12/11/2025
قبل ماتاخد ابرة الحديد اقرى الكلام ….
الي تشوفو فيها صبغة من ابرة الحديد عن طريق الوريد للاسف المحلول تسرب تحت الجلد … والمشكلة حتقعد اثرها بالطريقة هذي كانها وشم
مرات تتحول الاثر بالليزر … ومرات للاسف يقعد دائم
الشخص الي عطي الحقنة يبدو انه مانتبهش للاجراءات الي مفروض تهتم بيها قبل الحقنة … ويبدو انه المريض ماعطوشي الارشادات الصحيحة وكيف يتصرف وقت الابرة….
لانه لازم في نقاط تركز عليها …
وعن نفسي في القسم لازم نركز عليها لانه حرام اضيع مريضة علي حاجات بسيطة
ديما المحلول الوريدي لازم ينعطى ل حالة دخول .. او تحت اشراف طبي … خوفا من التحسس المفرط الي يصير والي يسبب في الوفاة مرات …
لازم المحلول نعطوه من كانيولا جديدة … كيف راكبة … او تتاكد الف مرة انها تكون راكبة في الوريد وماتسربش …
ونجربو فيها انه ناخدو في سرينجة … ونضربوها في الكانيولا ونشوفو هل الكانيولا كويسة او لا … هل صار نفاخ او لا … هل المريض وجعاته مكان الكانيولا لما عطيته الحقنة التجريبة …
كل العلامات هذي معناها الكانيولا مش في الوريد وتكون تحت الجلد يعني حتسرب المحلول
ممنوع نهائي نعطو المحلول وقت المريض يكون راقد او الوقت الي احتمال بيرقد فيه (يفضل الصبح اول مايفيق … ولا بعد العصر)
لازم المريض ينتبه للمحلول وتقوله ينتبه للكانيولا هل صار نفاخ او لا …
وانبهو المريض لو صار نفاخ في الكانيولا او شاف لون متغير تحت الجلد انه يوقف المحلول بروحه … ومايستناش الممرضة
واهم نقطة انك تعطي المحلول ببطىء شديد جداً جداً … لانه هكي يبان عليك لو تسرب … وتقدر تتصرف بسرعة …
وتمنع من التهاب الاوردة الي يصير لما تعطي الحديد بصورة سريعة …
وتأثر عالضغط وضربات القلب… ولازم يتراقب
وغالب التمريض للاسف عليه ضغط خدمة … ويعطي في الحقنة بسرعة مش يلحق عالخدمة
لكن ابرة الحديد ليها معاملة خاصة ومن المحاليل الي تحتاج الانتباه…
منقوووول
طبعاً.. ك طبيبه جلديه
نقول انه ممكن نستخدمو معاه الليزر .. لاكن الموضوع يبي وقت وتكلفته عاليه
لهذا ديمااا نفضل إعطاء الحديد عن طريق الفم..
لأنه مايختلفش علي اعطاءه في الوريد
إلا في الحالات الي عندهم مشاكل امتصاص في المعده .. غير هكي مافيش سبب يخليك تعطيه في الوريد ..
.. 🦋🩷
طبيبه أمراض جلديه وتجميل وليزر
🦋🦋🦋
