17/06/2024
عيادة الدكتورة أحلام
لغة المقال : الدارجة
بداية عيد مبارك سعيد وتقبل الله منا ومنكم صالح الاعمال وجعلها خالصة لوجهه الكريم..
نحاول بتوفيق من الله وككل سنة الاحاطة بمجموعة من النقاط المتعلقة بالشق الغذائي في عيد الاضحى فالدراسات في مجال التغدية كتوصي بتناول وجبات اللحوم مرتين في الاسبوع..كيف الحال اذن الى ولينا كناكلوه ربما يوميا اوحتى جوج مرات فاليوم فهاد الايام د العيد فأقول بالنسبة للناس لي فصحة جيدة والحمد لله : كلوا واشربوا ولا تسرفوا وبالنسبة للناس المرضى شافاهم الله نقول : الوقاية خير من علاج المضاعفات..
لحم الغنم اكتر سعرات حرارية و اكتر دهون من اللحوم الحمراء الاخرى..بصح ولكن هدا مكيعنيش وخاصة بالنسبة للناس المرضى انهم يستهلكو بإفراط لحم المعز او البقر راه حتا هو فيه الدهون المضرة.
لحم الخروف اقل من سنة غني اكثر من حيت القيمة الغذائية و اقل دهون من الحولي لي عمرو فايت عامين.
لحم الغنم على العموم راه عامر بالاحماض الدهنية المشبعة و الضارة و غني بالكوليستيرول اذن الناس لي كيعانيو من ارتفاع الكوليستيرول ارتفاع الضغط الدموي او مرض السكري وأمراض القلب والشرايين... راه خطيييير و مضر بالصحة ديالهم.
واش هناك قطع او اجزاء من الخروف اقل دهون ؟ نعم اللحم ديال الفخد،الكليتين مثلا اقل دهون من اللحم ديال الصدر او الكبد..ممكن نقيو اللحم من الشحم قبل الطهي باش نقلو نسبة الدهون شوية
حذاري من طرق الطهي الغير الصحية : حذاري من ورق الالمنيوم راه كارثة.. ماتشويوش اللحم مباشرة على الفاخر (حاولو تختارو الفحم الخشبي) وشويو فمكان تكون فيه التهوية جيدة لأن الدخان المنبعت من الفاخر والشوى فيه مواد مضرة.
فايام العيد قبل الاقبال على وجبة الغذاء لي غادي يكون فيها الشوى وبولفاف وتقلية واللحم فالاستعداد تيكون بداية بتناول وجبة فطور متكاملة قليلة السكريات (حنا كنفطرو بالحلوى و البطبوط والعسل ووو.. ) ف اذا بدينا النهار بفطور فيه هاد السعرات الحرارية كاملة و زدنا عليه الغدا بالغنم (لحم 100℅ فالغالب) وكملناها بالكوتي عند الحباب وختمناها بالعشا باللحم تاني فتخيلو معايا الكمية والحجم الهائل ديال السعرات الحرارية لي دخلنا للجسم ديالنا فنهار واحد..
اشنو الحل ؟ بالنسبة للناس المرضى يتجنبو ما امكن الافراط فاللحوم من جهة اخرى كاين بعض التدابير السهلة لي ممكن تخلي الجسم ديالنا على الاقل ميتهلكش أولها كيف قلنا الفطور المتوازن تانيا ضروري ندخلو سلطات وخضر ماشي ناكلو اللحم وحدو..من جهة الخضر غنية بالالياف كتساهم فتحسين الهضم وحماية الامعاء الدقيقة و القولون وكتعطي إحساس بالشبع ومن جهة اخرى كتحد او كتقلل من الامتصاص ديال الدهنيات الموجودة باللحم المتناول.
بالنسبة للفواكه او الديسير معروف عليه انه سريع الهضم ملي كناكلوه بعد الوجبة الدسمة لي الهضم ديالها اطول تيوقع بلوكاج للفاكهة وطبعا كنتيجة طبيعية تيوقع التخمر..اذن الفاكهة ناكلوها من الاحسن قبل الاكل بساعة او من بعدو ب 3 ساعات على الاقل.
خلال الاسبوع نحاولو نوعو من التغدية ديالنا ومناكلوش غير اللحم اللحم اللحم
المشروبات الغازية مكنصحش بيها نهائيا (مبغيتش نكول ممنووووعة) فإلى جانب المضار ديالها المتعددة فهي كتشكل سعرات حرارية زائدة وفارغة وحنا شرحنا قبل ان وجبة اللحم الدسمة لوحدها كتشكل ثقل على الجسم فمنزيدوش الحمل عليه بالمشروبات السكرية لي غتحول لدهون اضافية.
مشروب الشاي او اتاي كيبقى خيار جيد والى كان بدون سكر فهو جيد جدا.
مسألة كيغفل عليها عامة الناس فالعيد هي النشاط البدني فنحاولو ما امكن نمارسو نشاط بدني على الاقل المشي السريع الى مكانش نهار العيد نبداو النهار التاني.
نذكر انه مهما كلنا من اللحوم فالجسم ديالنا كياخد غير داكشي الي محتاج ليه الفائض فين تيمشي اذن ؟؟ راه كيشكل عبء على الكبد والكليتين و كيترسب على شكل دهون فالجسم والاعضاء الداخلية..
اخيرا..فالايام لي كتجي بعد العيد كتكثر امراض واعراض كالاسهال او القبط و التهابات المعدة ايضا للاسف السلوك الغذائي و اللامبالاة فالعيد كتكون الشرارة لي كتشعل المضاعفات الخطيرة للناس ذوي الامراض المزمنة او السبب فاكتشافها فنحاولو ان شاء الله نتابعو سلوك غذائي سوي باش نتجنبو المشاكل الصحية.
د.احلام ازكوار "الدروة"
