06/11/2024
Stresi nga Konteksti Mjeksor
Fjala "stres" rrjedh nga latinishtja "stringere," që do të thotë "të shtrëngosh" ose "të ngushtohet". Kjo fjalë u përdor për herë të parë në kontekstin mjekësor nga Hans Selye në vitet 1930 për të përshkruar përgjigjen fizike dhe mendore të trupit ndaj faktorëve të jashtëm sfidues.
Shtrëngime apo stres përjetojmë gati çdo ditë. Ajo që ndryshon nga dita në ditë është frekuenca (disa herë gjatë ditës ose vetëm një herë) dhe intensiteti (pak, mesatarisht, shumë). Trupi ynë përbëhet nga disa sisteme (respirator, kardiovaskular, nervor, hormonal, etj.) që bashkëveprojnë me njëri-tjetrin. Këto sisteme asnjëherë nuk funksionojnë ndaras, prandaj kur përjetojmë stres, të gjitha sistemet preken, duke shkaktuar çrregullime dhe devijime nga funksionimi normal.
Kërkesat tona ndaj jetës dhe kërkesat e jetës ndaj nesh jo gjithmonë qëndrojnë krah për krah. E kjo na tmerron dhe në lojë futet ky patogjen jomikroskopik që quhet stres apo stringere. E gjithë loja e këtij patogjeni bëhet nëpërmjet sistemit hormonal dhe atij nervor. Ky lojtar infiltrohet brenda tyre me qëllim që t'i ketë në dorë dhe të luajë si i pëlqen. Loja merr fund kur i mposht përfundimisht këto dy sisteme.
Shkruan Ismet Latifi për Qendrën Elan
