Htoo Aye Chan Pharmacy - ထူးအေးချမ်း ဆေးဆိုင်

10/02/2025

#ချောကလက်ပန်းစည်းနှင့်အတူ_ဝေဒနာတွေ_မပေးပါနှင့်

#ချစ်သူများနေ့ဝေဒနာ

အတူတူပျော်ပြီးသွားကြပြီး တစ်ပတ် နှစ်ပတ်လောက်အကြာမှာ
👉 ဆီးသွားရင် ကျဉ်တယ်
👉 သွားရတာ မဝဘူး
👉 ဆီးကျန်သလိုပဲ
👉 ခဏခဏ သွားချင်တယ် ၊ သွားတိုင်းလည်း ဆီးမထွက်ဘူး
👉 ငွေ့ငွေ့လေးဖျားတယ် ချမ်းတုန်တယ် ဆိုတာအထိက ဆီးပိုးဝင်တယ် ဆိုတာဖြစ်နိုင်ပေမယ့်
👉 ပြည်အရောင်လိုလို ၊ အစိမ်းရောင် အဝါရောင်တွေ ထွက်လာတယ်
👉 မွေးလမ်းကြောင်းကနေလည်း အရည်တွေဆင်းတယ်
👉 သွေးဆင်းတယ် ၊ ယားတယ်
👉 အမျိုးသားတွေမှာလည်း ဥ နာတယ် စသဖြင့် ဖြစ်လာခဲ့ရင်တော့
ဝေဒနာတွေ စပါပြီ ။
ခေတ်ကာလက ပုံမှန်နဲ့ မကျေနပ်ကြပဲ အိမ်နောက်ဖေးတံခါးဖွင့်ရတာတွေ တောင်းဆိုလာတတ်ကြတော့
ဝမ်းသွားတဲ့နေရာ
👉 ယားတာ နာတာ ရောင်တာ
👉 အရည်ထွက်တာ
👉 သွေးထွက်တာတွေပါ ဖြစ်လာကြပါတယ်
တချို့ဆို လည်ချောင်းပါနာကြပါတယ် 😥

ပြောရရင် ဒီ ဆီးပူညောင်းကျတို့ ကာလသားရောဂါတို့ ဆိုတာ ဆရာဝန်ပြသပြီး ထိထိရောက်ရောက်ကုသရင် ပျောက်ကင်းနိုင်ပါတယ် ဒါပေမယ့် ဒီရောဂါတွေနဲ့ ကူးစက်ပုံခြင်းတူတဲ့
😥 အသည်းရောင်အသားဝါ Bပိုး C ပိုး၊ HIV စတာတွေကတော့ ကူးပြီ ဖြစ်ပြီ ဆိုရင် ဘဝတလျှောက်လုံး ခံစားသွားကြရမှာပါ။
လောလောဆယ်ချစ်နေတဲ့သူတွေက ရင်းနှီးမှုရဲ့ အဆုံးစွန်ဆုံးအဆင့်ထိတက်လိုကြတဲ့ အခါ
စိတ်ထဲမှာ လူအသစ်လေးဖြစ်လာမှာကိုပဲ စိတ်ပူကြတာမို့ အရေးပေါ်တားဆေးဆိုတာ သောက်ကြ/တိုက်တတ်ကြပေမယ့်
👉 ကိုယ့်ဆီက ရောဂါ သူ့ဆီကူးသွားမှာ
👉 သူ့ဆီက ရောဂါ ကိုယ့်ကူးသွားမှာ ဆိုတာ ကို မတွေးဖြစ်ကြပါဘူး
နှစ်ယောက်လုံး ဆေးစစ်ထားတာမဟုတ်ရင် စိတ်မချရပါဘူး အကာကွယ်မပါပဲ အတူနေရဲတဲ့ အကျင့်ရှိရင် ရှေ့မှာလည်း နေခဲ့ဖူးမယ်လို့ တွေးမိလိုက်ရင်တော့ နည်းနည်းကြောက်ကြမလား မသိဘူး
လူအသစ်လေးရ သွားမှာပဲ မကြောက်ကြပါနဲ့ ရောဂါတွေကလည်း ကြောက်ဖို့ကောင်းပါတယ်
ကိုယ်ကဆရာကြီး Safe ဖြစ်တယ်ဆိုတာ အလကားပါ ဆရာဝန်တွေတောင် တိုင်ပတ်နေတာတွေ တပုံတပင်ကြီးပါ။
ခေတ်ကအရမ်းပြောင်းလဲလာတော့ Virginity ကို ဘယ်လိုထိန်းရမယ်ဆိုပြီး အတင်းအကြပ်ဆုံးမလည်း
😅 သူငယ်ချင်းအိမ်စာသွားကျက်မယ်ဆိုတာတွေ
😅 ကျောင်းကအချိန်ပိုခေါ်တယ်ဆိုတာတွေ
😅 အလုပ်က Overtime ဆင်းရမယ် ဆိုတာတွေက မလွှတ်ပေးလို့မှ မရတာလေနော်
ကျောင်းပေါက်ဝ အလုပ်ပေါက်ဝ ထိ လိုက်ပို့လည်း နောက်ပေါက်က လစ်နေကြတာပဲမို့
1. ကူးစက်ရောဂါတွေ (အသည်းအသားဝါ B ပိုး၊ C ပိုး ၊ ကာလသားရောဂါ၊ HIV) မကူးဖို့ အရေးကြီးကြောင်း
2. မလိုချင်သေးတဲ့အချိန် ပဋိသန္ဓေ ရမသွားဖို့က အရေးကြီးကြောင်း
3. (Sugar relationship) ဘယ်လောက်ချစ်ချစ် မုန့်ဖိုးပေးပြီး မချစ်သင့်ကြောင်း တော့သေသေချာချာ နားလည်ထားသင့်ပါတယ်

(Photo Credit; Pixabay)
တစ်ရက်စာမဟုတ်ပဲ တစ်သက်စာပျော်နိုင်ကြပါစေ
ကျန်းမာရေးဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ
Dr. ဘုန်းစည်သူလွင်

(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား
လာပါလိမ့်မယ် 💕💕💕 )

06/02/2025

30/01/2025

01/01/2025

ဆေးစပ်ပေးပါပြောလာတိုင်း ပိုးသတ်ဆေးတွေ NSAIDS တွေမလ်ုရင် မပေးဖြစ်တာများပါတယ် ဆေးကိုမလိုအပ်ဘဲသောက်ခဲ့ရင် ကျောက်ကပ်ဘဲအလုပ်ပိုလုပ်ရကြောင်းလည်း ရှင်းပြပေးဖြစ်တယ် 🤍

#ဆင်ခြေဖုံးတွေမှာလက်လုပ်လက်စားများတဲ့နေရာတွေမှာ_စပ်ဆေးကတော့_မကင်းနိုင်ကြပါ
#ဆရာဝန်ပြဖို့အဆင်မပြေသူများ_ချို့တဲ့သူများအတွက်_စပ်ဆေးကဆက်ရှိနေအုန်းမှာပါ

#စပ်ဆေး

စပ်ဆေး အန္တရာယ်အကြောင်းရေးတဲ့ဆောင်းပါးအောက်က Comment လေးတစ်ခုပါ ၊ ဟုတ်ပါတယ် ဆရာဝန်ပြသဖို့လက်လှမ်းမမှီတဲ့သူတွေရှိပါတယ် ဒါပေမယ့် အဲ့လိုလက်လှမ်းမမှီတာနဲ့ တစုံတခုဖြစ်ရင် စပ်ဆေးသောက်ရမှာ ဆိုတာကတော့ မဟုတ်ပါဘူး

စပ်ဆေးထဲ ထည့်လေ့ရှိတဲ့ #အရောင်ကျဆေး_Steroid နဲ့ #အကိုက်ခဲပျောက်ဆေး_NSAIDs တွေရဲ့ အန္တရာယ်ကို
👉 စပ်ဆေးဆေးရောင်းတဲ့သူတွေ နဲ့
👉 ဆရာဝန်လက်လှမ်းမမှီတဲ့မိဘပြည်သူတွေ သေသေချာချာသိရှိလာအောင် ကျွန်တော်တို့က ကြိုးစားပြီး အသိပညာပေးနေပါတယ်

* အဲ့ဆေးမသောက်တော့ ကိုက်ရင်ခဲရင် ဘာသောက်ရမှာလဲ ဆိုတာကိုလည်း ဖြေရှင်းပေးပါမယ်
* မကိုက်မခဲရအောင် နေထိုင်မှုတွေပြင်ဖို့ကိုလည်း မျှဝေပေးပါမယ်

ဒါပေမယ့် လိုအပ်တာက အဲ့လိုမျှဝေပေးတာကို ဖတ်ကြဖို့ပါ
စာရှည်တယ်မဖတ်ဘူးဆိုတာမျိုးပေါ့ 🥹😰
___________
ပထမဆုံး
စပ်ဆေးဆိုတာမှာ အရောင်ကျဆေး Steroid , အကိုက်ခဲပျောက်ဆေး NSAIDs , Cevit , အစာအိမ်ဆေး Antacid ဆိုတာတွေပါတတ်ပါတယ်။
ကိုက်ခဲဖျားနာ ပျောက်ပါတယ်

🚨 🚨 🚨 ဘာအန္တရာယ်ရှိလဲ 🚨 🚨 🚨
အရောင်ကျဆေး Steroid တွေဟာ သွေးတိုး၊ ဆီးချို၊ အရိုးပါးအရိုးပွ၊ အဝလွန်၊ အစာအိမ်ရောဂါတွေဖြစ်လာမှာဖြစ်ပြီး
အကိုက်ခဲပျောက်ဆေး NSAIDs တွေဟာ အစာအိမ်ရောင် ၊ အူ/အစာအိမ်အနာ၊ အစာအိမ်သွေးကြောပေါက်၊ ကျောက်ကပ်ပျက်တာတွေဖြစ်လာတတ်ပါတယ် (ဘာရောဂါမှ မယ်မယ်ရရ မရှိပဲ အသက် ၂၀ ကျော်နဲ့ ကျောက်ကပ်ဆေးနေရတာတွေ အတွေ့များလာပါတယ်)
____________
#အဲ့ဒါမသောက်လို့ဘာသောက်ရမှာလဲ❓

🤒 ကိုက်ခဲဖျားနာအတွက် Paracetamol 500mg ပါတဲ့ ဆေးကို တစ်နေ့ကို (၃) ကြိမ် ၈ နာရီခြားပြီးသောက်လို့ရပါတယ်
(၁၀ လုံးကို ၅၀၀ ပဲရှိလို့ တစ်လုံး ၅၀ လောက်ပဲကျသင့်ပါတယ်)
အကိုက်ခဲပျောက်ဆေး NSAIDs လောက် ကိုက်ခဲတာမသက်သာပေမယ့် အထိုက်အလျောက်သက်သာပါတယ်
🗣️ ချောင်းဆိုးတာအတွက် က Dextromethorphan နဲ့ Chlorphenamine ရောထားတဲ့ ဆေးကို တစ်နေ့ကို (၃) ကြိမ် ၈ နာရီခြားပြီးသောက်လို့ရပါတယ်။ တစ်ကဒ်မှ ၁၀၀ ဝန်းကျင်ရှိတဲ့ brand တွေရှိလို့ တစ်လုံး ၁၀ ကျပ်ပဲ ကျပါတယ်။
🤧 နှာစေး၊နှာမွှန်၊နှာရည်ယိုတာအတွက် Burmeton , Cetrizine စတဲ့ ဆေးတွေရှိပါတယ် ။ Burmeton ဆို တစ်နေ့ ၃ ကြိမ်/၄ ကြိမ် သောက်လို့ရပြီး Cetrizine က တစ်နေ့တစ်ကြိမ်ပဲသောက်ဖို့လိုပါတယ် (Original Cetrizine က စျေးများပေမယ့် စျေးသက်သာတဲ့ Brand တွေရှိပါတယ်)
🤢 ဝမ်းပျက်ဝမ်းလျှောဖြစ်ရင် စျေးကြီးတဲ့ Probiotic တွေသောက်နေစရာမလိုပါဘူး - ဝမ်းသွားသလောက် ဓာတ်ဆားရည်လိုက်သောက်ရုံပါပဲ ဓာတ်ဆားတစ်ထုပ် ၅၀၀ ဝန်းကျင်ရှိပါတယ်
စျေးများလို့ဓာတ်ဆားမသောက်ချင်ဘူးဆိုလဲ
ရေတစ်လီတာ ကို အိမ်မှာရှိတဲ့ သကြားလက်ဖက်ရည်ဇွန်း (၈) ဇွန်း ၊ ဆား လက်ဖက်ရည်ဇွန်း တစ်ဝက် ထည့်ပြီး သေချာပျော်အောင်ဖျော်သောက် လို့ရပါတယ်။

နေမကောင်းတဲ့အခါ အဓိက အရေးကြီးတာက
1. အစာအာဟာရဝင်အောင်စားရပါမယ်
အစာကြေမလွယ်လို့ ဆန်ပြုတ်၊ စွပ်ပြုတ်သောက်လည်း ရပါတယ် (အရေးကြီးတာက အစာမဖြတ်ဖို့ပါ) (အသားဓာတ်ကအရေးကြီးပါတယ် ငါးစားလည်းရသလို ပဲစားလည်းရပါတယ်)

2. သေသေချာချာနားရပါမယ် - အလုပ်ကတစ်နေ့လုပ်မှတစ်နေ့စားမို့ ခွင့်မရဘူးဆိုလည်း အိမ်ရောက်တဲ့အခါ သေသေချာချာနားပါ ၊ သေသေချာချာအိပ်ပါ
3. ရေအရည်ဟာ အရေးကြီးလှပါတယ်
ရေကတော့ ကြိုက်သလောက်သောက်လို့ ရနိုင်တာမို့ တစ်နေ့ (၃) လီတာ အနည်းဆုံးသောက်ပါ
4. အရက်သောက်ရင်ကိုက်ခဲတာသက်သာသလိုရှိနိုင်ပေမယ့် ရေဓာတ်ခမ်းခြောက်မှုကိုဖြစ်စေသလို ကိုယ်တွင်းအင်္ဂါတွေကို အားနည်းစေလို့ ဖျားနာတာကို ကြာရှည်စေပါတယ်
အရက်မသောက်ပါနဲ့ ၊ ဆေးလိပ်မသောက်ပါနဲ့
____________
#အလုပ်ကြောင့်_ကိုက်ခဲနာကျင်တာတွေလျော့ပါးရအောင်

- ရေများများသောက်ပါ (ရေဓာတ်ခမ်းခြောက်ခြင်းက ကြွက်သားအဆစ်မြစ်တွေနာကျင်စေပါတယ်)
- ချွေးထွက်များလို့ ရေနဲ့ဓာတ်ဆားဓာတ် (Calcium, Potassium) စတာတွေ ဆုံးရှုံးတဲ့အခါ ကိုက်ခဲတာ ၊ ကြွက်သားတွေအားမရှိတာ နုံးတာတွေဖြစ်လာတတ်လို့ ချွေးထွက်များလွန်းရင် အပေါ်မှာပြောထားတဲ့ ဓာတ်ဆားဖျော်နည်းအတိုင်းဖျော်သောက်ပါ
- ဖီးကြမ်းငှက်ပျော်သီးစားပါ
- ကြွက်သားတွေအသုံးပြုတာများပြီး တင်းမာနေတာတွေကို ပြန်မလျှော့ပေးရင် ကိုက်ခဲတာတွေဖြစ်တတ်လို့ အိမ်ရောက်လို့ ရေမချိုးခင် အကြောလျှေော့လေ့ကျင့်ခန်းလေး ၁၀-၁၅ မိနစ်လောက်လုပ်ပါ (ဘာလုပ်ရမလဲ မသိရင် ကျွန်တော့ Page မှာ အကြောလျှော့လေ့ကျင့်ခန်းဆိုတာကြည့်ပြီး လိုက်လုပ်လို့ရပါတယ်)
- ကျွန်တော်တို့ နိုင်ငံက ဟင်းသီးဟင်းရွက်က အသားထက်စျေးသက်သာပါတယ် များများစားပါ နေ့တိုင်းစားပါ (အားဆေးဆိုတဲ့ Multivitamins တွေသောက်စရာမလိုဘူးပေါ့)
- အရက် ဆေးလိပ် ကွမ်း စားနေ/သောက်နေရင် ဖြတ်ဖို့ကြိုးစားပါ (ကျန်းမာရေး/လူမှုရေး/စီးပွါးရေး တခုအတွက်မှ မကောင်းပါဘူး)

ဒီလို နည်းလမ်းလေးတွေ နေ့စဉ်နေ့တိုင်း လိုက်နာပြီး နေထိုင်မှုပုံစံပြင်လိုက်ရင် မကြာခဏဖျားနာတော့မှာ မဟုတ်သလို
ဖျားနာခဲ့လျှင်လည်း စပ်ဆေးတွေအလွယ်မသောက်ပဲ ညွှန်းပြထားတဲ့ ဆေးတွေကြိုးစားကြည့်ပါ
မသက်သာပဲ အတော်ဆိုးလာခဲ့ရင် နီးစပ်ရာပြည်သူ့ဆေးရုံပြင်ပလူနာဌာနကိုပြသလိုက်ပါ (တချို့ဆေးတွေဆို အခမဲ့တောင်ပေးတတ်ပါတယ်)

စာရှည်ပေမယ့် အကျိုးရမယ်ထင်ပါတယ် Tik Tok 5 ခုလောက်ကြည့်မယ့် အချိန်လေးပဲရှိတာပါ
ပြောင်းလဲကြည့်ကြပါ 💪💪💪

(Photo credit; YangonMediaGroup )
ကျန်းမာရေးဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ
💕Happy New Year to you all 💕
Dr. ဘုန်းစည်သူလွင်
11:30 pm/31.12.24
(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား လာပါလိမ့်မယ် 💕💕💕 )

29/08/2024

20/08/2024

16/05/2024

#ဆီးသွားတာများတယ်_ညတွေလည်းထ_ထ_သွားရတယ်
#စားနေတာပဲကို_ဆာနေတယ်_လူကလည်း_နုံးနေတယ်

#ဆီးချိုရောဂါ_စဖြစ်နေပြီတဲ့_ဘယ်လိုလုပ်ရမလဲ ⁉️

- ဘာတွေစားရမလဲ ⁉️ 🤔 ဆီးချိုဆန်စားရမလား
- ဘာတွေရှောင်ရမလဲ ⁉️ 🤔 အမဲသားတို့ နွားနို့တို့ရှောင်ရမှာလား
- ဘာဆေးတွေသောက်ရမလဲ ⁉️ 🤔 Metformin က ကျောက်ကပ်ပျက်တယ် ဆိုတာဟုတ်လား

#ဆီးချို

၁။ မနက်စောစော အစာမစားခင် Fasting Blood Sugar > 126 mg% (7 mmol/L) ကျော်မယ်
( + )
၂။ အစာစားပြီး (၂) နာရီ မှာ 2 Hour post prandial > 200 mg% (11.1 mmol/L) ကျော်မယ် ဆိုရင်
၃။(၃) လ အတွင်း သွေးချိုထိန်း သိမ်းမှု အခြေအနေ HbA1C > 6.5 % ကျော်မယ် ဆိုရင်
ဆီးချိုရှိတယ်လို့ သတ်မှတ်ပါတယ်။
___________
#ဆီးချိုရောဂါ_ဘာလို့ဖြစ်တာလဲ ⁉️

ကျွန်တော်တို့ အစာစားလို့ အူလမ်းကြောင်းက အစာခြေပြီးရင် သွေးထဲကို အာဟာရဓာတ် Glucose တွေစုပ်ယူလိုက်ပါတယ်
အစာစားပြီး သွေးထဲမှာ Glucose တွေများလာရင် (မုန့်ချိအိတ်) လို့ခေါ်တဲ့ အင်္ဂါက Insulin ဆိုတာကိုထုတ်ပါတယ်

ခန္ဓာကိုယ်က Cells တွေထဲကို Glucose က ဒီတိုင်းဝင်လို့မရပါဘူး၊ Insulin နဲ့တူတူလာမှ Cells တွေက ပေးဝင်ပါတယ်။

မြင်သာအောင်ပြောရရင်
👉 ကလေးတစ်ယောက် ဗိုက်ဆာနေရင် အမေက ကျွေးမှ စားရသလိုပေါ့
👉 ထမင်းပန်းကန်ကြီး မြင်နေရလည်း အမေ မကျွေးရင် မစားရသလို

သွေးထဲမှာ Glucose တွေ များနေလည်း Insulin မရှိရင် Cells တွေက ငတ်နေလည်း Glucose ကိုသုံးလို့မရပါဘူး

#ဆီးချိုရောဂါ ဆိုတာလွယ်လွယ်ပြောရရင်

1. Insulin အထွက်နည်းလာလို့ (Insulin Deficiency)
2. နည်းနည်းပဲ ထွက်တဲ့ Insulin ကို ခန္ဓာကိုယ်က မသုံးနိုင်လို့ ပါ (Insulin Resistance)

***အစာ စားပြီး သွေးထဲမှာ Glucoses တွေများနေပေမယ့် ခန္ဓာကိုယ် က သုံးနိုင်ဖို့ကူပေးမယ့် Insulin က မရှိတော့
သွေးထဲမှာ များနေတဲ့ Glucose ကို ခန္ဓာကိုယ် က မသုံးနိုင်ပဲ လူက ဆာပြီးရင်း ဆာ ဖြစ်နေပါတယ်
စားလေ Glucoses များလေ ဒါပေမယ့် ခန္ဓာကိုယ် က မသုံးနိုင်ပါဘူး***
___________
#ဘယ်လိုဖြေရှင်းကြမလဲ ⁉️

1. ခန္ဓာကိုယ် ပျက်စီးမှုမဖြစ်ရအောင် Glucose ဖြစ်စေတဲ့ အစာတွေလျှော့စားတာတွေပါ။
2. နည်းနည်းပဲ ထွက်တဲ့ Insulin ရဲ့ စကားကို နားမထောင်တာကို နားထောင်အောင်လုပ်တာ (Insulin resistance ဖြစ်နေတာကို)
3. အထွက်နည်းလာတဲ့ Insulin ကို ပိုထုတ်အောင် Pancreas ကို အတင်းခိုင်းတာ
___________
သွေးထဲမှာ Glucose က မရှိတာမဟုတ်ဘူး ၊ #မသုံးနိုင်တာပါ။
အဲ့ဒါကို ဆာလို့ ဆိုပြီး ထပ်ခါ ထပ်ခါ စားနေခြင်းဟာ သွေးတွင်း Glucose တရားလွန်တက်ပြီး ဆီးချိုဆိပ်တက်ပြီး အသက်အန္တရာယ်ကြီးပါတယ် (သေတတ်ပါတယ်)
#ဆီးချိုဆန်စားရမလား ⁉️

👉 ကဆီဓာတ်နည်းတဲ့ အရသာမရှိတဲ့ ရေရှည်လည်းစားနိုင်မှာ မဟုတ်တဲ့ ဆီးချိုဆန် ကို စားဖို့ ကျွန်တော်ဆို #အားမပေးပါဘူး။

✔️ #စားနေကြ_ဆန်ပဲ စားပါ။ #ပမာဏ_လျှော့စားပါ
လျှော့စားရင် ဗိုက်ပိုဆာ မှာပေါ့
ဟုတ်ပါတယ် *ဗိုက်မဆာရအောင် ဗိုက်လည်းပြည့်ပြီး ခန္ဓာကိုယ်တစ်ခုလုံးရဲ့ ကျန်းမာရေးသာမက အူမကြီးရဲ့ ကျန်းမာရေးပါကောင်းစေတဲ့ (Vitamins တွေအစုံပါဝင်တဲ့) ဟင်းသီးဟင်းရွက်တွေ ကြိုက်သလောက် တဝ စားပါ။

✔️ အသား ကြိုက်နှစ်သက်ရာစားပါ (အဆီနည်းတဲ့အသားစားပါ)
ဝက်သားကအဆီများလွန်းတော့ ရှောင်သင့်ပါတယ်။
- အမဲသား၊ ဆိတ်သား၊ ကြက်သား စားလို့ရပါတယ် (အသားစားလို့ ဆီးချို အရမ်းမတက်ပါဘူး)
- ငါးကတော့ စားဖို့ အသင့်တော်ဆုံးပါ (ဆီးချိုရောဂါရှင်တွေက သွေးတွင်းအဆီတက်တဲ့အတွက် Omega-3 ပါဝင်တဲ့ ငါးစားခြင်းက သွေးတွင်းအဆီ ကျစေပါတယ်)

✔️ အဆီကတော့ လျှော့စားရပါမယ်။ (ဆီးချိုသမားတွေ Keto Diet စားခြင်းဟာ Diabetes Ketoacidosis ဆိုတဲ့ ဆီးချိုဆိပ်တက်တာဖြစ်စေပြီး သေတတ်ပါတယ်)
- Low fat diary product (အဆီလျှော့/ထုတ်ထားတဲ့ နို့/နို့ထွက်ပစ္စည်း စားလို့ရပါတယ်)
- ဟင်းချက်ရာမှာ အသုံးသင့်ဆုံးဆီက ပဲဆီ ပဲဖြစ်ပါတယ်
- နေကြာဆီ တွေအသုံးများနေကြပါတယ် နေကြာဆီမှာ Omega-6 ပါတာများပါတယ်
- Omega-3 ကကောင်းတယ်ဆိုပေမယ့် Omega ပါတိုင်းကောင်းတာတော့မဟုတ်ပါဘူး
- Omega-6 ဟာ Inflammation-ရောင်ရမ်းမှုတွေ အားပေးလို့ စျေးကြီးပေးပြီး မစားသင့်ဘူးလို့ ယူဆပါတယ်။

✔️ အပေါ်မှာတော့ ပြောပြီးသားပါ၊
(အားဆေး အားဆေး ဆိုပြီး စျေးကြီးပေးသောက်နေကြတဲ့ 👉 Vitamins တွေအစုံပါဝင်တဲ့) ဟင်းသီးဟင်းရွက်တွေ ကြိုက်သလောက် တဝ စားပါ။
ကြော်စားရင် ဆီ ပါတော့ ၊ ကြော်စားတာထက်စာရင်
ဟင်းချိုလုပ် သောက်သောက်၊ ပြုတ်စားစား၊ ရေစင်အောင်ဆေးပြီး အစိမ်းပဲ စားစား ကြိုက်သလောက်စားပါ။
အရွက်စားရင် ဝမ်းမချုပ်တဲ့အတွက် အူမကြီးကင်ဆာအပါအဝင် အူမကြီးရောဂါတွေကို ကာကွယ်ပေးပါတယ်။

✔️ ပဲအမျိုးမျိုး စားလို့ရပါတယ် (အသားဓာတ်ရတာပေါ့)
✔️ အသီးအမျိုးမျိုး စားလို့ရပါတယ် (ချိုတဲ့ အသီးတွေကတော့ တဝ မစားပါနဲ့ ၊ အနည်းငယ်စားရင်ရပါတယ်)

❌ သွေးတွင်း Glucose တွေ ရုတ်တရက်မြင့်တက်စေတဲ့
- အချိုရည်၊ Energy drink၊ Bubble Tea၊ Coffee စတာတွေရှောင်ရပါမယ်
- Cake မုန့် အချိုတွေရှောင်ရပါမယ်
- အာလူးကြော်၊ ဘာဂါ၊ စတာတွေလည်းရှောင်ရပါမယ်
- ဆေးလိပ် လုံးဝ ဖြတ်ရပါမယ် (ဆီးချိုဝေဒနာရှင်ဟာ သွေးတိုး၊ နှလုံးရောဂါ အဖြစ်လွယ်လို့ သူများသောက်တာတောင် အနံ့ခံလို့မရပါဘူး)
- အရက်မသောက်ရပါဘူး

✴️ ကြိုက်တဲ့ အစားတွေ တရားလွန်စားတာ မလုပ်ရပါဘူး
✳️ စားချိန်သောက်ချိန်မှန်ရပါမယ်
✴️ ဆီးချို တက်နေလို့ဆိုပြီး ဒီတစ်နပ် မစားတော့ဘူး ဆိုတာ မလုပ်ရပါဘူး (ဆေးသောက်နေတဲ့ လူနာတွေမှာ ပိုပြီး အရေးကြီးပါတယ်)
___________
2. နည်းနည်းပဲ ထွက်တဲ့ Insulin ရဲ့ စကားကို နားမထောင်တာကို နားထောင်အောင်လုပ်တာ

ခန္ဓာကိုယ်လှုပ်ရှားမှု နည်းတဲ့အတွက် Cells တွေက Insulin resistance ဖြစ်နေတတ်ပါတယ်။

ကိုယ်လက်လှုပ်ရှားမှု လေ့ကျင့်ခန်းပြုလုပ်ခြင်းဟာ နည်းနည်းပဲ ထွက်တဲ့ Insulin ကို ခန္ဓာကိုယ်က အသုံးပြုနိုင်တဲ့အတွက်

အပြင်းအထန်မဟုတ်တဲ့ #လေ့ကျင့်ခန်းလုပ်ပါ။
" #လမ်းလျှောက်ပါ "
- တစ်နေ့ နာရီဝက်လောက်တော့ လျှောက်သင့်ပါတယ်
- ခြေတစ်လှမ်းကဋေတစ်သန်း နှုန်းနဲ့တော့ မလုပ်ပါနဲ့ သွက်သွက်လျှောက်ပါ (လမ်းစလျှောက်ပြီး ၁၀ မိနစ်လောက်ဆို ချွေးထွက်လာမှ အဆင်ပြေပါတယ်)
- လမ်းလျှောက်ပြီး မောလို့ဆိုပြီး အချိုရည် (လုံးဝ) လုံးဝ မသောက်ရပါဘူး
- ရေသောက်ပါ (ကြိုက်သလောက်သောက်ပါ)
"အန်တီက ဒူးနာလို့ လေ့ကျင့်ခန်း မလုပ်နိုင်ပါဘူးသားရယ်"
အန်တီ ဝ ဝ ချစ်စရာကြီးတွေ အကြောင်းပြနေကြ စကားပါ
ဒူးနာတာက ဝ လို့ပါ ၊ ဝ တာက မလှုပ်ရှားပဲ အစားချည်းစားနေလို့ပါ။
အဲ့ဒါကို ဒူးနာလို့ မလှုပ်ရှားရင် ပို ဝပြီး ပိုနာပါမယ်။
လမ်းမလျှောက်နိုင်ရင် လုပ်လို့ရတဲ့ နေရာလှုပ်ပါ။ လက်လှုပ်လို့ရတဲ့ လေ့ကျင့်ခန်းတွေ You Tube မှာရှာကြည့်ပြီး လိုက်လုပ်လို့ရပါတယ်။
__________
3. အထွက်နည်းလာတဲ့ Insulin ကို ပိုထုတ်အောင် Pancreas ကို အတင်းခိုင်းတာ

အဲ့ဒါကတော့ ဆေးသောက်တာပါပဲ။

OHA ဆိုတဲ့ ဆီးချိုဆေးတွေဟာ ဆီးချိုကျအောင် Pancreas ကနေ Insulin ကို အတင်းညှစ်ထုတ်ခိုင်းပါတယ်။

အပေါ်မှာ ပြောထားတဲ့
- အစားဆင်ခြင်တာ
- လေ့ကျင့်ခန်းလုပ်တာ တွေမလုပ်ပဲ

ဆေးပဲ သောက်တာဟာ ခန္ဓာကိုယ်ကို/ကျောက်ကပ် ကို ဆီးချိုရောဂါ နဲ့ တူတူ ကူပြီး #ဖျက်ဆီးပေးတာပါပဲ။

​လုပ်ကိုလုပ်ရမှာက Dietary Control - အစားဆင်ခြင်ရပါမယ်၊ Exercise လေ့ကျင့်ခန်း လုပ်ရပါမယ်။
နောက်တစ်ဆင့်က
ဆရာဝန်ညွှန်တဲ့ ဆေး မှန်မှန်သောက်ရပါမယ်။

#ဆေးဆိုလို့ ပြောပြချင်တာက ဆီးချိုဆေးတွေထဲမှာ အကောင်းတကာ့အကောင်းဆုံးဆေးဟာ
" " ပါ
👉 Metformin ထက် ကောင်းတဲ့ ဆေး မရှိပါဘူး
👉 Metformin ဟာ #ကျောက်ကပ်_မပျက်စေပါဘူး
👉 အဲ့လိုကောင်းလွန်းတဲ့ ဆေး Metformin ကို လူနာရဲ့ ကျောက်ကပ်မကောင်းတဲ့အခါမှာ တော့ ပေးလို့မရပါဘူး။

***သေသေချာချာ မှတ်ထားကြပါ
❇️ Metformin က ကျောက်ကပ်မပျက်ပါဘူး
❇️ ကျောက်ကပ်မကောင်းတဲ့ လူတွေမှ Metformin မသောက်ရတာပါ။

အကျိုးရှိကြမယ်လို့ ယုံကြည်ပါတယ်
(photo credit; diabetesuk)
(Original post; Sep,2021 👉 https://www.facebook.com/104993831383029/posts/386539676561775/?d=n)

ကျန်းမာရေးဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ

Dr. ဘုန်းစည်သူလွင်

(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား လာပါလိမ့်မယ် 💕💕💕 )

23/04/2024

#ဆရာ_ဒီရက်ထဲလူတွေအရမ်းပူပြီးတော့_နေ့ပင်ပန်းညအိပ်မရဖြစ်နေကြတာများပါတယ်
#အလုပ်လုပ်ရတာလဲမလန်းဆန်းစိတ်မတက်ကြွတော့ပါဘူး
#ဘယ်လိုတွေနေထိုင်စားသောက်ရမလဲ ❓
#အားဆေးအဖြစ်ဘာသောက်ရမလဲဆရာ ❓

ရာသီဥတုအပူချိန်မှာ အလွန်မြင့်မားနေပြီး
မီးကလည်း မမှန်သည့်အတွက် အပူနဲ့ဆိုင်တဲ့ ရောဂါတွေခံစားနေကြရပါတယ်

- အာခေါင်ခြောက်ခြင်း
- ပင်ပန်းနွမ်းနယ်ခြင်း
- ခေါင်းမူးခြင်း
- ခေါင်းကိုက်ခြင်း
- မိတ်ဖုအယားဖုထွက်ခြင်း
- ချွေးမထွက်နိုင်တော့ခြင်း (ချွေးခြောက်ခြင်း)
- ကိုယ့်အပူချိန်မြင့်တက်ခြင်း
- ကြွက်တက်ခြင်း
- သတိလစ်ခြင်းမှသည်
- အသက်သေဆုံးသည်အထိဖြစ်နိုင်ပါသည်

ကိုယ်တွင်းက အပူတွေကျဖို့က နည်းလမ်း (၂) ခုပဲရှိပါတယ်

1. ပတ်ဝန်းကျင်အပူချိန်ကို အေးအောင်လုပ်တာ
2. ချွေးထွက်ပြီးအပူတွေထုတ်တာ
__________
1. #ပတ်ဝန်းကျင်အပူချိန်ကို_အေးအောင်လုပ်တာ
- အေးတဲ့နေရာရှာနေကြပေါ့ (အပင်ရိပ် သစ်ရိပ်ဝါးရိပ်ပေါ့) အရိပ်ရှိတဲ့နေရာမှာပဲ နေသင့်တာပါ
- အိမ်ထဲမှာနေလည်း အေးတဲ့နေရာရှာနေကြပါ (ကျွန်တော်တို့ရန်ကုန်က အုတ်တိုက်ကျဉ်းကျဉ်းတွေမို့ အိမ်ထဲနေလည်း အပူချိိန်က မနည်းမနေပါပဲ)
- ပန်ကာ တို့ Aircon တို့ ဆိုတာကလည်း မီးလာမှ (မီးအားပြည့်မှ သုံးရတာမလား) အခု သူတို့တောင်ပူကျွတ်နေလို့ ယပ်ပြန်ခပ်ပေးနေရတယ်မလား 😅😁

2. #ချွေးထွက်ပြီးအပူတွေထုတ်တာ
ပြင်ပ အပူချိန်မြင့်တဲ့အချိန် ကိုယ်တွင်းအပူတွေထုတ်ဖို့နည်းလမ်းကတော့ ချွေးထွက်တာပါ - ချွေးအငွေ့ပျံတာနဲ့အတူအပူတွေစုပ်သွားတာပေါ့
ချွေးထွက်ဖို့က ခန္ဓာကိုယ်ထဲ ရေအလုံအလောက်ရှိရပါတယ် ရေအလုံအလောက်ရှိဖို့
- ရေ အရည်များများသောက်ပါ ချွေးထွက်များလွန်းက ဓာတ်ဆားရည်ပါသောက်ပါ
- ရေဘယ်လောက်သောက်ရမှာလဲ ကိုယ်ချွေးဘယ်လောက်ထွက်နေတာလဲ ဆိုတာမှ မှန်းမရတာ ဆီးတစ်နေ့ တစ်လီတာအနည်းဆုံး သွားအောင်သောက်ပါ (နှစ်နာရီတစ်ခါလောက်မှ ဆီးမသွားရင် ရေအသားကုန်သာလိုက်သောက်ပါတော့)
- အရည်ဖြစ်ပေမယ့် (အရက် ဘီယာ ကော်ဖီ လက်ဖက်ရည်ကတော့ ရှောင်သင့်ပါတယ်)
____________
* နေအပူတိုက်ရိုက်ထိခြင်းကိုရှောင်ပါ အရိပ်ထဲပဲနေပါ
* မဖြစ်မနေအပြင်ထွက်ရလျှင်
- ထီး ဦးထုပ်သေချာဆောင်းပါ
- ပွပွချောင်ချောင် ချည်ထည်များကိုသာ ဝတ်ဆင်ပါ
- အရိပ်ထဲ နားနားပြီး သွားပါ
* နေပူထဲမှ ပြန်လာပြီး ချက်ချင်းရေချိုးခြင်း
* မနက် ၁၀ နာရီမှ ညနေ ၅ နာရီအတွင်း နေရောင်အောက်တွင် ရေမချိုးပါနှင့်
* ပူအိုက်လို့ဆိုပြီး ရေစိုဝတ်နဲ့နေတာ ၊ ရေစိုအဝတ်ခင်းအိပ်တာ ၊ ရေချိုးပြီး ရေခြောက်အောင်မသုတ်တာတွေ ရှောင်ရပါမယ်
_____________
လူက မူးရိပ်ရိပ်ဖြစ်လာပြီ ၊အာခေါင်တွေခြောက်ပြီး နေရတာမကောင်းဖြစ်လာလျှင် ရေနှင့်ဓာတ်ဆား အမြန်ဆုံးသောက်ပါ (အများကြီးသောက်ပါ)
အရေပြားက ပူကျွတ်နေပြီး ချွေးမထွက်တော့လျှင်
ကယောင်ကတမ်းဖြစ်လာလျှင် ပတ်ဝန်းကျင်ကိုအကူညီတောင်းပြီး ဆေးရုံအမြန်ပို့ပါ
လူနာက အသိရှိလျှင် ရေနှင့်ဓာတ်ဆား အမြန်ဆုံးတိုက်ပါ (အများကြီးတိုက်ပါ)
(အိမ်မှာ ဆေးရုံသွားဖို့စောင့်နေစဉ်/ဆေးရုံသွားတဲ့လမ်းမှာ) ခန္ဓာကိုယ်ကို ရေပတ်တိုက်ပေးပါ
__________
သက်ကြီးရွယ်အိုနှင့်ကလေးသူငယ်များ
ကိုယ်ဝန်ဆောင်နှင့်နို့တိုက်မိခင်များ
နာတာရှည်ရောဂါခံစားနေရသူများ အထူးသတိပြုကြပါ
ရေကိုအတိုင်းအတာနှင့်သောက်နေရတဲ့ နှလုံးအားနည်းရောဂါ၊ ကျောက်ကပ်အားနည်းရောဂါ၊ အသည်းရောဂါ ရှင်များအနေနဲ့ တစုံတရာထူးခြားတာနဲ့ မိမိတို့၏ ဆရာဝန်များနှင့် ဆက်သွယ်တိုင်ပင်ကြပါ

နောက်မေးခွန်းတစ်ခုအတွက်က အားဆေးရယ်လို့ ထူးပြီးသောက်စရာမလိုပါဘူး
ပူလွန်းလို့ အစာမစားနိုင်ကြရင်တော့ ကိုယ်နဲ့နီးစပ်ရာ ဝယ်လို့လွယ်တဲ့ စျေးသင့်တဲ့ Multivitamin &Mineral တစ်မျိုးမျိုးသောက်နိုင်ပါတယ်။

(Photo credit; Meteoblue)
အထွေထွေဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ
Dr. ဘုန်းစည်သူလွင်
09:30 pm/23.04.2024
(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွားလာပါ
လိမ့်မယ် 💕💕💕 )

31/03/2024

#အပူလှိုင်းဖြတ်မှာမို့_သတိပေးချက်တွေကြားနေရပါပြီ
#အပူလေသင်တုန်းဖြတ်ခြင်း_အပူရှပ်ခြင်း

( #အပူလေသင်တုန်းဖြတ်ခြင်း)

#ရာသီဥတုပူပြင်းလာတာနဲ့အမျှ
သက်ကြီးရွယ်အိုများအတွက် အိမ်တွင်းမှာတောင် သင့်တင့်မျှတသော အပူချိန် မဖန်တီးနိုင်ကြသောအခါ
#အတွေ့အရမ်းများလာပါတယ်

👉 #ခန္ဓာကိုယ်ကပူကျွတ်နေတာပဲ
👉 #ချွေးလည်းမထွက်တော့ဘူး
👉 #အသက်ရှူတွေမြန်_သွေးပေါင်တွေကျပြီး_သတိလစ်သွားတယ်

Stroke လို့ခေါ်ကြလို့ လေဖြတ်တာလို (ကိုယ်တစ်ခြမ်းသေသွားတာ၊မျက်နှာရွဲ့သွားတာမျိုးဖြစ်ပြီး နာတာရှည်ရောဂါသည်အနေနဲ့ နေသွားရတာ) မဟုတ်ပါဘူး ဖြစ်ပြီဆိုရင် အရေးပေါ်ချက်ချင်းကုသမှုမခံယူလျှင် သေသွားနိုင်တာပါ

- ကိုယ်ခန္ဓာအပူချိန် ၁၀၄ Drgree Fahrenheit ကျော်ပူနေပြီး
- အသက်ရှူတွေမြန်၊ နှလုံးခုန်တွေမြန်၊ သွေးပေါင်တွေထိုးကျပြီး
- ကယောင်ကတမ်းတွေဖြစ်၊ သတိလစ်ရာကနေ၊ အသက်ဆုံးတဲ့အထိဖြစ်ရတာပါ။

ရာသီဥတုပူလွန်းအားကြီးလို့အဖြစ်များလာရတာပါ။
👉 ရာသီဥတုကပူ
👉 ရင်ထဲကအပူတွေကများ
👉 နေပူကြီးထဲတန်းတွေစည်
👉 ဆီး သွားရမှာစိုးပြီး ရေကမသောက်

အကြောင်းရင်းတွေစုပြီး အသက်ပါပေးရတတ်ပါတယ်။

လူကနုံးချိ၊ ပင်ပန်းနွမ်းနယ်နေပြီး၊ အာခေါင်တွေခြောက်၊ ခေါင်းတွေကိုက်ပြီး၊ ကြွက်တွေတက် ဆီးနည်းသွားတဲ့
Heat Stroke လောက်မဆိုးသေးတဲ့
- Heat cramp
- Heat Exhausation
စတာတွေတော့ အခုခံစားနေကြရလောက်ပါတယ်။

ခံစားနေကြရတယ် ဆိုရင်တော့ သတိကြီးကြီးထားကြပါ 👉 Heat Stroke ဖြစ်လာနိုင်ပါတယ်

👉👉👉
#ဘာလို့ဖြစ်ရတာလဲ ⁉️

ကျွန်တော်တို့ သွေးနွေးသတ္တဝါ (Warm blooded Animal) တွေက ခန္ဓာကိုယ်အပူချိန်တသတ်မှတ်တည်းဖြစ်ဖို့
အပူထုတ်လုပ်ခြင်း (Heat Gain) နှင့် အပူဆုံးရှုံးခြင်း (Heat Loss) က မျှချေမှာရှိရပါတယ်။

အပူထုတ်လုပ်ခြင်း (Heat Gain)
- ဇီဝဖြစ်စဉ်တွေကနေ ဘေးထွက်အနေနဲ့ အပူစွမ်းအင်ကိုရပါတယ်
- ကြွက်သားတွေလှုပ်ရှားခြင်း ကနေလည်း အပူရသလို
- ပတ်ဝန်းကျင်က ကနေလည်း ရရှိပါတယ်

အပူဆုံးရှုံးခြင်း (Heat Loss)
- ရေငွေ့ပြန်ခြင်း၊ ချွေးထွက်ခြင်း (အရေပြားမှစွန့်ထုတ်ခြင်း)
- အသက်ရှူထုတ်ခြင်း
- ဆီး၊ ဝမ်းစွန့်ခြင်း အစရှိသည်တို့က နေ့ စွန့်ထုတ်ပါတယ်

အဲ့ဒီ 😰 အပူထုတ်လုပ်ခြင်း (Heat Gain) နှင့် အပူဆုံးရှုံးခြင်း (Heat Loss) က မျှချေမှာ မရှိတော့လျှင်

ဖျားနာခြင်းကစလို့၊ Heat Cramp, Heat exhaustation မှ Heat Stroke အထိဖြစ်ပါတယ်။

ဖြစ်မှကုသရတာက ခက်ခဲပါတယ်
- ပန်ကာလေ/လေအေးပေးစက်တွေနဲ့ အေးနေအောင်လုပ်ရပါတယ်
- ရေပတ်တွေရွှဲရွှဲစိုအောင်တိုက်ရပြီး
- ရေဓာတ်တွေသွေးကြောမှအမြန်ပြန်သွင်းရပါတယ်

အဲ့ဒါကြောင့် မဖြစ်ရအောင်ပဲ #ကြိုတင်ကာကွယ် ကြရပါမယ်

- အပူရှောင်ပါ (အရိပ်ရသော၊ အေးမြသောနေရာများတွင်သာနေပါ)
- ရေများများသောက်ပါ (ရေကိုပုလင်းဖြင့် မှတ်မှတ်သားသား ဒီနေ့ (၃) ပုလင်းသောက်မယ် ဆိုပြီးသောက်ပါ၊ ရေဆာမှ၊အာခေါင်ခြောက်မှ မသောက်ပါနှင့်)
- ပြင်းထန်သောကိုယ်လက်လှုပ်ရှားမှုရှောင်ပါ (လက်လုပ်လက်စား အလုပ်သမားများအနေနဲ့မရှောင်လွှဲနိုင်သော်လည်း 👉 နေ့လည်ပိုင်း Gym သွားပြီး ပြင်းထန်သောလှုပ်ရှားမှုများ မလုပ်ကြပါနဲ့)

မရှောင်လွှဲနိုင်လို့အပြင်ထွက်ရလျှင်

- အင်္ကျီပွပွချောင်ချောင် ချည်ထည်များသာဝတ်ပါ၊
- အနက်ရောင်မဝတ်ပါနှင့် (ဝတ်ရဲကြမည်လည်း မထင်ပါ 😅)
- ထီးဆောင်းပါ
- အရိပ်ရသောနေရာများမှသာသွားပါ
- ရေများများပို၍သောက်ပါ (လမ်းတွင်ဆီးသွားချင်မည်ကိုမစိုးရိမ်ကြပါနှင့် ရေမသောက်ကဆီးမသွားနိုင်ပဲ ကျောက်ကပ်ပျက်တတ်ပါတယ်)
- လှုပ်ရှားမှုနည်းအောင်တတ်နိုင်သမျှ နေပါ

နေ့အချိန် အကာမရှိသောနေရာတွင်အလုပ်လုပ်ရသောလုပ်သားများအနေဖြင့်

- အင်္ကျီပွပွချောင်ချောင် ချည်ထည်များသာဝတ်ပါ၊
- အနက်ရောင်မဝတ်ပါနှင့်
- ရေအများကြီးသောက်ပါ (ဓာတ်ဆားရည်သောက်ပါ)
- အဆိုင်းခွဲပြီး နားချိန်ယူ၍အလုပ်လုပ်ပါ (အလုပ်ကြီးကြပ်သူများမှ သေသေချာချာစီစဉ်ပေးပါ) နားချိန်တွင် အရိပ်ကောင်းကောင်းရ၍အေးမြသောနေရာတွင်နားပါ
- ဆေးလိပ်မသောက်ပါနှင့်၊ အရက်မသောက်ပါနှင့်

👉👉👉
​😢 အရေပြားကြီးပူလောင်နေပြီး ချွေးမထွက်တော့လျှင်
😢 အာခေါင်တွေခြောက်ပြီး တံထွေးမထွက်တော့လျှင်
😢 မလှုပ်ရှားချင် နွမ်းနယ် နုံးချိကြွက်တက်လာလျှင်
😢 ခေါင်းအရမ်းကိုက်၊ မျက်စိပြာ သတိလစ်ချင်သလိုဖြစ်လာလျှင်
😢 အသက်ရှူကြပ်ပြီး မောလာလျှင်

ရေများများသောက်ပြီး နီးစပ်ရာ ဘေးမှလူများကိုအကူညီတောင်းပြီး နီးစပ်ရာဆေးရုံ၊ ဆေးခန်းသို့ အမြန်သွားကြပါ။

(Original post; May,2021 👉 https://www.facebook.com/104993831383029/posts/247223740493370/?d=n)
ကျန်းမာရေးဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ

Dr. ဘုန်းစည်သူလွင်

(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား လာပါလိမ့်မယ် 💕💕💕 )

30/03/2024

#သွေးတိုးရှိနေတာကြာပါပြီ
#ဆေးတနေ့တစ်လုံးနေ့တိုင်းသောက်ပေမယ့်_နည်းနည်းလေးအစားမှားတာနဲ့သွေးထတိုးပါတယ်
#ဆေးပြောင်းသောက်ရမလားဒါမှမဟုတ်ဆေးပိုသောက်သင့်လား ❓


(သွေးတိုးရောဂါနှင့်မိမိဖာသာဆေးသောက်ခြင်း)

စာအရှည်ကြီးမဖတ်ချင်သူတွေအတွက် လိုရင်းပဲပြောရရင်
***သွေးတိုးရောဂါ ရှိရင် #ဆရာဝန်ပြသပြီး_ကုသမှုခံယူရပါတယ်
မတည့်တာတွေက စားပြီး ဆေးသောက်ရမှာမဟုတ်ပါဘူး #လုံးဝ_ရှောင်ရမှာပါ။

အကြောင်းရင်းက ဘာလို့လဲသိချင်ရင်တော့ ဆက်ဖတ်ကြည့်ပါဗျာ 😃😃😃

သွေးတိုး ဆီးချို အဝလွန်တာတွေဖြစ်ရတဲ့ အကြောင်းရင်းက
- အဆီ ၊ အငန် ၊ အချို အစားများတာ
- ကိုယ်လက်လှုပ်ရှားမှုမရှိတာ
- ကိုယ်အလေးချိန်များတာ
- အိပ်ချိန် စားချိန် မမှန်တာတွေ
- အရက် ဆေးလိပ်သောက်တာ
- စိတ်ဖိစီးမှု များတာ စတဲ့ အနေအထိုင်အစားအသောက် ပုံစံမမှန်မှုကြောင့် အဖြစ်များပါတယ်
🍜 မုန့်ဟင်းခါး အုန်းနို့ခေါက်ဆွဲစားရင် သွေးတက်တတ်တယ် - အဲ့နေ့ #ဆေးပိုသောက်ရမလား ❓
မြင်သာအောင်ပြောရရင်
- လက်ကို တူနဲ့ ထုရင် နာလို့ အကိုက်ခဲပျောက်ဆေး သောက်ရမလား 🤔
- တူ နဲ့ မထုပဲနေရမလား 🧐 ဆိုသလိုပေါ့
မတည့်တာက မစားပဲရှောင်ရမှာပါ။

သွေးတိုးရောဂါက ပြောပြီးခဲ့သလို “အနေအထိုင်အစားအသောက်ပုံစံ မမှန်မှုကြောင့်” အဖြစ်များ တယ် ၊ မျိုးရိုးလိုက်တယ် ဆိုပေမယ့်
အသက်ငယ်ငယ် နဲ့ သွေးတိုးဖြစ်တဲ့ လူတွေကို “Young Hypertension “ လို့ခေါ်ပါတယ်
တချို့မှာ Secondary Hypertension - အကြောင်းရင်းတစ်ခုခုကြောင့် (တခြားရောဂါတစ်ခုခု ကြောင့် သွေးပေါင်တက်နေတာဖြစ်တတ်လို့ - ဆရာဝန်နဲ့ သေသေချာချာ ပြသပြီး)
👉 ရောဂါအခံကို ရှာဖွေကုသရပါမယ်

Enervon C လို အားဆေးတွေ
Paracetamol လို အကိုက်ခဲပျောက်ဆေးတွေ
နှာစေး၊ ချောင်းဆိုးပျောက်ဆေး စတာတွေက မိမိသဘောနဲ့ ဆေးဆိုင်က အလွယ်တကူ ဝယ်သောက်လို့ ရပေမယ့်
*****
* သွေးပေါင်ကျဆေး
* ဆီးချိုကျဆေး
* ပိုးသတ်ဆေး စတာတွေ ကို မိမိ စိတ်ထင်သလို အလွယ်တကူ ဝယ်သောက်တာမျိုး
Ethic - ကျင့်ဝတ်မလိုက်နာတဲ့ တချို့ စပ်ဆေးရောင်းတဲ့ ဆိုင်တွေ က ဝယ်သောက်တာမျိုးက ရေတိုမှာ ကုန်ကျစားရိတ်သက်သာတယ် ဆိုပေမယ့်
- ကျောက်ကပ်ပျက်တာ
- နှလုံးထိခိုက်တာ
- တကယ်ရောဂါကြီးဖြစ်ရင် ပိုးသတ်ဆေးမတိုးတော့တာ တွေဖြစ်တတ်လို့ မလုပ်သင့်ပါဘူးဗျာ
သွေးတိုးရောဂါမှာ
သွေးပေါင်ချိန်လိုက်ပြီး စက်မှာပေါ်လာတဲ့ နံပါတ်အရ
👉 ဒီလောက်ဆို Calcium Channel Blocker တိုက်မယ်
👉 ဒီလောက်ဆို ACEI တိုက်မယ်
👉 နည်းနည်းများရင် ၂-၃ မျိုး ပေါင်းထားတဲ့ဆေး တိုက်မယ်ဆိုတာ လုံးဝ လုံးဝ #မဟုတ်ပါဘူး
*****
- Hypertension grading (သွေးပေါင်ဘယ်လောက်တောင်တက်နေပြီလဲ)
Target organ Damage လို့ခေါ်တဲ့ သွေးတိုးကြောင့်ခန္ဓာကိုယ်အစိတ်အပိုင်းတွေပျက်စီးနေပြီလား
* နှလုံးကြီးနေပြီလား ❓
* ကျောက်ကပ်ထိနေပြီလား❓
* မျက်လုံးထဲက အမြင်လွှာ (Retina) ထိခိုက်နေပြီလား❓
* လေဖြတ်/လေဖြန်းဖူးလား ❓
- Hypertension with Diabetes ( သွေးတိုး ဆီးချိုပေါင်းဖြစ်နေတာလား)❓
- Hypertension with IHD (သွေးတိုး နှလုံးသွေးကြောကျဉ်းရောဂါပေါင်းဖြစ်နေတာလား)❓
- Hypertension with stroke (လေဖြတ်သွားပြီလား)❓
- Hypertension with renal failure (သွေးတိုးကြောင့် ကျောက်ကပ်ပါပျက်သွားပြီလား)❓
စသဖြင့် သွေးတိုးနဲ့ တခြားရောဂါတစ်ခုနဲ့တွဲတဲ့အခါ
သွေးတိုး နဲ့ တခြားရောဂါ နှစ်ခုတွဲတဲ့အခါ ဆိုတဲ့ အခြေအနေတွေ အများကြီးရှိပါတယ် အများကြီးစဉ်းစားရပါတယ်
အဲ့ဒါကြောင့် သွေးတိုးရှိတာခြင်းတူပေမယ့် သောက်ရတဲ့ဆေးတွေ #မတူကြတာပါ
Risk factors ဆိုတာတွေလည်း ကြည့်ရပါတယ်ဗျ
* အသက်အရွယ် ၊ ယောက်ျား/မိန်းမ
* မိဘမျိုးရိုး
* Metabolic syndrome လိုမျိုး
- အဝလွန်တယ်
- Waist circumference ကြီးတယ် (ဗိုက်ရွှဲ ခါးတုတ်တယ်)
- သွေးတွင်းအဆီများတယ် (အသည်းအဆီဖုံးရောဂါရှိတယ်)
- အကြိုဆီးချို (Impair glucose tolerance)
- 10 years CVD risk ဆိုတာတွေလည်းတွက်ရပါတယ် (ဆေးကုရတာက ရှုပ်ထွေးလှပါတယ်)
သွေးတိုးတာနဲ့ဒါသောက်ဆိုတာမျိုး က စပ်ဆေးရောင်းတဲ့သူပဲလုပ်နိုင်တာပါဗျာ။
သွေးတိုးရောဂါမဖြစ်ချင်ဘူး/ဖြစ်နေပြီထပ်မဆိုးချင်ဘူးဆိုရင်
* Lifestyle modification အစားအသောက်အနေအထိုင်ဆင်ခြင်ရပါမယ်ဗျာ (မှာနေကြအရာတွေပါပဲ)
*****
- အဝ လွန်နေရင် ကိုယ်အလေးချိန်ကို ကျန်းမာသော နည်းလမ်းတွေသုံးပြီး လျှော့ပါ
(https://www.facebook.com/104993831383029/posts/108040834411662/)
- အရက်မသောက်ပါနှင့်
- ဆေးလိပ်သောက်တာဟာ ကင်ဆာတိုင်းကိုဖြစ်စေလို့ ရှောင်ရပါမယ်။
- ဆီးချိုရောဂါ၊ Metabolic syndrome ၊ အဝလွန်ခြင်း ၊ Obstructive sleep apnoea ၊ သွေးတွင်းအဆီများခြင်း (Dyslipidaemia) စတဲ့ရောဂါတွေကိုလည်း သေသေချာချာ ကြပ်ကြပ်မတ်မတ် ကုသမှုခံယူရပါမယ်
အဓိက ကတော့ #အစားအသောက်ပေါ့
- ကဆီဓာတ် (Carbohydrate) လျှော့စားရမှာပါ (ထမင်းအဓိက စားတတ်တဲ့/ကြိုက်တဲ့ ကျွန်တော်တို့အတွက် မလွယ်ဘူးဆိုပေမယ့် လျှော့စားရပါမယ်)
- သွေးတွင်း Glucose ရုတ်တရက်တက်ပြီး Insulin ကမောက်ကမ ဖြစ်စေနိုင်တဲ့ အချိုမုန့်တွေနဲ့ အချိုရည်ကတော့ လုံးဝကို ရှောင်ရမှာပါ
- အချိုကြိုက်တာကို ဘယ်လိုလုပ်ရမလဲ အချိုမုန့်တွေနဲ့ အချိုရည် ကော ရှောင်ရရင် 😀 အသီးတွေစားပါ (အသားအရေလည်းကောင်း အဆိပ်အတောက်တွေလည်းစင်တာပေါ့)
- ဟင်းသီးဟင်းရွက် အများကြီးစားပါ (ကျွန်တော်တို့ နိုင်ငံအတွက်ကတော့ သေသေချာချာဆေးပြီးမှ စားကြပါ) ကျန်းမာချင်လို့ ဟင်းသီးဟင်းရွက် စားကာမှ ပိုသတ်ဆေးမိပြီး ကြွသွားမှာစိုးလို့ပါ (လူယုတ်မာ is everywhere 😅)
- အသားက ကဆီဓာတ်လောက်မဆိုးပေမယ့် ဝက်သားစားတဲ့လူထက် ငါးစားတဲ့ သူက အများကြီးပိုပြီး ကျန်းမာတာပေါ့ (ပင်လယ်စာ စားပေးပါ) ပင်လယ်စာဆိုလို့ ငါးပိ၊ငါးခြောက်တွေ အများကြီးစားရင်တော့ သွေးတိုးရောဂါရပါလိမ့်မယ်
- အဆီကတော့ ပဲဆီ သုံးတာအကောင်းဆုံးပေါ့ (သံလွင်ဆီက ပိုကောင်းတယ် ဆိုပေမယ့် သူ့စျေးကဝယ်မှ မစားနိုင်တာ 😅) ကိုယ့်ဝင်ငွေအရ စားအုံးဆီပဲစားနိုင်တယ် ဆိုလဲ နည်းနည်းပဲသုံးပေါ့ (တစ်ခါသုံးပြီးသားဆီတော့ လုံးဝ ပြန်မသုံးကြပါနဲ့ Trans fat တွေက တော်တော်ကြောက်ဖို့ကောင်းလို့ပါ)
- Intermittent fasting ဆိုတဲ့ နည်းလမ်းကတော့ လုပ်နိုင်ရင် ကောင်းတယ် ဆိုတဲ့ သုတေသနတွေ အများကြီးရှိပါတယ် ၊ တကယ်လည်း ကိုယ်အလေးချိန်ကျသလို (Insulin resistance ကျသွား တဲ့အတွက်)ကျန်းမာရေးအတွက်လည်း ကောင်းပါတယ်
(ဒါပေမယ့် ရေရှည်လုပ်နိုင်မလုပ်နိုင်ဆိုတာရယ်၊ လုပ်ငန်းခွင်မှာ ဗိုက်ဆာနေပြီး အဆင်မပြေဖြစ်နေမှာရယ်ကို ချိန်ကြပါ )
- Keto diet ကတော့ ကျွန်တော် (ကျွန်တော့ Opinion ပါ) အားမပေးပါဘူး ( ခေတ်အရမ်းစားနေပေမယ့် Diet တစ်ခုမှာ Carbohydrate လျှော့တာမှန်ပေမယ့် အဆီ Potion များများစားခိုင်းတာ မဖြစ်သင့်ပါဘူး)
- အကောင်းဆုံးကတော့ ကောက်ရိုးမီး မဟုတ်ပဲ လေ့ကျင့်ခန်းပုံမှန်လုပ်ပါ (ဒူးနာလို့ ဟိုနားနာလို့ဒီနားနာလို့ ဘာမှမလုပ်ဖြစ်ဘူးဆိုတဲ့ သူတွေလည်း မနာတဲ့နေရာတွေကို လေ့ကျင့်ခန်းလုပ်ပေါ့)
- Workout ထဲမှာ မလုပ်ရမယ့် Workout ကတော့ ပါးစပ် Workout ပါပဲ 😁 (တခြားဘယ်နေရာမှ မလှုပ်ရှားပဲ မိုးလင်းမိုးချုပ် ပါးစပ်ပဲလှုပ်နေတာလေ တကျွတ်ကျွတ်နဲ့စားနေတာပေါ့)
- အတင်းပြောရင်တောင် Mood ဝင်လာလို့ မျက်နှာမဲ့ရွဲ့ပြီး ကိုယ်ဟန်လက်ဟန်တွေပါလာရင် လေ့ကျင့်ခန်းလုပ်သလိုဖြစ်သေးတယ်လေ (စတာနော်)
- စိတ်ဖိစီးမှုလျှော့ (သူများကို အကောင်းမြင်ရမှာ 😀၊ သံသယစိတ် လျှော့၊ ဣဿာမစ္ဆရိယ လျှော့ရမှာပေါ့)

***အရေးကြီးတာက
- သွေးပေါင်မှန်မှန်ချိိန်ရပါမယ်
အဲ့တော့မှ
- ဆေးသောက်နေတာ Control ရလား/မရလား
- ဆေးညှိဖို့လို/မလို သိနိုင်မှာပါ
(Photo credit; Healio )
ကျန်းမာရေးဗဟုသုတ တိုးပြီး
သက်ရှည်ကျန်းမာ စိတ်ချမ်းသာကြပါစေ

Dr. ဘုန်းစည်သူလွင်

(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား လာပါလိမ့်မယ် 💕💕💕 )

28/03/2024

#ဆီးချိုရောဂါနှစ်မျိုးရှိတယ်ဆိုတာသိချင်ပါတယ်
#အကြိုဆီးချိုရောဂါ_ဆိုတာဘာပါလဲ ❓



ဆီးချိုရောဂါကို နားလည်ဖို့ Insulin ဆိုတဲ့ ဟော်မုန်းအကြောင်းသိရပါတယ်
1. ကျွန်တော်တို့ အစာတွေစားသောက်လိုက်တဲ့အခါ အစာအိမ်နှင့်အူလမ်းကြောင်းက ချေဖျက်လိုက်တဲ့ အာဟာရတွေက သွေးထဲကိုရောက်သွားပါတယ်။
2. သွေးတွင်း အာဟာရ (Glucose တွေပေါ့) တွေ ရောက်တာ နဲ့ မုန့်ချိုအိတ် (Pancreas) က Insulin ဆိုတဲ့ ဟော်မုန်းထုတ်ပါတယ်
3. ဦးနှောက်ကလွဲရင် ကျွန်တော်တိုခန္ဓာကိုယ်အစိတ်အပိုင်းတွေက အာဟာရ (Glucose )တွေ ကိုသုံးဖို့ Insulin လိုပါတယ်
4. Insulin က Glucose တွေကို Cells တွေဆီလိုက်ပို့ပေးပါတယ်
Insulin က တံခါးလာမခေါက်ရင် Cells တွေက Glucose ကို ပေးမဝင်ပါဘူး
အဲ့ဒါကြောင့် Insulin ချို့တဲ့လာတဲ့အခါ အစားစားလိုက်လို့ သွေးတွင်းများလာတဲ့ Glucose တွေကို အိမ်တိုင်းစေ့ လိုက်မပို့ပေးနိုင်လို့ Cells တွေက Glucose မသုံးရတော့သလို
သွေးတွင်းမှာ Cells တွေ ***မသုံးနိုင်လို့ Glucose တွေ ပိုနေပါရော
(ဒီနေရာမှာ သေသေချာချာ သိဖို့က cells တွေက အသုံးမလိုတာ မဟုတ်ပါဘူး
Insulin မရှိလို့ မသုံးနိုင်ကြတာပါ)
ဒီအထိသဘောပေါက်ရင်
Insulin အလုံအလောက်မရှိရင်/ချို့တဲ့လာရင် ဆီးချိုဖြစ်ပါတယ်။
အသက်ငယ်ငယ်လေးနဲ့ မျိုရိုးကြောင့် Insulin မထုတ်နိုင်လို့ ဆီးချိုဖြစ်လာတာကို
Type I Diabetes Mellitus (Insulin Dependent DM) လို့ခေါ်ပါတယ်။ (( ပထမ ဆီးချို တစ်မျိုးပေါ့ ))
____________
အချိုတွေ ၊ အစားတွေ အများကြီးစားတယ် - သွေးတွင်း Glucose တွေ ဝုန်းခနဲ တက်သွားတယ်
👉 မုန့်ချိုအိတ်က Insulin တွေ အများကြီးထုတ်လိုက်ရတယ်
သိပ်မကြာဘူး ထပ်စားတယ်
👉 မုန့်ချိုအိတ်က Insulin တွေ ထပ်ထုတ်ရတယ်
ထပ်စားတယ်
👉 Insulin ထပ်ထပ် ထုတ်ရတယ်
အဲ့လိုနှစ်ပေါင်းများစွာကြာလာတဲ့ အခါ မုန်ချိုအိတ်က ပင်ပန်းပြီး အလုပ်မလုပ်နိုင်တော့ပါဘူး - Insulin မထုတ်နိုင်တော့ပါဘူး => Insulin ချို့တဲ့ပြီပေါ့
အဲ့ဒါအပြင်
အချိုတွေ ၊ အစားတွေ အများကြီးစားတယ် - လူကြီးက ဝ ဝ လာတယ် (အဝလွန်လာတယ်ပေါ့)
လူကြီးက ဝ လာပြီး အဆီတွေများလာသလို Cells တိုင်းမှာလည်း အဆီတွေအများကြီးစုလာပါတယ်
Cells တွေကလည်း ဝ တုတ်နေပြီပေါ့ (အိမ်ထဲမှာ အဆီတွေသိုလှောင်ထားတယ်လေ)
အဲ့အချိန်မှာ Insulin က Glucose ကို ခေါ်လာပြီး တံခါးလာခေါက်တဲ့အခါ Cells က သူ့မှာ အဆီတွေများနေတော့ Insulin တံခါးခေါက်တာကို #အဖက်မလုပ်တော့ပါဘူး
ဆိုလိုတာက Insulin ရှိနေပါရဲ့နဲ့ Cells တွေက တံခါးဖွင့်မပေးတာပါ (ငါတို့ ဝ နေပြီ Weight လျှော့မယ်ပေါ့ 😅)
အဲ့ဒါကို Insulin Resistance ဖြစ်တယ်လို့ခေါ်ပါတယ်
Insulin ထုတ်နိုင်နေသေးပေမယ့် Cells တွေက အရေးမလုပ်တော့တာပါ။
အဲ့တော့ သွေးတွင်းသကြားဓာတ်က ပုံမှန်မဟုတ်တော့ပါဘူး - များလာပါပြီ
သွေးတွင်းသကြားဓာတ်ပုံမှန်ထက်များလာပေမယ့် Insulin က ထွက်နေသေးတော့ ဆီးချိုရောဂါအဆင့်ကို မရောက်သေးဘူးပေါ့။
အဲ့ဒီအခြေအနေကို #အကြိုဆီးချို (Prediabetes) လို့ခေါ်ပါတယ်
- အစားတွေ တရားလွန်မစားဘူး
- လေ့ကျင့်ခန်းလုပ်မယ် ဆိုရင် Cells တွေမှာ ရှိတဲ့ အဆီတွေကျ သွားမှာဖြစ်လို့
အဲ့အချိန် Cells တွေက Insulin ကို ပြန်အရေးလုပ်ပါတယ်။
Insulin Resistance ဖြစ်နေတာကနေ ပြန်ကောင်းသွားပေါ့ 👉 အဲ့ကနေ ပုံမှန်လူအတိုင်ပြန်ဖြစ်နိုင်ပါတယ်
🥲 အဲ့လိုမဟုတ်ပဲ Insulin Resistance ဖြစ်နေတာကို
🥲 အစားတွေစွတ်စားနေဆဲ
🥲 လေ့ကျင့်ခန်းမလုပ် အိပ်လိုက် ထိုင်လိုက် ရုပ်ရှင်ကြည့်လိုက် စားလိုက် ဆက်ပြီးနေကြတဲ့အခါ
အပေါ်မှာပြောထားသလို မုန့်ချိုအိတ်က ပင်ပန်းပြီး Insulin ထုတ်တာ နည်းနည်းလာပါပြီ။

လေ့ကျင့်ခန်းမလုပ် မလှုပ်ရှားလို့ Insulin Resistance ဖြစ်တာအပြင်
Insulin ပါ ချို့တဲ့လာတဲ့အခါ ဆီးချို က တဖြည်းဖြည်းတက်လာပြီး နောက်ဆုံး ဆီးချိုရောဂါအဆင့်ကို ရောက်သွားရပါတော့တယ်
အဲ့လို အစားအသောက် သောင်းကြမ်း + လှုပ်ရှားမှုမရှိ + အရက်သောက် + အဝလွန်ရာကနေ 👉 အကြိုဆီးချို
အဲ့ကနေ ဆက်ပြီး မဆင်ခြင်လို့ ဖြစ်လာတဲ့ ဆီးချိုက
Type -2 Diabetes Mellitus ( Non-Insulin Dependent DM) ပါ။

ဒီအထိနားလည်ရင်
1. Type 1 ဆီးချို
2. Type 2 ဆီးချို အပြင်
3. အကြိုဆီးချို (Prediabetes) ဆိုတာ ရှိတယ်ဆိုတာ သိကြမယ်ထင်ပါတယ်။

* လူကောင်းက အစာမစားမီ(fasting) 110 အောက်
အစာစားပြီး ၂ နာရီ 180 အောက်ရှိရပါမယ်
* ဆီးချိုကတော့
အစာမစားမီ(fasting) 126 အထက်
အစာစားပြီး ၂ နာရီ 200 အထက် ဆို ရောဂါရှိပြီလို့ သတ်မှတ်ပါတယ်
* အစာမစားမီ(fasting) 110 - 126 ကြား
အစာစားပြီး ၂ နာရီ 180 - 200 ကြား ဆို (အကြိုဆီးချို) ၁၀ နှစ်အတွင်း ဆီးချိုရောဂါ ဖြစ်လာတော့မယ်လို့ သတ်မှတ်ပါတယ်
__________
ဆီးချိုက နောက်တစ်မျိုးရှိပါသေးတယ်
ကိုယ်ဝန်ဆောင်ချိန်မှာ ဟော်မုန်းအပြောင်းအလဲကြောင့် ဆီးချိုဖြစ်ရင် - Gestational DM (ကိုယ်ဝန်ဆောင်ဆီးချို) လို့သတ်မှတ်ပါတယ်
ကလေးမွေးပြီးရင် ပုံမှန်ပြန်ဖြစ်သွားကြပါတယ်။

ဆိုတော့ကာ ဆီးချိုရောဂါဆိုရင်
1. Type 1 ဆီးချို
2. Type 2 ဆီးချို အပြင်
3. အကြိုဆီးချို (Prediabetes)
4. Gestational DM (ကိုယ်ဝန်ဆောင်ဆီးချို) ဆိုပြီး အကြမ်းအားဖြင့် (၄) မျိုးရှိတယ် ဆိုတာသိကြမယ်လို့ မျှော်လင့်ပါတယ်
ဆီးချိုရောဂါမဖြစ်ရအောင်/ဖြစ်နေပြီ ဆိုးမသွားရအောင် ဆေးကုသမှုခံယူတာအပြင် ဘာ​တွေလုပ်လို့ရမလဲက ဒီဆောင်းပါးလေးထပ်ဖတ်ကြည့်ကြပါ

https://www.facebook.com/104993831383029/posts/386539676561775/?d=n

(Photo credit; Narayana Health )
ကျန်းမာရေးဗဟုသုတ တိုးပြီး
သက်ရှည်ကျန်းမာ စိတ်ချမ်းသာကြပါစေ

Dr. ဘုန်းစည်သူလွင်

(ကျန်းမာရေးဆောင်းပါးများ နေ့စဉ်တင်ပေးနေသောကြောင့် #ကျွန်တော့_Pageကို_Like လုပ်ထားခြင်းဖြင့် ကျန်းမာရေးဗဟုသုတတိုးပွား လာပါလိမ့်မယ် 💕💕💕 )