17/08/2025
ຜູ້ບໍລິຫານໂຮງໝໍຂັ້ນເມືອງ, ຢູ່ແຂວງຫຼວງພະບາງ ໄດ້ຮັບການຍົກລະດັບວຽກງານບໍລິຫານ
ພິທີເປີດຊຸດອົບຮົມ ໄລຍະສັ້ນບໍລິຫານໂຮງໝໍຂັ້ນເມືອງ, ຢູ່ແຂວງຫຼວງພະບາງ ໄດ້ຈັດຂື້ນໃນໃນວັນທີ 11 ສິງຫາ 2025 ນີ້ທີ່ຫ້ອງປະຊຸມຂະແໜງໄຂ້ຍຸງ, ພະແນກສາທາລະນະສຸກແຂວງຫຼວງພະບາງ, ໂດຍເປັນປະທານຮ່ວມຂອງ ດຣ. ສົມໃຈ ລາດຊະວົງ ຮອງອະທິການບໍດີ ມະຫາວິທະຍາໄລວິທະຍາສາດສຸຂະພາບ; ຮສ. ປອ. ດຣ. ນ. ວັນພະນອມ ສີຈະເລີນ ຄະນະບໍດີ ຄະນະສາທາລະນະສຸກສາດ, ມະຫາວິທະຍາໄລວິທະຍາສາດສຸຂະພາບ ແລະ ດຣ. ທອງພຸດ ສຸກກະເສີມ ຮອງຫົວໜ້າພະແນກສາທາລະນະສຸກແຂວງຫຼວງພະບາງ, ມີແຂກຮັບເຊີນ, ວິທະຍາກອນ ແລະສຳມະນາກອນຈາກຫ້ອງການສາທາລະນະສຸກ, ໂຮງໝໍເມືອງ-ນະຄອນ ຫຼວງພະບາງ ເຂົ້າຮ່ວມ. ຊຸດຝຶກອົບຮົມຄັ້ງນີ້ ເປັນການສ້າງຄວາມເຂັ້ມແຂງ ໃຫ້ບຸກຄະລາກອນສາທາລະນະສຸກ ໂດຍສະເພາະແມ່ນຄະນະນຳຢູ່ຂັ້ນໂຮງໝໍເມືອງ ໃຫ້ມີຄວາມຊໍານານ ໃນການບໍລິຫານຄຸ້ມຄອງໂຮງໝໍເມືອງ, ມີຄວາມຮູ້, ຄວາມສາມາດ ແລະທັກສະໃນການວິເຄາະບັນຫາ ແລະວາງແຜນ. ພ້ອມທັງຄຸນສົມບັດ, ຈັນຍາທຳ, ຈັນຍາບັນທາງວິຊາຊີບ ໃນການຄຸ້ມຄອງບໍລິຫານໂຮງໝໍເມືອງ ເພື່ອຍົກສູງຄຸນນະພາບການບໍລິການ ໃຫ້ມີປະສິດທິພາບ, ປະສິດທິຜົນ ແລະເປັນທີ່ຍອມຮັບຈາກສັງຄົມ ໃນການສ້າງພະນັກງານສາທາລະນະສຸກ ໃຫ້ມີຄວາມຮູ້ຄວາມສາມາດໃນການບໍລິຫານຄຸ້ມຄອງວຽກງານສາທາລະນະສຸກ, ປະກອບສ່ວນການປະຕິບັດໜ້າທີ່ ການສະໜອງບໍລິການສາທາລະນະສຸກໃຫ້ທົ່ວເຖີງ ແລະມີຄຸນນະພາບນັບມື້ນັບດີຂື້ນ. ເຊີ່ງການຈັດຊຸດຝຶກອົບຮົມ ເປັນໂຄງການທີ່ຈັດຕັ້ງປະຕິບັດໂດຍ ຄະນະສາທາລະນະສາດ ມະຫາວິທະຍາໄລວິທະຍາສາດສຸຂະພາບ; ໂດຍໄດ້ຮັບການສະໜັບສະໜູນຈາກ ທະນາຄານພັດທະນາອາຊີ ຫຼື ADB, ເຊີ່ງຕະຫຼອດໄລຍະຂອງການຝຶກອົບຮົມ ວິທະຍາກອນຈາກ ຄະນະສາທາລະນະສຸກສາດ, ຄະນະແພດສາດ ມະຫາວິທະຍາໄລວິທະຍາສາດສຸຂະພາບ ແລະຜູ້ຊ່ຽວຊານອ້ອມຂ້າງກະຊວງສາທາລະນະສຸກ ຈະໄດ້ບັນຍາຍທິດສະດີ ແລະນຳພາຈັດຕັ້ງປະຕິບັດວຽກງານຕົວຈີງຕື່ມອີກ.
#ແຂວງຫຼວງພະບາງ
#ພະແນກສາທາລະນະສຸກ
#ໂຮງໝໍ
#ເປີດຝຶກອົບຮົມ
#ຄະນະໂຄສະນາອົບຮົມ
#ວິທະຍຸໂທລະພາບຫຼວງພະບາງ
#ຂ່າວສານຫຼວງພະບາງ
