Health and Wellness EXPO LAOS

18/05/2021

INFO. - ອິນໂຟ x Health and Wellness EXPO LAOS
ງີບຫຼັບຈັກນາທີ ໃຫ້ຕື່ນມາບໍ່ຮູ້ສຶກເມື່ອຍ
ການທີ່ເຮົາຮູ້ສຶກຢາກນອນຕອນກາງເວັນ ແລະ ຫຼາຍຄົນກໍຕ້ອງໄດ້ຮັບມືກັບຄວາມຮູ້ສຶກນີ້ ພະຍາຍາມປຸກຕົວເອງໃຫ້ຕື່ນດ້ວຍວິທີຕ່າງໆເຊັ່ນ: ການດື່ມກາເຟ, ດື່ມເຄື່ອງດື່ມຊູກຳລັງ, ລ້າງໜ້າໃຫ້ສົດຊື່ນເປັນຕົ້ນ. ແຕ່ສິ່ງທີ່ສໍາຄັນທີ່ສຸດນັ້ນ ແມ່ນການງີບຫຼັບ ເຊິ່ງເປັນວິທີທີ່ດີທີ່ສຸດ ແລະ ຈະຊ່ວຍໃຫ້ເຮົາຮູ້ສຶກສົດຊື່ນຂຶ້ນມາໄດ້ ຖ້າຫາກຈະໃຫ້ໄດ້ຜົນເຕັມທີ່ເຮົາຕ້ອງງີບຫຼັບໃນເວລາທີ່ເໝາະສົມ
-ການງີບຫຼັບ 10-20ນາທີ Refresh ຮ່າງກາຍແບບໄດ້ຜົນທັນໃຈ
ເປັນເວລາທີ່ຈະເຮັດໃຫ້ຕື່ນຕົວໄດ້ດີ, ຫາຍເມື່ອຍ, ກະຕຸ້ນສະໝອງໃຫ້ຮູ້ສຶກສົດຊື່ນ ເຊິ່ງຈະເຮັດໃຫ້ການນອນຂອງເຮົາຢູ່ໃນຊ່ວງ non-rapid eye movement (NREM) ຫຼັງຈາກຕື່ນຂຶ້ນມາກໍຈະສາມາດເຮັດກິດຈະກໍານັ້ນຢ່າງຕໍ່ເນື່ອງໄດ້ເລີຍ ຈຶ່ງເອີ້ນການງີບຫຼັບໃນໄລຍະນີ້ວ່າ “Power nap” ເປັນການງີບຫຼັບທີ່ຊ່ວຍຟື້ນຟູຄວາມເມື່ອຍໃຫ້ກັບຮ່າງກາຍ ຖ້າເຮົາເຮັດວຽກກ່ຽວກັບຕົວອັກສອນ ແລະ ຕົວເລກ ການງີບຫຼັບ 20ນາທີຈະມີປະສິດທິພາບດີ
-ການງີບຫຼັບ 30ນາທີ ບໍ່ເຮັດໃຫ້ເກີດປະໂຫຍດ
ການງີບຫຼັບ 30ນາທີ ຈະເຮັດໃຫ້ເຮົາຮູ້ສຶກຕື່ນຕົວໄດ້ດີຂຶ້ນ ແຕ່ກໍຍັງຈະສົ່ງຜົນເສຍໃຫ້ກັບຮ່າງກາຍເພາະຫຼັງຈາກຕື່ນຂຶ້ນມາ ຈະມີອາການມືນງົງ, ຮ່າງກາຍຍັງຢາກນອນຢູ່ ຫຼື ບາງຄົນກໍຮູ້ສຶກປວດຫົວ ເພາະການງີບຫຼັບ 30ນາທີນັ້ນຈະເຮັດເຮົາເຂົ້າສູ່ການຫຼັບເລິກ ຖ້າເຮົາຕື່ນນອນໃນໄລຍະນີ້ ຈະເຮັດໃຫ້ຮູ້ສຶກຫງຸດຫງິດ, ເມື່ອຍ ແລະ ອ່ອນເພຍກ່ອນເກົ່າ ເຊິ່ງອາການນັ້ນຈະຫາຍໄປຕ້ອງໃຊ້ເວລາອີກ 30ນາທີ

-ການງີບຫຼັບ 60ນາທີ ສົ່ງຜົນດີຕໍ່ຄວາມຈໍາ
ການງີບຫຼັບ 60ນາທີ ຈະຊ່ວຍສົ່ງຜົນຕໍ່ລະບົບຄວາມຈໍາຂອງເຮົາດີຂຶ້ນ ເພາະວ່າມັນຈະເປັນການນອນທີ່ຢູ່ໃນໄລຍະ Slow-Wave-Sleep ທີ່ຈະເຮັັດໃຫ້ສະໝອງປອດໂປ່ງ, ເພີ່ມຄວາມພ້ອມໃນການຮຽນຮູ້, ສາມາດເຮັດໃຫ້ເຮົາຈົດຈໍາຂໍ້ມູນຕ່າງໆໄດ້ ເໝາະສໍາຫຼັບຄົນທີ່ເຮັດວຽກໜັກ ຫຼື ການອ່ານໜັງສືຈົນຮ່າງກາຍອ່ອນເພຍ

-ການງີບຫຼັບ 90ນາທີ ອາດຈະມີບັນຫາກ່ຽວກັບການນອນ
ການງີບຫຼັບ 90ນາທີເປັນໄລຍະທີ່ສະໝອງ ແລະ ຮ່າງກາຍໄດ້ພັກຜ່ອນຢ່າງສົມບູນ ເຊິ່ງຈະເຮັດໃຫ້ຄວາມຈຳ ແລະ ອາລົມດີຂຶ້ນ ເພາະເຮົານອນຄົບ 90ນາທີນັ້ນຖືວ່າເຮົານອນຫຼັບໄດ້ 1 Cycle (1ຮອບການນອນ ເຊິ່ງປະກອບດ້ວຍໄລຍະ Non-REM ປະມານ 80ນາທີ ແລະ ໄລຍະ REM ອີກ 10ນາທີ) ແຕ່ການງີບຫຼັບດົນຕະຫຼອດນັ້ນ ອາດຈະເຮັດໃຫ້ເກີດຄວາມຜິດປົກກະຕິຂອງການນອນໃນຕອນກາງຄືນໄດ້
ການອົດນອນນັ້ນທໍາລາຍສຸຂະພາບ ເຮັດໃຫ້ເກີດບັນຫາທາງດ້ານຮ່າງກາຍ ແລະ ອາລົມ, ໃນຂະນະດຽວກັນ ການງີບຫຼັບໃນຕອນກາງເວັນນັ້ນໄດ້ມີການສຶກສາແລ້ວພົບວ່າເກີດປະໂຫຍດຕໍ່ສຸຂະພາບຮ່າງກາຍ ແລະ ຈິດໃຈດ ຊ່ວຍໃຫ້ມີສະມາທິ ແລະ ຄວາມຈໍາດີຂຶ້ນ, ຊ່ວຍຫຼຸດຄວາມສ່ຽງຕໍ່ໂຣກຫົວໃຈ ແລະ ໂໜກຫຼອດເລືອດໄດ້
ການງີບຫຼັບໃນຕອນກາງເວັນ ເຖິງວ່າຈະມີພຽງແຄ່ 10-20ນາທີ ກໍສາມາດເຮັດໃຫ້ເຮົາຮູ້ສຶກສົດຊື່ນຂຶ້ນ ເພາະຊ່ວງເວລານີ້ ຈະຊ່ວຍເຮັດໃຫ້ຮ່າງກາຍຂອງເຮົາກັບສູ່ໂໝດປົກກະຕິໄດ້ຢ່າງມີປະສິດທິພາບ ລວມເຖິງການເຮັດວຽກຂອງລະບົບສະໝອງ, ຄວາມຄິດສ້າງສັນ ແລະ ປະໂຫຍດດ້ານອື່ນໆອີກຫຼາຍຢ່າງ
ດ້ວຍຄວາມຫ່ວງໃຍ
INFO.- ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://www.healthline.com/health/how-long-should-i-nap
(2) https://www.ncbi.nlm.nih.gov/pmc/articles/PMC4667384/
(3) https://www.medicalnewstoday.com/articles/326803
#ສຸຂະພາບທີ່ດີເລີ່ມຕົ້ນຈາກໂຕທ່ານ

14/05/2021

INFO. - ອິນໂຟ x Health and Wellness EXPO LAOS
ເມົາລົດເກີດຈາກຫຍັງ?
ອາການເມົາລົດ ອາດເປັນບັນຫາໜັກໃຈຂອງໃຜຫຼາຍໆຄົນ ໂດຍສະເພາະແມ່ນຜູ້ທີ່ຕ້ອງເດີນທາງເປັນປະຈໍາ ໂດຍມັກຈະເກີດຂຶ້ນຕອນທີ່ເຮົາກຳລັງໂດຍສານພາຫະນະທີ່ມີການແກວ່ງຕົວໃນຂະນະທີ່ຕົວລົດກຳລັງເຄື່ອນທີ່ເປັນເວລາດົນ ສົ່ງຜົນໃຫ້ວິນຫົວ, ປວດຮາກ ເຊິ່ງອາການດັ່ງກວ່າສາມາດປ້ອງກັນ ແລະ ບັນເທົາໄດ້ດ້ວຍການປັບພຶດຕິກຳບາງຢ່າງໃນລະຫວ່າງເດີນທາງ ແລະ ອາດໃຊ້ຢາແກ້ເມົາລົດຕາມຄໍາແນະນໍາຂອງທ່ານໝໍ
ອາການເມົາລົດ (Motion Sickness) ເປັນບັນຫາທີ່ເກີດຂຶ້ນກັບບາງຄົນເທົ່ານັ້ນ ໂດຍຈະພົບໄດ້ໃນຕອນທີ່ນັ່ງລົດທີ່ມີການເຄື່ອນທີ່ ສົ່ງຜົນໃຫ້ປະສາດຮັບຮູ້ການເຄື່ອນທີ່ຂອງບໍ່ສອດຄ່ອງກັບສິ່ງທີ່ເຫັນ ເຮັດໃຫ້ສະໝອງເກີດຄວາມສັບສົນ ເຊິ່ງເຮັດໃຫ້ເກີດອາການເມົາລົດ ເຮັດໃຫ້ຜູ້ທີ່ມີອາການເມົາລົດຮູ້ສຶກວິນຫົວ, ປວດຮາກ, ມິເຫື່ອອອກຫຼາຍກວ່າປົກກະຕິ, ຮູ້ສຶກອ່ອນເພຍ ແລະ ບໍ່ຍາກອາຫານເປັນຕົ້ນ
ອາການເມົາລົດສາມາດເກີດຂຶ້ນໄດ້ງ່າຍ ໂດຍສະເພາະບຸກຄົນຕໍ່ໄປນີ້ ທີ່ສ່ຽງຕໍ່ອາການເມົາລົດໄດ້ຫຼາຍກວ່າຄົນທົ່ວໄປຄື:
- ເດັກນ້ອຍອາຍຸ 2-12ປີ
- ຜູ້ທີ່ມີປະສາດການຮັບຮູ້ໄວ
- ຜູ້ທີ່ເປັນໄມເກຣນ
- ຜູ້ຍິງທີ່ກໍາລັງມີປະຈໍາເດືອນ, ຜູ້ຍິງຖືພາ, ຫຼື ຢູ່ໃນໄລຍະການບໍາບັດຮໍໂມນ
- ຜູ້ທີ່ມີພຶດຕິກໍາໃຊ້ສານເສບຕິດ
- ຜູ້ທີ່ກໍາລັງໃຊ້ຢາບາງຊະນິດເຊັ່ນ: ຢາຮັກສາໂຣກຫອບຫືດ, ຢາຕ້ານໂຣກຊຶມເສົ້າເປັນຕົ້ນ
ວິທີແກ້ອາການເມົາລົດ
1. ນັ່ງທາງໜ້າຂອງລົດ
ເພາະຈະເປັນຕໍາແໜ່ງທີ່ການແກວ່ງ ແລະ ການເໜັງຂອງລົດໜ້ອຍກວ່າຊ່ວງທ້າຍ ການນັ່ງເບາະໜ້າຂອງລົດຈະເຮັດໃຫ້ການປະສາດຮັບຮູ້ການເຄື່ອນຂອງລົດ ໄປພ້ອມກັບອະໄວຍາວະຄວບຄຸມການຊົງຕົວທີ່ຢູ່ໃນຫູຊັ້ນໃນ ຈຶ່ງມີໂອກາດເມົາລົດໄດ້ໜ້ອຍກວ່າ
2. ແນມເບິ່ງໄປທາງໜ້າໄກໆ ແລະ ຕັ້ງຫົວໃຫ້ຊື່
ໃນຕອນທີ່ເດີນທາງ ຄວນໃຊ້ສາຍຕາເບິ່ງໄປບ່ອນທີ່ຢູ່ໄກ ແລະ ໃນບາງຄັ້ງໃຫ້ນັ່ງຢູ່ຊື່ໆ ເພື່ອໃຫ້ປະສາດສໍາພັດຄ່ອຍປັບຕົວ ແລະ ຮັບຮູ້ຕໍາແໜ່ງຂອງຕົນເອງໃນຕອນທີ່ລົດກໍາລັງເຄື່ອນຕົວໄປທາງໜ້າ ນອກຈາກນີ້ ການຕັ້ງຫົວໃຫ້ຊື່ ບໍ່ໃຫ້ຫົວພິງກັບສ່ວນລົດທີ່ເຄື່ອນທີ່ ແລະ ບໍ່ຄວນໝູບໜ້າເພາະຈະເຮັດໃຫ້ຮູ້ສຶກຄືກັບຖືກແກວ່ງຕະຫຼອດເວລາເຮັດໃຫ້ເກີດອາການເມົດລົດຫຼາຍກວ່າເກົ່າ
3. ບໍ່ຄວນກົ້ມໜ້າອ່ານໜັງສື ຫຼື ຫຼິ້ນໂທລະສັບ
ການຈົດຈໍ່ສາຍຕາຢູ່ບ່ອນເກົ່າດົນເກີນໄປ ຈະເຮັດໃຫ້ມີອາການປວດຫົວເພີ່ມຂຶ້ນໄດ້ ໂດຍສະເພາະການອ່ານໜັງສື ຫຼື ຫຼິ້ນໂທລະສັບ ເພາະຈະເຮັດໃຫ້ປະສາດຕາ ແລະ ຮ່າງກາຍບໍ່ສາມາດປັບສົມດຸນການເຄື່ອນໄຫວໄດ້ ເຮັດໃຫ້ເລືອດໄປລ້ຽງສະໝອງໄດ້ໜ້ອຍ ເຊິ່ງເປັນສາເຫດຂອງອາການວິນຫົວ ແລະ ປວດຮາກ
4. ກິນໝາກໄມ້ທີ່ມີລົດຊາດສົ້ມ ຫຼື ດື່ມນໍ້າອັດລົມ
ແນະນໍາກິນອາຫານທີ່ມີລົດຊາດສົ້ມເຊັ່ນ: ໝາກຂາມ, ໝາກນາວ, ໝາກມ່ວງ ເພື່ອຫຼຸດອາການວິນຫົວ ແຕ່ບໍ່ຄວນກິນຫຼາຍຈົນເກີນໄປ ເພາະອາດຈະເຮັດໃຫ້ເກີດກົດໃນກະເພາະໄດ້ ນອກຈາກນີ້ ການດື່ມນໍ້າອັດລົມເປັນໄລຍະກໍສາມາດຊ່ວຍຫຼຸດອາການປວດຮາກທີ່ເກີດຂຶ້ນຈາກການເມົາລົດໄດ້ເຊັ່ນກັນ
5. ເປີດແວ່ນລົດເພື່ອລະບາຍອາກາດ
ການເປີດແວ່ນລົດໃນໄລຍະໃດໜຶ່ງ ເພື່ອໃຫ້ອາກາດຖ່າຍເທໄດ້ສະດວກ ພັດເອົາລົມຈາກນອກລົດເຂົ້າມາໃນລົດ ເພາະລົມຈາກທໍາມະຊາດຈະຊ່ວຍໃຫ້ສະໝອງປອດໂປ່ງຂຶ້ນ ຫຼຸດອາການວິນຫົວໄດ້ເປັນຢ່າງດີ
6. ບໍ່ຄວນສູບຢາ
ສໍາຫຼັບຜູ້ທີ່ບໍ່ສູບຢາຈະຮູ້ດີວ່າ ກິ່ນຂອງຄວັນຢາສູບນັ້ນມີກິ່ນທີ່ແຮງ ຖ້າເຮົາສູດດົມພຽງເວລາບໍ່ດົນກໍສາມາດເຮັດໃຫ້ເກີດອາການວິນຫົວໄດ້ ໂດຍທີ່ລົດບໍ່ມີການບໍ່ເຄື່ອນກໍສາມາດວິນຫົວໄດ້
7. ບໍ່ຄວນກິນອາຫານອິ່ມຈົນເກີນໄປ
ເພາະມີແນວໂນ້ມສູງທີ່ຈະປວດຮາກໄດ້ ຄວນຫງົດອາຫານທີ່ມີກິ່ນແຮງ, ອາຫານມັນ ເພາະຈະເຮັດໃຫ້ຍ່ອຍຍາກ ແລະ ຄວນຫງົດອາຫານລົດຈັດ ເພາະຖ້າຮາກອອກມາຈະເຮັດໃຫ້ແສບຄໍ ແລະ ດັງ
8. ຢາດົມ ຫຼື ຢາໝ່ອງ
ເອີ້ນໄດ້ວ່າເປັນຂອງຄູ່ກັນກັບອາການວິນຫົວເລີຍກໍວ່າໄດ້ ໂດຍໃຊ້ດົມໃນຕອນທີ່ມີອາການຈະຊ່ວຍບັນເທົາໄດ້ບໍ່ຫຼາຍກໍໜ້ອຍ ຖ້າຖາກເປັນຢາໝ່ອງນໍ້າ ແນະນໍາໃຫ້ທາທີຂະມັບ ຫຼື ບໍລິເວນໝ້າຮູດັງບາງໆ
9. ຢາແກ້ເມົາລົດ
ຖ້າວິທີຂ້າງຕົ້ນເຄີຍເຮັດແລ້ວແຕ່ບໍ່ສາມາດຊ່ວຍຫຼຸດອາການໄດ້ ແນະນໍາກິນຢາແກ້ເມົາລົດ ກ່ອນອອກເດີນທາງເຄິ່ງຊົ່ວໂມງ ເຊິ່ງເປັນວິທີທີ່ງ່າຍ ແລະ ຄວນປະຕິບັດຕາມຄໍາແນະນໍາຂອງແພດ ຫຼື ຄໍາເຕືອນຂອງຢານັ້ນຢ່າງເຂັ້ມງວດ ລວມທັງປຶກສາແພດທຸກກຄັ້ງ ໂດຍສະເພາະເດັກນ້ອຍອາດສ່ຽງໄດ້ຮັບຜົນຂ້າງຄຽງຈາກການໃຊ້ຢາຫຼາຍກວ່າກຸ່ມອື່ນໆ
ດ້ວຍຄວາມຫ່ວງໃຍ
INFO.- ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://www.healthline.com/health/motion-sickness
(2) https://www.nhs.uk/conditions/motion-sickness/
(3) https://familydoctor.org/condition/motion-sickness/
#ສຸຂະພາບທີ່ດີເລີ່ມຕົ້ນຈາກໂຕທ່ານ

11/05/2021

INFO. - ອິນໂຟ x Health and Wellness EXPO LAOS
parasomnia ອາການນອນລະເມີ ຫຼື ອາການຜິດປົກກະຕິໃນຕອນທີ່ເຮົາຫຼັບ
ການນອນເປັນສິ່ງທີ່ສຳຄັນຕໍ່ສຸຂະພາບຫຼາຍສຳລັບທຸກໄວ ຖ້າຫາກເຮົາມີບັນຫາການນອນຫຼັບ ອາດເຮັດໃຫ້ເຮົານອນບໍ່ພຽງພໍ ສົ່ງຜົນຕໍ່ສຸຂະພາບທາງດ້ານຮ່າງກາຍ ແລະ ຈິດໃຈ ລວມທັງຄວາມສາມາດໃນການຮຽນຮູ້ຂອງເຮົາພ້ອມ ນອກຈາກນີ້ ຍັງນຳມາສູ່ບັນຫາສຸຂະພາບຮ່າງກາຍ ແລະ ຄວາມວິຕົກກັງວົນຂອງຈິດໃຈຄົນຮອບຂ້າງອີກດ້ວຍ, ບາງຄັ້ງທີ່ເຮົານອນລະເມີ ເຮົາອາດຈະບໍ່ຮູ້ວ່າເຮົາຄວນເເຮັດແບບໃດ ມື້ນີ້ເຮົາມາຮູ້ຈັກກ່ວກັບບັນຫາການນອນລະເມີ (parasomnia), ສາເຫດ ລວມທັງວິທີປ້ອງກັນຂອງອາການນີ້
ການນອນລະເມີແມ່ນຫຍັງ?
ການລະເມີ ແມ່ນພຶດຕິກຳການນອນທີ່ເກີດຂຶ້ນຕອນກຳລັງຫຼັບ ບໍ່ຮູ້ສຶກຕົວ ແລະ ມີການກ່ຽວຂ້ອງກັບການເຮັັດວຽກຂອງລະບົບປະສາດອັດຕະໂນມັດ ຄົນທີ່ມີອາການນອນລະເມີມີພຶດຕິກຳ ຫຼື ການປ່ຽນແປງທາງດ້ານຮ່າງກາຍທີ່ຜິດປົກກະຕິ ເຊິ່ງສິ່ງນີ້ກ່ຽວຂ້ອງກັບການນອນ, ໃນບາງໄລຍະຂອງການນອນ ຫຼື ໃນໄລຍະເຄິ່ງຫຼັບ ເຄິ່ງຕື່ນ ອາດຈະເວົ້າໄດ້ວ່າ ເປັນຄວາມຜິດປົກກະຕິທີ່ເກີດຈາກການຕື່ນຕົວຂອງ autonomic nervous system, motor system, ຫຼື cognitive process ໃນຕອນທີ່ຫຼັບ
ອາການນອນລະເມີນັ້ນສ່ວນໃຫຍ່ເກີດຈາກຄວາມຜິດປົກກະຕິຂອງຄື່ນສະໝອງໃນຕອນທີ່ຫຼັບ ຄືມີຄື່ນສະໝອງທີ່ຄວນຢູ່ຕອນທີ່ເຮົາຕື່ນມາປະສົມໃນຕອນທີ່ຫຼັບ ດັ່ງນັ້ນຈຶ່ງເຮັດໃຫ້ຜູ້ທີ່ມີອາການຢູ່ໃນສະພາວະເຄິ່ງຫຼັບເຄິ່ງຕື່ນ ສ່ວນຫຼາຍຈະເກີດຂື້ນໃນເດັກນ້ອຍ ຄາດການວ່າເກີດຈາກການທີ່ສະໝອງຍັງພັດທະນາໄດ້ບໍ່ເຕັມທີ່
ວົງຈອນຂອງການນອນຫຼັບແບ່ງເປັນ 2ໄລຍະຄື
1.ໄລຍະຫຼັບທໍາມະດາ NON-RAPID EYE MOVEMENT SLEEP ຫຼື NON-REP SLEEP ເປັນໄລຍະທີ່ຈະເຮັດໃຫ້ເຮົາຫຼັບລົງໄປເປັນແຕ່ໄລຍະ ເຊິ່ງແບ່ງເປັນ 4ໄລຍະຍ່ອຍເລີ່ມຢາກນອນເຄິ່ງຫຼັບເຄິ່ງຕື່ນຫຼັບປານກາງຫຼັບເລິກ
2.ໄລຍະຫຼັບຝັນ RAPID EYE MOVEMENT SLEEP ຫຼື REP SLEEP
ໂດຍການລະເມີສ່ວນໃຫຍ່ມັກເກີດໃນໄລຍະ ຫຼັບເລິກ ແລະ ຫຼັບຝັນ
Nightmare Disorder ຫຼື ຝັນຮ້າຍ ເກີດໃນໄລຍະ REM ອາດຈະຈື່ຄວາມຝັນໄດ້ ພົບຫຼາຍໃນກຸ່ມຄົນທີ່ອາຍຸນ້ອຍ, ກຸ່ມໄວໜຸ່ມ ແລະ ກຸ່ມຄົນເຮັດວຽກ ເຊິ່ງເກີດຈາກຄວາມກົດດັນດ້ານຈິດໃຈເຊັ່ນ: ການຮຽນ ແລະ ການສອບເສັງ ຫຼື ການເຮັດວຽກເປັນຕົ້ນ ເຊິ່ງບໍ່ມີວິທີຮັກສາສະເພາະ
Sleep Terror Disorder ມີອາການສະດູ້ງຕື່ນ ຜະຫວາ ກີດຮ້ອງສຽງດັງ ການເຮັດວຽກຂອງ autonomic nervous system ສູງ ເກີດຂື້ນຕອນທີ່ເຮົາຫຼັບເລິກ ເມື່ອຕື່ນມາຈະຈື່ຄວາມຝັນບໍ່ໄດ້
Sleep Walking Disorder ຫຼື somnambulism ສ່ວນຫຼາຍມັກເກີດຂື້ນຕອນທີ່ເຮົາຫຼັບຝັນ ແລະ ສາມາດເກີດຫຼັບເລິກໄດ້ເຊັ່ນກັນ ມີອາການລຸກຂື້ນມາຢ່າງແບບບໍ່ຮູ້ສຶກຕົວ ແລະ ຈະເປັນບໍ່ດົນ ເມື່ອຕື່ນຂື້ນມາຈະຈື່ເຫດການບໍ່ໄດ້ ການຮັກສາຄືການຮັບ Imipramine ຫຼື Benzodiazepine ທີ່ມີຂະໜາດຕ່ຳ ໂດຍການໄປພົບແພດ ເພື່ອຂໍຄຳປຶກສາ ເພາະມັນເປັນອັນຕະລາຍຕໍ່ຕົວເອງ
ສາເຫດທີ່ເຮັດໃຫ້ນອນລະເມີ ອາດມາຈາກປັດໄຈເຫຼົ່ານີ້:
- ພາວະການນອນຫຼັບບໍ່ພຽງພໍ ຫຼື ຖືກລົບກວນການນອນຫຼັບ
- ຄວາມເມື່ອຍ
- ຄວາມຄຽດ ແລະ ຄວາມວິຕົກກັງວົນ
- ພາວະຊຶມເສົ້າ
- ເປັນໄຂ້
- ເມົາເຫຼົ້າ
- ໃຊ້ສານ ຫຼື ຢາບາງຊະນິດເຊັ່ນ: ຢາລະຫງັບປະສາດ ຫຼື ຢາກ່ອມປະສາດ
ວິທີປ້ອງກັນ ແລະ ຮັກສາ:
ການປ້ອງກັນເຮັດໄດ້ໂດຍກາຍເພີ່ມຄຸນນະພາບໃນການນອນເຊັ່ນ: ນອນເປັນເວລາ ແລະ ຕື່ນເປັນເວລາ, ນອນຫຼັບໃຫ້ພຽງພໍ ລວມເຖິງການເຮັດໃຫ້ສະພາບແວດລ້ອມເໝາະສົມໃນການນອນກໍຊ່ວຍຫຼຸດຄວາມສ່ຽງໃນການນອນລະເມີໄດ້ ຖ້າມີອາການໜັກເກີນໄປກໍຄວນໄປພົບແພດ ເພື່ອຮັບການຮັກສາ ໂດຍແພດຈະຖາມປະຫວັດ ແລະ ກວດຮ່າງກາຍຢ່າງລະອຽດເພື່ອຫາສາເຫດ ທີ່ເຮັດໃຫ້ເກີດອາການລະເມີ
ການນອນລະເມີເປັນເລື່ອງທຳມະດາທີ່ບໍ່ໄດ້ມີຄວາມຮ້າຍແຮງ ຫຼື ເປັນຕາຢ້ານຢ່າງທີ່ຄິດ ແຕ່ຈະພົບບາງຄົນສາມາດເຮັດໃຫ້ເກີດຕໍ່ຕົວເອງ ແລະ ຜູ້ອື່ນ ລວມເຖິງການບາດເຈັບຈາກອຸບັດຕິເຫດທີ່ເກີດຂື້ນຈາກການລະເມີ ແລະ ພຶດຕິກຳບໍ່ເໝາະສົມທີ່ເກີດແບບບໍ່ຮູ້ຕົວ
ໝາຍເຫດ: ປັດໄຈສຳຄັນທີ່ເຮັດໃຫ້ອາການນອນລະເມີເພີ່ມຂື້ນແມ່ນມາຈາກກຳມະພັນ ແລະ ອາຍຸ
ດ້ວຍຄວາມຫ່ວງໃຍ
INFO.- ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://www.sleepfoundation.org/parasomnias
(2) http://sleepeducation.org/sleep-disorders-by.../parasomnias
(3) https://www.uofmhealth.org/.../brain.../parasomnia
#ສຸຂະພາບທີ່ດີເລີ່ມຕົ້ນຈາກໂຕທ່ານ

07/05/2021

INFO. - ອິນໂຟ x Health and Wellness EXPO LAOS
ອາການກ່ອນເປັນປະຈຳເດືອນທີ່ຫຼາຍຄົນບໍ່ເຂົ້າໃຈ
ອາການກ່ອນມີປະຈຳເດືອນ (Permenstrual Syndrome) ເປັນອາການທີ່ເກີດຈາກຮໍໂມນປ່ຽນແປງ ມັນເປັນເລື່ອງປົກກະຕິທີ່ຜູ້ຍິງສ່ວນໃຫຍ່ຄິດວ່າຕ້ອງໄດ້ເປັນ ແລະ ຈະຫາຍໄປເອງໄດ້ໂດຍບໍ່ຈຳເປັນທີ່ຈະຕ້ອງໄປພົບໝໍເພື່ອຮັກສາ ຫຼື ອາດຈະບໍ່ຕ້ອງໄດ້ເຮັດສິ່ງໃດເລີຍ ເພາະວ່າມັນບໍ່ມີທາງແກ້ໄຂໄດ້ ຕ້ອງລໍຖ້າຈົນກວ່າມັນກວ່າອາການນັ້ນມັນຫາຍໄປເອງ ວິທີຮັກສາສ່ວນໃຫຍ່ຈຶ່ງເປັນການແກ້ໄຂທີ່ປາຍເຫດຫຼາຍກວ່າເຊັ່ນ ການກິນຢາເພື່ອຊ່ວຍບັນເທົາອາການປວດ, ການດື່ມນ້ຳອຸນ ແລະ ຫາເອົານ້ຳອຸ່ນມາປະຄົບເພື່ອບັນເທົາອາການເທົ່ານັ້ນ
ອາການຜິດປົກກະຕິກ່ອນມີປະຈຳເດືອນ (Permenstrual Dysphoric Disorder) ຄືອາການຜິດປົກກະຕິທາງຮ່າງກາຍ, ຈິດໃຈ ແລະ ອາລົມຢ່າງຮຸນແຮງ ໂດຍຄວາມຮ້າຍແຮງນັ້ນຈະຄ້າຍຄືກັບອາການ PMS ແຕ່ເປັນອາການທີ່ມີຄວາມຮ້າຍແຮງກວ່າ PMS ເຊັ່ນ: ຄວາມຄຽດ, ຫງຸດຫງິດງ່າຍ, ອາລົມຂຶ້ນງ່າຍ ຫຼືຊຶມເສົ້າຢ່າງໜັກ ເຊິ່ງ PMDD ຈະພົບພຽງ 2%-10% ຈາກຈໍານວນຜູ້ຍິງທີ່ເປັນປະຈໍາເດືອນທັງໝົດ
ຄວາມແຕກຕ່າງຂອງອາການກ່ອນມີປະຈຳເດືອນ (Permenstrual Syndrome) ແລະ ອາການຜິດປົກກະຕິກ່ອນມີປະຈຳເດືອນ (Permenstrual Dysphoric Disorder)
ອາການກ່ອນມີປະຈຳເດືອນ (Permenstrual Syndrome)
· ທ້ອງອືດ
· ເຈັບທ້ອງ
· ເປັນຕະຄິວ
· ປວດຫົວ
· ກິນຫຼາຍກວ່າປົກກະຕິ
· ອ່ອນເພຍງ່າຍ
· ປວດຕາມຂໍ້ ແລະ ກ້າມເນື້ອ
· ນອນບໍ່ຫຼັບ
· ຫົດຫູ່
ອາການຜິດປົກກະຕິກ່ອນມີປະຈຳເດືອນ (Permenstrual Dysphoric Disorder)
· ຊຶມເສົ້າຢ່າງໜັກ
· ອາລົມປ່ຽນແປງງ່າຍ
· ໃຈຮ້າຍ, ຮ້ອງໃຫ້ງ່າຍ
· ບໍ່ມີແຮງ, ນອນບໍ່ຫຼັບ
· ບໍ່ມີສະມາທິ, ສະມາທິສັ້ນ
· ເກີດອາການບວມຕາມຕົວ
· ແໜ້ນໜ້າເອິກ
· ປວດຫົວຢ່າງໜັກ
· ຄິດທີ່ຈະຂ້າຕົວຕາຍ
ສາເຫດຂອງອາການກ່ອນມີປະຈຳເດືອນ (PMS) ແລະ ອາການຜິດປົກກະຕິກ່ອນມີປະຈໍາເດືອນ (PMDD) ນັ້ນເຖິງວ່າໃນປັດຈຸບັນຍັງບໍ່ທັນຫາຂໍ້ສະຫຼຸບໄດ້ຊັດເຈນ ແຕ່ງານວິໄຈໃນປະເທດສະຫາລັດອາເມຣິກາພົບວ່າ (PMS) ແລະ (PMDD) ກ່ຽວຂ້ອງກັບປັດໂຈຕ່າງໆດັ່ງນີ້:

●ກຳມະພັນ: ຄົນທີ່ມີອາການ PMS ຂັ້ນຮຸນແຮງ ແລະ PMDD ຈະພົບໃນເຊື້ອພັນ ESR1 (Estrogen Receptor Alpha) ທີ່ທ່າຍທອດມາຈາກກຳມະພັນ

●ຄວາມຜັນຜວນຂອງຮໍໂມນໃນເພດຍິງ: ການຕອບສະໜອງຂອງແຕ່ລະຄົນນັ້ນບໍ່ເທົ່າກັນ ການວິໄຈພົບວ່າຄ່າຂອງຮໍໂມນເອສໂຕຣເຈນ ແລະ ໂປຣເຈຮເຕີໂຣນໃນຄົນທີ່ເປັນ PMS, PMDD ແລະ ບໍ່ເປັນນັ້ນບໍ່ແຕກຕ່າງກັນ, ແຕ່ຄົນທີ່ມີອາການ PMS ແລະ PMDD ຫາກບໍ່ມີອາການຜັນຜວນຂອງຮໍໂມນ ເຊັ່ນຖືກຕັດຮັງໄຂ່ ຫຼື ໄດ້ຮັບຢາຫຼຸດການເຮັດວຽກຂອງຮັງໄຂ່ຈະບໍ່ມີອາການ PMS ແລະ PMDD

●ນິໄສສ່ວນຕົວ ແລະ ສະພາບແວດລ້ອມ: ຈາກການສຶກສາພົບວ່າ ຄົນທີ່ມີຖານະຍາກຈົນ, ການສຶກສາບໍ່ສູງ, ມັກສູບຍາ, ຄຽດງ່າຍ ມີຄວາມສ່ຽວທີ່ຈະມີອາການ PMS ແລະ PMDD ຫຼາຍກວ່າປົກກະຕິ

●ສານສື່ປະສາດ (Neurotransmitters): ການຜັັນຜວນຂອງຮໍໂມນ Progesterone ຫຼຸດສານສື່ປະສາດ Opioid, GABA, Beta endorphin ແລະ Serotonin ເຊິ່ງກໍ່ໃຫ້ເກີດຄວາມວິຕົກກັງວົນ, ຄວາມຄຽດ ແລະ ຊຶມເສົ້າ ການຄົ້ນຄວ້າພົບວ່າສານສື່ປະສາດເຫຼົ່ານີ້ຈະຫຼຸດລົງໃນຄົນທີ່ເປັນ PMS ແລະ PMDD

●ວິຕາມິນ: ພົບການກ່ຽວຂ້ອງລະຫວ່າງການກິນວິຕາມິນບີ1, ບີ2 ທີ່ສູງເກີນໄປເຮັດໃຫ້ຊ່ວຍຫຼຸດອາການ PMS ຂັ້ນຮຸນແຮງ ແລະ PMDD ລົງ ຖ້າຮ່າງກາຍຂາດວິຕາມິນຈໍາພວກນີ້ຈະເຮັດອາການຂອງ PMS ແລະ PMDD ຮ້າຍແຮງຂຶ້ນ ສ່ວນການຮັກສາໂດຍການກິນວິຕາມິນບີ6, ວິຕາມິນອີ, ວິຕາມິນຊີ, ແຄຣຊຽມ ແລະ ເບີລີ້ນັ້ນຈະໂດ້ຜົນໃນບາງຄົນເທົ່ານັ້ນ
ວິທີບັນເທົາອາການກ່ອນມີປະຈຳເດືອນ (Permenstrual Syndrome) ແລະ ອາການຜິດປົກກະຕິກ່ອນມີປະຈໍາເດືອນ (Permenstrual Dysphoric Disorder)
ຕ້ອງອາໄສການເບິ່ງແຍງຕົວເອງໃນເບື້ອງຕົ້ນເຊັ່ນ: ພັກຜ່ອນໃຫ້ພຽງພໍ, ຫຼຸດຄວາມຄຽດອອກກຳລັງກາຍຢ່າງສະໝ່ຳສະເໝີ, ກິນຜັກ ແລະ ໝາກໄມ້ໃຫ້ຫຼາຍຂຶ້ນ, ຫຼຸດອາການທີ່ລົດຈັດ ແລະ ຫຼຸດການດື່ມຊາ, ກາເຟ ແລະ Alcohol ກໍສາມາດຊ່ວຍໄດ້ ແຕ່ຖ້າອາການໜັກເກີນໄປກໍຄວນໄປພົບໝໍ ເພາະເລື່ອງບາງເລື່ອງທີ່ເຮົາຄິດວ່າເປັນເລື່ອງນ້ອຍ, ບາງຢ່າງທີ່ເຮົາຄິດວ່າແກ້ໄຂບໍ່ໄດ້ຖ້າເຮົາໃສ່ໃຈ ແລະ ບໍ່ເບິ່ງຂ້າມບັນຫາທຸກຢ່າງກໍຈະມີທາງອອກ
ດ້ວຍຄວາມຫ່ວງໃຍ
INFO.- ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://womensmentalhealth.org/specialty.../pms-and-pmdd/
(2) https://www.mayoclinic.org/.../expert.../pmdd/faq-20058315
(3) https://www.hopkinsmedicine.org/.../premenstrual...
#ສຸຂະພາບທີ່ດີເລີ່ມຕົ້ນຈາກໂຕທ່ານ

04/05/2021

INFO. - ອິນໂຟ x Health and Wellness EXPO LAOS
ອາຫານທີ່ແຕ່ກ່ອນກິນໄດ້ແຕ່ຕອນນີ້ແພ້ ແລະ ອາຫານທີ່ແຕ່ກ່ອນແພ້ ແລ້ວຕອນນີ້ກິນໄດ້.
ອາການແພ້ອາຫານ ເປັນໜຶ່ງໃນສິ່ງທີ່ທາງການແພດຍັງຫາຄຳຕອບບໍ່ໄດ້ວ່າເປັນເພາະເຫດໃດ ຄົນເຮົາຈຶ່ງແພ້ອາຫານ ໃນຂະນະທີ່ບາງຄົນບໍ່ແພ້ອາຫານຊະນິດໃດເລີຍ ແຕ່ບາງຄົນແພ້ອາຫານຫຼາຍຢ່າງຈົນນັບບໍ່ຖ້ວນ ທີ່ໜ້າປະຫຼາດໃຈກວ່ານັ້ນ ເມື່ອເຮົາໃຊ້ຊີວິດໄປຫຼາຍປີຈົນເຂົ້າສູ່ຊ່ວງໄວໜຸ່ມ ໄວເຮັດວຽກ ຫຼື ຈົນເຖິງໄວກະສຽນ ອາຫານທີ່ເຄີຍກິນມາຕັ້ງແຕ່ຕອນຍັງນ້ອຍ ກໍເຮັດໃຫ້ເຮົາເກີດອາການແພ້ ໃນທາງກົງກັນຂ້າມ ອາຫານທີ່ກິນຕອນຍັງນ້ອຍແລ້ວແພ້ ພໍເວລາຜ່ານໄປກໍກິນໄດ້
Cathryn Nagler ນັກວິທະຍາສາດ ແລະ ອາຈານຈາກມະຫາວິທະຍາໄລ Chicago ກວ່າວ່າ “ຈາກອັດຕາການພົບຜູ້ປ່ວຍທີ່ມີອາການແພ້ອາຫານທີ່ເພີ່ມຂື້ນຢ່າງໄວນີ້ ສາມາດລະບຸໄດ້ວ່າເປັນອາການແພ້ທີ່ບໍ່ໄດ້ເກີດຈາກກຳມະພັນ ເພາະກຳມະພັນບໍ່ສາມາດປ່ຽນແປງໄດ້ຢ່າງງ່າຍດາຍແບບນີ້ ຕ້ອງກ່ຽວກັບສະພາບແວດລ້ອມອ້ອມຕົວແນ່ນອນ” ໂດຍລາວອະທິບາຍເພີ່ມເຕີມວ່ານັກວິທະຍາສາດຫຼາຍຄົນເຊື່ອວ່າ ການເພີ່ມຂື້ນຂອງຜູ້ປ່ວຍໂຣກແພ້ອາຫານ ອາດກ່ຽວຂ້ອງກັບສະພາບແວດລ້ອມອ້ອມຕົວ ເພາະເປັນປັດໄຈທີ່ສາມາດປ່ຽນແປງຂອງ ໄມໂຄຣໄບໂອມ (Microbiome) ເຊິ່ງເປັນເຊື້ອແບັກທີເຣັຍທີ່ອາໄສຢູ່ໃນຮ່າງກາຍຂອງຄົນເຮົາ
ອາຫານທີ່ແຕ່ກ່ອນກິນໄດ້ແຕ່ຕອນນີ້ແພ້ໄດ້ຫຼືບໍ່?
ສ່ວນໃຫຍ່ແລ້ວອາຫານທີ່ເຮົາເຄີຍແພ້ທີ່ມາຈາກຄວາມຜິດປົກກະຕິຂອງຮ່າງກາຍ ມັກເກີດຂື້ນຕັ້ງແຕ່ຕອນຍັງນ້ອຍ ຈົນເຮັດໃຫ້ເຮົາຮູ້ວ່າເຮົາບໍ່ສາມາດກິນອາຫານປະເພດນັ້ນໄດ້ ແຕ່ມີບາງຄັ້ງທີ່ຄວາມຜິດປົກກະຕິດັ່ງກວ່າສາມາດເກີດຂື້ນໄດ້ໃນຕອນທີ່ເຮົາມີອາຍຸເພີ່ມຂື້ນໄດ້ເຊັ່ນກັນ
ເຮົາຈະຮູ້ໄດ້ແນວໃດວ່າເຮົາແພ້ອາຫານ
ຄອບຄົວມີປະຫວັດແພ້ອາຫານບາງປະເພດ
ມີອາການຂອງໂຣກພູມແພ້ຢູ່ກ່ອນແລ້ວເຊັ່ນ ໂຣກຫອບຫືດ ໂຣກຜື່ນແພ້ ຫຼື ຈາມ
ເຄີຍກິນອາຫານປະເພດໜຶ່ງ ແລ້ວມີອາການຜິດປົກກະຕິເຊັ່ນ ມີຜື່ນຂື້ນໜ້າ ໜ້າບວມ ປາກບວມ ຫາຍໃຈບໍ່ອອກ
ຈົດບັນທຶກອາຫານທີ່ເຮັດໃຫ້ເກີດອາການແພ້ ແລ້ວຢຸດກິນອາຫານນັ້ນ 10-15ມື້ ແລ້ວສັງເກດວ່າອາການດີຂື້ນ ຫຼື ບໍ່
ໄປຫາທ່ານໝໍເພື່ອກວດຮ່າງກາຍຢ່າງລະອຽດ
ແພ້ອາຫານ ແຕ່ຖ້າກິນໄປເລື້ອຍໆຈົນກວ່າຈະເຊົາແພ້ໄດ້ຫຼືບໍ່
ມີຄວາມເປັນໄປໄດ້ວ່າ ເດັກນ້ອຍຈະພົບເຫັນອາການແພ້ອາຫານໄດ້ຫຼາຍຊະນິດກວ່າຜູ້ໃຫຍ່ ແລະ ມີໂອກາດທີ່ທີ່ຈະມີອາການດີຂື້ນໄດ້ເມື່ອໃຫຍ່ຂື້ນມາ ເວົ້າໄດ້ວ່າ ເດັກນ້ອຍອາຍຸຕໍ່າກວ່າ 6ປີ ທີ່ມີອາການແພ້ອາຫານປະເພດນົມ ໄຂ່ ແລະ ແປ້ງສາລີ ອາດມີອາການດີຂື້ນໄດ້ເມື່ອອາຍຸໃຫຍ່ຂື້ນ ຈາກພັດທະນາການທາງດ້ານຮ່າງກາຍທີ່ຄ່ອຍໆພັດທະນາຈົນເຕັມທີ່ ແຕ່ສຳຫຼັບບາງຄົນທີ່ມີອາການແພ້ອາຫານປະເພດຖົ່ວ ແລະ ອາຫານທະເລ ການທີ່ເຮົາກິນມື້ລະໜ້ອຍ ດ້ວຍຄວາມເຊື່ອທີ່ວ່າຮ່າງກາຍຈະຄ່ອຍໆປັບສະພາບໄດ້ເອງ ເຊິ່ງວິທີນີ້ອາດຈະໄດ້ຜົນສຳຫຼັບູຄົນທີ່ບໍ່ມີອາການແພ້ທີ່ຮ້າຍແຮງ ແຕ່ບໍ່ແນະນໍາໃຫ້ຄົນທີ່ມີອາການແພ້ທີ່ຮ້າຍແຮງ ເພາະຮ່າງກາຍເຮົາອາດຊ໋ອກ ໝົດສະຕິ ຫຼື ອາດຈະເສຍຊີວິດໄດ້
ນອກຈາກນີ້ ສຳຫຼັບອາການແພ້ອາຫານບາງປະເພດ ທີ່ເກີດຂື້ນຈາກຄວາມຜິດປົກກະຕິຂອງຮ່າງກາຍທີ່ບໍ່ມີຕົວຍ່ອຍສານອາຫານບາງປະເພດຕັ້ງແຕ່ຕອນເກີດເຊັ່ນ ໂປຣຕີນ ຫຼື ກຣູເຕັນໃນແປ້ງ ການທີ່ເຮົາກິນເທື່ອລະໜ້ອຍອາດຈະບໍ່ໄດ້ຜົນ ແລະ ເຮັດໃຫ້ອາການຊຸດໂຊມລົງໄປອີກຕື່ມ
ວິທີຮັກສາອາການແພ້ອາຫານ
ການຮັກສາໂດຍທົ່ວໄປແນະນຳໃຫ້ຫຼີກລ້ຽງອາຫານທີ່ຕົວເອງສົງໄສວ່າແພ້ ຈົນກວ່າອາການແພ້ຈະດີຂື້ນຕາມຊ່ວງອາຍຸ ແຕ່ມີອາຫານຫຼາຍຊະນິດທີ່ມີໂອກາດແພ້ໄດ້ໜ້ອຍ ຫຼື ໃນບາງຄັ້ງຜູ້ປ່ວຍມີອາການແພ້ຫຼາຍ ເຮັດໃຫ້ບໍ່ເຊົາຈາກການແພ້ອາຫານຕາມຊ່ວງອາຍຸ ແລະ ອາຫານບາງຊະນິດຜູ້ປ່ວຍສາມາດຫຼີກລ້ຽງໄດ້ຍາກ ເນື່ອງຈາກເປັນສ່ວນປະກອບຂອງອາຫານຫຼາຍຊະນິດ ແລະ ກາສິນຄ້າຂອງອາຫານບາງປະເພດທີ່ບໍ່ໄດ້ລະບຸ ເຮັດໃຫ້ເຮົາກິນອາຫານທີ່ແພ້ໄປແບບບໍ່ໄດ້ຕັ້ງໃຈ

ດ້ວຍຄວາມຫ່ວງໃຍ
INFO. - ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://www.mayoclinic.org/.../symptoms-causes/syc-20355095
(2) https://acaai.org/allergies/types/food-allergy
(3) https://www.nhs.uk/conditions/food-allergy/ See Less
#ສຸຂະພາບທີ່ດີເລີ່ມຕົ້ນຈາກໂຕທ່ານ

30/04/2021

INFO. - ອິນໂຟ x Health and Wellness EXPO LAOS
| ຄວາມເຫງົາ ອັນຕະລາຍ ຕໍ່ສຸຂະພາບ

ທຳມະດາ, ໃຜກໍເຄີຍເຫງົາ ມັນເປັນເລື່ອງທຳມະຊາດຂອງຊີວິດ ແຕ່ມັນກໍເປັນສິ່ງທີ່ເຮົາບໍ່ມັກໃຫ້ເກີດຂຶ້ນກັບເຮົາ ເພາະຄວາມເຫງົາ ມັນເຮັດໃຫ້ເຮົາເສົ້າ, ຫົດຫູ່ ທັງທີ່ບາງຄັ້ງກໍບໍ່ໄດ້ຢູ່ຄົນດຽວ, ອາດຈະເຫງົາເພາະຄິດຮອດເລື່ອງອະດີດ, ເຫງົາເພາະຄິດຮອດໃຜບາງຄົນ ແຕ່ຄວາມເຫງົາທີ່ເຮົາຄິດວ່າມັນເປັນເລື່ອງທຳມະດານັ້ນ ມັນອັນຕະລາຍທຳຮ້າຍສຸຂະພາບຫຼາຍກວ່າທີ່ເຮົາຄິດ
ມີນັກຈິດຕະວິທະຍາ ແລະ ວິໄຈຫລາຍອັນ ທີ່ສະແດງໃຫ້ເຫັນວ່າ ຄວາມເຫງົາອາດສົ່ງຜົນກະທົບຕໍ່ສຸຂະພາບ ບໍ່ວ່າຈະເປັນການເຈັບປ່ວຍງ່າຍ ຫຼື ເຮັດໃຫ້ອາການເຈັບປ່ວຍຊຸດໂຊມລົງ ເພາະວ່າຫາກເຮົາມີຄວາມເຫງົາຊໍ້າເຮື້ອ ອາດມີຄວາມກ່ຽວພັນກັບຮໍໂມນແຫ່ງຄວາມຄຽດ ແລະ ອາດເຮັດໃຫ້ພູມຕ້ານຂອງເຮົາຕໍ່າລົງ ຮ້າຍແຮງໄປກ່ວານັ້ນອາດມີຜົນກ່ຽວຂ້ອງກັບຄວາມດັນເລືອດເພີ້ມຂຶ້ນ, ເກີດພາວະຊຶມເສົ້າ, ເປັນໂຣກຄວາມຈຳສັ້ນ ແລະ ອື່ນໆ.
ນອກນັ້ນຍັງມີ ບົດລາຍງານການສຶກສາອົງກອນບໍລິຫານຊັບພະຍາກອນ ແລະ ບໍລິການສຸຂະພາບ ໃນປະເທດອັງກິດ ລະບຸວ່າ ຄວາມເຫງົາສາມາດຂ້າຄົນໄດ້ ແລະ ອັນຕະລາຍທຽບເທົ່າກັບການສູບຢາ 15 ກອກຕໍ່ມື້
ເຫັນໄດ້ວ່າ ຄວາມເຫງົາ ນອກຈາກມີຜົນກະທົບທາງດ້ານຈິດໃຈແລ້ວ ຍັງມີຜົນຕໍ່ກັບຮ່າງກາຍຄົນເຮົາທີ່ມີຜົນອັນຕະລາຍຕໍ່ກັບສຸຂະພາບຂອງເຮົາ, ສະນັ້ນ ຢ່າລືມໃຫ້ຄວາມສຳຄັນກັບຕົນເອງ ຫາກຮູ້ສຶກວ່າຕົນເອງເຫງົາ ຄວນທີ່ຈະຫາກິດຈະກຳເຮັດ, ໄປພົບປະໝູ່ເພື່ອນ, ຫາສັດລ້ຽງຄູ່ໃຈມາຢູ່ຄຽງຂ້າງ ລວມໄປເຖິງຢ່າຄາດຫວັງກັບຄົນອື່ນ ຫຼື ສິ່ງໃດສິ່ງໜຶ່ງເກີນໄປ.
ດ້ວຍຄວາມຫ່ວງໃຍ
INFO. - ອິນໂຟ x Health and Wellness EXPO LAOS
__________________________________
ແຫຼ່ງຂໍ້ມູນ:
(1) https://theconversation.com/loneliness-is-bad-for-your...
(2) https://www.inc.com/.../americas-loneliness-epidemic-is...
(3) https://www.webmd.com/.../loneliness-rivals-obesity...
#ສຸຂະພາບທີ່ດີເລີ່ມຕົ້ນຈາກໂຕທ່ານ

27/04/2021

INFO. - ອິນໂຟ x Health and Wellness EXPO LAOS
| ພູມຕ້ານທານສຳຄັນກວ່າທີ່ຄິດ
ຮ່າງກາຍຂອງເຮົາມີ ລະບົບຕ່າງໆທີ່ສຳຄັນ ແລະ ລະບົບພູມຕ້ານທານກໍເປັນລະບົບທີ່ສຳຄັນທີ່ເປັນສ່ວນທີ່ຈະ ຊ່ວຍໃຫ້ເຮົາມີສຸຂະພາບແຂງແຮງ ບໍ່ເຈັບປ່ວຍໄດ້ງ່າຍ ເຊິ່ງລະບົບພູມຕ້ານທານປະກອບໄປດ້ວຍເຊວເມັດເລືອດຂາວຊະນິດຕ່າງໆ ແລະ ສານຫຼາຍຢ່າງທີ່ຮ່າງກາຍສ່ວນຕ່າງໆຜະລິດຂຶ້ນມາເພື່ອຕໍ່ສູ້, ປ້ອງກັນ ແລະ ກຳຈັດເຊື້ອພະຍາດຕ່າງໆທີ່ຈະເຂົ້າສູ່ຮ່າງກາຍ ຖ້າຫາກລະບົບພູມຕ້ານທານຜິດປົກກະຕິ ຈະສົ່ງຜົນເຮັດໃຫ້ເຊື້ອພະຍາດເຂົ້າສູ່ຮ່າງກາຍງ່າຍຂຶ້ນ ແລະ ເຮັດໃຫ້ເຮົາມີການເຈັບປ່ວຍ
ພູມຄຸ້ມກັນຂອງເຮົາເວລາມີການພັດທະນາຢູ່ສະເໝີ ເມື່ອມີປະສົບການຜ່ານເຊື້ອພະຍາດ ລວມໄປເຖິງວັກແຊັງຕ່າງໆກໍຈະເຮັດໃຫ້ພູມຕ້ານທານຂອງເຮົາເກັ່ງຂື້ນ. ການສັກວັກແຊັງກໍຄືການກະຕຸ້ນພູມຕ້ານທານທີ່ເໝາະສົມໄວ້ກ່ອນລ່ວງໜ້າ ເພື່ອຈະເຮັດໃຫ້ລະບົບເຮັດວຽກໄດ້ເມື່ອມີໄພມາແທ້ໆ ຄ້າຍຄືກັບການຝຶກຊ້ອມໃຫ້ມີຄວາມຄ້ອງແຄ້ວກັບການຕໍ່ສູ້
ນອກຈາກການສັກວັກແຊັງແລ້ວ ເຮົາສາມາດສ້າງໃຫ້ພູມຕ້ານທານເຮົາແຂງແຮງຂຶ້ນໂດຍການອອກກຳລັງກາຍສະໝໍ່າສະເໝີ, ພັກຜ່ອນນອນຫຼັບໃຫ້ພຽງພໍ, ກິນອາຫານທີ່ເປັນປະໂຫຍດ ແລະ ຫຼາກຫຼາຍ ເນັ້ນຜັກ-ໝາກໄມ້, ຮັບແສງແດດຍາມເຊົ້າເພື່ອຮັບວິຕາມິນ D, ຄິດໃນແງ່ບວກ ເຮັດຈິດໃຈໃຫ້ປອດໂປ່ງບໍ່ຕຶງຄຽດ ແລະ ຄວນຫຼີກລ່ຽງສິ່ງທີ່ຈະທຳລາຍ ຫຼື ເຮັດໃຫ້ພູມຕ້ານທານເຮົາຕໍ່າລົງ ກໍຄື ການສູບຢາ, ການດື່ມສິ່ງມຶນເມົາຫຼາຍເກີນໄປ, ເຮັດວຽກໜັກຫົກໂຫມເກີນໄປ ແລະ ອື່ນໆທີ່ເປັນຜົນເສຍກັບສຸຂະພາບ.
ຄວາມເກັ່ງຂອງພູມຕ້ານທານສາມາດສົ່ງຕໍ່ຜ່ານທາງພັນທຸກຳ DNA ຈາກພໍ່ແມ່ໄປຫາຕົວລູກໄດ້
ຫາກເດັກນ້ອຍມີລະບົບພູມຕ້ານທານບໍ່ດີມາຕັ້ງແຕ່ກຳເນີດ ຈະເຮັດໃຫ້ຕິດເຊື້ອຮຸນແຮງຕັ້ງແຕ່ອາຍຸບໍ່ເທົ່າໃດອາທິດ ຫຼື ບາງຊະນິດອາຈຈະສະແດງຕອນເປັນຜູ້ໃຫຍ່ ສະນັ້ນພໍ່ແມ່ຈຶ່ງເປັນສ່ວນສຳຄັນທີ່ຈະຮັກສາດູແລສຸຂະພາບ ແລະ ສ້າງພູມຄຸ້ມກັນໃຫ້ແຂງແຮງ.
ທັງນີ້ທັງນັ້ນຫາກເຮົາຮູ້ສຶກວ່າເຮົາມີປັນຫາເລື່ອງພູມຕ້ານທານ ມັກເຈັບປ່ວຍເລື້ອຍໆ ກໍຄວນເຂົ້າປຶກສາແພດໝໍເພື່ອຮັບການກວດ ແລະ ປິ່ນປົວຕາມຄວາມເໝາະສົມ.​

ດ້ວຍຄວາມຫ່ວງໃຍ
INFO. - ອິນໂຟ x Health and Wellness EXPO LAOS

ແຫຼ່ງຂໍ້ມູນ:
1. https://www.health.harvard.edu/.../how-to-boost-your...
2. http://www.aiglemag.com/home/defense-is-best-offense
#ສຸຂະພາບທີ່ດີເລີ່ມຕົ້ນຈາກໂຕທ່ານ

23/04/2021

INFO. - ອິນໂຟ x Health and Wellness EXPO LAOS
| ເສົ້າ ແລະ ຊຶມເສົ້າ ຕ່າງກັນແນວໃດ
ຄວາມເສົ້າ ເປັນອາລົມທີ່ຄົນເຮົາຮູ້ສຶກໄດ້ໃນບາງຊ່ວງຂອງຊີວິດ ການຮູ້ສຶກເສົ້າເປັນປະຕິກິລິຍາຕາມທຳມະຊາດ ຕໍ່ສະຖານະການທີ່ເຮັດໃຫ້ເສຍໃຈ, ຜິດຫວັງ ແຕ່ຄວາມເສົ້າເປັນພຽງຊົ່ວຄາວ ແລ້ວກໍຈາງຫາຍໄປຕາມການເວລາ ແລະ ເຮົາສາມາດໃຊ້ຊີວິດປະຈຳວັນແບບເປັນປົກກະຕິ
ອາການຊຶມເສົ້າ ເປັນຄວາມເຈັບປ່ວຍທາງຈິດທີ່ສົ່ງຜົນຕໍ່ອາລົມຂອງເຮົາ, ການເຂົ້າໃຈຕົນເອງ ແລະ ສິ່ງທີ່ຢູ່ອ້ອມຮອບເຮົາ ໂດຍອາການເສົ້າຈະເກີດຂຶ້ນໂດຍບໍ່ມີເຫດຜົນ ແລະ ຄົງຢູ່ເປັນເວລາດົນ ມັນເປັນຫຼາຍກວ່າຄວາມເສົ້າ ຫຼື ອາລົມຊົ່ວວູບ ຜູ້ທີ່ມີອາການຊຶມເສົ້າອາດຈະຮູ້ສຶກວ່າຕົນເອງໄຮ້ຄ່າ, ສິ້ນຫວັງ, ຮູ້ສຶກຜິດຢ່າງບໍ່ມີເຫດຜົນ ຫຼື ຮູ້ສຶກຜິດຫຼາຍເກີນໄປ ບາງຄົນອາດມີອາລົມຢາກຮ້າຍ ຫຼື ໝຸດໝິດ. ລວມໄປເຖິງບໍ່ມີສະມາທິ, ບໍ່ສາມາດຕັດສິນໃຈໄດ້ ທັງນີ້ຍັງມີປັນຫາການນອນບໍ່ຫຼັບ, ການຢາກອາຫານ, ມີອາການປວດເມື່ອຍທີ່ບໍ່ສາມາດອະທິບາຍໄດ້ ບາງຄົນມີຄວາມຄິດຢາກຈົບຊີວິດຕົນເອງ.
ອາການຊຶມເສົ້າຈະກິນເວລາດົນ ເປັນເວລາຫຼາຍກວ່າ 2 ອາທິດ ແລະ ບໍ່ແມ່ນທ່າທີວ່າຈະຫາຍໄປ ແລະ ມັນສົ່ງຜົນກັບການໃຊ້ຊີວິດເຮົາເຊັ່ນ: ການຮຽນ, ການເຮັດວຽກ.
ດ້ວຍເຫດນີ້ ຄວາມເສົ້າຈຶ່ງແຕກຕ່າງຈາກພາວະຊຶມເສົ້າ ເຊິ່ງຫຼາຍຄົນອາດຈະໄດ້ເຂົ້າໃຈຕື່ມ ດີທີ່ສຸດບໍ່ຄວນປ່ອຍໃຫ້ຕົນເອງເສົ້າ ຫາກຮູ້ວ່າຕົນເອງຮູ້ສຶກເສົ້າ ກໍພະຍາຍາມຊອກຫາກິດຈະກຳເຮັດ ຫຼື ຫາສິ່ງທີ່ຊ່ວຍບັນເທົາຄວາມເສົ້າຂອງເຮົາໄດ້ ຫາກໃຜເຫັນວ່າຕົນເອງເຂົ້າຂ່າຍເປັນພາວະຊຶມເສົ້າແລ້ວ ກໍສາມາດເຂົ້າຫາທ່ານໝໍ ເພື່ອເຂົ້າຮັບການປຶກສາ ແລະ ປິ່ນປົວຕາມອາການ.
ໃຜມີຄຳຖາມເພີ່ມເຕີມກ່ຽວກັບໂລກຊຶມເສົ້າ ຫຼື ຢາກປຶກສາ, ທ່ານສາມາດໂທປຶກສາຜູ້ທີ່ໃຫ້ຄຳປຶກສາໃນເລື່ອງນີ້ໄດ້ ທີ່ເບີລຸ່ມນີ້
02055612148 ດຣ. ບຸນໂຮມ
02055512121 ດຣ. ຈັນທະຣາວະດີ ຈຸນລະມະນີ
02059536080 ດຣ. ມະນີວອນ
ດ້ວຍຄວາມຫ່ວງໃຍ
ແຫຼ່ງຂໍ້ມູນ:
(1) https://www.healthline.com/.../depr.../depression-vs-sadness
(2) https://www.heretohelp.bc.ca/.../whats-the-difference...
#ສຸຂະພາບທີ່ດີເລີ່ມຕົ້ນຈາກໂຕທ່ານ

20/04/2021

ໃນຊ່ວງເວລາທີ່ພະຍາດ COVID - 19 ກໍາລັງລະບາດໃນຂະນະນີ້, ການປ້ອງກັນຕົນເອງ ແລະ ຄົນທີ່ທ່ານຮັກຈາກການຕິດເຊື້ອພະຍາດ COVID - 19 ແມ່ນສີ່ງສໍາຄັນ ແລະ ຈໍາເປັນຫຼາຍ. ພວກເຮົາຄວນຮ່ວມແຮງ ຮ່ວມໃຈປະຕິບັດຕາມຄໍາແນະນໍາຂອງທາງການ ແລະ ຂັ້ນຕອນດັ່ງນີ້ເປັນຕົ້ນ

#ສຸຂະພາບທີ່ດີເລີ່ມຕົ້ນຈາກໂຕທ່ານ

19/04/2021

09/04/2021

ອາການປວດບ່າ ແລະ ຄໍ ຄື່ສີ່ງທີ່ພະນັກງານຫ້ອງການພົບພໍ້ເປັນປະຈໍາເນື່ອງຈາກນັ່ງເຮັດວຽກຢູ່ໜ້າຈໍຄອມເປັນເວລາດົນ
ມື້ນີ້ເຮົາມີວິທີງ່າຍໆທີ່ສາມາຫຼຸດຜ່ອນອາການປວດບ່າ ແລະ ຄໍ ໃຫ້ທ່ານ
#ສຸຂະພາບທີ່ດີເລີ່ມຕົ້ນຈາກໂຕທ່ານ