دكتورة هند ناجم Dr hind najem

14/05/2023

اول يوم امتحان دعاء الامتحانات للطلبة والطالبات
اللهم ألهمهم الصواب في الجواب و ثبتهم على الحق و انزع الضيق و القلق من نفوسهم و سهل عليهم كل عسير و افتح لهم فتوح العارفين و ارزقهم فهم المرسلين و حفظ النبيين...
اللهم إني استودعك أبنائنا و أبناء المسلمين و أستودعتك حفظهم و فهمهم فرده لهم عند حاجتهم إليه إنك سميع مجيب الدعاء...
اللهم لا سهل إلا ما جعلته سهلا وانت تجعل الحزن اذا شئت سهلا فيسر لهم الصعب
اللهم وفق ابنائنا اللهم ارزقهم قوة الحفظ وسرعة الفهم وصفاء للذهن
اللهم ألهمهم الصواب في الجواب يارب النجاح والتفوق والتميز حليفهم يارب العالمين ،اللهم لا علم لنا إلا ما علمتنا انك انت العليم الحكيم اللهم امين ..بالنجاح والتوفيق إن شاء الله.. 👩‍🎓👩‍🎓

13/05/2023

13/05/2023

كان يوم حلو مع الحالات وطبعا عيادة رويال التخصصية وفرولي الأدوية إلي نوصف فيها وعندي معاها فيدباك كويس مع حالاتي وسعرها نفسه بدل مالدوري تاخديها في نفس العيادة ومن أحلي الأدوية 🥰❤🌷 دكتورة هند ناجم 🌷

06/05/2023

مساء الخير رجعتلكم مع مواضيع مهمة والملمة 🥰 نتكلم عن الخمول من الأعراض والأسباب والعلاج 💞

اعراض_الخمول.
1💞 التعرق المستمر والتعب والارهاق.
2💞النوم لفترات طويله والشعور بالوهن.
3💞الاصابه بالحاله النفسيه السيئه وعدم الرغبه في الاختلاط مع الاخرين.
4 💞اصفرار البشرة وإصابة الوجه بالإجهاد مع ظهور الهالات السوداء أسفل العينين.
5 💞شحوب الوجه. أسباب- الخمول
1 💞الحالة النفسية والإكتئاب 2💞الحمل أو البلوغ بسبب تغيير الهرمونات قلة الأكل وشرب السوايل ونقص فيتامينات زي دال والحديد . 3💞السمنة والأمراض المزمنة متل أمراض القلب والسكر وخمول في الغدة الدرقية 4💞أخد الأدوية لعلاج إكتئاب والمهدئات
علاج_الخمول.
1💞 الغذاء الصحي.
2💞 شرب كميات كافيه من الماء.
3 💞التقليل من السهر.
4💞الحفاظ على الوزن.
5 💞الاستحمام بالماء البارد.
6💞ممارسه الرياضه والحجامة♦️
7💞 تحسين الحاله النفسيه.❤️🩺 8 💞معالجة الأسباب مذكورة سابقا 🌷 دكتورة هند ناجم ❤🌷

29/04/2023

السلام عليكم ورحمة الله وبركاته دكتورة هند ناجم 🌷 متواجدة في عيادة رويال التخصصية🥰 ب عين زارة بقرب من الزويتة برج الساعة 🧭 يوم السبت والإربعاء من الساعة 4 إلي 8 مساءا والإتصال في نفس اليوم للحجز كشف وجهاز ❤ 0922822286🤗

22/04/2023

كل سنة وانتم بألف خير 🌷

19/04/2023

موضوعنا اليوم فيتامين دال اهميته في الحمل وقبل الحمل ننصح لكل من تبي تحمل او حامل انها تهتم ودير تحاليل وتتاكد انها في المعدل الطبيعي مابين 30نانوغرام/ملليلتر الي 50 نانوغرام/ملليلترويعتبر رقم 30 عل حافة وانها تاخده ك وقائي يحافظلها عل معدل رقمي هدا وطلع يلعب دور كبير ومهم في الحمل لانه كالسيترول هو الشكل النشط للفيتامين دال إلي يمتصه الجسم ويتحكم في الجينات إللي تشارك في صنع الإستروجين وألي يأتر في الحمل ويساعد في تهيئة بطانة الرحم قبل زراعة الأجنة ويعمل في تنظيم كمية كالسيوم والفوسفات إلي يحتاجها العظام والأسنان والعضلات ويساعد عل فقدان الوزن وشغل الغدة الدرقية ليه دور فيه🧐 ويحسن نمو الشعر والبشرة 👩وللأسف شائع نقص الفيتامين دال في جميع الدول ومع توفر الشمس والكمية المناسبة يوميا نقدرو نتعرضولها والاكل لازم يكون فيه نسبه مع فيتامين دال نلقوه في الأسماك والبيض واللحوم الحمراء وتقدرو تاخدوه عن طريق استشارة الطبيب انه يطلب تحاليل باش يعرف شنو يعطي هل حبوب🔴 او إيباري💦 وطبعا زي ماعنده فوائد عنده أضرار لما واحد ياخده فوق الحد المطلوب زي القئ والغثيان والامساك وحصي الكلى وعدم انتظام دقات القلب وزي ماليه اهمية قبل الحمل حتي في الحمل ليه هلبا اهميته وليه دور في الحمل للام وللطفل لازم نهتمو بالام انها تكون فيتامين دال في معدلها طبيعي باش الطفل يستفيد منها ترى نجو نقولو شنو فائدته عند الأم الحامل 🤓😌 طلع يحميها من انها مايصيرلهاش تسمم الحمل الي هو ضغط الحمل ومايجيهاش سكر الحمل وطلع يساعد عل انقباضات الرحم والحوض وهكي ولادتها تجيها ساهلة راهو دراسة داروها بين الي خدو فيتامين طلع اقل عرضة ب الحاجات هادي ونجو توا بنقولو من شنو يستفيد 👶 لما الام تاخد الفيتامين الطفل أقل عرضة انه وزنه يجي ناقص و نضمنو نموه الطفل سليم وتعزيز قوةالعظام والاسنان والتقليل من خطر لقصور انتباه وفرط في الحركة ومساعدة عل تطور العقلي ل الطفل نحموه من مرض التوحد وانه ما تجيشي الكساح 🥺 توا خلاص عرفتو اهميته وفائدته ولازم يكون المعدل اليومي 10 ميكروجرام والي حد الآن فيه هلبا مضاعفات وامراض وطلع بسبب نقص فيتامين دال ودمتم بألف خير د هند ناجم ❤

14/04/2023

هلا وغلا كلام مختصر عن التكلس في المشيمة( calcefication of placenta) من خلال دراستي وخدمتي 👀 زي ماتعرفو المشيمة دورها ترفع الماكلة والأكسجين للجنين والعكس طلع فضلات من الجنين هو حلقة وصل بين الأم والجنين نبو نعرفو شن هي التكلس في المشيمة 😴 ؟ هي نضوج وكبر في المشيمة ناتج عن ترسبات الكالسيوم في المشيمةوفي الطبيعي تطلع في شهور الأخيرة في الحمل تبي متابعة ومراقبة بين المريض والدكتورة 😎 نجو لأسبابها ؟ أسبابها اول شي طبيعية وتصير في شهور الاخير وعل حسب درجتها بس من الشهور الأولي والوسط هني بنوقفو شوي🤚 لأنه زي مافهمنا المشيمة توصل في الماكلة والأكسجين يعني هكي بينقص عل جنين نخافو واسباب هو الي عندها ضغط الحمل وسكر الحمل و امراض مزمنة وفقر الدم ونقص مناعة الأم وإلتهابات مهبلية مزمنة والي ياخدو في كالسيوم فوق الجرعة المطلوبة 😴 كيف يتشخص ؟ عن طريق السونار نحددو بيها درجة التكلس وعل حسب شهور الحمل نستعملو دوبلر وبنقيسو المية ومن المريضة لو تعاني من نقص حركة متلا وتقلصات مع وجع ومن مضاعفاتها نقص المية 🏊‍♀️ونقص الحركة ونقص وزن البيبي 👶 وإنفصال المشيمة وتختر في المشيمة ونخافو البيبي نخسروه لو هدا كله كان بدون متابعة مع الدكتورة والفحوصات مع بداية الحمل 🙋‍♀️ كيف نقدرو نحافظو وشنو نوع ولادة 🌷 أول حاجة السونار عل حسب الدرجات التكلس ووضع الجنين وقياس المية والوزن الجنين ونديرو دوبلر ونحددو اليوم لضرب إبرة تنشيط الرئة قبل الشهر التاسع ومتابعات امراض الحمل زي الضغط والسكر والفقر الدم يتعدلو والمريضة تحسب الحركة ونقررو نوع الولادة عل حسب وضع الحاله ودرجة التكيس و وضع الجنين وحالة المريضة 🤰 دكتورة هند ناجم

12/04/2023

يومكم طيب وجميل موضوعنا عن تغلظ الجدار الرحم او تضخم في الرحم نبو نعرفو شن هو التضخم في الرحم شنو أسبابه وشنو أعراضه وكيف علاجه وكيف يتشخص 🤗هو عبارة عن زيادة تنسج في جدار الرحم وخلل في الهرمونات وخاصة انه فيه من يزيد عنه هرمون الاستروجين🤨 ونقص في بروجستيرون هدا الي يسبب في تغلظ في جدار الرحم ويصير في الامراض المزمنة زي السمنة والمرض السكري ومتلازمة تكيس المبايض 🤓 الرحم في طبيعته هو زي قبضة اليد ويكبر ويزيد لو كان فيه حمل وهدا زيادة الطبيعية يصير في الحمل بس لو زاد حجمه من غير الحمل هدا نقولو فيه شي مش طبيعي شنو أسبابه في الغير الطبيعي 😔 أول شي الأورام الليفية هو الي نقولو عليه اللحمية هو عبارة عن نمو زي اللحمة في جدار الرحم ويصير في الاعمار الاربعين والخمسين وعبارة عن ورم حميدي😴 ويكون اعراضهم انه نزيف فترة الدورة مع تكتلات ويضغط عل المتانة لما يكون كبير في الحجم ويكتر التبول ويدير تضخم في الرحم السبب تاني أدينومايوسيس وهني يكون تشخيصه زي اللحمية ويطلع فترة الدورة والحاله تجي بنزيف ويكون سببه نمو الخلايا اكتر من اللازم فترة الدورة تالت سبب التكيسات المبايض وهني يكون سببه خلل في الهرمونات الي مفروض تنزل كل بطانة الرحم فترة الدورة الشهرية ولما يكون خلل راح ينزل جزء وجزء يقعد ويتحول ل التهاب وبذالك يدير تضخم في الرحم ورابع سبب هو سرطان الرحم 😓وأعراضه نزيف فترة الدورة وتضخم في الرحم ويتشخص عن طريق منظار رحمي وأخذ العينة او عملية تنظيف باش نشوفو الخلايا المتحولة وخامس سبب هو قبل موعد انقطاع الدورة او سن اليأس😥 بيصير لخبطه في هرمونات وبذالك بيتغلظ جدار الرحم أكتر من الطبيعي وهكي بيكون تضخم الرحم خلونا نعاودو ونرتبو الأعراض تضخم في الرحم😌 هو انتفاخ اسفل البطن ونزيف أثناء الدورة الشهرية مع إختلاف وجود الكتل وألم أسفل الظهر وتشنجات في الحوض وألم أسفل الظهر كترت التبول وشحوب في الوجه والضعف العام وأعراض فقر الدم ونزول افرازات مائية وفيه حاجة اسمها عوامل الخطر اكتر عرضة ل تضخم الرحم 🤔 إلي عندهم السمنة والي عمرها فوق 35 والي عندهم مرض السكر وإلي عندهم تاريخ مرضي في العائلة زي أمراض السرطانية في الثدي والرحم والمبايض وإلي ياخدو في هرمونات وإلي مش جايبة الصغار ونجو توا كيف بنشخصو التضخم في الرحم اول حاجة من تاريخ المرضي ناخد منها معلومات وبعدها نطلب تحاليل الهرمونات وراح يبان الخلل لو موجود وبنشوف الدم لو فقر دم حاد💢 عندها وبعدها جهاز السونار ونقيس سمك الرحم ونشوف لو عندها لحمية او تكيس المبايض وعل حسب لو هي في سن اليأس وندير منظار مهبلي ونكشف ونعطي كومنت ونبعتها دير صورة رنين المغناطيسي ويعطي تقرير ونبي نفهمكم انه الموضوع مايخوفش الاغلب يكون خلل هرموني وعلاجه بيكون باعطاء هرمون بروجستيرون سواء حبوب او ابر ومع مسكنات ومع متابعة او تركب لولب هرموني ومرات نطلبو منها تنظيف الرحم زي الي نديرو فيه في الاجهاض وناخدو عينة ونبعتوها ومرات منظار رحمي ولازم الكشف المبكر في ظهور النزيف ولو تكرر هلبا خودوها بعين الاعتبار لو تكرر هلبا التضخم ونخافو من تحولها الي خلايا سرطانية وبيولي سرطان الرحم وخاصة قبل السن اليأس او في سن اليأس نضطرو بازالة الرحم وربي يحفظكم جميعا وان شالله استفذتو معاي أنا دكتورة هند ناجم ❤

12/04/2023

••

‏هي العشرُ الأواخرُ فاقتحِمْها ..
ولا تركَنْ إلى الفَرشِ الوثيرِ

وشُدَّ لها المآزرَ واغتنمها ..
فإنَّ الفوزَ في الشوطِ الأخيرِ .🌸

12/04/2023

الرحم ذو القرنين (Bicornuate uterus) حالات طلبو مني نتكلم عليه بمختصر وبالعامية يبو يعرفو شنو هو 🤔؟هو عبارة عن تشوه خلقي من لما هي كانت في بطن أمها ويكون شكله زي 💜 وهبوط في الجزء العلوي من الرحم سواء كلي أو جزئي هل ليه أعراض معينة؟🙋‍♀️ طبعا لا لين البنت تتزوج 💍👰وينكشف الموضوع معاها كيف 👀؟ لأنه بعد الزواج مرات تتأخر في الحمل تعاين او يكون عندها حمل او تعدد في الاجهاضات هكي بنكتشفو عندها الرحم ذو القرنين 👿 بالجهاز او سونار بطني ومهبلي وبالرنين المغناطيسي وبالصبغة الملونة باهي نجو لسؤال إلي بعده هل يمنع الحمل 🤓 ؟ لا مايمنعش الحمل ويصير إخصاب وفيه نسبة بسيطة تحمل حتي بتوأم غر بس يكون فيه قصور بسبب هبوط في الجزء العلوي في الرحم ومع إنقباضات إلي تصير مرات يصير معاها اجهاضات و ولادات مبكرة نقدرو نديرو حل مع متابعات مبكرة الديرعملية الربط في عنق الرحم في شهر الرابع ونعطو التتبيت بروجستيرون باه لو صار حمل🤰 كيف بتكون الولادة طبيعية أو قيصرية؟🥰 عل حسب وضع الحالة و وضع الجنين لأنه لو قيصري بيكون ليه سبب زي متلا فارسي وضع الجنين ومايمنعش الرحم ذو القرنين ولادة مبكرة نجو لآخر شي شنو هو علاج الرحم ذو القرنين🤔؟ ماليشي علاج يبي متابعة بس 🤚 لو في حالة تعدد الاجهاض وتأخر في الحمل ويكون كل تحاليلها هي وزوجها سليمات ندخلو 🌷 نديرو منظار رحمي وفيه عملية تصحيح للجزء العلوي ل رحم وآخر حاجة إلي عندها رحم ذو القرنين لا يمنعك إنك تكوني أم 😴 ولازم تعرفو الرحم ذو القرنين مش هو نوع بس ل تشوهات خلقية ل الرحم عندنا الحاجز الرحمي وفيه الي عندها رحمين والي عندها رحمين وعنقين رحم زي الي موضح في الصورة 🥰 دكتورة هند ناجم 🌷

12/04/2023

أهلين قروبي العزيز حابة نتكلم عن البواسير (hemorrhoids) أكتر شي يصير مع النساء في الحمل ومن مضاعفات بعد الولادة سواء طبيعي وحتي القيصري تجيهم خلوني نفهمكم شنو هو البواسير 🤔 هو عبارة عن العروق منتفخة 😬في الجزء السفلي فتحة الشرج وبتضغط وبتخلي الأوردة تتنفخ وتتهيج وتطلع وتبان انتفاخ أو زي نتوء حاجة زايدة طالعة ل برا وبتنزبط لما وحدة تخش للحمام حشاكم 🌝 أو بنزول الدم وقت التبرز ومعاها وجع لما يكون إمساك خلي نقوللكم السبب أي شي يكون ضاغط في الحوض وبيكون ضاغط عل العروق ويخلي البواسير تصير في الحمل ناتج من هرمونات والإمساك والوزن الزائد ووالوقوف هلبا والتقعميز هلبا 😴 والولادات بالذات الطبيعي وقت لأنه بيكون فيه دفع البيبي 👶 وحتي فيه إلي تجيهم بعد الولادة مش شرط من دفع بالذات إلي جابو قيصري يكون سببه من هرمونات والإمساك إي تصير معاهم خلونا نتكلمو عل كيف نصرفو لو صارت معاكم أول شي نظام الأكل وطبيعته يكون معبي من الألياف زي الخضراء وخاصة السلاطة وتكون فيها زيت زيتون ومع شرب هلبا سوايل وخاصة المية والفاكهةوتاني شي نبيكم تنظفو المكان كويس بالمية ومع قطرة ديتول في المية وتغسلو بيها منطقة ومعاش تستعملو الصابون والمعطرات وبعدها ديرو كمادات تلج زي مكعبات الثلج وتحطوها باش تنقصو من الهيجان🤯 والإلتهاب وبعده فيه كريمات تنحط مرتين في اليوم تنكمش التورم او زوائد وتنقص من حجمها و تعالج إلتهاب🤒 وفيه حتي بنج موضعي يستعمل قبل التبرز 🤓 وهدا كله يكون بوصف الدكتورة أو الدكتور وآخر حل الجراحة والليزر والسدادات المطاطية هدا كله عل حسب درجة البواسير يحددها دكتور الجراحة المختص💭وأهم شي المحافظة ومتابعة ودمتكم بخير 🌷 دكتورة هند ناجم 🥰