MOH Office Hasalaka

21/04/2026

2026 වෙසක් පෝය දිනට සමගාමීව, ලබා දෙන දන්සල්, MOH කාර්යාලයේ ලියපදිංචි කිරිම මේ දින වල සිදු කරනු ලැබේ.
🟢දන්සල් ලියාපදිංචිය සදහා 🟠https://docs.google.com/forms/d/e/1FAIpQLSeVL_6dufpPmyAGxoqlB68AkNZpOs2rLD-hpIFMvZDfrBQq9A/viewform?usp=sharing&ouid=108108167911798704970

21/04/2026

🔴 2026 වෙසක් මංගල්‍යය වෙනුවෙන් ඔබ විසින් සංවිධානය කරනු ලබන දන්සැල් ඔබ ප්‍රදේශයට අදාළ සෞඛ්‍ය වෛද්‍ය නිලධාරී කාර්යාලයේ අනිවාර්යයෙන්ම ලියාපදිංචි කිරීමට කටයුතු කරන්න.

දන්සැල් පැවැත්වීමට අදාල සෞඛ්‍යමය උපදෙස් මහජන සෞඛ්‍ය පරීක්ෂකවරැන් විසින් ලබා දෙන අතර සියලු දන්සැල් සෞඛ්‍යාරක්ශිත ද යන්න පරීක්ෂා කරනු ලැබේ.

බැති සිතින් ලබා දෙන දන්සල කිසිවකුටවත් හානියක් නොවී පැවැත්වීමට නිවැරදි උපදෙස් ලබාගන්න.

සෞඛ්‍යට නුසුදුසු තත්වයෙන් පවත්වන දන්සල් පවත්වාගෙන යාමට ඉඩ ලබා නොදෙන බව කරුණාවෙන් දන්වා සිටිමු.

වැඩි දුර විස්තර සදහා ඔබ ප්‍රදේශයේ මහජන සෞඛ්‍ය පරීක්ෂක මහතා අමතන්න.

🔴 දැනුවත් වීම සදහා කරුණු කිහිපයක්....

💠 දන්සැල සදහා පිරිසිදු පානීය ජලය භාවිතා කළ යුතුය. සෞඛ්‍ය ආරක්ෂිතව ජලය ගබඩා කර ගැනීම කළ යුතුය. දූෂණය වීම අවම කර ගත යුතුය

💠 අපජලය ක්‍රමානුකූලව බැහැරලීම කළ යුතුය. අපජලය එකතු වන ස්ථාන දන්සැල පවත්වා ගෙන යන කාලය තුල නිරන්තරයෙන් සෝදා පිරිසිදු කිරීම කළ යුතුය. අපවිත්‍ර ජලය මාර්ගය ඔස්සේ ගලා යාමට සැලැස්වී නොකළ යුතුය

💠 දන්සැලින් එකතුවන කසළ වර්ග කිරීමත්,එකතු කිරීමට ප්‍රමාණවත් පියන සහිත කසළ බදුන් හෝ බෑග් භාවිතා කළ යුතුය.

💠 දන්සැල පැවැත්වීමෙන් පසු පෙර තිබූ පරිදි ස්ථානය පිරිසිදු කිරීම කළ යුතුය.

💠 දන්සැල සදහා දායක වන සෑම තැනැත්තෙකුම පුද්ගලික ස්වස්ථාවය ආහාර ස්වස්ථාව සනීපාරක්ෂාව පිළිබද ඉහළ මට්ටමින් ක්‍රියා කළ යුතු අතර ආහාර විෂවීම් ඇති නොවීමට වග බලා ගත යුතුය.

💠 දන්සැල් පරිශ්‍රය තුල බුලත් විට සැපීම, දුම්පානය කිරීම බීමත්ව හැසිරීම සම්පුර්ණයෙන්ම තහනම් වේ.

💠 කිසියම් බෝවන රෝගයකින් පෙළෙන්නෙකු, චර්ම රෝගයකින් පෙළෙන්නෙකු දන්සැල් කාර්ය මණ්ඩලය සදහා සභාභාගි කරවා නොගත යුතු අතර දන්සැල් පරිශ්‍රය තුල රැදි සිටීමද නොකළ යුතුය.

🔴 බත් / කඩල දන්සැල සඳහා කොන්දේසි

1. ආහාර පිසින ස්ථානයේ ප්‍රමාණවත් තරම් ඉඩ පහසුකම් තිබිය යුතුය.

2. වැසිකිළි අසළ හා කාණු උඩ හෝ අසල ආහාර පිසීම නොකළ යුතුය.

3. ආහාර පිළියෙල කිරීමට ගන්නා සියලුම භාණ්ඩ හා උපකරණ සබන් දා හොදින් සෝදා පිරිසිදු කර භාවිතා කළ යුතුය.

4. ආහාර පරිහරණය කරන්නා හොදින් සබන්දා අත් සේදීම කළ යුතු අතර ප්‍රමාණවත් සබන් සපයා තිබිය යුතුය.

5. පිරිසිදු ඇදුම් පැලද සිටිය යුතුය. නිළ ඇදුමක් ලබාදීම වඩාත් උචිතය.

6. සෑම අවස්ථාවකදීම මැස්සන්ගෙන් ආහාර ආරක්ෂා කර ගැනීමට වසා තැබිය යුතුය.

7. කුණු කසළ විවෘතව නොතබා පියන සහිත බදුන් වල බහාලිය යුතුය. අප ජලය ක්‍රමාණුකූලව බැහැරලිය යුතුය.

8. දන්සැල්හි ආහාර පිළිගන්වන්නන් අත්වැසුම්, හිස් වැසුම්, මුඛ ආවරණ පැළද සිටිය යුතුය.

🔴 අයිස් ක්‍රීම් / කෝයි / සිසිල් බීම දන්සැල සදහා කොන්දේසි

1. අයිස් ක්‍රීම් නියමිත උෂ්ණත්වයේ ශිතකරණ වල ගබඩා කර තැබිය යුතුය.

2. ආහාර පිළිගන්වන්නන් අත්වැසුම්, හිස් වැසුම්, මුඛ ආවරණ පැළද සිටිය යුතුය.

3. කෝපි හා සිසිල් බීම සඳහා භාවිතා කරන කෝප්ප හොදින් සෝදා පිරිසිදු කළ යුතුය.

4. ප්‍රමාණවත් කසළ බදුන් තිබිය යුතුය.

Copied
🟢දන්සල් ලියාපදිංචිය සදහා 🟠 https://docs.google.com/forms/d/e/1FAIpQLSeVL_6dufpPmyAGxoqlB68AkNZpOs2rLD-hpIFMvZDfrBQq9A/viewform?usp=sharing&ouid=108108167911798704970

#දන්සැල්

15/02/2026

🔴 හදිසි උපත් පාලන පෙති (Emergency Contraceptive Pills) පිළිබඳව ඔබ දැනුවත්ද?

බොහෝ දෙනා අතර විවිධ මත පවතින "පොස්ටිනෝ" (Postinor) වැනි හදිසි උපත් පාලන පෙති (ECP) භාවිතය පිළිබඳව නිවැරදි සෞඛ්‍යාරක්ෂිත තොරතුරු සමාජගත කිරීම කාලීන අවශ්‍යතාවයකි.

මෙය සාමාන්‍ය පවුල් සැලසුම් ක්‍රමයක් නොවන අතර, හදිසි අවස්ථාවකදී පමණක් භාවිතා කළ යුතු ඖෂධයකි.

📌 මෙය භාවිතා කළ යුත්තේ කවදාද?

මෙය "Plan B" එකක් හෙවත් අමතර විකල්පයක් ලෙස පමණක් භාවිතා කරන්න.

✅ අනාරක්ෂිත ලිංගික ඇසුරක් පැවැත්වූ විට.

✅ භාවිතා කළ උපත් පාලන ක්‍රමයක් අසාර්ථක වූ විට (උදා: කොන්ඩම් එකක් ගැලවී යාම).

✅ නිත්‍ය උපත් පාලන පෙති (Mithuri වැනි) ගැනීමට අමතක වූ විට.

✅ දූෂණයකට හෝ බලහත්කාරී ලිංගික එක්වීමකට ලක් වූ විට.

📌 මෙය ශරීරය තුළ ක්‍රියා කරන්නේ කෙසේද?

මෙහි අඩංගු හෝමෝන මගින් ඩිම්බ කෝෂවලින් ඩිම්බයක් පිටවීම (Ovulation) ප්‍රමාද කිරීම හෝ වැළැක්වීම සිදු කරයි.

⚠️ විශේෂ අවධානයට: මෙය ගබ්සා පෙත්තක් (Abortion Pill) නොවේ. දැනටමත් ගැබ්ගෙන ඇති අයෙකු මෙය පානය කිරීමෙන් ගබ්සාවක් සිදු නොවේ.

📌 නිවැරදි භාවිතය

අනාරක්ෂිත ලිංගික එක්වීමෙන් පසු පැය 72ක් (දින 3ක්) ඇතුළත පළමු පෙත්ත ලබාගත යුතුය. එය ප්‍රමාද වන විට සාර්ථකත්වය අඩුවන බැවින් හැකි ඉක්මනින් (පැය 12ක් ඇතුළත) ලබා ගැනීම වඩාත් ප්‍රතිඵලදායකයි.

📌 දැනගත යුතුම කරුණු:

⛔ මෙය ලිංගිකව සම්ප්‍රේෂණය වන රෝග (STDs / HIV) වලින් ඔබව ආරක්ෂා නොකරයි.

⛔ මෙය නිතර භාවිතා කිරීම සුදුසු නැත. එය ඔසප් චක්‍රයේ අක්‍රමවත් බවක් ඇති කළ හැක.

💡 අපගේ පණිවිඩය:

ඔබට නිත්‍ය පවුල් සැලසුම් ක්‍රමයක් අවශ්‍ය නම්, ඒ සඳහා විවිධ ආරක්ෂිත ක්‍රම අප කාර්යාලය මගින් හෝ ඔබේ ප්‍රදේශයේ පවුල් සෞඛ්‍ය සේවා නිලධාරිනිය (Midwife) මගින් නොමිලේ ලබා ගත හැක. හදිසි පෙති මත පමණක් යැපීම නුවණට හුරු නැත.

සෞඛ්‍ය සම්පන්න දිවියක් උදෙසා නිවැරදි තොරතුරු දැනගනිමු!

15/02/2026

සැබෑ ආදරය යනු හුදෙක් ආදරවන්තයින් ලෙස සිටීම පමණක් නොවේ, තම ආදරණීයයන් නිවැරදි මාර්ගයට යොමු කිරීමයි. 💔 දුම්කොළ සහ මද්‍යසාර නිසා ඔබේ ආදරය විනාශ වීමට ඉඩ නොදෙන්න.

True love isn't just about romance; it's about guiding your loved ones toward the right path.

31/01/2026

දුම්කොළ සහ මද්‍යසාර පිළිබඳ ප්‍රචාරක දැන්වීම් තහනම් වේ. එවැනි දැන්වීම් දුටු විගස ඔබ කල යුත්තේ මෙයයි:
1. App එක බාගත කරන්න.
2. සාක්ෂි (ඡායාරූප/වීඩියෝ) ඇතුළත් කරන්න.
3. අදාළ මාධ්‍යය තෝරන්න. ඔබේ සහයෝගය අපේ රටට ශක්තියකි.

புகையிலை மற்றும் மதுசாரம் தொடர்பான அனைத்து விளம்பரங்களும் தடைசெய்யப்பட்டுள்ளது. எனவே அவ்வாறனதொரு விளம்பரம் ஒன்றை காண்பீர்களாயின் உடனடியாக செய்யவேண்டியது:

1. வண்ட எனும் செயலியை தரவிறக்கம் செய்யுங்கள்
2. சாட்சிகள்( புகைப்படம்/காணொளி) உள்ளீடு செய்யுங்கள்.
3. பொருத்தமான ஊடகத்தை தெரிவு செய்யுங்கள்.
உங்கள் பங்களிப்பு நாட்டின் சக்தியாகும்.

Be a responsible citizen and report illegal advertising immediately. Follow these three easy steps:

1. Get the VNATA app on your smartphone.
2. Upload your evidence, including photos or videos.
3. Select the specific media source for your report.
Your contribution is vital for a better tomorrow.

21/01/2026

12/01/2026

ස්වයං පියයුරු පරීක්ෂාව

ස්වයං පියයුරු පරීක්ෂාව (Self Breast Examination - SBE) යනු ඔබේ පියයුරු වල ස්වභාවය ගැන ඔබම අවබෝධයක් ලබා ගැනීමයි. මෙය මසකට වරක් නිවැරදිව සිදු කිරීමෙන්, යම් වෙනසක් ඇති වුවහොත් එය ඉතා ඉක්මනින් හඳුනා ගැනීමට ඔබට හැකි වේ.
මෙය සිදු කළ යුතු නිවැරදි ආකාරය පියවරෙන් පියවර පහත දැක්වේ.
1. සුදුසුම කාලය තෝරා ගැනීම
* මාසික ඔසප් වීම සිදුවන කාන්තාවන්: ඔසප් වීම ආරම්භ වී දින 7ත් 10ත් අතර කාලය මේ සඳහා වඩාත් සුදුසුය. (මෙම කාලයේදී පියයුරු වල හෝමෝන නිසා ඇතිවන තද ගතිය සහ මෘදු බව අඩුවන බැවිනි).
* ආර්තවහරණය වූ (ඔසප් වීම නතර වූ) හෝ ගර්භණී කාන්තාවන්: සෑම මසකම ඔබට පහසු එකම දිනයක් තෝරා ගන්න (උදාහරණයකට: සෑම මාසයකම පළමු වෙනිදා හෝ ඔබේ උපන් දිනය යෙදෙන දිනය).
පියවර 1: කැඩපතක් ඉදිරිපිට බැලීම (Visual Inspection)
හොඳින් ආලෝකය ඇති ස්ථානයක, විශාල කැඩපතක් ඉදිරිපිටට ගොස් ඔබේ සිරුරේ ඉහළ කොටස නිරාවරණය කරගන්න. පහත ඉරියව් වල සිට පියයුරු දෙස හොඳින් බලන්න:
* දෑත් දෙපසට දමාගෙන (සැහැල්ලුවෙන්): කෙලින් සිටගෙන දෑත් දෙපසට දමා, පියයුරු වල ප්‍රමාණය, හැඩය, වර්ණය හෝ සමේ යම් වෙනසක් (රැලි වැටීම්, වළ ගැසීම්) ඇත්දැයි බලන්න.
* දෑත් ඉහළට ඔසවා: දෑත් ඉහළට ඔසවා හිස පිටුපසින් බැඳගන්න. පෙර පරිදිම වෙනස්කම් ඇත්දැයි බලන්න. (මෙම ඉරියව්වෙන් පියයුරේ යට කොටස හොඳින් නිරීක්ෂණය කළ හැක).
* ඉඟටියට අත තබා: දෑත් ඉඟටිය මත තබා තද කරන්න (පපුවේ මාංශ පේශී තද වන සේ). මදක් ඉදිරියට නැමී පියයුරු දෙස බලන්න.
මෙම සෑම ඉරියව්වකදීම තන පුඩු ඇතුළට නෙරා යාමක් හෝ වෙනසක් ඇත්දැයි විශේෂයෙන් බලන්න.
පියවර 2: ස්නානය කරන විට ඇල්ලීම (Palpation while Standing/Showering)
බොහෝ අයට ස්නානය කරන විට සබන් ගා තෙත් වූ සම මත ඇඟිලි පහසුවෙන් එහා මෙහා ගෙන යා හැකි නිසා ගැටිති හඳුනා ගැනීම පහසුය.
* එක් අතක් (උදා: දකුණු අත) ඉහළට ඔසවා හිස පිටුපසින් තබාගන්න.
* වම් අතේ ඇඟිලි තුනක (දබර, මැද සහ වෙද ඇඟිලි) පැතලි කොටස (ඇඟිලි තුඩු නොවේ) භාවිතා කරන්න.
* ඔසවා ඇති අත පැත්තේ පියයුර (දකුණු පියයුර), සම්පූර්ණයෙන්ම ආවරණය වන පරිදි ඇඟිලි රවුමට කරකවමින් පරීක්ෂා කරන්න.
* කිහිල්ලේ සිට පියයුර දෙසටත්, පියයුර වටාත්, තන පුඩුව අවටත් ගැටිති හෝ තද වීම් ඇත්දැයි බලන්න.
* අනෙක් පියයුර සඳහාද අත් මාරු කර මෙය සිදු කරන්න.
පියවර 3: ඇඳ මත හාන්සි වී පරීක්ෂා කිරීම (Palpation Lying Down)
මෙය වඩාත්ම වැදගත් පියවරයි. ඔබ උඩුබැලි අතට හාන්සි වූ විට පියයුරු පටක පපුව මත සමව පැතිරෙන නිසා ගැටිති හඳුනා ගැනීම ඉතා පහසු වේ.
* ඇඳ මත උඩුබැලි අතට හාන්සි වන්න.
* පරීක්ෂා කිරීමට බලාපොරොත්තු වන පියයුර පැත්තේ (උදා: දකුණු පැත්තේ) උරහිසට යටින් කුඩා කොට්ටයක් හෝ නැමූ තුවායක් තබන්න. එම පැත්තේ අත (දකුණු අත) හිසට යටින් තබන්න.
* වම් අතේ ඇඟිලි තුනක (දබර, මැද, වෙද) පැතලි කොටස භාවිතා කරන්න.
* ඇඟිලි කුඩාවට රවුමට කරකවමින් (කාසියක ප්‍රමාණයට) මුළු පියයුරම පරීක්ෂා කරන්න.
* පීඩනය වෙනස් කරන්න: සෑම ස්ථානයකම පීඩන මට්ටම් 3ක් භාවිතා කරන්න:
* මතුපිටින්: සමට යටින් ඇති පටක දැනීමට මදක් තද කරන්න.
* මධ්‍යස්ථව: ඊට ටිකක් වැඩිපුර තද කරන්න.
* ගැඹුරට: පපුවේ ඉල ඇට වලට දැනෙන සේ තද කරන්න.
* සම්පූර්ණ ප්‍රදේශය ආවරණය කරන්න: උරහිස් අස්ථියේ (Clavicle) සිට පියයුරට පහළින් ඉල ඇට දක්වාත්, කිහිල්ලේ සිට පපුව මැද අස්ථිය (Sternum) දක්වාත් සම්පූර්ණ ප්‍රදේශය ක්‍රමානුකූලව (ඉහළ සිට පහළට තීරු ලෙස හෝ රවුමට) පරීක්ෂා කරන්න. කිහිලිය ප්‍රදේශය හොඳින් පරීක්ෂා කිරීමට අමතක නොකරන්න.
* තන පුඩුව පරීක්ෂා කිරීම: අවසානයේදී, තන පුඩුව මාපටැඟිල්ල සහ දබරැඟිල්ල අතරට ගෙන මෘදු ලෙස මිරිකා බලන්න. ලේ මිශ්‍ර හෝ වෙනත් දියරයක් පිටවේදැයි බලන්න.
* අනෙක් පියයුර සඳහාද කොට්ටය සහ අත් මාරු කර මෙම සම්පූර්ණ ක්‍රියාවලියම නැවත කරන්න.
යම් වෙනසක් දැනුනොත් කුමක් කළ යුතුද?
ඔබට යම් ගැටිත්තක්, තද වීමක් හෝ ඉහත සඳහන් කළ වෙනසක් දැනුනොත්, බිය නොවන්න. පියයුරු වල ඇතිවන ගැටිති බොහොමයක් පිළිකා නොවේ.
නමුත්, එය තහවුරු කර ගැනීම සඳහා ප්‍රමාද නොවී වහාම ඔබේ පවුලේ වෛද්‍යවරයා හෝ ළඟම ඇති රෝහලේ වෛද්‍යවරයෙකු හමු වී පරීක්ෂා කරවා ගැනීම අනිවාර්ය වේ.

12/01/2026

පියයුරු පිළිකා

පියයුරු පිළිකාවක් කල්තියා හඳුනා ගැනීම සාර්ථක ප්‍රතිකාර සඳහා ඉතා වැදගත් වේ. මේ සඳහා එහි මූලික රෝග ලක්ෂණ පිළිබඳව දැනුවත් වී සිටීම අත්‍යවශ්‍යයි.
පියයුරු පිළිකාවකදී දැකිය හැකි ප්‍රධාන ලක්ෂණ පහත දැක්වේ:
1. පියයුරේ හෝ කිහිලි ප්‍රදේශයේ ගැටිති (Lumps):
* පියයුරේ හෝ කිහිලි ප්‍රදේශයේ අලුතින් ඇතිවන ගැටිත්තක්, ගෙඩියක් හෝ ඝන වීමක්.
* මෙම ගැටිති බොහෝ විට වේදනා රහිත වන අතර තද ස්වභාවයක් ගනී. නමුත් සමහර ගැටිති වේදනාකාරී හෝ මෘදු ඒවා විය හැක.
2. පියයුරේ හැඩයේ හෝ ප්‍රමාණයේ වෙනස්කම්:
* පියයුරේ සාමාන්‍ය ප්‍රමාණයේ හෝ හැඩයේ සිදුවන පැහැදිලි, අසාමාන්‍ය වෙනසක්.
* එක් පියයුරක් අනෙකට වඩා අසාමාන්‍ය ලෙස විශාල වීමක් හෝ පහත් වීමක් (සාමාන්‍යයෙන් පියයුරු දෙක සමාන නොවිය හැකි නමුත්, හදිසියේ සිදුවන වෙනසක් ගැන සැලකිලිමත් විය යුතුය).
3. සමේ වෙනස්කම්:
* පියයුරේ සමෙහි ඇතිවන වළ ගැසීමක් (dimpling), රැලි වැටීමක් හෝ ඇතුළට නෙරා යාමක්.
* සම දොඩම් ලෙල්ලක ස්වභාවයක් ගැනීම (සම ඝන වීම සහ සිදුරු සහිත බවක් පෙනීම - Peau d'orange).
* පියයුරේ සම මතුපිට ඇතිවන රතු පැහැය, කොරල ස්වභාවය හෝ සුව නොවන තුවාල.
4. තන පුඩුවේ වෙනස්කම්:
* තන පුඩුව ඇතුළට නෙරා යාමක් (Inverted ni**le) - (උපතින්ම එසේ නොතිබුනේ නම්).
* තන පුඩුවෙන් කිරි නොවන වෙනත් දියරයක් ඉබේම ගැලීම (විශේෂයෙන් ලේ මිශ්‍රව, තද දුඹුරු පැහැයෙන් හෝ පැහැදිලි දියරයක් ලෙස).
* තන පුඩුව අවට ප්‍රදේශයේ (aerola) ඇතිවන තුවාල, කැසීම්, රතු වීම් හෝ කොරල ගැසීම්.
5. වෙනත් ලක්ෂණ:
* කිහිලිය හෝ උරහිස (clavicle) අසල වසා ගැටිති ඉදිමීම.
* පියයුරේ එකම ස්ථානයක දිගින් දිගටම පවතින අසාමාන්‍ය වේදනාවක්. (බොහෝ පියයුරු පිළිකා වේදනා රහිත වුවත්, සමහර ඒවා වේදනාකාරී විය හැක).
ඉතා වැදගත් සටහනක්:
ඉහත සඳහන් කළ ලක්ෂණ තිබූ පමණින් එය පිළිකාවක්ම යැයි නිශ්චිතව කිව නොහැක. පියයුරු ආශ්‍රිත වෙනත් අහිංසක (පිළිකා නොවන) තත්ත්වයන් වන හෝමෝන වෙනස්වීම් හෝ ගෙඩි (cysts) නිසාද මෙම ලක්ෂණ බොහෝමයක් ඇතිවිය හැක.
කළ යුතු දේ:
කෙසේ වෙතත්, ඉහත ලක්ෂණ එකක් හෝ ඔබ නිරීක්ෂණය කළහොත්, බිය නොවී, ප්‍රමාද නොවී වහාම සුදුසුකම් ලත් වෛද්‍යවරයෙකු හමු වී පරීක්ෂා කරවා ගැනීම අත්‍යවශ්‍ය වේ.
කාන්තාවන් වයස අවුරුදු 20 සිට මසකට වරක් "ස්වයං පියයුරු පරීක්ෂාවක්" (Self Breast Examination) සිදු කිරීමෙන් මෙම වෙනස්කම් ඉතා කලින් හඳුනාගත හැක.

12/01/2026

🔰 මහජන සෞඛ්‍ය පරීක්ෂක (PHI)ගේ රාජකාරි හා උත්සව සනීපාරක්ෂාව
🧑‍⚕️ මහජන සෞඛ්‍ය පරීක්ෂක (PHI)ගේ ප්‍රධාන රාජකාරි

මහජනතාවගේ සෞඛ්‍යය ආරක්ෂා කිරීම හා රෝග වැළැක්වීම

ආහාර සනීපාරක්ෂාව නිරීක්ෂණය කිරීම (Food Safety)

ජල හා පරිසර සනීපාරක්ෂාව පරීක්ෂා කිරීම

බෝවන රෝග (ඩෙන්ගු, ලෙප්ටොස්පයිරෝසිස්, අතීසාර ආදී) පාලනය

මහජන දැනුවත් කිරීම හා සෞඛ්‍ය අධ්‍යාපනය

මහජන සෞඛ්‍ය නීති හා නියෝග ක්‍රියාත්මක කිරීම

🎉 උත්සව සනීපාරක්ෂාව සම්බන්ධයෙන් PHIගේ විශේෂ රාජකාරි
🔹 උත්සවයට පෙර

උත්සව භූමිය පරීක්ෂා කර සනීපාරක්ෂා අවදානම් හඳුනාගැනීම

ආහාර වෙළඳ කුටි, ජල මූලාශ්‍ර, වැසිකිලි පහසුකම් අනුමත කිරීම

උත්සව සංවිධායකයින්ට සෞඛ්‍ය උපදෙස් හා මාර්ගෝපදේශ ලබාදීම

🔹 උත්සවය පැවැත්වෙන අතරතුර

ආහාර පිසීම හා විකිණීම නිතර නිරීක්ෂණය

ආහාර හසුරුවන පුද්ගලයින්ගේ පිරිසිදුකම පරීක්ෂා කිරීම

කසල කළමනාකරණය, වැසිකිලි හා අත් සෝදන ස්ථාන පිරිසිදු බව නිරීක්ෂණය

රෝග ලක්ෂණ ඇති පුද්ගලයින් හඳුනාගෙන අවශ්‍ය උපදෙස් ලබාදීම

🔹 උත්සවයෙන් පසු

කසල නිසි ලෙස ඉවත් කර ඇතිද යන්න පරීක්ෂා කිරීම

ජලය රැඳී සිටින ස්ථාන ඉවත් කර ඩෙන්ගු අවදානම වැළැක්වීම

අවශ්‍ය නම් වාර්තා සකස් කර MOH කාර්යාලයට ඉදිරිපත් කිරීම

✅ උත්සව සනීපාරක්ෂාව වැදගත් වන්නේ ඇයි?

ආහාර විෂබීජ හා බෝවන රෝග වැළැක්වීමට

මහජන සෞඛ්‍ය අවදානම් අවම කිරීමට

උත්සවය සාර්ථක හා ආරක්ෂිතව පැවැත්වීමට

මහජන සෞඛ්‍ය පරීක්ෂකගේ (PHI) කාර්යභාරය, උත්සවයකදී මහජන සෞඛ්‍යය සුරක්ෂිත කිරීම සඳහා අත්‍යවශ්‍ය වන අතර, මහජනතාවගේ සහ සංවිධායකයින්ගේ සහයෝගයද ඒ සඳහා ඉතා වැදගත් වේ.

01/01/2026

සුභ නව වසරක් වේවා..
දුම්කොළ හා මද්‍යසාර භාවිතයෙන් තොර නව වසරක් සැමටම වේවා..!

07/12/2025

ගංවතුරට හසු වූ මස් හඳුනා ගැනීමේ ක්‍රම.🐖🦌🐄🐂🐐🐓

මස් වල දෘශ්‍ය පරීක්ෂාවක් සිදු කිරීම (Visual Inspection) අනිවාර්‍ය වේ. එහිදී.

👉 වර්ණය වෙනස් වීම (Discoloration) මස් වල තිබිය යුතු දීප්තිමත් රතු හෝ ලා රෝස පැහැය වෙනුවට, ජලයෙන් මරණයට ලක්වූ සතුන්ගේ මස් වල අසාමාන්‍ය ලෙස තද අළු, දුඹුරු හෝ කොළ පැහැති ලප දක්නට හැකිය.
👉 මස් වල ගඳ (Odor) - නරක් වූ මස් වල අප්‍රසන්න හෝ කුණු වූ ගඳක් ඇත.
👉 තෙතමනය සහ ඇලෙන සුළු බව (Moisture and Stickiness) මතුපිට අධික ලෙස තෙත් ගතියක් තිබීම හෝ ඇලෙන සුළු(slimy residue)ගතියක් දැනේ.බැක්ටීරියා වර්ධනය වීම නිසා..
👉අධික අයිස් කැටිති දක්නට තිබීම (Excessive Ice Crystals) මස් අධිශීතනය කර තිබුනත්, එම මස් මතුපිට සහ ඇතුළත අසාමාන්‍ය ලෙස අයිස් කැටිති (Freezer Burn) තිබීම.(ජලය පෙවීම හේතුවෙන්)
👉මස් වල ව්‍යුහය සහ ස්වභාවය (Texture and Consistency) වෙනස් වීම-
අසාමාන්‍ය ලෙස මෘදු වීම (Softness) නරක් වූ මස් වල දක්නට ලැබේ.ඒවා මෘදු මෙන්ම ලිහිල් හෝ දියවෙන සුළු ස්වභාවයක් (mushy texture) ගනී.
👉 Musle fibers පැහැදිලිව නොපෙනීම. සාමාන්‍යයෙන් මස් වල ඇති කෙඳි ස්වභාවය (muscle fibers) ජලය නිසා විනාශ වීමෙන් එම මස් අසාමාන්‍ය ලෙස නොපැහැදිලි (indistinct) පෙනුමක් ගත හැකිය.මෙය කැපූ හරක්,ඌරු,එලු මස් වල පැහැදිලිවම දක්නට ඇත.
👉 ඇතැම් විට අඩු මිලකට මස් විකිණීමද කල හැකිය.(නැතහොත් තව දුරටත් නරක් වෙන නිසා)
👉 මස් සන්තකය දරන්නා අලුත් සැපයුම්කරුවෙකු වීම - මස් පිළිබඳව විමසීමේදී අපැහැදිලි තොරතුරු ලබා දෙන්නේ නම් එය සැක සහිතවේ.බොහෝ විට බලපත්‍රයක් නැත.නීත්‍යානුකූලව පරීක්ෂා කර මරණ ලද සතුන් (ගව මස් වැනි) බවට වන සාක්ෂි නැත.බලපත්‍ර නිසි ලෙස පරීක්ෂා කරන්න.
👉 මස් වල pH පරීක්ෂාව ඉතාම වැදගත් වේ. ඕනෑම හොද මස් වර්ගයක pH අගය 5.4- 6.2 මට්ටමේ තිබිය යුතුය.
👉 හැකි නම් ක්ෂුද්‍රජීවී පරීක්ෂාවක් සදහා යැවිය හැක. සැක සහිත මස් සාම්පලවල ඊ. කෝලි (E. coli), සැල්මොනෙල්ලා (Salmonella) වැනි හානිකර බැක්ටීරියා හෝ වෙනත් දූෂක තිබේදැයි බැලීමට මෙය වැදගත්වේ.
📌️ඉහත ක්‍රම පිළිබදව නිවැරදි අවබෝධයකින් කටයුතු කල හොත් මේ දින වල වෙළදපොලට එක් විය හැකි නරක් වූ මස් හදුනා ගැනීම අපහසු නොවනු ඇත.දැනුවත් වෙමු.ජනතාවගේ ආහාර සුරක්ෂිතතාවය වෙනුවෙන් අපි අපේ යුතුකම ඉටුකරමු.

🖊️මහේන් J. බාලසූරිය.

01/12/2025

ගංවතුර සමග පැතිරෙන 🌧️🌊
ලෙප්ටොස්පයිරෝසිස් - මී උණ 🐁
හඳුනාගෙන ප්‍රතිකාර නොකළහොත් මාරාන්තික විය හැක

මී උණ වලක්වා ගැනිමට අදම සෞඛ්‍ය වෛද්‍ය නිලධාරී කාර්යාලය හෝ ප්‍රදේශයේ මහජන සෞඛ්‍ය පරික්ෂක හමුවන්න