29/06/2025
كلنا عارفين ان صيف جي وجي معاه البحر 🌊 والدلاع 🍉
وللاسف معاه الإسهال والترجيع عند الاطفال
في البوست حنتكلم على هذا الموضوع باذن الله
في فترة الصيف ترتفع درجة الحرارة وهذا بيخلي الفيروسات والبكتيريا تنشط وتثكاثر اكثر خصوصا على الاكل والميه
ومع الصيف والبحر مرات الاطفال يبدو يعومو في بحر مش مجهز او في احواض مش نظيفة وملوتة ببكتريا وفيروسات معينة حتي لو كان فيها الكلور خصوصا الي تبدا زحمة
وبيكثر الدلاع الي مرات القشرة الخارجية بتعه ملوثة بميكروبات او مواد كيميائية وتكون الام مغسلاتاش كويس وكلاه الطفل او قطعت دلاعة وماحطتهاش في ثلاجة لانه لو قعد برا الثلاجة اكثر من ساعتين حيتلوث وممكن يسبب في مشاكل
وهذا علاش ننصحو في الصيف بالاتي:
ماتخليش طفلك يعوم في بحر مش نظيف او حوض زحمة وحاول بقدر ماتقدر مايبلعش مية الحوض
اغسله بعد مايطلع من بحر والحوض مباشرة واغسله ايديه قبل ماياكل
حاول ماتخليشي ياكل فواكه ليها فترة برا الثلاجة (اكتر من ساعتين) واغسلها كويس قبل ماتعطيهاله
باهي الي صار صار وجاته نزلة معوية (اسهال وترجيع)
شن الحل وهل نعطي مضاد؟
مضاد لا—لانه ماينعطاش الا في حالات معينة يحددها دكتور
العلاج الاساسي نمنع الجفاف بمحلول الجفاف الي درت عليه بوست وحلقة بالتفصيل
ولو جفاف قوي (يحدده الدكتور معناها يبي سوائل وريدية)
في بعض الامهات تبي الاسهال يوقف (مع وقت حيوقف بروحه لكن مانبوشي يدير جفاف لطفل)
في علاجات تانية مساعدة زي البكتيريا النافعة الي بتساعد جهاز مناعة يقضي علي ميكروب
ومن افضل منتجات في حالة هده
coloncare sachet
عبارة عن اكياس فيها بكتيريا نافعة ومواد تحبها بكتيريا نافعة بش
تنشط
لو طفل اقل من سنة كيس باليوم
ولو عمره اكبر من سنة 2 اكياس يوميا
المدة من 5 الي 7 ايام
ولكن:
تخلطها مع فنجان اميه (ممكن مع حليب او عصير ) بشرط مش حامض او سخون
و ياخده خلال الاكل او بعد الاكل طول
بعد تخليط تستخدم خلال نصف ساعة
مايتخزنش في ثلاجة بعد تخليط
ربي يحفظكم ويحفظلكم صغاركم❤️
