24/10/2025
အစာလည်း ဆေး၊ ဆေးလည်း အစာ - အပိုင်း (၁)
ဒီတစ်ပတ်မှာတော့ အစာလည်း ဆေး၊ ဆေးလည်း အစာ ဆိုတဲ့ ခေါင်းစဉ်လေးနဲ့ ပတ်သတ်ပြီး မျှဝေပေးမှာဖြစ်ပါတယ်။
ပါဝင်မဲ့အကြောင်းအရာတွေက
⁃ အစာလည်း ဆေး၊ ဆေးလည်း အစာဆိုတာ
⁃ အာဟာရဓာတ်ဆိုတာ
⁃ အခြေခံအစာအုပ်စု (၃) စု
⁃ အနောက်နိုင်ငံတွေရဲ့ အစာအုပ်စု (၅) စု
လူတွေဟာ အသက်ရှင်သန်ဖို့ အစားအစာတွေကို စားသုံးကြရပါတယ်။ ဒီလိုစားတဲ့အခါမှာ လူကိုအာဟာရပြည့်ဝစေပြီး ကျန်းမာကြံ့ခိုင်စေတဲ့ အစာတွေကို ဂရုတစိုက်စားဖို့ရာ အင်မတန် အရေးကြီးပါတယ်။
အစာလည်း ဆေး၊ ဆေးလည်း အစာ သည် မြန်မာဆိုရိုးစကား ဖြစ်သည်။
အနက်အဓိပ္ပာယ် :
သင့်လျော်သော အစားအစာသည် အာဟာရဖြစ်စေသဖြင့် ဆေးတစ်မျိုးပင် ဖြစ်သည်။ သင့်လျော်သော ဆေးသည်လည်း အာဟာရဖြစ်စေသဖြင့် အစားအစာတစ်မျိုးပင် ဖြစ်သည်။
ဆိုလိုတာကတော့ “အစားအစာကို မှန်ကန်စွာစားသုံးခြင်းဖြင့် ဆေးသောက်သကဲ့သို့ ကျန်းမာရေးကို ကောင်းမွန်စေနိုင်တယ်။ ထို့နည်းတူစွာပဲ ဆေးသောက်ခြင်းဖြင့်လည်း ကိုယ်ခန္ဓာမှာလိုအပ်တဲ့ ဗီတာမင်၊ သတ္တုဓာတ်များ ဖြည့်တင်းပေးလို့ အစာစားသကဲ့သို့ အားဖြစ်စေနိုင်တယ်” လို့ ဆိုလိုပါတယ်။
အစာစားတိုင်း အာဟာရဓာတ်ရရှိတာ မဟုတ်ပါဘူး။ သန့်ရှင်းလတ်ဆတ်ပြီး အာဟာရပြည့်ဝတဲ့ အစားအစာကို စားသုံးမှသာ အာဟာရ ရရှိပါတယ်။
အာဟာရဓာတ် (Nutrients) ဆိုတာ ဘာလဲ
၁။ ကစီဓာတ် (ကာဗိုဟိုက်ဒရိတ်)
၂။ အသားဓာတ် (ပရိုတင်း)
၃။ အဆီဓာတ်
၄။ ဗီတာမင်နှင့် သတ္တုဓာတ် တွေဖြစ်ပါတယ်။
ဗီတာမင် စုစုပေါင်း (၆) မျိုး ရှိပါတယ်။
⁃ ဗီတာမင် A
⁃ ဗီတာမင် B (1, 2, 3, 5, 6, 12)
⁃ ဗီတာမင် C
⁃ ဗီတာမင် D
⁃ ဗီတာမင် E
⁃ ဗီတာမင် K
သတ္တုဓာတ်အနေနဲ့ကတော့ လူ့ခန္ဓာကိုယ်အတွက် မရှိမဖြစ်လိုအပ်တဲ့ သတ္တုဓာတ်တွေဟာ ကယ်ဆီယမ်၊ ဆိုဒီယမ်၊ ပိုတက်ဆီယမ်၊ မက်ဂနီဆီယမ်၊ ဖေ့ာစပေါရပ်၊ သံဓာတ်၊ ဇင့်ဓာတ်၊ အိုင်အိုဒင်းဓာတ်၊ ကလိုရိုက်၊ ဖလိုရိုက်၊ မန်းဂနိစ်ဓာတ် တို့ဖြစ်ပါတယ်။
မိမိတို့စားလိုက်တဲ့ အစားအစာဟာ အပေါ်ကပြောခဲ့တဲ့ အာဟာရဓာတ်အနည်းဆုံးတစ်မျိုး ပါဝင်နေမှသာလျှင် အာဟာရရှိတဲ့အစားအစာဖြစ်ပါတယ်။ ဓာတုပစ္စည်းတွေသုံးကာ ဖန်တီးထားတဲ့ အစားအသောက်တွေမှာ အာဟာရဓာတ်ပါဝင်မှု လျော့နည်းပါတယ်။
ဒါ့အပြင် အစာစားတဲ့အခါမှာ “အစာနှင့်ခိုင်း ဝမ်းကိုနှိုင်း” ဆိုသလို မိမိဝမ်းဗိုက်ပမာဏနှင့် ချင့်ချိန်စားမယ်ဆိုရင် အစာကြေညက်ပြီး ရောဂါကင်းစေပါတယ်။ သို့ပေမဲ့ အလွန်ကျူးစားမယ်ဆို တန်ဆေး လွန်ဘေး ဖြစ်တတ်ပါတယ်။
ဒီတော့ အစားအစာကို ဘယ်လိုစားရမလဲ
အစာအုပ်စု (၃) စု မျှတအောင် စားသုံးသင့်ပါတယ်။ အခြေခံအားဖြင့် အစာအုပ်စု (၃) စု ခွဲခြားထားပါတယ်။ ၎င်းတို့မှာ -
၁။ ခန္ဓာကိုယ်ကြီးထွားဖွံ့ဖြိုးစေသော အစာအုပ်စု
၂။ အင်အားဖြစ်စေသော အစာအုပ်စု
၃။ ရောဂါကာကွယ်စေသော အစာအုပ်စု တို့ဖြစ်ပါတယ်။
ဥရောပနိုင်ငံတွေမှာတော့ သူတို့နိုင်ငံရဲ့ ကျန်းမာရေးလမ်းညွှန်ချက်တွေအရ အစာအုပ်စု(၅)စု ခွဲထားပါတယ်။
၁။ ဟင်းသီးဟင်းရွက်များ (vegetables)
၂။ အသီးအနှံ (fruits)
၃။ အစေ့အဆန် (cereals & grains)
၄။ နို့နှင့် နို့ထွက်ပစ္စည်း (Diary)
၅။ ပရိုတင်း အသားဓာတ်ရစေသော အစာများ (Proteins)
ဆက်ရန် …
နောက်အပတ်မှာတော့ အစာအုပ်စု (၅)စုထဲက ဟင်းသီးဟင်းရွက်တွေအကြောင်းကို မျှဝေပေးမှာဖြစ်ပါတယ်။
ဟင်းသီးဟင်းရွက်တွေဟာ လူ့ခန္ဓာကိုယ်အတွက် ဘယ်လိုအကျိုးပြုနိုင်လဲဆိုတာကို စောင့်ကြည့်ဖတ်ရှုပေးပါဦးခင်ဗျာ။
ဒီနေ့တော့ ဒီလောက်ပါပဲဗျ။
#အစာလည်းဆေးဆေးလည်းအစာ
#ကျန်းမာရေးဗဟုသတ
#အပတ်စဉ်မျှဝေခြင်း
#ရွှေဗဟိုရ်ဆေးဆိုင်မန္တလေး
