30/09/2022
#၀က်ခြံသမားအမှားတစ်ရာ
#ဒေါက်တာကျော်ကျော်((အရေပြားအထူးကု ဆရာဝန်ကြီး)
ဝက်ခြံပေါက်တဲ့သူတွေအများစုဟာ ဝက်ခြံအမြန် ပျောက်စေတဲ့ ဆေးမျိုးကိုသာ တောင့်တလေ့ရှိပါ တယ်။ ပြောရရင် ဆေးကိုပဲ အားကိုးလေ့ရှိပါတယ်။ တကယ်တော့ ဝက်ခြံရှိသူတွေဟာ မသိမသာရော၊ သိသိသာသာရော အမှားများစွာကို လုပ်တတ်ကြပါ တယ်။ စစ်မှန်တဲ့ဆေးတွေနဲ့ ကုသနေသည့်တိုင် အမူအကျင့်အမှားတွေကို မပြုပြင်နိုင်ခဲ့ရင် သက်သာ ပျောက်ကင်းနိုင်မှာ မဟုတ်ပါဘူး။ ဒါကြောင့် ဝက်ခြံ သမားတွေရဲ့ အမှားတွေကို ဆွေးနွေးလိုက်တာပါ။
ညှစ်၊ ကုတ်၊ ဖဲ့၊ ကိုက်၊ ဆိတ်၊ ဆွ၊ ကလိ
အတော်များများဟာ ဒီအကျင့်ဆိုးကြီးကို ကျူးလွန်မိတတ်ကြပါတယ်။ မျက်နှာပေါ်က ဝက်ခြံ ဖုတွေကို ညှစ်ထုတ်လိုက်ရမှ အာသာပြေသူတွေ အများကြီးပါ။ ကုတ်တာ၊ ကိုင်တာ၊ ခွာ၊ ပွတ် တွေ လည်း လုပ်ကြတာပါပဲ။ အကျိုးဆက်ကတော့ ဝက်ခြံပျောက်သွားပေမဲ့ အချိုင့်၊ အပေါက်နဲ့ အညို အမည်းတွေ စွဲကျန်ခဲ့တာပါ။ လက်မှာရှိတဲ့ ဗက်တီးရီးယားပိုးတွေ ဝက်ခြံထဲ ဝင်သွားပြီး ပြဿနာ ပေးတာကိုး။ တကယ်တော့ မျက်နှာကို လက်နဲ့မထိ မကိုင်ပဲ နေနိုင်ရင် အကောင်းဆုံးပါ။ ခက်တော့ခက် သား ဘာလို့လဲဆိုတော့ လေ့လာမှုတွေအရ လူ တစ်ယောက်ဟာ သူ့မျက်နှာကို တစ်နာရီအတွင်း အကြိမ် ၂၀ လောက် ထိမိ၊ ကိုင်မိတယ်ဆိုပဲ။ လက်တလော ခေတ်စားနေတဲ့ Covid-19 ဗိုင်းရပ်စ် မကူးစက်ရအောင် လက်ဆေးခြင်းနဲ့ မျက်နှာကို လက်နဲ့မထိကြဖို့ တိုက်တွန်းနေတာပါ။ ဝက်ခြံသမား တွေလည်း အဲဒီကျင့်စဉ်ကို လိုက်ကြပါ။
လက်သည်းရှည်ရှည်ထားတဲ့သူတွေမှာ ဒီပြဿနာ ကပိုဆိုးပါတယ်။
#အိပ်ရေးပျက်ခြင်း
လုံလောက်တဲ့ အိပ်စက်မှု မရတဲ့သူတွေဟာ စိတ် ဖိစီးမှု ဝင်တတ်ပါတယ်။ ခက်တာက မြို့ပြလူတန်း စားတွေက အိပ်ရာဝင်နောက်ကျတာ များပါတယ်။ ည ၉ နာရီ၊ ၁၀ နာရီမှာ အိပ်ရာဝင်တဲ့သူ ရှားပါ တယ်။ ဖုန်းတစ်လုံးနဲ့ အချိန်ဖြုံးကြတာပါ။ ဖေ့စ်ဘုတ်၊ ယူကျူ့၊ ဂိန်း စတာတွေက အဖိုးတန်အိပ်ချိန်တွေကို ဖဲ့ယူသွားတာပါ။ ဘောလုံးပွဲတို့၊ ဇာတ်လမ်းတွဲတို့ လည်းပါတာပေါ့။ စိတ်ဖိစီးတော့ ဟော်မုန်းတစ်ချို့ ထွက်လာပြီး အဆီအတ်တွေကို လှုံ့ဆော်တော့တာပါ။ အဆီတွေ ပိုထွက်တော့ ဝက်ခြံတွေပိုဆိုးပေါ့။ တကယ် ဆိုတော့ ညအချိန်မှာ လုံလောက်စွာ အိပ်စက်အနား ယူသင့်ပါတယ်။ Night Sleep ပဲ ဖြစ်သင့်ပါတယ်။ ညစောစော မအိပ်ဘဲ နေ့ခင်းမှာ နေဖင်ထိုးတဲ့အချိန်ထိ အိပ်တတ်တဲ့ Day Sleep ကို ရှောင်ရမှာပါ။ အိပ်ရေး ၀၀အိပ်ရသူတွေဟာ ကိုယ်ခံအားကောင်းတာမို့ Covid- 19 ဗိုင်းရပ်စ် ကူးစက်မှုကို ဟန့်တားရာမှာ အထောက် အကူပြုတယ်လို့ ဆိုပါတယ်။
#ဖုန်းနဲ့သင့်ပါးမကပ်မိပါစေနဲ့
မရှိမဖြစ် ဆဲလ်ဖုန်းတွေကြောင့် ဝက်ခြံပြဿနာ ကို ပိုဆိုးလာသလိုပါပဲ။ စောစောကပြောခဲ့တဲ့ ဖုန်း ဆော့ကစားလို့ အိပ်ရေးပျက်ရတာအပြင် ဖုန်းနဲ့ပါးနဲ့ ထိကပ်မှုကြောင့်လည်း ဝက်ခြံတွေပိုကြွ၊ ပိုရဲလာနိုင် ပါတယ်။ ဖုန်းနဲ့ကြာကြာဖိထားတဲ့ နေရာမှာ အဆီပေါက်တွေ ပိတ်သွားနိုင်လို့ပါ။ Acne mechqnican ဆိုတဲ့ဝက်ခြံပေါ့။ မကြာမကြာ ဖိတဲ့၊ ပွတ်တဲ့ နေရာ မှာ ပေါက်တတ်တဲ့ ဝက်ခြံကို ပြောတာပါ။ နောက် တစ်ကွက်က ဖုန်းရဲ့ မျက်နှာပြင်မှာ ရောဂါပိုးမွှားတွေ အများကြီး ရှိနေတာမို့ပါ။ လေ့လာမှုတစ်ခုမှာတော့ ဘိုထိုင်အိမ်သာမျက်နှာပြင်မှာ ရှိတဲ့ပိုးတွေလောက်ကို များဆိုပဲ။ ဒီပိုးတွေ ဝက်ခြံဖုထဲဝင်သွားပြီး နီရဲရောင် ရမ်းတာတွေ ဖြစ်ပါလေရော။ ဒီတော့ ပါးနဲ့ဖိကပ်ပြီး ဖုန်းမပြောပါနဲ့ Blue tooth တို့၊ Head phone တို့နဲ့ ပြောကြပါ။ ကိုယ်ဖုန်းကိုလည်း မကြာမကြာ Hand Gel နဲ့ သန့်စင်ပေးပေါ့။ ကိုယ်ဝက်ခြံတွေ ပျောက် ချိန်တန်ပါလျက် မပျောက်တာဟာ သင့်ရဲ့ ဖုန်းလည်း တရားခံအဖြစ် ပါနိုင်တာပေါ့။
#ဆံပင်နဲ့ဝက်ခြံ
မျက်နှာကို အိမ်နီးနားချင်း ဆံပင်တွေက တစ်ခါတလေ ဒုက္ခပေးတတ်ပါတယ်။ ဆံပင်မှာ သဘာဝအတိုင်းပါတဲ့ အဆီတွေက အဆီပေါက်ပိတ် စေပြီး ဝက်ခြံပိုထွက်တတ်လို့ပါ။ ဒါအပြင် ဆံပင်အ လှပြုပြင်တဲ့ ဂျယ်၊ ဆီ၊ စပရေး စတာတွေကြောင့် လည်း ဝက်ခြံ ပိုဆိုးတတ်ပါတယ်။ မျက်နှာပေါ်ကို ဆံပင်တွေဝဲချတဲ့အကျင့်ကို ရှောင်ရမှာပါ။ တစ်ချို့ နဖူးပေါ် ဆံမြိတ်ကလေးချထားတော့ နဖူးမှာပဲ ဝက်ခြံ လေးတွေ ပေါက်ပါလေရော။ ဆံပင်ရှည်ထားသူတွေ ကျတော့ ကျောဘက်ဖြန့်ထားရင် ပူးပြီးကျောအပေါ် ပိုင်းမှာ ဝက်ခြံဖုတွေ၊ အပူဖုတွေ ပေါက်တာမျိုး ရှိပါ တယ်။ ဒါကြောင့် ဆံပင်ကို ရှေ့ဖြန့်၊ နောက်ဖြန့်တဲ့ အကျင့်ကို ရှောင်ပြီး သိမ်းထားစေချင်ပါတယ်။
#အလှအပပစ္စည်းတွေ
အလှအပ ပစ္စည်းတွေ အလွန်အကျွံသုံးခဲ့ရင် ရှိပြီး ဝက်ခြံပြဿနာ ပိုဆိုးစေပါတယ်။ နဂိုက မရှိသေးရင် လည်း ဝက်ခြံဖုတွေ ထွက်တာမျိုး ကြုံရတတ်ပါ တယ်။ Cosmetic acne တဲ့၊ အထူးသဖြင့် အဆီဓာတ် များတဲ့ အလှကုန်တွေကို ဝက်ခြံသမားတွေ ရှောင်သင့် ပါတယ်။ တစ်ချို့ကျတော့ ဝက်ခြံကို မိတ်ကပ်ထူထူ နဲ့ဖုံးတော့ ဝက်ခြံပိုဆိုးတာပဲ အဖတ်တင်ပါတယ်။ ပြောရရင် ဝက်ခြံနဲ့မိတ်ကပ်၊ မိတ်ကပ်နဲ့ဝက်ခြံ လည် လိုက်နေတာပါပဲ။ ဒီတော့ ဝက်ခြံသမားတွေ အလှ ပြင်တာကို လျော့ကြဖို့ပါ။
#သွားတိုက်ဆေး၊ ထုံး
ဝက်ခြံဖုတွေကို ဝက်ခြံဆေးလိမ်းရမယ့်အစား သွားတိုက်ဆေး တို့၊ ထုံး တို့၊ တိုင်းရင်းဆေး တို့ ကြတာလည်း မဟာအမှားပါပဲ။ ဝက်ခြံပျောက်တယ် လို့ တစ်စုံတစ်ယောက် ပြောလိုက်ရင် မစဉ်းစား၊ မဆင် ခြင်ဘဲ လက်တည့်စမ်းကြတဲ့ ဆေးနည်းတွေလည်း အများကြီး ရှိပါတယ်။ အထူးသဖြင့် နှင်းခူလိမ်းတဲ့ စတီးရွိုက် လိမ်းဆေးတွေကို ဝက်ခြံမှာ လိမ်းကြတဲ့ အမှားပါ။ စတီးရွိုက်ဆိုတဲ့အတိုင်း ရောင်ရမ်းမှုသက် သာစေတာမို့ လိမ်းခါစမှာတော့ ဟုတ်သလိုလိုပေါ့။ ကြာတော့ ဝက်ခြံတွေ ပိုပေါက်၊ ပိုပြန့်ပြီး ထိန်းမရ ဖြစ်ပါလေရော။ ခက်တာက စတီးရွိုက်ဆိုတာကို အများက နားမလည်နိုင်သေးတာပါ။ အပြောကောင်း လို့သာ လိုက်ပြီးလိမ်းကြတာပါ။ ဒါကြောင့် ကိုယ်မ သိနားမလည်တဲ့ လိမ်းဆေးတွေကို ဝက်ခြံပျောက်လို ဇောနဲ့ သူများညွှန်းတိုင်း မလိမ်းသင့်ပါဘူး။
#ဝက်ခြံအမြန်ပျောက်ဆေး
ဝက်ခြံအမြန်ပျောက်တယ်၊ သက်သာတယ်ဆိုတဲ့ လိမ်းဆေးတွေ၊ မျက်နှာသစ်ဆေးရည်တွေကလည်း ဈေးကွက်ထဲမှာ ပလူပျံနေတာပါပဲ။ ဝက်ခြံပြဿနာ ကြောင့် စိတ်ဖိစီးနေရသူတွေခမျာ အဟုတ်မှတ်ပြီး ဝယ်သုံးကြပါလေရော။ ကြော်ငြာတွေရဲ့ ဖမ်းစားမှုပေါ့။ ၃ ရက်အတွင်း ဒါမှမဟုတ် တစ်ပတ်အတွင်း မြန်မြန် ပျောက်တယ်ဆိုပဲ။ လွန်ခဲ့တဲ့ ၄ နှစ်လောက်က နာမည် ကြီး အလှကုန် ကုမ္ပဏီတစ်ခုက ကျွန်တော်တို့ အရေ ပြားဆရာဝန် (၂၀) လောက်ကို ဟော်တယ်ကြီးတစ်ခု မှာ ဝက်ခြံအကြောင်း ဆွေးနွေးပွဲလုပ်၊ ထမင်းကျွေး ပြီးမှ သူတို့ရဲ့ ဝက်ခြံအတွက် မျက်နှာဆပ်ပြာခရင်မ် ကို မိတ်ဆက်ပါတယ်။ မကြာပါဘူး တီဗီမှာအဲဒီ ပစ္စည်းကို ကြော်ငြာတော့တာပါပဲ။ အရေပြားအထူးကု ဆရာဝန်ကြီးများ ထောက်ခံထားသော ဝက်ခြံမြန်မြန် ပျောက်တဲ့ ဆပ်ပြာခရင်မ်ဆိုပဲ။ လက်တွေ့သုံးကြည့် ကြတဲ့ သူတွေခမျာ တကယ်လည်း ထူးထူးခြားခြား ကောင်းလာတာ မရှိပါဘူး။ ပြောရရင် ကျွန်တော်တို့ အရေပြားဆရာဝန်တွေလည်း အညာခံရ သုံးစွဲသူတွေ လည်း အလိမ်ခံရပေါ့။ ဒီနေ့ဒီအချိန်ထိ ဝက်ခြံကို ရက်တိုတိုနဲ့ အမြန်ပျောက်တဲ့ သောက်ဆေး၊ လိမ်းဆေး၊ မျက်နှာသစ် ခရင်မ်၊ လိုးရှင်း ဘာဆိုဘာမှ မရှိသေး တာမို့ အညွှန်းကောင်းတိုင်း မယုံကြပါနဲ့။
#ဒေါက်တာကျော်ကျော်
(အရေပြားအထူးကု ဆရာဝန်ကြီး)
