17/07/2025
منشور مهم ياريت تقروه
من سنة وطالع كلما نطلب تحاليل Ferritin مخزون الحديد و vit.D فيتامين د و vit.B12 فيتامين ب12
نلقاهم نازلين ومش بس عند النساء هاذم حدث ولا حرج مفيش مرا ليبية جتني حديدها في العلالي 🙂 و الكارثة حتى من عمر ال10 لل16 ؟؟
ليش هل يستاهل ان بنتك تكون عمرها 10 او 16 او 20 و معدل فيتاميناتها لوحدة عمرها 70 ؟؟
على عمرهم كنت نرقى للسقف نجيبه لوطى من النشاط والحيوية توا تجيك بعمر ال16 ( معنديش جهد . وتعبانه . ونظرتها للحياة سوداوية ) !!!
وتجيبلك صورة من النت قالو الفيتامينات هاذم خوديهم شعرك يطول ونفسيتك تتحسن وبشرتك تتفتح 🫡🫣
نصيحة لوجه الله ..........
معادش تاخدو مالتي فيتامين قبل ماتعدلو الفيتامين المعين الي ناقص عندكم في الأساس لأنه لو خديتيه مسألة شهر وترجعي نفس الأعراض يعني جو مسكن ويمشي مفعوله
وراهو العيب مش في الدواء العيب في طريقة اخده و مفيش الالتزام ناخده اسبوع بعدين نبدا نمل و ننسى و هذا يلعب دور كبير في الخلل ..
ونمط حياتنا الي غلط في غلط تقضي يومك على ( كريب وقهوة تامة )🙄🙄 رفعتي حموضة المعدة وهرمون الأنسولين وبدت معادش عارفة وين تقطع روحها
راهو سندوتش الهريسة و البيض مايشكي من شي راهو مفيد وصحي في بروتين وكربوهيدرات (( وعلى الموضة )) وبدل طاسة النسكافيه التامة خودي موزة تعدلك سكرك وفيها بوتاسيوم كويس حتى الزميطة وطاشة الشاهي الخضرا ممتازة ... طبعا مش دكتورة تغذية ولكن ارجعو للخضرا و الاكل الطايب في الحوش .. التغير الي صاير في نمط اكلنا كااارثة ومخلي معدتنا مش شغالة بكفأة زي زمان قبل كدس المواد الحافظة والمعدة هي الي بتهضم الفيتامينات وتديرلها امتصاص .. ومادام المعدة ملعوب فيها مفيش ولا فيتامين حيتعدل غير فترة مؤقته ومش حيتم امتصاصهم بالكامل ...
.. في الاخر .. ديري بالك على صحتك قبل فوات الأوان
