https://www.facebook.com/101259961865584/

يوميات طبيب عام - General Physician Diaries, Tripoli, Tiji (2026)

10/05/2026

"الاكتئاب زي الزكام.. يمكن أن ينتقل بالجلوس قرب المصاب"💔

👥 كيف حالكم ... عارفين الإحساس لما تقعد فترة طويلة مع شخص محطم نفسيًا وبعد مدة تلقى روحك حتى انتا ثقيل؟ وفاقد طاڤتك؟ وحتى ضحكتك ناقصة؟

الغريب إن العلم بدأ فعلاً يهتم بالحاجة الي زي هذي بجدية

📚 وحتى في بعض المراجعات والدراسات النفسية الحديثة اشارت.. إن المشاعر السلبية خاصة الحزن المزمن والتوتر والاكتئاب ممكن “تنتقل نفسيًا”
عبر التفاعل الاجتماعي الطويل مش كعدوى حرفية لكن كا تأثير نفسي وعصبي وعاطفي تدريجي عبر (through emotional contagion and mirror neuron activity)

💠 كيف يصير هذا دكتور؟
1️⃣ او حاجة يصير “بالمحاكاة التلقائية” بدون ما تحس تبدأ تقلد في تعابير الشخص اللي قدامك وجه حزين نكد نبرة منهكة تنهدات متكررة .. الخ

👤 ومع الوقت الدماغ متعك يبدأ يتفاعل مع هذي الإشارات وكأنها مشاعرك أنت

2️⃣ وثاني شي عن طريق “الخلايا العصبية الي هيا المرآة” (Mirror Neurons) وهيا تعتبر شبكة عصبية في المخ تساعدنا نفهم ونشعر بالناس لهذا حتى الأطباء والمعالجين النفسيين أحيانًا يتكلموا على شيء اسمه الإرهاق العاطفي (Emotional Burnout) بسبب الاحتكاك الطويل بالمشاعر الثقيلة”

لهذا مرات تشوف شخص متوتر تلقى قلبك حتى انتا توتر معاه بدون سبب واضح
أو شخص مكتئب حتى هنا تبدأ طاقتك تنطفئ بالتدريج

📌 وهذا ما يعنيش إننا نهربوا من الناس المتعبة نفسيًا أو نتركوا المرضى النفسيين بروحهم طبعًا لا.. .

لكن يعني إن البيئة النفسية اللي مرات انعيشوا فيها تأثر فينا بشكل جدي أكثر مما نتخيل

- لان مرات شخص واحد سلبي معاك طول الوقت قادر يطفّي حوش كامل...
- وشخص اخر معك مطمّن وحنون قادر يرجع الروح للحوش كاملة.

🫶 فحاولوا تختاروا الناس اللي دايرين بقلوبكم بعناية لأن النفس البشرية تلتقط المشاعر أسرع حتى من الكلمات. .

🖋️ وإن شاء الله ديما طيبين، وفي حفظ الله ورعايته.. .
______________________________________________
👥
#الاكتئاب

#ليبيا 🇱🇾

يوميات طبيب عام - General Physician Diaries🩺

10/05/2026

💔“دكتور كيف عندي كوليسترول مرتفع وأنا أكلي كله صحي؟!”

ركزوا معاي بنقولكم على حاجة ناس واجد ما تعرفهاش الي هيا...
🧬 “مش كل ارتفاع بالكوليسترول بيكون سببه الأكل”

إيه نعم.. الأكل صح يكون سبب لكن في حالات واجد السبب الحقيقي يكون “الجينات” لانها مسؤالة عن 85٪ من الحالات أكثر من الصحن اللي قدامك

📌 لان في نوع من الناس جسمهم يصنع الكوليسترول هذه بكميات أعلى حتى لو وكالهم ممتاز - وما ياكلوش مقليات - ويتحركوا ويمارسوا الرياضة

🍿 وفي المقابل تلقى شخص صحيح وياكل في كل شي وما يطلعش عنده ارتفاع واضح 🤷🏻‍♂️

❕ #والسبب؟
السبب لأن الوراثة هنا تلعب دور كبير جدًا في تنظيم الدهون داخل الجسم و مثبتة حتى ببعض الدراسات وتذكر إن العوامل الجينية تكون مسؤولة عن نسبة كبيرة من حالات ارتفاع الكوليسترول وخاصة لما يكون الارتفاع قوي أو موجود من عمر صغير أو متكرر بالعائلة

🏃 ولهذا مرات نشوفوا شخص رياضي وعنده كوليسترول
وشخص وزنه ممتاز لكن تحاليله متع الكوليسترول مرتفعة↗️
وفي حتى شباب صغار يكون عندهم اضطراب دهون وراثي بدون أي أعراض وميعلموش الا لما يديروا تحليل

⚠️ وهنا الغلطة اللي تصير ويعتقدوها واجدين منا ويقولك “طالما ناكل صحي خلاص مستحيل يجيني كوليسترول.”

لا ياغالي.
هنا التحاليل هوا الي يحكم ويكون أهم من التوقعات متعك

🩺 وخاصة لو عندك تاريخ عائلي جلطات، ذبحة، كوليسترول، أو وفاة مبكرة بالقلب وحتى لو شكلك صحي
#مفيش باس تعدي وادير تحليل دهون (Lipid profile) واطمن على روحك.

😔 لان ارتفاع الكوليسترول غالبًا يمشي “بصمت”
#يعني مرات من أول عرض يكونلك طول مشكلة بالقلب لا قدر الله فكونوا واعيين وفاهمين كيف تنتبهوا لصحتكم كويس.

🖋️° وإن شاء الله ديما طيبين، وفي حفظ الله ورعايته.. .
______________________________________________
#الكوليسترول

ً

#الوراثة 🇱🇾

يوميات طبيب عام - General Physician Diaries🩺

09/05/2026

💊 “دكتور.. حقا دوا الضغط #أملوديبين ينفخ الرجلين !”

ركزو بالمعلومة هذي كويس وتعالوا مع بعض نتعلموا حاجة بعالم الادوية وخلي نحكوا على هذي النقطة الي ممكن اتكون لواجدين ما يعرفوهاش بخصوص ادوية الضغط وانتفاخ القدمبن 👇🩺

طبعآ للعلم بعض أدوية الضغط فعلًا ممكن تسبب احتباس سوائل وانتفاخ في الرجلين زي ما موضح في الصورة ومن أشهرها مادة اسمها
Amlodipine (أملوديبين)

وطبعًا قبل أي شي.. هذا مش ذم في الدواء نفسه للعلم باش انكونوا متفقين، وبالعكس الأملوديبين يعتبر من الأدوية الممتازة والفعالة جدًا لعلاج الضغط وناس واجد مستفيدة منه بدون أي مشاكل تُذكر.
لكن حبيت نوضح النقطة هذي لأن حتى الأدوية الممتازة ممكن تعطي آثار جانبية عند بعض المرضى وهذا شي طبيعي بعالم الطب” لانه زيه زي أي دواء في الدنيا ممكن ما يناسبش بعض المرضى يعني ميمشيش مع الكل او ممكن يسبب بعض الآثار الجانبية للبعض

📌 بهي كيف يصير الانتفاخ هذا ممكن توضحنا؟
طبعاً الأملوديبين هذه يعتبر من مجموعة اسمها
Calcium Channel Blockers (CCB)
ويشتغل عن طريق توسيع الشرايين تمام..
#لكن أحيانًا التوسعة هذي تخلي جزء من السوائل عند بعض المرضى يتسرب للأنسجة الخاصة في القدمين والكاحل وهنا يظهر الانتفاخ عندهم ويشعروا بيه او ممكن مايشعروش بيه او في احمرار واضح وهوا يعتبر شائع

⚠️المهم والي لازم تعرفوه هنا إن أي انتفاخ في القدمين مهوش شرط يكون من الدواء نفسه مرات يكون بسبب
▪️مشاكل بالقلب
▪️الكلى
▪️الكبد
▪️الدوالي
▪️أو حتى الجلوس والوقفة الطويلة

فما تلوموش الدواء طول مباشرة قبل ما تقيموا حالتكم طبيًا وتعرفوا السبب منه ولا من مشكلة تانيا فكونوا واعيين بهاذي النقطة

🩺 بهي… لو الاحتباس طلع من الدواء وصار انتفاخ مزعج شن الحل دكتور؟

هنا الأمر يعتمد على كل مريض وحالته مش عشوائي ولا طول توقفوا الدواء متعك #لا...
لكن من الخيارات اللي يتم مناقشتها مع دكتوركم

1️⃣ أحيانًا يتم تغيير الأملوديبين هذه إلى
Lercanidipine (ليركانديبين / ليركاديب)

بورغم إنهم من نفس المجموعة الدوائية CCB إلا إن احتباس السوائل فيهم غالبًا حيكون أقل عند بعض المرضى الي سببلهم انتفاخ

📌 ولمعلومة إضافية ومهمة ليكم
تقريبًا
5 mg Amlodipine ≈
تساوي 10 mg Lercanidipine

لكن تحديد هذي الجرعة النهائية يكون على حسب تقييم دكتوركم زي مقتلكم

2️⃣ والنقطة الثانيه الي ممكن مناقشتها مع دكتوركم هي تقليل جرعة الأملوديبين الي ياخذوا فيه المرضى
مثلاً من 10 mg تتخفف إلى 5 mg مع إضافة دواء ضغط ثاني من مجموعة مختلفة لتقليل الأعراض والمحافظة على التحكم بالضغط عند المريض

3️⃣ أو ممكن يطلب الدكتور التحويل لمجموعات أخرى حسب حالة المريض وتمشي معاه زي
ARBs / ACE inhibitors / Diuretics
وغيرها وحسب العمر ووظائف الكلى والقلب والأمراض المصاحبة لو فيه وشن يمشي معاه

🚫 والأهم زي مقتلكم مش تشوفوا رجليكم منفخة تعدوا توقفوا دواء الضغط هذا من روحكم بسبب هذا المنشور أو تجربة من شخص ثاني ردو بالكم

لأن ارتفاع الضغط مش لعبة وأخطر بواجد من الانتفاخ نفسه أحيانًا فكونوا فاهمين لكلامي كويس وواعيين لشنوا حبيبت انوضحه ليكم لتستفيدوا وتتعلموا وتكونوا فاطنين لامراضكم

🧠
لان مش كل عرض جانبي يعني إن الدواء “سيئ” قبل ما نعرفوا الاسباب الاخرى الي ممكن ايكون السبب منها
لان الطب الحقيقي هو الي يوريك كيف تعرف وتختار العلاج المناسب ليك وللشخص المناسب.

🖋️ °وإن شاء الله ديما طيبين، وفي حفظ الله ورعايته.. .
______________________________________________

🇱🇾

يوميات طبيب عام - General Physician Diaries🩺

09/05/2026

🥕 “خاص للرجال .. الجزر طلع مش بس للأرانب!” 😄

طبعا المنشور هذا خاص للرجال _ فياريت الاخوات بعد اذنكم متزاحموناش عليه لان مش كل شي ليكم🤭

🧾في دراسة لافتة لينا بالذات معشر الرجال قالو لقوا مادة اسمها Beta-carotene موجودة بكثرة في الجزر والبطاطا الحلوة، تمام
وقالوا إنها ممكن تعطي (البشرة الخاصة بالرجال) لون صحي أكثر وتخلي الوجه يبان أكثر حيوية ونظارة وانطباع ثحي عندهم😎 وذالك حسب الدرسات الي داروها على عدد من الرجال تحديدًا الي تناولوا المكملات هذي💊

📌 بهي بالأول خلي نعرفوا شن هيا البيتا كاروتين هذي؟
هيا يا متابعيني تعتبرصبغة طبيعية تعطي اللون البرتقالي للخضار.. والجسم متعنا يحوله لفيتامين A الي هوا يعتبر مهم للبشرة متعنا والمناعة، وللعيون... يا هوووا

🥕 المهم أكثر مصادره الطبيعية تكون فيه هيا
▪️بالجزر
▪️والبطاطا الحلوة
▪️والقرع
▪️والسبانخ والخضرة الغامقة بس مش كيف الجزر ولبطاطا

وطبعا اكيد معشر الشباب مش حتكون صعبه أنكم تدمجوها الفكرة في نظامك الغذائي وطعامكم اليومي في الحوش وخاصة لو يكونوا طالعات من تحت ايديات امهاتنا واخواتنا وزوجاتنا ربي يحفظهم وتستفيدوا من النظارة والاشراقة الي رح اتكون انطباع في وجوهنا

والطريقة تقدروا اديروها عصير ..🥕🍹
🥗 او سلاطة جزر + بطاطا حلوة مسلوقة او مشوية بالفرن + وممكن معاها قرعة لو تحبوا + زيت زيتون لأن امتصاص البيتا كاروتين هذي يتحسن مع الدهون🫒

وهكي اتكونوا درتوا غذاء وخير لبشرتكم ولجسمكم مع بعض وحصلتوا مكمل طبيعي وتشاركوا فيه الرفيقات 🤗 عادي يقدروا حتى هما يشاركوها معانا باش يحسنوا لون بشرتهن لانهم يحبوا يكتشفوا بروحهم برغم ان الدراسة مذكرتهنش بس يالله خلي يجربوا 😒

🥕 والفكرة مش إنكم تاكلوا جزرة او بطاطا وتصبح “موديل” ثاني يوم 😅 لا، لا..
لكن فعلاً هذي التغذية وقت تجربوها حتفرق في شكل الجلد ولونه وصحة الجسم متعكم بشكل عام ولافت ولون زاهي لو استمريتوا وانتظمتم عليها وحتشوفوا الفرق تدريجي كيف ✨

❗ لكن بنوضح حاجة 👇
الي ميبيش وبياخذ المكملات يحاول ميكثرش لان مش ديماً فكرة ممتازة، #وخاصة للمدخنين، لأن بعض الدراسات القديمة ربطت الإفراط في مكملات البيتا كاروتين هذي بزيادة مشاكل صحية بالرئة قد تحصل عندهم 🚬
-فكونوا واعيين لهاذي الفكرة الناس الي ادخن بالذات.. لهاذا خلوها على الأكل الطبيعي أفضل وآمن.

وتوا يلا… اللي بياكل الجزر من توا يشمر على ايديه ويأكل كل يوم ومدوروا على حد 👋
وانتم ما عادش تضحكوا علينا، وتقولوا.. اهو زعميتك “يديروا في روتين عناية بالبشرة زينا” لكن بطريقة علمية ردو بالكم ايوا 🤫 😂🥕

🖋️ °وإن شاء الله ديما طيبين وفي حفظ الله.. .
______________________________________________

#الجزر

#ليبيا 🇱🇾

يوميات طبيب عام - General Physician Diaries🩺

09/05/2026

“حبة وحدة صغيرة منها … داخلها معدن لو كثرت منه يمكن يقلب جسمك بالكامل.” 🌰

كيف حالكم ✨
تعالوا مع بعض نتعرفوا على نوع من المكسرات الي ناس واجد تاكله وهي مش عارفة إنه يعتبر من أقوى المصادر الطبيعية لمعدن #ومهم جداً في الجسم اسمه
السيلينيوم (Selenium)

🧪
واسمه الشائع عندنا
Brazil Nuts
(الجوز البرازيلي) 🌰

📌
لعلمكم المعدن هذا مش حاجة بسيطة زي ما الناس تتصور بلعكس #السيلينيوم هذه يدخل في

- تنظيم عمل الغدة الدرقية
- تصنيع وتحويل هرموناتها
- دعم المناعة
- وتقليل الإجهاد التأكسدي داخل الخلايا وواجد من الحجات

🧠
وحتى للناس اللي تستعمل في علاج الغدة، السيلينيوم يساعد الجسم في تحويل هرمون T4 إلى الشكل النشط T3 اللي يشتغل فعلياً داخل الأنسجة.

يعني الموضوع مش “فيتامينات وخلاص”..
لا،
هذا معدن يدخل في قلب العمليات الحيوية متاع الجسم بالكامل ويعتبر مهم

💡
والغريب فيه إن الجوز البرازيلي يعتبر من أغنى المصادر الطبيعية بالسيلينيوم لدرجة إن
حبة وحدة أو حبتين في اليوم تكفيك بزايدة غالباً! 🌰🌰

⚠️
#بـس انتبهوا.. الإفراط فيه أكثر من 5 حبات ممكن يكون خطير لأن السيلينيوم رغم أهميته، يعتبر زيه زي بعض المعادن الزيادة متاعه تتحول لتسمم.
خاصة لو واحد يقعد ياكل فيه بكميات كبيرة يومياً فوق 4 إلى 6 حبات بشكل متكرر ممكن تبدأ تظهر عليه أعراض تسمم السيلينيوم المتمثلة في

- غثيان
- تعب
- تساقط شعر
- هشاشة أظافر
- وطعم معدني غريب في الفم
وفي الحالات الشديدة مشاكل عصبية لا قدر الله فكونوا واعيين.

📉
لهذا اعتبروه زي االدواء أقرب “لجرعة مركزة” مش مجرد تسلية عادية وتقصيرة ليل× 🍿

وخصوصاً الأطفال…
بعدوه عليهم وما تخلوش العلبة مفتوحة قدامهم وكأنها لوز عادي يكفي تعطوهن حبتين بس

👇
ولعلمكم في حتى بعض الدراسات تشير إن السيلينيوم هذه الموجود في الأسماك وممكن يساعد ويقلل ضرر الزئبق الي فيها عن طريق الارتباط به وتكوين مركبات أقل ضرراً داخل الجسم.
يعني سبحان الله الطبيعة مرات تدير توازناتها بطريقة مدهشة

🫶
فالرسالة هنا مش “اتخافوا من الجوز البرازيلي” ولا “تاكلوه بكميات مفتوحة”
#الرسالة هي مفروض حتى الأشياء الصحية لما نبالغوا فيها، ممكن تنقلب ضدنا والاعتدال هوا الاساس الصح فكونوا واعيين.

🖋️° وإن شاء الله ديما طيبين وفي حفظ الله.. .
_____________________________________________
#السيلينيوم

#تغذية 🇱🇾

يوميات طبيب عام - General Physician Diaries🩺

08/05/2026

📋 #الحالة(٣٣)
💔 "يا دكتور... المية ما ترويش فيّا، والحمام صار عنواني!"

- حل لغز "السكري الكاذب" والفرق بين سكر الدم وسكر المية! 🩺💧

مرحبتين بمتبعيني الأفاضل.. وان شاء الله تكونوا بخير وفي أحسن حال يارب 🌸

بوست اليوم مش مجرد قصة بوست اليوم هو "درس اخر في الفطنة الطبية" لحالة خلت مريضنا يلف واجد على المستشفيات، وكل مرة يسمع في كلمة "سكرك كويس، أكيد موضوع خوف ونفسي!".. لين وصل لعيادتنا وبدينا معاه رحلة البحث عن الحقيقة.

✍️ تحليل المنعرج الدرامي لما يكون التحليل "سليم" والمريض "يعاني"!
نتفكر من مدة دخل عليا شاب في ريعان شبابه عمره 29 سنة، ملامحه ذابلة وفي ايده قنينة المية (شيشة) كأنها جزء من جسمه.
وقاللي بمرارة "أنا تعبت مرات نوصل نشرب في 8 أو حتى 9 لتر مية في اليوم وما نرتويش، ونوض في الليل 5 مرات للحمام حشاكم، حياتي وقفت مشيت وتشخصت هلبا، وكلهم يقولولي سكرك التراكمي (HbA1c) 5.2% يعني ممتاز والصائم ممتاز غير أنت موسوس وبس!"

طبعآ هنا، كان لازم عليا نوقف ونشغل "الرادار متع التركيز" اطلعت على التحاليل وتفاصيل كلامه واعراضه الواضحة وقعدت انفكر لو السكر (Glucose) سليم والعطش والتبول (Polyuria & Polydipsia) بهذا الحجم فنحن قدام لغز طبي يتجاوز "البنكرياس" ويمشي لمناطق أبعد.. !

🧠 بديت رحلة الاستبعاد المنهجي (Differential Diagnosis)
وعشان نوصل للحق كان لازم نستبعدوا الفرضيات وحدة وحدة
1. السكري المعروف (DM) استبعدناه لأن الجلوكوز والتراكمي سليمين تماماً.
2. العطش النفسي (Psychogenic Polydipsia) مريضنا حتى من عزّ النوم ينوض يدور على المية والكميات خيالية فكان الاحتمال ضعيف.
3.اضطراب الأملاح طلبنا تحليل صوديوم (Sodium) ولقيناه في الحد الأعلى (145 mmol/L الطبيعي) وهذا يعطينا إشارة إن الجسم قاعد يفقد في "مية صافية" مش أملاح.

🩺 والاشتباه الحقيقي بالتشخيص طلع السكري الكاذب (Diabetes Insipidus) كان اقرب..
وهنا بدت الصورة توضح يا إما المريض عنده مشكلة في هرمون الADH (Vasopressin) الهرمون اللي يمنع إدرار البول يا إما المخ ما يفرزش فيه (مركزي) يا إما الكلية ما تبيش تسمع كلامه (كلوي)

وحولناه للفحص الحاسم الي هوا اختبار حرمان الماء (Water Deprivation Test)
"طبعاً الاختبار هذا ما يندارش في الحوش ولا بشكل عشوائي، لأنه يحتاج متابعة طبية دقيقة ومراقبة مستمرة للسوائل والأملاح"
ودخل المريض في هذه الاختبار الدقيق ومنع عنه المية وبدينا بمتبعته وراقبنا "أسمولية البول" (Urine Osmolality) عنده

والنتيجة الأولى البول قعد مخفف جداً (Dilute urine) رغم بداية الجفاف وهذا أكد إن الجسم فاقد السيطرة على المية 💧
والضربة الطبية القاضية (Desmopressin Challenge) عطينا المريض جرعة من هرمون صناعي (DDAVP)

وبعدها كانت النتيجة بعد الجرعة فجأة الكلية بدت تركز في البول والأسمولية ارتفعت!
وهذا يعني إن الكلية "سليمة" الحمدلله وتستجيب للهرمون لكن المشكلة والغز كانت في "المخ" اللي ما يفرزش في الهرمون بشكل المطلوب

✅ واخيرا بعد إجراء ليه كافة التقييمات والتأكد التشخيص النهائي والواضح كان إصابته بالسكري الكاذب المركزي (Central Diabetes Insipidus) نتيجة نقص إفراز هرمون ال ADH
"وبعدها طلبناله تصوير رنين للغدة النخامية (Pituitary MRI) كجزء من استكمال البحث عن السبب اكثر لاي مشكلة اخرى قد تكون مش في الحسبة ونطمنوا"

💊 ودرنا خطة العلاج والمتابعة وبدينا معاه فوراً في علاج Desmopressin (DDAVP) على شكل بخاخ أنفي/أقراص

وحددنا معاه موعد مراجعة بعد أسبوعين لمتابعة مستوى الصوديوم ووظائف الكلى (Renal Functions) وضبط الجرعة حسب الاستجابة بإذن الله تعالى لأن علاج DDAVP يحتاج متابعة فعلية

وهكي كانت بفضل الله النتيجة المريض بعد اسبوعين ويومين جاني اليوم قبل شوي وجابلي تحاليله الاخيرة ووجه ضاوي وقالي انه ولا يرقد ليلة كاملة من غير ما ينوض للحمام وكمية المية رجعت طبيعية واموره في تحسن بأذن الله.

🫶 والخلاصة يا أحبابي
الطب مش بس أرقام في وتحليل بس الطب هو "قصة" لازم يحكيها المريض وعقل يحللها الطبيب ولما مريضك يشكي من عرض واضح والتحاليل الروتينية سليمة ما تقولش هذه "نفسي ونتيجة خوف" بلعكس ابحثوا عن السبب وتعمقوا لانه مرات السر يكون أعمق من التحاليل الأساسية والمريض يحتاج حد يسمعه ويتبعه ويراقبه وينصحه قبل ما يحتاج دواء.

📌 والي يبي يطلع ويشوف تفاصيل التشخيص بالخطوة اوضح اكثر للحالة يشوف #بالتعليقات 👇
🖋️ وإن شاء الله ديما طيبين، وفي حفظ الله.. .

______________________________________________
📋 #الحالة(٣٣)

🇱🇾
.
يوميات طبيب عام - General Physician Diaries🩺

08/05/2026

من يعرف ❕
شن هيا "حالة النهي العصبي القلبي"؟

08/05/2026

📌
Ceylon cinnamon can lower blood sugar by up to 29%...🍵👌

08/05/2026

💔 "لعلمكم ❕
" نص البنات اللي يمشوا طول اليوم مرهقات وتعبانات هذه مش كسل، ومش دلع، ومش “نفسية” زي ما الناس تقول"

مرات المشكلة بكل بساطة تكون في ان🩸 مخزون الحديد عندهن شبه فاضي

لان فيه دراسة قوية منشورة في مجلة CMAJ تابعت تقريباً 200 امرأة يعانوا من تعب مزمن وكل تحاليلهن كانت “طبيعية” تقريباً ما عدا مخزون الحديد (Ferritin) كان أقل من 50↘️

📉 وبعد 12 أسبوع فقط من علاج الحديد بالفم؟
التعب نزل تقريباً للنصف مقارنة بالناس اللي ما خذوش العلاج الحقيقي

وهنا المشكلة اللي توجع فعلاً ان واجد أطباء ومختبرات يركزوا بس على الهيموغلوبين (Hb) فلو “قوة الدم” طالعة طبيعية يقولولك
“أمورك كويسة”

بينما الحقيقة إن الجسم ممكن يكون قاعد يصرخ من نقص الحديد من الداخل قبل حتى ما يطيح الهيموغلوبين ❕

🧠 يعني تقدري تكوني
▪️تتعبي بسرعة
▪️شعرك يطيح
▪️تركيزك ضايع
▪️فيك خفقان
▪️تململ في الرجلين
▪️وبرودة ودوخة وإرهاق طول اليوم.. وتحاليل “الدم العادية” يقولولك طالعة سليمة

وليش؟
لأن الجسم عنده مراحل وأول مرحلة يفضى فيها “المخزون”
وبعدين بعد فترة يبدأ يطيح الهيموغلوبين

يعني مرات الـ Hb يطلع طبيعي لكن الFerritin شبه ميت عندهن💔

📊 وحتى في دراسة سويسرية اطلعت عليها صارت على موظفات بصحة ممتازة لقت إن نسبة كبيرة منهن مخزون الحديد عندهن منخفض بدون ما يعرفوا أصلاً....

❗لكن هنا نقطة مهمة جداً لازم تتقال بأمانة ان مش أي تعب يعني نقص حديد ومش أي Ferritin أقل من 50 يعني لازم علاج فوراً لأن مخزون الحديد يتفسر على حسب
▪️الأعراض
▪️العمر
▪️وجود التهاب أو لا
▪️والتحاليل الثانية كاملة

لكن اللي نبي نوصله؟
انكم ما ترضوش بكلمة “تحاليلك سليمة” وعندكم أعراض
وبدون ما تشوفوا مخزون الحديد الحقيقي بالأرقام 🧾

🩺 لان الفرق بين وحدة حاسة روحها “مطفية” طول اليوم ووحدة رجعت لحياتها الطبيعية
كان مجرد تحليل Ferritin داراته بدون ما حد يطلبه منها وكشفت السبب..

🖋️ وإن شاء الله ديما طيبين، وفي حفظ الله.
_____________________________________________

#الدوخة 🇱🇾

يوميات طبيب عام - General Physician Diaries🩺

07/05/2026

(2)
“كنا نحاسبوا أرواحنا هربنا من السكر… دخلونا في قصص ثانية أخطر.” 🩸💔

تجمعوا هنا بسرعة متابعيني الأعزاء طبعاً بعد الخضة اللي صارت على مادة (الإريثريتول) الي ذكرتها امس بمكونات منتجات "الدايت" وفي حتى من شكك في كلامي الي وضحته في المنشور تقول انا الي كاتبها الدراسات والقصد كان منه توعي بحت.
اليوم زدت بحثت ليكم ببعض الدراسات وطلع توا كلام اخر جديد ورجّع الجدل حتى هوا فيه من أوله… لكن هالمرة على مادة ثانية موجودة حتى هيا بكثرة في نص المنتجات اللي الناس تاخذ فيها وهي مطمنة وتحسبها “صحية 100%”
المادة اسمها
Xylitol - الزيليتول # 👈

لعلمكم المادة هذه تعتبر سامة جدًا حتى على الكلاب حشاكم وتعتبر اي كميات صغيرة قادرة تسبب هبوط سكر حاد وفشل كبدي عندهم
وهي تعتبر من أكثر المحليات الصناعية استخداماً (وأمان زي ميقولوا) وتدخل في صناعة
- علكة الأسنان (المستكة)
- وحلويات الدايت
- وحتى بعض المنتجات الي “بدون سكر”
- وبعض معاجين الأسنان وحتى الفيتامينات والمشروبات المرة هاذي
👄 (يعني تعتبر اكثر شي خاص بمنتجات الي تخص صحة الفم بصفة عامة)

⚠️
والمشكلة ان الدراسة القديمة الجديدة المنشورة الي كل مرة أطل علينا ويعاد تداولها وخاصة الي انذكرت في European Heart Journal لقت إن #الزيليتول حتى هوا زي #الإريثريتول ممكن يزيد قابلية تكوّن الجلطات عن طريق تنشيط الصفائح الدموية وزيادة التخثر داخل العروق.💔

يعني باختصار…🩸
حتى هوا يساهم “ويسرع” في نسبة التجلط عند بعض الناس وخاصة المرضى..
والصدمة اللي لازم نفهموها كويس بهاذي المنتوجات وعلاش قتلكم امس يفضل تقروا المكونات وتتجنبوها أفضل شي لان الموضوع معادش مطمئن من الاخير ومش معناه إن أي واحد مضغ علكة او كلي منه مرات معدودة “حتجيه جلطة”
#لا....
بس لإننا وصلنا لمرحلة مضطربة فمفروض معاش فيها امان وأي حاجة مكتوب عليها
“دايت”
“صفر سكر”
“Healthy”
وغيرها..
مفروض ما نعتبروهاش آمنة بشكل مطلق وهذا غلط كبير خاصة بعد هالدراسات وناخذوا حذرنا.. لأن الجسم البشري أعقد بواجد من الفكرة نفسها متع “بدلنا السكر معنها خلاص ارتحنا.”

ولعلمكم أي مادة تدخل الجسم تلعب في
- الاستقلاب
- والبكتيريا المعوية
- والهرمونات
- وحتى الصفائح الدموية
وهنا كان مفروض قبل ما تصنعها الشركات وادخل هذي المحليات كان لازم عليها تتدرسها سنين طويلة قبل ما نقولوا إنها “آمنة تماماً” لكن زي مقتلكم همهم الربح على حساب صحتكم

💭
والغريب إن شركات التغذية كل فترة تطلع بديل جديد وكلام جديد والناس باقي مصدقة وتمشي وراه كأنه معجزة
مرة سكر بني.
مرة ستيفيا.
مرة إريثريتول.
وتوا زيليتول.
وبكرى ابصر شن بيكون....
وبعد سنوات تبدأ الدراسات تطلع لنا حجات ما كانتش محسوبة وهنا اتكون المشكلة الحقيقية وبعدين من بيردلك صحتك.. .

🩺
فالفايدة وسامحوني ممكن جماعة انتا زي الدكتور (العوضي) وانت مش دكتور وتبي تثير الجدل وتبي التفاعل ضايقتكم لاني تكلمت على صحة الناس على الأساس إلاعجاب متعكم يوصل فيا بالدولار فعلاً مصدوم من أسلوب التشكيك والمحقق كونان واسلوب الفهامة الي ماشيين بيه ومتأسف جدآ لمستوى تفكيركم بهذه الطريقة كان الأجدر يكون الرد بالدليل والمناقشة والاثبات مش بالتشكيك والاتهامات

المهم لمتابعيني الأعزاء بنقوللكم مش معناتها كلامي وحي وانكم تقاطعوا كل شي لكن لمصلحتكم ولصحتكم خلونا بس نبدوا بالشوي وانبطلوا اول شي التفكير اللي يقول
“طالما بدون سكر = اشرب وخذ راحتك”
وديروا في بالكم من اليوم وطالع حتى منتجات الدايت متع التغذية الجديدة ممكن حيكون فيها مشاكل لو #زاد استهلاكها بشكل يومي ومبالغ فيه وصحتكم اكيد تعتبر فوق كل شي واولولية قصوى.

📌
والرسالة الأهم هنا زي ما عودتكم يقعد الاعتدال أهم من الهوس والمية وعصرت الفواكه في الحوش المعتدلة ما زالت أصدق من ألف مشروب “صحي” مصنع💧
وصدقوني أحياناً أخطر حاجة مش السكر نفسه بل إحساسنا الكاذب بالأمان ناحيت اي منتج يطلع ترند والتسويق متعه يكون ضارب الدنيا وهوا الله اعلم شن مضاف ليه

🖋️ °وإن شاء الله ديما طيبين وفي حفظ الله.. .
______________________________________________

#الزيليتول

#جلطات

🇱🇾

يوميات طبيب عام - General Physician Diaries🩺

06/05/2026

📢
"الدايت" و "صفر سكر" والنتيجة "جلطة" لا قدر الله! 🥤

💔 برسمي وصدمة علمية لازم الكل يعرفها! 🚑🩺
ركزوا معاي اليوم نبي نحكي معاكم في موضوع "احبطني" حرفياً.. خاصة لواجدين كيفي اللي دايرين ريجيم ومحافضين على صحتهن أو خايفين من السكر ويمشوا يشروا في مشروبات الطاقة المعروفة زي "الدايت" (زي الردبول والمونستر صفر سكر) أو العلكة والحلويات والبشاكيط اللي مكتوب عليها "بدون سكر"🚫

ونحسابوا في روحنا "فالحين" وماشيين صح.. لكن الحقيقة طلعت "صدمة" حتى ليا أنا شخصياً كطبيب انحب المنتجات هذي! 📉

⚠️
فالي صار.... ؟
فيه مادة اسمها (الإريثريتول Erythritol) هذي المادة معروفة انها هي اللي تعطي الطعمة الحلوة في أغلب منتجات الدايت..
#لكن الدراسات العالمية الأخيرة (Nature Medicine 2023/2024) كشفت إن المادة هذي تساعد في "تنشط" الصفائح الدموية وتخلي الدم "يتجلط" بسرعة في العروق!🩸

يعني بدل ما تحمي روحك من السكر، تفتح في باب للنوبات القلبية والجلطات والسكتات الدماغية لاقدر الله..
#والصدمة 👈 الدراسات أثارت مخاوف حتى عند الأصحاء" الي ما عندهمش أمراض! 😱

💔يعني الموضوع ولا خطير وما يتسكتش عليه والتفاصيل العلمية تعتبر مرعبة لو زادت وتأكدت.

💬لهاذا ركزوا معاي بهذي الشي لأنها حتمس حياتكم وحياة عائلاتكم

باليبي مادة الإريثريتول هذي تعتبر سكر كحولي يستخدموه كبديل للسكر العادي لأنه ما فيهش سعرات وكل شي تمام اهني..
#لكن المشكلة طلعت مش في السعرات المشكلة أثناء المتابعة بالدراسات طلعت في " #تفاعل" المادة هذي مع الدم.

🚨 يعني ولت خطيرة والأفضل عدم الإفراط فيها إلى أن تتضح الصورة أكثر

لان الدراسة أثبتت إن المادة هذي تجلط في الدم يعني تخلي الصفائح الدموية "تتلاصق" ببعضها بسرعة وهذا هو اللي يدير الجلطة في القلب أو الدماغ. 🩸

⚠️وخطر على الكل والصدمة إن الخطر هذا مش بس لمرضى السكر أو القلب... لا
قالوا حتى الناس "الأصحاء" تماماً اللي يشربوا في مشروبات الطاقة دايت 👈 #معرضين لنفس الخطر..!

📉 وقالوا المادة هذي تتراكم وتقعد في الدم لفترة طويلة بعد ما تستهلكها يعني مفعولها "الجلطي" يقعد مستمر معاك.

✅ بهي شن الحل برائيك يا دكتور؟
▪️ زي ما قلتلكم من مدة وانزيد انعاود وأي حاجة مكتوب عليها (Erythritol) أو (E968) ابعدوا عليها فوراً، خاصة لو كنت تستهلك فيها يومياً. 🚫

📖
والبدائل الطبيعية مزيها شي لو لازم من السكر، خوذ كمية بسيطة من السكر الطبيعي اقل شي معروف من زمان أو استعملو بدائل أكثر أماناً سكر (زي الستيفيا الطبيعية) وبكميات معقولة وتأثير الميكروبيوم قبل ما يطلع حتى هوا فيه مصيبة اخرى.

💧 والمية هي الملك ارجعوا للمية والعصائر الطبيعية اللي تعصروها في الحوش وفكونا من "وهم" والدايت المصنع معاش فيه امان لان بجد تعبونا بهذ الشكل

لان مش كل حاجة مكتوب عليها "صحي" هي فعلاً صحية.. والشركات واضح ومن زمان يهمها الأرباح على صحتنا والتسويق مرات يخلّي الناس تحس إن كلمة دايت تعني آمن بالكامل وأحني يهمنا "صحتكم" فكونوا واعيين ووعوا غيركم وشاركوا المعلومة بينكم، بالكي تقدروا توقضوا حد غالي عليكم.🩺

🖋° وان شاء الله ديما طيبين.. وفي حفظ الله ورعايته.
______________________________________________

#الإريثريتول
#جلطات

#دايت
🇱🇾

يوميات طبيب عام - General Physician Diaries🩺

يوميات طبيب عام - General Physician Diaries

10/05/2026

10/05/2026

09/05/2026

09/05/2026

09/05/2026

08/05/2026

08/05/2026

08/05/2026

08/05/2026

07/05/2026

06/05/2026

Address

Website

Alerts

Shortcuts

Share

Category