28/06/2022
សារធាតុថែរក្សាស្បែកទាំងនេះ កុំប្រើពេលពពោះឲ្យសោះ ព្រោះអាចគ្រោះថ្នាក់ដល់គភ៌!
ដឹងហើយ ស្រីៗណាមិនចង់ស្អាតនោះ ទោះអំឡុងពេលពពោះ ក៏ចង់តុបតែងខ្លួនឲ្យស្អាត ថែស្បែកឲ្យនៅស្រស់ថ្លាដែរ។ យ៉ាងណា ត្រូវដឹងផង បើចង់ស្អាតពេលពពោះ មានវិធីសាស្ត្រធម្មជាតិច្រើនណាស់អាចជួយយើងបាន មិនគួរប្រើគ្រឿងសម្អាង ឬផលិតផលថែរក្សាស្បែកទេ ព្រោះសារធាតុមួយចំនួនក្នុងផលិតផលទាំងនោះ អាចបង្កគ្រោះថ្នាក់ដល់កូនក្នុងផ្ទៃបាន។
១- ជាតិសំណ
សំណ ជាសារធាតុផ្សំ ប្រើញឹកញាប់បំផុតក្នុងគ្រឿងសម្អាងគ្រប់ប្រភេទ ហើយសារធាតុនេះ អាចពុល ប៉ះពាល់ដល់ការវិវត្តប្រព័ន្ធសរសៃប្រសាទបាន។ សំណ ត្រូវបានគេរកឃើញថា ជាមូលហេតុមួយ បង្កឲ្យមានការរលូតដោយធម្មជាតិរាប់លានករណី និងបញ្ហាមិនអាចមានកូនជាច្រើនទៀត។ ប៉ះពាល់ជាមួយសារធាតុសំណ មុនពេលសម្រាល អាចធ្វើកូនកើតមកមិនគ្រប់គីឡូ និងខូចរូបរាងពីកំណើតទៀតផង។
២- ជាតិ Triclosan
សារធាតុ Triclosan រួមជាមួយ Triclocarban មាននៅក្នុងពពួកសាប៊ូសម្លាប់មេរោគ ថ្នាំដុសធ្មេញ និងផលិតផលប្រឆាំងបាក់តេរីជាច្រើនទៀត។ យ៉ាងណាវិញ សារធាតុគីមីនេះ អាចទៅរំខានដល់ដំណើរការអ័រម៉ូនធ្វើមេតាបូលីសក្នុងរាងការយើង អាចធ្វើឲ្យប្រឈមជំងឺប្រព័ន្ធអង់ដូគ្រីនចំពោះក្មេងៗ ក៏ដូចជាភាពមិនប្រក្រតីផ្លូវចិត្ត និងកើតមកមិនគ្រប់គីឡូជាដើម។ ការសិក្សានៅឆ្នាំ ២០១០ បានបង្ហាញថា ប៉ះពាល់សារធាតុ Triclosan មុនពេលសម្រាល អាចធ្វើឲ្យថយចុះអ័រម៉ូនអឺស្រ្តូសែន ដែលមាននាទីរត់ពីទងសុក ដែលផ្គត់ផ្គង់ការលូតលាស់របស់ទារកក្នុងផ្ទៃ។
៣- ពពួកសារធាតុ Parabens
ពពួលសារធាតុ Parabens មានដូចជា Propyl, Butyl, Isopropyl, Isobutyl និង Methyl parabens) ជាសារធាតុគីមីសម្រាប់រក្សាគុណភាពឲ្យបានយូរ នឹងត្រូវបានគេប្រើប្រាស់ជាទូទៅ ក្នុងផលិតផលគ្រឿងសម្អាង ច្រើនជាង ៩០% ឯណោះ។ ស្រដៀងគ្នានឹងសារធាតុផ្សេងៗដែរ Parabens នឹងទៅរំខានដល់ដំណើរការប្រព័ន្ធអង់ដូគ្រីន ដោយធ្វើត្រាប់តាមឥទ្ធិពលអ័រម៉ូនអឺស្រ្តូសែនក្នុងរាងកាយយើង ធ្វើអ័រម៉ូនម៉ាក់ៗកំពុងពពោះ គ្មានតុល្យភាព ប៉ះពាល់ដល់ការវិត្តរបស់គភ៌ក្នុងផ្ទៃ។ ការសិក្សាមួយនៅឆ្នាំ ២០១៥ បង្ហាញថា ច្រើនជាង ៩៤% ក្នុងចំណោមទារកទើបកើត មានសារធាតុ Parabens ក្នុងឈាម ហើយជាងពាក់កណ្តាលក្នុងចំណោមទារកទាំងនោះ មានសារធាតុ Parabens ក្នុងឈាម ច្រើនជាងម៉ាក់ៗទៅទៀត។
៤- អាស៊ីដ Salicylic
សារធាតុ BHA និង BHT នៃអាស៊ីដ Salicylic ត្រូវគេចាត់ទុកជាសារធាតុអាចបង្កជំងឺមហារីក។ អាស៊ីដនេះ គេប្រើដើម្បីរក្សាគុណភាពគ្រឿងសម្អាង ខណៈសារធារតុ BHA ត្រូវបានប្រើយ៉ាងទូលំទូលាយ ជាសមាសធាតុសម្រាប់ព្យាបាលជំងឺមុន និងសម្អាតស្រទាប់ស្បែក។ បើគ្នាយើងកំពុងពពោះ លេបថ្នាំមានផ្ទុកសារធាតុទាំងពីរនេះច្រើនពេក អាចធ្វើឲ្យមានផលវិបាកចំពោះការពពោះ និងខូចរូបរាងកូនពីកំណើត។ ទោះបីជាគេចាត់ទុកថា ការប្រើផលិតផលថែរក្សាស្បែក និងគ្រឿងសម្អាង មានសារធាតុ BHA តិចជាង ២% មានសុវត្ថិភាពក៏ដោយ តែអ្នកជំនាញជាច្រើន បានទទូចណែនាំឲ្យស្រីៗកំពុងពពោះ ប្រើពពួកគ្រឿងសម្អាងមានផ្ទុកសារធាតុ AHA ជំនួសវិញ។
៥- សារធាតុ Retinol និងពពួកសារធាតុក្លាយពី Retinol
សារធាតុ Retinol និង Retinyl palmitate ជាទម្រង់នៃវីតាមីន A ត្រូវគេប្រើច្រើនជាងគេក្នុងគ្រឿងសម្អាង ព្រោះមានប្រសិទ្ធភាពបំបាត់ស្នាម និងភាពជ្រីវជ្រួញ។ ក្រៅពីគុណប្រយោជន៍នេះ ការប្រើប្រាស់សារធាតុ Retinol ត្រូវបានរឹតបណ្តឹង ឬហាមឃាត់ ដោយសារអាចធ្វើ កូនខូចរូបរាងពីកំណើត និងពុលថ្លើម បើសិនប្រើ និងស្រូបសារធាតុនេះចូលក្នុងខ្លួនលើសកំណត់។ សំណាងល្អ ផលិតផលថែរក្សាសម្រស់ជាច្រើននាពេលបច្ចុប្បន្ន បានប្រើសារធាតុផ្សេងៗទៀត ដែលមានប្រសិទ្ធភាពដូចគ្នានឹងសារធាតុ Retinol មានដូចជា វីតាមីន C អាស៊ីដ Glycolic អាស៊ីដ kojic និងពពួកសណ្តែក (តែដកអឺស្ត្រូសែនចេញហើយ)។
ត្រួតពិនិត្យដោយ ចាន់ ស៊ីណេត
|
ដោយ Chamnan Amrith
Medical news for Cambodia
