានទងធំ ស៊ីចូលទៅដល់សាច់ដុំស្បូន

- ទី៣(Grade 2): ដុំសាច់ដែលដុះនៅភ្នាសក្នុងនៃស្បូន (Predominantly intramural endocavity angle of protrusion > 90o) ដែលមានទំហំធំស៊ីចូលទាំងភ្នាសក្នុង និងសាច់ដុំនៃស្បូន មិនមានទងច្បាស់លាស់ហើយទំហំធំលើសពី៥សង់ទីម៉ែត្រ។

១) មូលហេតុ៖
- ជំងឺនេះកើតមានតែលើស្រ្តីក្នុងវ័យបន្តពូជ
- ជំងឺនេះកើតលើស្ត្រីដែលលើសជាតិអ័រមូនអ៊ឺស្រ្តូហ្សែន
- ជំងឺនេះកើតលើស្ត្រីដែលមានវិបត្តិអ័រមូន
- ជំងឺនេះកើតលើស្ត្រីដែលមានវដ្តរដូវមិនទៀងទាត់
- កត្តាចំណីអាហារ បរិយាកាស និងកត្តាសង្គម

* ជំងឺនេះមិនអាចកើតមានចំពោះស្រ្តីមិនទាន់ពេញវ័យ ហើយជំងឺនេះនឹងអាចបាត់ទៅវិញនៅពេលដែលស្រ្តីមានវ័យចំណាស់ (ស្ត្រីអត់រដូវ)។

២) រោគសញ្ញា៖
ស្រ្តីដែលមានជំងឺនេះធ្វើឲ្យមានរោគសញ្ញាដូចតទៅ
- ធ្លាក់ឈាមរដូវច្រើន
- រយៈពេលមានរដូវអូសបន្លាយយូរខុសធម្មតា
- ធ្លាក់ឈាមតាមទ្វារមាសខុសធម្មតា ក្រៅពីពេលមានរដូវ
- មានការឈឺចុកចាប់ពេលមានរដូវ
- អាចបណ្តាលឲ្យធ្លាក់ឈាមពេលមានផ្ទៃពោះ
- អាចបណ្តាលឲ្យរលូតកូននៅត្រីមាសដំបូង
- បង្កឲ្យមានវិបត្តិអត់កូន

៣) ការព្យាបាល៖
ក្នុងករណីពុំមានបង្កឲ្យមានផលវិបាកធ្លាក់ឈាម ឬក៏មានវិបត្តិផ្សេងៗ គេពុំធ្វើការវះកាត់ទេ ដោយគ្រាន់តែធ្វើការតាមដានឲ្យបានទៀងទាត់ជាមួយគ្រូពេទ្យឯកទេសរោគស្ត្រីជាប្រចាំ។

ប៉ុន្តែក្នុងករណីមានធ្លាក់ឈាមច្រើនខុសធម្មតា និងបង្កឲ្យមានវិបត្តិអត់កូន យើងត្រូវធ្វើការវះកាត់ដុំសាច់នេះចេញ ដោយគ្រូពេទ្យឯកទេសរោគស្ត្រីតាមរយៈម៉ាស៊ីនឆ្លុះប្រហោងក្នុងនៃស្បូនបច្ចេកវិទ្យាចុងក្រោយ (Modern hysteroscopy of diagnosis and operative procedure) នៅមន្ទីរពេទ្យកាល់ម៉ែត។

“សូមបងប្អូនស្ត្រី លោកស្រី មេត្តាមកពិគ្រោះ និងពិនិត្យរោគស្ត្រីអោយបានទាន់ពេលវេលា ក្នុងករណីមានរោគសញ្ញាដូចបានជម្រាបជូនខាងលើ។”

Source:calmettehospital
Medical news for Cambodia

24/12/2025

🔔ស្របពេលដែលយោធាថៃ កំពុងបន្តការឈ្លានពានយ៉ាងកម្រោល និងកាន់តែព្រៃផ្សៃបំផុត តាមរយៈ ការវាយប្រហារតាមផ្លូវអាកាសចូលកាន់តែជ្រៅក្នុងដែនអធិបតេយ្យកម្ពុជា ជាពិសេស ការវាយប្រហារលើតំបន់ជនស៊ីវិលរស់នៅ សូមបងប្អូនទាំងអស់ ដែលស្ថិតក្នុងតំបន់រងហានិភ័យ មេត្តាប្រុងប្រយ័ត្នខ្ពស់ ‼️

ខាងក្រោមនេះ គឺជារបៀបការពារខ្លួនបន្ទាន់ នៅពេលដែលមានការវាយប្រហារពីលើអាកាស៖

១. ដេកផ្កាប់មុខលើដី ដើម្បីកាត់បន្ថយសម្ពាធមកលើរាងកាយ
២. យកដៃខ្ទប់ក្បាល និងក ដើម្បីការពារពីកម្ទេចកម្ទី
៣. ហើបមាត់បន្តិចកាត់បន្ថយសម្ពាធក្រដាសត្រចៀក និងសួត
៤. កុំផ្អែកនឹងជញ្ជាំងព្រោះអាចបណ្ដាលឲ្យរងរបួស