Tyron 's Talking Therapy

Tyron 's Talking Therapy Coaching /Guidance & Counseling /
Psychosocial Supports

#အမှိုက်ကားသတိထားရှောင် ဒီနေ့ "အမှိုက်ကားတစ်စီး လာနေပြီလား"ဝေးဝေးကရှောင်နေကြပါ။” ဆိုတာကို Food for Thought 1143 အဖြစ်မျ...
23/01/2026

#အမှိုက်ကားသတိထားရှောင်

ဒီနေ့ "အမှိုက်ကားတစ်စီး လာနေပြီလား"ဝေးဝေးကရှောင်နေကြပါ။” ဆိုတာကို Food for Thought 1143 အဖြစ်မျှဝေလိုက်ပါတယ်။

လမ်းပေါ်မှာ အမှိုက်ကားတစ်စီး မောင်းလာတာ တွေ့ရင် လူတွေ ဘာလုပ်ကြသလဲ..။ အနံ့အသက် မကောင်းဘူး၊ ညစ်ပတ်တယ်ဆိုတာ သိတဲ့အတွက် နှာခေါင်းပိတ်ပြီး ဝေးဝေးက ရှောင်သွားကြတယ်။ အမှိုက်ကားနဲ့ ယှဉ်ပြီး လမ်းလျှောက်မသွားကြဘူး။

အမှိုက်ကားပေါ်မှာ အမှိုက်တွေ ပြည့်နေပြီဆိုရင် တစ်နေရာရာမှာ စွန့်ပစ်ဖို့ လိုအပ်လာတာ သဘာဝ ပါပဲ။

လူမှု ပတ်ဝန်းကျင်က လူတချို့ဟာလည်း ဒီ “အမှိုက်ကား”တွေလိုပါပဲ။
သူတို့ရဲ့ စိတ်ထဲမှာ လောဘကြီးလွန်းမှုတွေ၊ ဒေါသတွေ၊ မကျေနပ်ချက်တွေ၊ စိတ်ပျက်စရာတွေ၊ အဆိုးမြင်စိတ်တွေဆိုတဲ့ “အမှိုက်” တွေ ပြည့်နှက်နေတတ်တယ်။ အဲဒီအမှိုက်တွေ လျှံကျလာတဲ့အခါ တစ်ယောက်ယောက်ဆီကို စွန့်ပစ်ဖို့ ကြိုးစားကြတယ်။

တစ်ခါတလေ ကိုယ်က ဘာမှအမှားမလုပ်ဘဲနဲ့ ကိုယ့်ကို လာအော်မယ်။ ရန်ရှာမယ်။ မဲမယ်။ ဒါဟာ ကိုယ်ညံ့လို့၊ ကိုယ်မှားလို့ မဟုတ်ပါဘူး။ သူတို့ရဲ့ အမှိုက်ကား “အမှိုက်လျှံ” နေလို့ ကိုယ့်ဆီ လာပုံချတာ ဖြစ်နိုင်ပါတယ်။

ဒီသဘောတရားကို နားမလည်တဲ့လူတွေက “ငါ့ကို ဘာလို့ ဒီလိုပြောရတာလဲ” ဆိုပြီး ပြန်ဒေါသ ထွက်မယ်။ စိတ်ဆိုးမယ်။

အဲဒီလို ပြန်တုံ့ပြန်လိုက်တာက သူတို့ပစ်လိုက်တဲ့ အမှိုက်တွေကို ကိုယ့်အိတ်ကပ်ထဲ ကောက်ထည့်လိုက် တာနဲ့ အတူတူပါပဲ။

အဲဒီအမှိုက်တွေကို အိတ်ကပ်ထဲ ထည့်လာပြီး အိမ်ပြန်ရောက်တော့ ကိုယ့်မိသားစု၊ ကိုယ့်ကလေး တွေကို ပြန်ပြီး ဒေါသထွက်မိတယ်။ အမှိုက်ကားဆီက လက်ခံလိုက်တဲ့ အမှိုက်တွေကို အိမ်မှာ ပြန်ဖြန့်ခင်းမိသလို ဖြစ်သွားတာပေါ့။
ပျော်ရွှင်တဲ့သူတွေ၊ စိတ်ချမ်းသာတဲ့သူတွေရဲ့ လျှို့ဝှက်ချက်ကတော့ အဲဒီ “အမှိုက်ကား” တွေကို လက်မခံတာပါပဲ။

အကြောင်းမဲ့ ရန်လိုနေတဲ့သူ၊ မကောင်းမြင်နေတဲ့သူကို တွေ့ရင် “ဩော်... သူ့ခမျာ အမှိုက်တွေ ပြည့် နေရှာတာပဲ” လို့ မေတ္တာစိတ်နဲ့ နားလည်ပေးလိုက်ပါ။ ပြုံးပြလိုက်ပါ။ ပြီးရင် ကိုယ့်လမ်းကို ဆက်လျှောက်သွားလိုက်ပါ။

သူတို့ရဲ့အမှိုက်ကို ကိုယ့်ဘဝထဲ အဝင်မခံပါနဲ့။ ကိုယ့်ရဲ့နေ့ရက်ကောင်းတွေကို ဖျက်ဆီးခွင့် မပေးပါနဲ့။

ဒါကြောင့် တစ်ယောက်ယောက်က ကိုယ့်ကို အကြောင်းမဲ့ စိတ်အနှောင့်အယှက် ပေးလာရင် ကိုယ့်ကိုယ်ကိုယ် သတိပေးလိုက်ပါ။
“ဒါ ငါ့အမှိုက် မဟုတ်ဘူး။ ငါ လက်ခံစရာ မလိုဘူး”

အမှိုက်ကားကို ရှောင်ပြီး လေကောင်းလေသန့် ရတဲ့လမ်းကနေပဲ ဆက်လျှောက်သွားလိုက်ပါ။

မိတ်ဆွေများ ကြုံတတ်တဲ့အမှိုက်ကားတွေကိုရှောင်နိုင်ကြပါစေ။

မေတ္တာဖြင့်
ဒေါက်တာသိန်းလွင်၊ ပါမောက္ခ၊ (ငြိမ်း)၊ ပညာ​ေရးစိတ်ပညာဌာန၊ ရန်ကုန်ပညာရေးတက္ကသိုလ်။

#အဆိပ်သင့်တအကောင်းမြင်ဝါဒ "အမြဲတမ်း ပျော်နေစမ်းပါ" ဆိုတဲ့ စကားက တစ်ခါတလေ လူသတ်လက်နက် ဖြစ်သွားနိုင်တယ် 🚫 ​ကိုယ်ဝမ်းနည်းပ...
22/01/2026

#အဆိပ်သင့်တအကောင်းမြင်ဝါဒ

"အမြဲတမ်း ပျော်နေစမ်းပါ" ဆိုတဲ့ စကားက တစ်ခါတလေ လူသတ်လက်နက် ဖြစ်သွားနိုင်တယ် 🚫

​ကိုယ်ဝမ်းနည်းပက်လက် ဖြစ်နေတဲ့အချိန်မှာ တစ်ယောက်ယောက်က "ဟာ... ဘာမှမဖြစ်ပါဘူး၊ အကောင်းဘက်က တွေးလိုက်စမ်းပါ" လို့ လာပြောရင် ဘယ်လိုခံစားရလဲ?
​စိတ်သက်သာရာ ရသွားလား?
ဒါမှမဟုတ် ကိုယ့်ခံစားချက်ကို အသိအမှတ်မပြုဘဲ ပစ်ပယ်လိုက်သလို ခံစားရလား?
​ဒါကို Toxic Optimism (အဆိပ်သင့် အကောင်းမြင်ဝါဒ) သို့မဟုတ် (ဇွတ်အတင်း အကောင်းမြင်ဝါဒ) လို့ ခေါ်ပါတယ်။

​Toxic Optimism ဆိုတာ အချိန်တိုင်း၊ နေရာတိုင်းမှာ အကောင်းပဲ မြင်ရမယ်၊ ပျော်ရွှင်နေရမယ်လို့ ကိုယ့်ကိုယ်ကို (သို့မဟုတ်) သူတစ်ပါးကို ဖိအားပေးတာပါ။
​👉 "Good vibes only" (အကောင်းပဲဖြစ်နေတာ ဖြစ်နေတာမှန်သမျှ အကောင်းပဲလို့ ပြောကြေး/တွေးကြေး)ဆိုတာမျိုးပါ။
👉 "ဒါထက် ဆိုးနိုင်သေးတာပဲ၊ ကျေးဇူးတင်သင့်တယ်"
👉 "မငိုနဲ့၊ စိတ်မညစ်နဲ့"
​ဒီလိုစကားတွေက အပေါ်ယံ အားပေးသလို ရှိပေမဲ့၊ တကယ် ခံစားနေရသူအတွက်တော့ "နင့်ရဲ့ နာကျင်မှုက အရေးမကြီးဘူး" လို့ ပြောလိုက်သလိုပါပဲ။
​လူတစ်ယောက်မှာ ပျော်ရွှင်မှုလိုပဲ ဝမ်းနည်းတာ၊ ဒေါသထွက်တာ၊ ကြောက်ရွံ့တာတွေက သဘာဝ ခံစားချက်တွေပါ။ ဒါတွေကို အတင်း ဖိနှိပ်ထားရင် (Suppress လုပ်ရင်) ရေရှည်မှာ စိတ်ရောဂါတွေ ဖြစ်လာနိုင်ပါတယ်။

​စစ်မှန်တဲ့ စိတ်ခွန်အားဆိုတာ အမြဲတမ်း ပြုံးနေတာ မဟုတ်ပါဘူး။
"It's okay not to be okay" (အဆင်မပြေတဲ့အချိန်တွေ ရှိတာဟာ အဆင်ပြေပါတယ်) ဆိုတာကို လက်ခံနိုင်ခြင်းသာ ဖြစ်ပါတယ်။
​ကိုယ့်ခံစားချက်အမှန်ကို ရိုးသားဖို့ အရေးကြီးပါတယ်။ 🙏

"အဆင်မပြေလည်း ပြုံးထားရမယ်" ဆိုပြီး လူသားတစ်ယောက်ရဲ့ သဘာဝကျတဲ့ ဝမ်းနည်းခွင့်၊ နာကျင်ခွင့်၊ စိုးရိမ်ခွင့်တွေကို ပိတ်ပင်တားဆီးလိုက်ပါတယ်။
ခံစားချက်ဆိုးတွေကို အတင်းဖိနှိပ် ထားတဲ့အခါ အဲဒီခံစားချက်တွေက ပျောက်သွားတာ မဟုတ်ပါဘူး။ စိတ်အောက်ခြေမှာ ပိုကြီးထွားလာပြီး ရေရှည်မှာ ပေါက်ကွဲတတ်သလို၊ စိတ်ကျန်းမာရေးကိုလည်း ဆိုးရွားစွာ ထိခိုက်စေပါတယ်။

Good Vibes Only" ဆိုတဲ့ ထောင်ချောက် နှင့် ဗုဒ္ဓနည်းကျ စိတ်ထွက်ပေါက် 🚫🙏🧘‍♂️

ဗုဒ္ဓမြတ်စွာရဲ့ အဆုံးအမတွေထဲမှာ "မဖြစ်နိုင်တာကို အတင်းအကောင်းမြင်ပြီး နေလိုက်ပါ" ဆိုတဲ့ နည်းလမ်း မပါပါဘူး။
ဗုဒ္ဓလမ်းစဉ်ဟာ Realism (လက်တွေ့အရှိတရားဝါဒ) သက်သက်သာ ဖြစ်ပါတယ်။

၁။ ဆင်းရဲခြင်းကို အသိအမှတ်ပြုပါ (ဒုက္ခ သစ္စာ)🪷
မြတ်စွာဘုရားက ဆင်းရဲဒုက္ခနဲ့ ကြုံရင် မျက်ကွယ်ပြုခိုင်းတာ မဟုတ်ပါဘူး။ "ဒုက္ခကို ပိုင်းခြားသိရမယ်" (ဒုက္ခ ပရိညေယျ) လို့ ဟောပါတယ်။ ကိုယ်ဝမ်းနည်းနေရင် "ငါ ဝမ်းနည်းနေပါလား" လို့ အရှိကို အရှိအတိုင်း သိလိုက်တာက ပထမဆုံး ဖြေရှင်းနည်းပါပဲ။ မရှိသလို ဟန်ဆောင်နေတာက "မောဟ" (Delusion) သာ ဖြစ်ပါတယ်။

၂။ သတိ (Mindfulness) ဖြင့် စောင့်ကြည့်ပါ🪷
ဝမ်းနည်းစိတ်၊ ဒေါသစိတ် ဖြစ်လာရင် အဲ့ဒီစိတ်ကို မောင်းထုတ်ဖို့ မကြိုးစားပါနဲ့။ အတင်းအကောင်းမြင်ဖို့လည်း မကြိုးစားပါနဲ့။ "ဪ... ငါ့စိတ်ထဲမှာ မကျေနပ်မှုတွေ ဖြစ်နေပါလား" ဆိုပြီး သတိ (Sati) ကပ်ပြီး စောင့်ကြည့်လိုက်ပါ။ ခံစားချက်ကို လက်ခံလိုက်မှသာ အဲ့ဒီခံစားချက်ရဲ့ ချုပ်ငြိမ်းရာကို တွေ့နိုင်မှာပါ။

၃။ ဥပေက္ခာ (Equanimity) နှင့် အပေါ်ယံပျော်ရွှင်မှု မတူပါ 🪷
ဗုဒ္ဓနည်းကျ "ဥပေက္ခာ" ဆိုတာ ကောင်းတာပဲဖြစ်ဖြစ်၊ ဆိုးတာပဲဖြစ်ဖြစ် တုန်လှုပ်မှုမရှိဘဲ တည်ငြိမ်အေးချမ်းစွာ ရှုမြင်ခြင်း ဖြစ်ပါတယ်။ Toxic Optimism လိုမျိုး ဆိုးတာကို မမြင်ချင်ယောင်ဆောင်ပြီး အတင်းပြုံးနေတာမျိုး မဟုတ်ပါဘူး။

✅ နိဂုံးချုပ်

စစ်မှန်တဲ့ စိတ်ခွန်အားဆိုတာ မျက်ရည်မကျတာ မဟုတ်ပါဘူး။ မျက်ရည်ကျနေရက်နဲ့ ရှေ့ဆက်လျှောက်ရဲတာကို ခေါ်တာပါ။
ဒါကြောင့်... စိတ်ညစ်တဲ့အခါ "ငါ စိတ်ညစ်တယ်" လို့ ရိုးရိုးသားသား ဝန်ခံလိုက်ပါ။
ငိုချင်တဲ့အခါ ငိုလိုက်ပါ။
"It's okay not to be okay" (အဆင်မပြေတဲ့ အချိန်တွေ ရှိတာဟာ သဘာဝပါပဲ) ဆိုတာကို လက်ခံလိုက်ပါ။
အရှိတရားကို သတိထားပြီူ လက်ခံခြင်း (Acceptance) ကနေမှတဆင့် စစ်မှန်တဲ့ ငြိမ်းချမ်းမှုနဲ့ ကုစားခြင်း (Healing) ကို စတင်နိုင်ပါလိမ့်မယ်။
အပေါ်ယံ အပြုံးအတုတွေထက်၊ အတွင်းစိတ်ရဲ့ အရှိတရားက ပိုတန်ဖိုးရှိပါတယ်။
🍀


#အဆိပ်သင့်အကောင်းမြင်ဝါဒ

#အနတ္တလက္ခဏသုတ်လာဘဝနေနည်းအနုပညာ 🪷 "အရှုပ်ထဲမှာ ရှင်းအောင်နေ၊အမှောင်ထဲမှာ လင်းအောင်နေ၊အပူထဲမှာ အေးနိုင်စေ" ဆိုတဲ့ အရာအား...
21/01/2026

#အနတ္တလက္ခဏသုတ်လာဘဝနေနည်းအနုပညာ 🪷

"အရှုပ်ထဲမှာ ရှင်းအောင်နေ၊
အမှောင်ထဲမှာ လင်းအောင်နေ၊
အပူထဲမှာ အေးနိုင်စေ" ဆိုတဲ့ အရာအားလုံးကို တရားတစ်ခုတည်းနဲ့ ပြည့်စုံစေနိုင်တယ်ဆိုရင် ယုံမလား?
ဒါကတော့ အနတ္တ တရားတော်ပါပဲ။ 🙏

ဒီနေ့တော့ နည်းနည်းလေး လေးနက်သလိုလိုနဲ့ တကယ်တမ်းကျတော့ ဦးဇင်းတို့ နေ့စဉ်ဘဝနဲ့ အရမ်းဆိုင်တဲ့ အကြောင်းအရာလေးတစ်ခုကို ပြောပြချင်ပါတယ်။
"အနတ္တ" ဆိုတဲ့ စကားလုံးကို ကြားလိုက်တာနဲ့ တော်တော်များများက "ဟာ... ဒါ တရားစာကြီးပဲ၊ အရမ်းနက်နဲတယ်၊ ဘုန်းကြီးတွေ၊ ယောဂီတွေနဲ့ပဲ ဆိုင်တာပါ" လို့ ထင်သွားတတ်ကြတယ်။
ဒါပေမဲ့ တကယ်တမ်းကျတော့ မဟုတ်ပါဘူး။ မြတ်စွာဘုရားဟောခဲ့တဲ့ ဒီ "အနတ္တလက္ခဏသုတ်" ဆိုတာ ဦးဇင်းတို့တွေ ဒီနေ့ဒီအချိန် ရှင်သန်နေထိုင်နေတဲ့ ဘဝထဲမှာကိုက လက်တွေ့ကျင့်သုံးလို့ရတဲ့ "ဘဝနေနည်း အနုပညာ (The Art of Living)" တစ်ခုပါပဲ။
ဒီသဘောတရားကို နည်းနည်းလောက် သဘောပေါက်သွားရင်ကိုပဲ ဘဝက ပိုပြီး ပေါ့ပါးလွတ်လပ်သွားသလို ခံစားရပါလိမ့်မယ်။ ကဲ... ဘယ်လို လက်တွေ့ကျင့်သုံးမလဲ ကြည့်ရအောင်။
🍀🍀🍀

အနတ္တလက္ခဏသုတ်မှာ မြတ်စွာဘုရားက ခန္ဓာငါးပါး (ရုပ်၊ ဝေဒနာ၊ သညာ၊ သင်္ခါရ၊ ဝိညာဉ်) တို့ဟာ အမြဲမရှိခြင်း (အနိစ္စ)၊ ဆင်းရဲခြင်း (ဒုက္ခ) ဖြစ်သောကြောင့် ကိုယ်ပိုင်အစိုးရသော အတ္တမဟုတ်ကြောင်း (အနတ္တ) ရှင်းလင်းစွာ ဟောပြခဲ့ပါတယ်။
​ဒီသဘောကို နားလည်လက်ခံခြင်းဟာ ဘဝနေနည်းအနုပညာ၏ အခြေခံပဲဖြစ်ပါတယ်။

၁။ "ငါ" ဆိုတဲ့ ဝန်ထုပ်ကြီးကို ခဏလောက် ချထားလိုက်ပါ
ကိုယ့်ကိုယ်ကို ပြန်သတိထားကြည့်ဖူးလား။ နေ့တိုင်း စိတ်ညစ်ရတာ၊ ပူပန်ရတာ၊ ဖိစီးရတာတွေက ဘယ်ကစသလဲဆိုတော့ "ငါ" ဆိုတဲ့ အစွဲက စတာ။
"ဒါ ငါ့ ခန္ဓာကိုယ်ကွ၊ ဒါ ငါ့ ခံစားချက်၊ ဒါ ငါ့ ပစ္စည်း၊ ဒါ ငါ့ အကြံအစည်" ဆိုပြီး အရာရာကို "ငါ" နဲ့ ချိတ်ဆက်ပြီး ပိုင်စိုးပိုင်နင်း လုပ်ထားတတ်ကြတယ်လေ။ ဒီတော့ ကိုယ်ပိုင်ဆိုင်ထားတယ်ထင်တဲ့အရာတွေ ပျက်စီးသွားရင်၊ ပြောင်းလဲသွားရင် ခံစားရရော။
ဘုရားရှင်က ဘာပြောခဲ့သလဲဆိုတော့... တကယ်တမ်းကျတော့ ဒီခန္ဓာကိုယ်နဲ့ စိတ်ဆိုတာကြီးက အမြဲမရှိဘူး၊ ဆင်းရဲတယ်၊ ဒါကြောင့် ကိုယ်ပိုင် အစိုးရတဲ့ "အတ္တ" မဟုတ်ဘူးတဲ့။
ဒီအချက်ကို လက်ခံလိုက်နိုင်ရင် ဘဝက တော်တော်လေး ငြိမ်းချမ်းသွားတယ်။ စဉ်းစားကြည့်လေ... ကိုယ့်ခန္ဓာကိုယ်နဲ့ ကိုယ့်စိတ်ကိုတောင် ကိုယ်ဖြစ်ချင်သလို လုပ်မရမှန်း သိသွားတဲ့အခါ ပြင်ပလောကကြီးနဲ့ တခြားလူတွေ ကိုယ့်အလိုအတိုင်း မဖြစ်လာရင်လည်း သိပ်ပြီး စိတ်မကောက်တော့ဘူးပေါ့။ "ငါ" ဆိုတဲ့ ဝန်ထုပ်ကြီးကို အောက်ချလိုက်ရသလို စိတ်က ပေါ့သွားရော။

၂။ ပြောင်းလဲတာတွေကို လက်ခံတတ်လာတယ်
လောကကြီးရဲ့ သဘာဝကိုက အမြဲပြောင်းလဲနေတာလေ။ ဒါပေမဲ့ ဦးဇင်းတို့က ကောင်းတာလေးတွေဆိုရင် ဘယ်တော့မှ မပြောင်းလဲစေချင်ဘူး။ အဲဒီလို သဘာဝနဲ့ ဆန့်ကျင်ဘက် ဖြစ်ချင်နေတော့ စိတ်ဆင်းရဲရတာပေါ့။
အနတ္တသဘောကို နှလုံးသွင်းထားတဲ့သူကျတော့ ဘဝမှာ နိမ့်လိုက်မြင့်လိုက်၊ ရလိုက်ရှုံးလိုက်၊ ကျန်းမာလိုက် ဖျားလိုက် ဖြစ်လာတဲ့အခါ "ဟာ... ငါ့ကျမှ ဖြစ်ရလေခြင်း" (Why me?) ဒါမှမဟုတ် "ငါ့ကျမှ မဖြစ်ရလေခြင်း" (Why not me?) ဆိုပြီး drama ခင်းမနေတော့ဘူး။ "အော်... သဘာဝတရားက ဒီအတိုင်းပါလား" ဆိုပြီး တည်ငြိမ်စွာ လက်ခံတတ်လာတယ်။ ဒါဟာ လှိုင်းလေထန်နေတဲ့ ဘဝပင်လယ်ထဲမှာ တည်ငြိမ်စွာ ရွက်လွှင့်တတ်တဲ့ အနုပညာပါပဲ။

၃။ သူတပါးအပေါ် စာနာစိတ်နဲ့ မေတ္တာတွေ ပိုတိုးလာတယ်။
အတ္တစွဲတွေကပဲ အတွင်းစိတ်မငြိမ်းမှု၊ တစ်ဦးချင်းမသင့်မြတ်မှု က တစ်ဆင့် ကမ္ဘာစစ်အထိဖြစ်စေတာပါ။
"ငါ" ဆိုတဲ့ စိတ် အားကြီးနေသရွေ့ "သူ" နဲ့ "ငါ" ဆိုပြီး စည်းတွေ ခြားနေဦးမှာပဲ။ အဲဒီအခါ ကိုယ့်ဖို့ပဲ ကိုယ်ကြည့်တတ်လာတယ်။
"ငါ" ဆိုတာလည်း အကြောင်းအကျိုးအရ ဖြစ်နေတာပါလား၊ တခြားသူတွေလည်း ငါ့လိုပါပဲလားလို့ သဘောပေါက်လာတဲ့အခါကျတော့ ဟို အကာအရံတွေ၊ အတားအဆီးတွေ ပျော်ကျသွားတယ်။ သူများဆင်းရဲရင် ကိုယ်ချင်းစာတတ်လာတယ်၊ အားလုံးအပေါ်ထားတဲ့ မေတ္တာစိတ်ကလည်း သူ့အလိုလို ပိုကျယ်ပြန့်လာရော။ အားလုံးက အနိစ္စ ဒုက္ခ အနတ္တ ပဲလို့ သိမြင်လာရင် ကိုယ်ခြင်စာတရားနဲ့ ကရုဏာတရား တိုးပွားလာပါလိမ့်မယ်။

🪷🪷🪷

အနတ္တလက္ခဏသုတ်မှာ အမေးအေဖြ ပုံစံနဲ့ ပြောထားတာကို အတုယူပြီး ဦးဇင်းတို့ အတူတူ အဖြေရှာကြရအောင်။

"မင်းခန္ဓာကိုယ်က မင်းပိုင်တာလား?"
"ပိုင်တာပေါ့ဘုရား"
"ဒါဆို မင်းရဲ့ ခန္ဓာကိုယ်ကို 'မအိုစေနဲ့၊ မနာစေနဲ့၊ ဝက်ခြံမထွက်စေနဲ့၊ ဗိုက်မရွှဲစေနဲ့' လို့ အမိန့်ပေးပြီး ထိန်းချုပ် လုပ်လို့ရလား?"
"မရပါဘူးဘုရား"
"ထိန်းချုပ်လို့မရရင် အဲဒါ မင်းပိုင်တာ ဟုတ်ပါ့မလား?"
မှတ်ချက်။ လူငယ်တွေအနေနဲ့ ကိုယ့်ရုပ်ရည် မလှလို့၊ ကျန်းမာရေး မကောင်းလို့ စိတ်ညစ်နေကြတာတွေ ရှိတယ်။ တကယ်တော့ ဒီခန္ဓာကိုယ်ကြီးက "ငါ့ဟာ" မဟုတ်ပါဘူး။ သဘာဝအတိုင်း ပြောင်းလဲနေမယ့် "Nature" သက်သက်ပါပဲ။ ကိုယ်ပိုင်တာ မဟုတ်တဲ့အရာတစ်ခုအတွက် စိတ်ညစ်မနေပါနဲ့။ စိတ်ညစ်ရင် ပိုပြီးတောင် ဖြစ်တတ်ပါသေးတယ်။ ဥပမာ ဆံပင်ဖြူလို့စိတ်ညစ်၊ စိတ်ညစ်လို့ ဆံပင်ဖြူ ဆိုတာမျိုးပေါ့။

ခံစားချက်ဟာ ကိုယ်မဟုတ်ပါ 🪷🪷🪷
စိတ်ဓာတ်ကျတာ (Depression)၊ စိုးရိမ်တာ (Anxiety)၊ ဝမ်းနည်းတာတွေ ဖြစ်တဲ့အခါ "ငါ စိတ်ညစ်တယ်" လို့ ပြောလေ့ရှိတယ်။
"ခံစားချက် (ဝေဒနာ)" ဆိုတာ ကောင်းကင်မှာ တက်လိုက်၊ ကျလိုက် ဖြစ်နေတဲ့ တိမ်တိုက်တွေလိုပဲ။ မင်းက ကောင်းကင် ဆိုရင်၊ စိတ်ညစ်တာက တိမ်မည်းတွေပါ။
ဝိပဿနာအမြင်နဲ့ ဒီလိုလေး ကြည့်ကြည့်ပါ။ "I am sad" (ငါ ဝမ်းနည်းနေတယ်) လို့ မတွေးပါနဲ့။ "Sadness is happening" (ဝမ်းနည်းမှု ဖြစ်ပေါ်နေတယ်) လို့ သိပါ။ ခံစားချက်ကို ကိုယ်ပိုင် Identity လို့ မသတ်မှတ်လိုက်ပါနဲ့။ သူက ဝင်လိုက် ထွက်လိုက် ဧည့်သည်ပါ၊ လာမယ် ပြီးရင် ပြန်သွားပါလိမ့်မယ်။
(ပရတော- ဘေးလူအမြင်နဲ့ ကြည့်ကြည့်ပါ။ ဒါဟာ ဝိပဿနာပွားနည်း ၄၀ ထဲက တစ်နည်းပါ)

🪷🪷🪷

အနတ္တလက္ခဏသုတ်ဟာ ဓမ္မစကြာပြီးနောက် ဟောတဲ့ ဒုတိယမြောက် တရားတော်ဖြစ်ပြီး ပဉ္စဝဂ္ဂီ (၅) ဦးလုံးကို ရဟန္တာ ဖြစ်သွားစေခဲ့တဲ့ အဆင့်မြင့် တရားတော်ပါ။
အနတ္တကို သိမြင်သွားရဲ့ ရဟန္တာအရှင်မြတ်တွေဟာ လွတ်ငြိမ်းချမ်းသာ (ဝိမုတ္တိသုခ) ကို ရသွားကြပါတယ်။ အကုပ္ပါစေတောဝိမုတ္တိ- တုန်လှုပ်မှုကင်းတဲ့ လွတ်မြောက်မှု၊ပြီးပြည့်စုံမှုကို ရရှိသွားတာပါ။
🪷🪷🪷

ငါ၊ ငါ့ဥစ္စာ၊ ငါမှငါ ဆိုတဲ့ အတ္တဗဟိုပြု တွေးခေါ်မှုများရဲ့ အလွန် 🪷

အနတ္တလက္ခဏသုတ်တော်ရဲ့ အနှစ်ချုပ်ကတော့ အရာရာကို ရှုမြင်သုံးသပ်ရမယ့် ဖော်မြူလာပါပဲ။
(၁) နေတံမမ - ဒါ ငါ့ဟာ မဟုတ်ဘူး (This is not mine)။
(၂) နေသောဟမသ္မိ- ဒါ ငါ မဟုတ်ဘူး (I am not this)။
(၃) နမေသော အတ္တာ- ဒါ ငါ့ရဲ့ အတ္တ/လိပ်ပြာ မဟုတ်ဘူး (This is not my self)။
တစ်ယောက်ယောက်က ကိုယ့်ကို လာဆဲတယ်၊ ဝေဖန်တယ် ဆိုပါစို့။ အဲဒီ "အသံ" ဟာ ငါ့ဟာ မဟုတ်ဘူး။ သဘာဝတရား တစ်ခုပဲလို့ နှလုံးသွင်းလိုက်ရင် ဒေါသထွက်စရာ မလိုတော့ပါဘူး။

ဘဝမှာ ပေါ့ပါးလွတ်လပ်ချင်ရင်... အရာရာကို ငါနဲ့ ဆွဲမညှိပါနဲ့။
ကိုယ့်ခန္ဓာ၊ ကိုယ့်စိတ်ကိုတောင် "ငါ့ဟာ" မဟုတ်ဘူးလို့ သိမြင်လိုက်တဲ့အချိန်မှာ... ဘယ်အရာကမှ ကိုယ့်ကို လာပြီး ဒုက္ခပေးလို့ မရတော့ပါဘူး။ ငါ ဆိုတာ မရှိရင် "ဘာလို့ ငါ့ကျမှဖြစ်ရတာလဲ" "ဘာလို့ ငါ့ကျမှ မဖြစ်ရတာလဲ?" ဆိုတဲ့ မရှိတင်ကဲ ဝမ်းနည်းမှုမျိုးမဖြစ်တော့ဘဲ "ဒီအကြောင်းကြောင့် ဒီအကျိုးဖြစ်တယ်။ ဒီအကြောင်းမရှိရင် ဒီအကျိုးမဖြစ်" ဆိုတဲ့ သဘာဝဓမ္မသက်သက်ကို မြင်သွားပါလိမ့်မယ်။ အဲ့မြင်ကပဲ ဦးဇင်းတို့အားလုံးကို လွတ်မြောက်စေမှာပါ။
🪷🪷🪷
မဟာဂန္ဓာရုံ ဆရာတော်ကြီးကို လူတစ်ယောက်က လျောက်ထားဖူးပါတယ်။ အရာအားလုံးက အနိစ္စ (မမြဲ) သင်္ခါရ(ပြုပြင်ပေးရတဲ့သဘော)ပါပဲတဲ့။ အဲ့ဒီတော့ ဆရာတော်ကြီးက "အဲ့လို အနိစ္စဖြစ်လို့ သင်္ခါရဖြစ်လို့ ကြိုးစားလုပ်ဆောင် ပြုပြင်နေရတာပဲ။ နောက်လည်း ဒီလို ကြိုးစားနေရမှာပါပဲ" ဆိုတဲ့ အဓိပ္ပါယ်မျိုး ဖြေကြားခဲ့ပါသတဲ့။
အနတ္တ ကို ရှုဆင်ခြင်တာက အပျင်းကြီးဖို့ မဟုတ်ပါဘူး။ ငါဆိုတဲ့ အတ္တရဲ့ထောင်ချောက်က လွတ်မြောက်ဖို့ပါ။

အတိုချုပ်ပြောရရင်တော့...
အနတ္တလက္ခဏသုတ်ဆိုတာ နက်နဲတယ်ဆိုပေမဲ့ သူ့ရဲ့ အနှစ်သာရက နေ့စဉ်ဘဝမှာ "ငါ၊ ငါ့ဟာ" ဆိုတဲ့ စွဲလမ်းမှု (Attachment) လေးတွေကို လျှော့ချဖို့ပါပဲ။
"ဒါ ငါမဟုတ်ဘူး၊ ဒါ ငါပိုင်တာမဟုတ်ဘူး၊ ဒါ ငါ့ရဲ့ အတ္တမဟုတ်ဘူး" ဆိုတဲ့ အသိနဲ့ နေထိုင်တယ်ဆိုတာ ဘဝကို ပစ်ပယ်လိုက်တာ မဟုတ်ပါဘူး။ အရာရာကို ပိုရှင်းရှင်းလင်းလင်း မြင်ပြီးတော့၊ မလိုအပ်တဲ့ စိတ်ဖိစီးမှုတွေ ကင်းဝေးပြီး ပေါ့ပါးလွတ်လပ်စွာ ရှင်သန်တာမျိုးပါ။ ဒါမှ တကယ့် "ဘဝနေနည်း အနုပညာ" အစစ်ပေါ့။

ငါစွဲကင်းကွာ ချမ်းသာကြပါစေ
🪷🪷🪷

မေတ္တာဖြင့်-မေတ္တာခံယူလျက်
အရှင်ဉာဏဝရ(ပါရမီ)





20/01/2026

Lemming(လမ်မင်းကြွက်)မျိုးလူတွေ မဖြစ်ဖို့လိုတယ်။
=•=•=•=•=•=•=•=•=•=•=•=•=•=•=•=•=•=•=
လမ်မင်းဆိုတာက ကြွက်နဲ့တူတဲ့ အကောင်တစ်မျိုးပါ။
ဒါပေမယ့်အမြီးတိုတယ်။ ကမ္ဘာမြောက်ပိုင်းအေးတဲ့
နိုင်ငံတွေမှာနေကြသတဲ့။ အစာရှာဖို့အုပ်စုလိုက်
ခေါင်းဆောင်နောက်ကိုလိုက်ကြရာက ချောက်ကမ်းပါး၊
တောင်ကြား၊ ပင်လယ်ထဲကျ ရေနစ်သေကြတဲ့သတ္တဝါ
တွေပေါ့။ ထုံးတမ်းစဉ်လာနောက်လိုက်တဲ့လမ်းရိုးသမား
တွေပေါ့။ အချင်းချင်း ဟုတ်ဟုတ် မဟုတ်ဟုတ် မစဉ်း
မစားသဘောတူစည်းလုံးရင်း ဒုက္ခရောက်အကျိုးပျက်စီး
သေဆုံးကြရတယ်။ ဥပမာ ဟစ်တလာရဲ့တပ်ဖွဲ့ကလူမျိုး
တွေလိုမျိုးပေါ့။ အဲလိုမျိုးလူတွေကို လမ်မင်းကြွက်တွေ
လို့ခိုင်းနှိုင်းတင်စားကြတယ်။ လူအဖွဲ့အစည်း မပျက်စီးဖို့
လမ်မင်းကြွက်တွေလို လူမျိုးတွေမဖြစ်ဖို့လည်းလိုတယ်။

လမ်မင်းတွေဟာ မိမိအဖွဲထဲကအကြောင်းကွဲဆန့်ကျင်တဲ့
အကောင်ဆိုရင်ဝိုင်းနှိပ်ကွပ်ပြီး ညီလာခံလုပ်ဖို့ ပင်လယ်
ကမ်းစပ်ကိုရှာတယ်လို့လည်းတင်စားပြောတယ်။

ဆိုလိုတာကဒုက္ခဖြစ်နိုင်မဖြစ်နိုင်မစဉ်းစားပဲ စည်းလုံးညီညွတ်မှုပြချင်လို့ကောင်းတာရော ဆိုးတာရော ဝိုင်းသဘောတူကြတဲ့ဖြစ်ရပ်ပေါ့။ ဆက်ဆံရေးစိတ်ပညာမှာတော့ ဒီဖြစ်ရပ်ကိုGroup Think လို့ သုံးတယ်။

Dr မြင့်လွင်(စိတ်ပညာ)

#မဟာသမယသုတ်မှဘဝသင်ခန်းစာများ မဟာသမယသုတ်ကို ရွတ်ဖတ်ရုံသက်သက်မဟုတ်ဘဲ ဒီသုတ်ထဲက ဘဝသင်ခန်းစာတွေ ယူနိုင်အောင် ဖတ်ကြည့်ပါ။ စက...
20/01/2026

#မဟာသမယသုတ်မှဘဝသင်ခန်းစာများ

မဟာသမယသုတ်ကို ရွတ်ဖတ်ရုံသက်သက်မဟုတ်ဘဲ ဒီသုတ်ထဲက ဘဝသင်ခန်းစာတွေ ယူနိုင်အောင် ဖတ်ကြည့်ပါ။

စကြဝဠာအဆင့် ထိပ်သီးအစည်းအဝေးကြီး (The Majestic Gathering) ✨
​စိတ်ကူးအာရုံနဲ့ ခဏလောက် ပုံဖော်ကြည့်လိုက်ပါ။
​နေရာကတော့ ကပိလဝတ်ပြည်အနီးက မဟာဝုန်တောအုပ်ကြီး...။
သာမန်အချိန်တွေမှာ တိတ်ဆိတ်နေတတ်တဲ့ ဒီတောအုပ်ကြီးဟာ အခုအချိန်မှာတော့ မကြုံစဖူး ထူးကဲတဲ့ အရောင်အဝါတွေနဲ့ လင်းလက်တောက်ပနေပါတယ်။

​ဘာကြောင့်လဲဆိုတော့... စကြဝဠာတစ်ခုတည်းက မဟုတ်ဘဲ၊ စကြဝဠာပေါင်း တစ်သောင်း (Ten Thousand World Systems) မှာရှိကြတဲ့ တန်ခိုးကြီး နတ်၊ ဗြဟ္မာ၊ နဂါး၊ ဂဠုန် အစရှိတဲ့ ထိပ်သီးပုဂ္ဂိုလ်တွေ အားလုံးစုံညီ စုဝေးရောက်ရှိနေကြလို့ပါပဲ။
​ဒီလောက်များပြား၊ ဒီလောက်ကွဲပြားတဲ့ တန်ခိုးရှင်တွေ အားလုံးကို တစ်နေရာတည်းမှာ ငြိမ်းချမ်းစွာ စုစည်းပေးနိုင်တဲ့ ဗဟိုချက်ကတော့ အလယ်မှာ သီတင်းသုံးနေတော်မူတဲ့ "မြတ်စွာဘုရားရှင်" ပဲ ဖြစ်ပါတယ်။
​ဒီ သမိုင်းတွင်မယ့် ခမ်းနားထည်ဝါလှတဲ့ မြင်ကွင်းကြီးကို မှတ်တမ်းတင်ထားတာကတော့ ဦးဇင်းတို့ ရွတ်ဖတ်ပူဇော်နေကြတဲ့ "မဟာသမယသုတ်" တော်ကြီးပါပဲ။

​ဒီသုတ်တော်ကြီးက နတ်တွေ ဘယ်လောက်လာတယ်ဆိုတဲ့ စာရင်းကို ပြောပြရုံ သက်သက်မဟုတ်ပါဘူး။ ဒီ စကြဝဠာ အစည်းအဝေးကြီးကနေ လက်တွေ့ဘဝအတွက် တန်ဖိုးမဖြတ်နိုင်တဲ့ သင်ခန်းစာတွေကိုလည်း ပေးစွမ်းနေပါတယ်။

​📜 "မဟာသမယသုတ် မှ ဘဝသင်ခန်းစာများ"

✨ ဒီလောက် တန်ခိုးကြီးတဲ့ နတ်ဘီလူးကြီးတွေက လူသားဖြစ်တဲ့ မြတ်စွာဘုရားကို ဘာလို့ လာပြီး အရိုအသေပြုကြတာလဲ? ဘုရားက သူတို့ကို တန်ခိုးပြပြီး ခြိမ်းခြောက်ထားလို့ မဟုတ်ပါဘူး။ ဘုရားရဲ့ တုနှိုင်းမဲ့ မေတ္တာ နဲ့ Wisdom (ပညာ) ကြောင့်ပါ။
🍀 Lesson: လူငယ်တွေအနေနဲ့ Leader တစ်ယောက်ဖြစ်ချင်ရင် အော်ဟစ်ဆူပူပြီး အာဏာပြတာ (Hard Power) ထက် ကိုယ့်ရဲ့ အရည်အချင်းနဲ့ မေတ္တာတရား (Soft Power) ကို တည်ဆောက်ပါ။ ဒါမှ လူတွေက အစစ်အမှန် လေးစားမှာပါ။ True Leadership is "Soft Power"

🌷စိတ်ဓာတ်တူသူများ စုစည်းခြင်း
မဟာသမယသုတ်မှာ မြတ်စွာဘုရားက နတ်တွေကို နာမည်နဲ့တကွ မိတ်ဆက်ပေးပါတယ်။ သူတို့က ရဟန္တာ (၅၀၀) ရဲ့ ငြိမ်းချမ်းတဲ့ စိတ်အရှိန် (Peaceful Energy) ကြောင့် ရောက်လာကြတာပါ။
🌷Lesson: ကိုယ့်စိတ်ထား ကောင်းမွန်ပြီး အေးချမ်းနေရင် ကိုယ့်ဘေးနားကို လူကောင်းတွေ၊ မိတ်ဆွေကောင်းတွေ (Quality Connections) အလိုလို ရောက်လာပါလိမ့်မယ်။ Law of Attraction ပေါ့။ Good Vibes Attract Good Tribes .

🌷 အသိအမှတ်ပြုမှုဟာ နတ်လူချစ်ဆေးပါ။
ရှေးလူကြီးတွေက "မဟာသမယ ရွတ်ရင် နတ်ချစ်တယ်" လို့ ပြောကြတယ်။ ဘာလို့လဲဆိုတော့ ဒီသုတ်က နတ်တွေကို "Roll Call" ခေါ်ပြီး အသိအမှတ်ပြုပေးထားလို့ပါ။ ကိုယ်က သူတို့ကို Respect ပေးတော့ သူတို့ကလည်း ကိုယ့်ကို ပြန်စောင့်ရှောက်တာပေါ့။
* Lesson: ဘဝမှာ အောင်မြင်ဖို့အတွက် Relationship ကောင်းမွန်ဖို့ လိုပါတယ်။ လူတိုင်းကို လေးစားမှုပေးပါ။ Mutual Respect ရှိတဲ့နေရာမှာ ဘေးရန်ကင်းပါတယ်။

🪷. အတူယှဉ်တွဲ နေထိုင်ခြင်း
ဒီပွဲမှာ ပုံမှန်ဆို မတည့်ကြတဲ့ နဂါးနဲ့ ဂဠုန်၊ နတ်နဲ့ အသူရာတွေ အကုန်ပါပါတယ်။ ဒါပေမဲ့ ဘယ်သူမှ ရန်မဖြစ်ကြဘူး။
🍀Lesson: မတူကွဲပြားမှုတွေ ရှိနေပေမယ့် ငြိမ်းချမ်းစွာ အတူယှဉ်တွဲနေထိုင်လို့ ရတယ်ဆိုတာကို ပြသတာပါ။ ကိုယ့်ကျောင်းမှာ၊ ကိုယ့်လုပ်ငန်းခွင်မှာ ကိုယ်နဲ့ အဆင်မပြေတဲ့သူတွေ ရှိနေရင်တောင် "မဟာသမယ စိတ်ဓာတ်" နဲ့ Professional ဆန်ဆန် ဆက်ဆံတတ်ဖို့ လိုပါတယ်။
အဲ့လိုနေနိုင်ဖို့ ဆိုတာကလည်း အပေါ်က အချက်တွေ နဲ့ ပြည့်စုံမှ ဖြစ်မှာပါ။

ဒါကြောင့်...
မဟာသမယသုတ်ကို ရွတ်ဖတ်တဲ့အခါ စာလုံးတွေ ရွတ်နေတယ်လို့ သဘောမထားဘဲ... "ငါ့ရဲ့ မေတ္တာစိတ်နဲ့ ငြိမ်းချမ်းရေး စွမ်းအင်တွေကို စကြဝဠာတစ်ခုလုံးဆီ ဖြန့်ကျက်ပြီး မိတ်ဖွဲ့လိုက်မယ်" ဆိုတဲ့ စိတ်နဲ့ ပူဇော်ကြည့်ပါ။"စိတ်နှလုံး အေးချမ်းပြီး မိတ်ဆွေကောင်းများ ဝန်းရံကြပါစေ"
🪷🪷🪷🪷🪷🪷🪷

အပိုင်း(၂)
နောက်ဆက်တွဲ ⚓

မဟာသမယသုတ် (The Great Meeting) ဆိုတာ စကြဝဠာပေါင်း တစ်သောင်းက နတ်ဗြဟ္မာတွေ စုံညီအစည်းအဝေး လုပ်ကြတဲ့ပွဲလို့ လို့ အပေါ်မှာ ပြောခဲ့ပါတယ်နော်။ ဒါပေမဲ့ ဒီပွဲကြီးမှာ Plot Twist တစ်ခု ရှိခဲ့တယ်။
အဲဒါကတော့ အားလုံးငြိမ်းချမ်းစွာ တရားနာနေချိန်မှာ မဖိတ်ခေါ်ဘဲ ရောက်လာတဲ့ ဧည့်သည်ဆိုး "မာရ်နတ်" ပါပဲ။ အားလုံး ငြိမ်းချမ်းစွာ စုဝေးနေကြချိန်မှာ "ပွဲဖျက်ဖို့ ရောက်လာတဲ့ မာရ်နတ် " အကြောင်းနဲ့ ရဟန္တာတို့ရဲ့ တုန်လှုပ်ခြင်းမရှိတဲ့ စိတ်စွမ်းအား (Unshakable Mindset) အကြောင်းကလည်း အထူးမှတ်သားစရာ ကောင်းပါတယ်။
ဒါက လူငယ်တွေအတွက် "Haters" တွေ၊ "Toxic People" တွေကို ဘယ်လို ကိုင်တွယ်ရမလဲဆိုတဲ့ သင်ခန်းစာကောင်း တစ်ခုပါပဲ။

😈 မာရ်နတ်၏ တိုက်ခိုက်မှု
နတ်တွေ၊ ဗြဟ္မာတွေ၊ ရဟန္တာ (၅၀၀) တို့ရဲ့ ငြိမ်းချမ်းမှု (Peace & Harmony) ကို မာရ်နတ်က မလိုလားပါဘူး။ ဒါကြောင့် သူ့ရဲ့ စစ်တပ်ကြီးကို ခေါ်ပြီး ရောက်ချလာတယ်။
သူအော်တဲ့ အသံက ဒီလို...
"ဖမ်းကြ၊ ချည်ကြ၊ ရာဂ နဲ့ တုပ်နှောင်ကြ၊ တစ်ယောက်မှ မလွတ်စေနဲ့..."လို့ ကြုံးဝါးပြီး မိုးခြိမ်းသံတွေ၊ လျှပ်စီးတွေ၊ ကြောက်မက်ဖွယ် အသံတွေနဲ့ ခြိမ်းခြောက်ပါတော့တယ်။
(ဒီနေ့ခေတ်လို ပြောရင်တော့ ကိုယ်အောင်မြင်နေချိန်၊ ပျော်နေချိန်မှာ Drama တွေ ဖန်တီး၊ ကောလာဟလတွေ လွှင့်ပြီး လာနှောင့်ယှက်တဲ့ Haters တွေ၊ Trolls တွေပါပဲ)

🛡️ မြတ်စွာဘုရားရှင်၏ တုံ့ပြန်ပုံ 🪷
ပုံမှန်ဆိုရင် ဒီလောက်ကြောက်စရာကောင်းတဲ့ အခြေအနေမှာ ပွဲပျက်ပြီး ထွက်ပြေးကြမှာပါ။ ဒါပေမဲ့ မြတ်စွာဘုရားက တန်ခိုးပြပြီး ပြန်မတိုက်ခိုက်ပါဘူး။ ရဟန်းတွေကို စကားတစ်ခွန်းပဲ မှာလိုက်တယ်။
"ရဟန်းတို့... မာရ်နတ်လာနေပြီ။ သိ အောင် အားထုတ်ကြ (Be Aware of them)"
ဒါပါပဲ။ ဘုရားရှင်က (သတိ) ဆိုတဲ့ Radar ကို ဖွင့်ခိုင်းလိုက်တာပါ။
ကြောက်ရွံ့မှု ကင်းစင်ပြီးသားဖြစ်တဲ့
ရဟန္တာမထေရ်မြတ်ကြီးတွေကလည်းတည်ငြိမ်တဲ့စိတ်နဲ့ မာရ်နတ်ရဲ့ အပြုအမူတွေကို သတိ (Mindfulness) နဲ့ အသိ ( full Awareness) နဲ့ ကြည့်နေလိုက်ကြတယ်။ သတိ အသိ တစ်နည်းအားဖြင့်- သတိပညာနဲ့ ကြည့်တဲ့အခါ ဘာဖြစ်သွားလဲ။

✨ တုန်လှုပ်မှု ကင်းခြင်း 🪷
စာထဲမှာ "လောမံ တေသံ န ဣဉ္ဇယုံ" တဲ့။
ရဟန္တာတို့ရဲ့ "မွေးညင်းတစ်ပင်လောက်တောင် လှုပ်ရှားအောင် မာရ်နတ်က မစွမ်းဆောင်နိုင်ခဲ့ပါဘူး" တဲ့။
ရဟန္တာတွေမှာ အစကတည်းက "ကြောက်စိတ်" (Fear) မရှိဘူး။ "ရာဂ" (Lust) လည် မရှိဘူး။ ဒါ့အပြင် သတိ အသိ နဲ့ ကြည့်နေတဲ့ ရဟန္တာအရှင်မြတ်တွေရဲ့ တည်ကြည်မှု၊ သိမြင်မှု နဲ့ စိတ်စွမ်းအားတွေ ကြောင့် ... မာရ်နတ်ဟာ ရှက်ပြီး သူ့စစ်တပ်ကို ပြန်ခေါက်သွားရပါတော့တယ်။
မာရ်နတ်က ဘယ်လိုပဲ "Trigger" ဆွဲဆွဲ၊ ဟိုဘက်က ဘာမှ "React" မလုပ်တဲ့အခါ မာရ်နတ်ပဲ တုန်လှုန်သွားခဲ့ရတာပါ။

🎓 အနှောက်အယှက်တွေကို ဘယ်ဆို ရင်ဆိုင်မလဲ?
How to deal with Negativity?
ဘဝမှာလည်း ကိုယ်အဆင်ပြေနေရင် မလိုလားတဲ့ မာရ်နတ်လို လူတွေ၊ အနှောင့်အယှက်တွေ ဝင်လာတတ်ပါတယ်။
* သူတို့က ကိုယ့်ကို ဒေါသထွက်အောင် စာဆွဲမယ် (Trigger)။
* ကြောက်အောင် ခြိမ်းခြောက်မယ်။
* မကောင်းသတင်းတွေ လွှင့်မယ်။
အဲဒီအခါ မဟာသမယသုတ်က နည်းလမ်းကို သုံးပါ။

၁။ ပြာပြာသလဲ ပြန်မတုံ့ပြန်ပါနဲ့ (Don't react impulsively)။
၂။ "သူလာနှောင့်ယှက်နေပါလား" လို့ သတိနဲ့ သိမှတ်လိုက်ပါ ။ သူ့အကြောင်းကို သိအောင်လုပ်ပါ(Acknowledge with Mindfulness)။
၃။ ကိုယ့်စိတ်ကို တည်ငြိမ်အောင်ထားပါ (Stay Calm & Equanimous)။

ကိုယ့်ဘက်က သတိ အသိ မေတ္တာနဲ့ တည်ငြိမ်နေသရွေ့၊ ကိုယ့်ရဲ့ "မွေးညင်းတစ်ပင်" တောင် မလှုပ်သရွေ့... အဲဒီ Haters တွေ၊ ပြဿနာတွေဟာ သူ့အလိုလို ရှက်ပြီး ထွက်သွားရပါလိမ့်မယ်။
"ရန်သူအပေါင်းကို သည်းခံခြင်း၊ တည်ငြိမ်ခြင်းတို့ဖြင့် အောင်နိုင်သူများ ဖြစ်ကြပါစေ"။
အဲ့လိုပါပဲ။ အပြင်ရန်သူတွေသာမက
အတွင်းရန်သူတွေ ဖြစ်တဲ့ ရာဂ ဒေါသတွေ ဝင်လာတဲ့အခါလည်း သိအောင်အားထုတ်ပါ။ သတိ အသိနဲ့ အားထုတ်တဲ့အခါ အတွင်း ရန်သူတွေလည်း မနှောက်ယှက်နိုင်တော့ပါဘူး။

မေတ္တာဖြင့်- မေတ္တာခံယူလျက်
#အရှင်ဉာဏဝရ(ပါရမီ)


#မဟာသမယသုတ်

#မဟာသမယအခါတော်နေ့

လူ့ဘဝဆိုတာ ဒီလိုပဲကွဲ့ လူ့ဘဝဆိုတာ ကိုယ်ဖြစ်ချင်သလို ဖြစ်တာမဟုတ်ဘူး ။သူ ဖြစ်ချင်သလိုဖြစ်တာကို ကိုယ်က ရင်ဆိုင်ကျော်လွှားနိ...
19/01/2026

လူ့ဘဝဆိုတာ ဒီလိုပဲကွဲ့

လူ့ဘဝဆိုတာ ကိုယ်ဖြစ်ချင်သလို ဖြစ်တာမဟုတ်ဘူး ။

သူ ဖြစ်ချင်သလိုဖြစ်တာကို ကိုယ်က ရင်ဆိုင်ကျော်လွှားနိုင်ရတာ ။

အမေတို့ အမေက ပြောဖူးတယ် ။ ငါ့သမီးရယ် လူ့ဘဝဆိုတာ လက်ဝှေ့သမားလိုပါပဲတဲ့ ။ လက်ဝှေ့သမားက ကြိုးဝိုင်းထဲ ဝင်လာလိုက်တော့ တစ်ဖက်လူကို ငါဘယ်လိုထိုးလိုက်မယ်ဆိုတဲ့ ထိုးပေါက်တွေ အများကြီးနဲ့ပေါ့ ။ဒါပေမဲ့ တကယ်ထိုးကြတဲ့အခါမှာတော့ ကိုယ်က ထိုးရဖို့နေနေသာသာ သူ့လက်သီးတွေကိုပဲ မနည်းရှောင်နေရတာတဲ့ ။

လူဖြစ်လာပြီဆိုရင် ကိုယ်က အရှုံးမပေးနိုင်တော့ ဖြစ်အောင် ရင်ဆိုင်ရတာပဲ ။ သတ္တိကောင်းလိုက်တာလို့ မအောက်မေ့နဲ့ ။ ဘဝရပ်တည်နိုင်ဖို့အတွက် သတ္တိမရှိရင်လည်း ရှိလိုက်ရတာပဲ ။ လူတွေအားလုံးဟာ ဒီလိုပဲ ရင်ဆိုင်စရာရှိရင် ရင်ဆိုင်ကြရတယ် ။

လူ့ဘဝဆိုတာ ဘဝတစ်လျှောက်လုံး ရင်ဆိုင်ဖြေရှင်းသွားရမယ့် ကိစ္စချည်းပဲ ။ အဲဒီအခါမှာ လိုက်လျောညီထွေ ကျင့်သုံးလိုက်ရတာမျိုးလည်း ရှိတယ် ။ ကိုယ်က သတ္တိနဲ့ကျော်လွှားဖြတ်သန်းလိုက်ရတာမျိုးလည်း ရှိတယ် ။

အဲဒီလို တိုက်ပွဲတွေမှာ ကိုယ် ကနိုင်လိုက်တဲ့အခါလည်း
နိုင်ရှုံးတဲ့အခါလည်း ရှုံးပေါ့ ။ ရှုံးရင် ဖြစ်ရလေခြင်းဆိုပြီး ထိုင်ငိုနေလို့ရတာ မဟုတ်ဘူး ။ ကိုယ့်ဘဝအတွက် အရှုံးထဲက ကုန်းထရတာပဲ ။

လူဆိုတာ ဖြစ်လာရင် လူစွမ်းလူစကတော့ ပေါ်ရတော့တာပဲ
ကဲ မင်းတို့လည်း ငယ်သေးတော့ အတွေ့အကြုံတွေက နည်းသေးတယ် ။ ဘာပဲဖြစ်ဖြစ် တွေ့လာ ကြုံလာရရင်တော့ ခံနိုင်ရည်ရှိကြရမှာပဲ ။

▪️လူထုဒေါ်အမာ (အမေ့ရှေးစကားများ)


ဓမ္မစကြာလာ ဘဝနေနည်း အနုပညာ (သို့မဟုတ်) The Art of Balanced Living 🛞 ဓမ္မစကြာဟာ မြတ်ဗုဒ္ဓရဲ့ (ပထမဆုံး တရားဦး) ဖြစ်သလို၊ လ...
19/01/2026

ဓမ္မစကြာလာ ဘဝနေနည်း အနုပညာ (သို့မဟုတ်) The Art of Balanced Living

🛞 ဓမ္မစကြာဟာ မြတ်ဗုဒ္ဓရဲ့ (ပထမဆုံး တရားဦး) ဖြစ်သလို၊ လောကအမြင်ကို ပြောင်းလဲပစ်ခဲ့တဲ့ တော်လှန်ရေးကြီးတစ်ခုလည်း ဖြစ်ပါတယ်။ ဓမ္မစကြာက လောကုတ္တရာဉာဏ်အလင်းပွင့်ဖို့ ရည်ရွယ်ပေမယ့်၊ လောကီဘဝမှာပါ ဒီနည်းလမ်းတွေကို အသုံးပြုရင် လှပပြီး အနုပညာမြောက်တဲ့ဘဝကို တည်ဆောက်နိုင်မှာပါ။

ဓမ္မစကြာဆိုတာ ဘုရားစင်ရှေ့မှာ ရွတ်ဖို့သက်သက် မဟုတ်ပါဘူး။ ဒါဟာ "The Art of Balanced Living" (မျှတစွာ နေထိုင်နည်းအနုပညာ) ကို သင်ပေးတဲ့ Masterclass တစ်ခုပါ။
မြတ်စွာဘုရားက မိဂဒါဝုန်တောမှာ ပဉ္စဝဂ္ဂီ ၅ ဦးကို First Lecture ပေးတုန်းက လူငယ်တွေ ဒီနေ့ထိ ကြုံတွေ့နေရတဲ့ အစွန်းတရားကြီး နှစ်ပါးကို အရင်ဆုံး ထောက်ပြခဲ့တယ်။

🚫 1. The Trap of "Pleasure Seeking" (ကာမသုခလ္လိကာနုယောဂ)
ဒါကတော့ "YOLO" (You Only Live Once) ဆိုပြီး အပျော်အပါး၊ အစားအသောက်၊ အာရုံခံစားမှုတွေနောက် လိုက်ပြီး အချိန်ဖြုန်းနေတာမျိုးပါ။
Social Media, Facebook, TikTok မှာပဲ အချိန်ကုန်နေတာ၊ Game တွေပဲ စွဲနေတာ၊ ရည်မှန်းချက်မရှိဘဲ Comfort Zone မှာပဲ ပျော်နေတာမျိုးပေါ့။
မြတ်စွာဘုရားက ဒါကို "ယုတ်ညံ့တယ်၊ ကိုယ်ရည်ကိုယ်သွေးမတက်ဘူး၊ အကျိုးမရှိဘူး" (ဟီနော ဂမ္မော ပေါထုဇ္ဇနိကော အနရိယော အနတ္ထသံဟိတော) လို့ သုံးသပ်ပြပါတယ်။

🚫 2. The Trap of "Self-Torture" (အတ္တကိလမထာနုယောဂ)
ဒါကတော့ ဒီဘက်ခေတ် "Toxic Hustle Culture" ပါပဲ။
အနားမယူဘဲ အလုပ်တွေလုပ်၊ အိပ်ချိန်တွေလျှော့၊ ကိုယ့်ကိုယ်ကိုယ် ဖိအားတွေပေး၊ Stress တွေများပြီး အားအင်ကုန်ခမ်း (Burnout) သွားတဲ့အထိ ရုန်းကန်တာမျိုးပါ။ မြတ်စွာဘုရားက ဒါကိုလည်း "ဆင်းရဲတယ်၊ အကျိုးစီးပွား
မရှိဘူး" (ဒုက္ခော အနရိယော အနတ္ထသံဟိတော) လို့ ဆိုပါတယ်။ ဦးဇင်းကိုယ်တိုင်လည်း ဒီလိုမျိုး ဖြစ်ဖူးပါတယ်။ ဒီစာက ကိုယ့်ကိုယ်ကိုလည်း သတိပေးတဲ့အနေနဲ့ ရေးတာပါ။

3. The Solution: "The Middle Way" (မဇ္ဈိမပဋိပဒါ)
ဘုရားရှင်က "ငါ ဒီအစွန်းနှစ်ဖက်လုံးကို ရှောင်ပြီး လမ်းအသစ်တွေ့ပြီ" တဲ့။ အဲဒါကတော့ Middle Way (အလယ်အလတ်လမ်းစဉ်) ပါ။ ဒါဟာ "ပျင်းတာ" မဟုတ်သလို၊ "ပင်ပန်းခံတာ" လည်း မဟုတ်ပါဘူး။ "Effective" (ထိရောက်မှု) ဖြစ်တာပါ။ အစွန်းနှစ်ဖက်ကြားက "Sweet Spot" ကို ရှာဖွေနိုင်ခြင်းပါ။

ဒါက မြတ်စွာဘုရားရှင်ဟောကြာတဲ့ ပညာရှိဟာ "တစ်ဖက်မြင်မဟုတ်၊ နှစ်ဘက်မြင်ပါ။" ဆိုတဲ့ အဆုံးအမနဲ့လည်း ညီပါတယ်။
ကိုယ့်ရည်မှန်းချက်အတွက် ကြိုးစားမယ်၊ ဒါပေမဲ့ ကိုယ့်ကျန်းမာရေးနဲ့ စိတ်ကို မထိခိုက်စေရဘူး။
အနားယူမယ်၊ ဒါပေမဲ့ ပျင်းရိမနေဘူး။
မိမိအတွက် တစ်ဖို့တည်း
မဟုတ်ဘူး။ သူတပါးအတွက်လည်း ပါစေတယ်။
ယခုပစ္စုပ္ပန်ချမ်းသာတင်မက အနာဂတ်ချမ်းသာလည်း ပါစေတယ်။
‌ေလာကီရေးသက်သက်အတွက်မဟုတ်ဘူး၊ လောကုတ္တရာရေး လည်း ပါတယ်။
ရုပ်ချမ်းသာရေးအတွက်တင်သာမက စိတ်ချမ်းသာရေးကိုလည်း ပါစေတယ်။
🍀🍀🍀🍀

ပြဿနာဖြေရှင်းနည်း (၄) ဆင့်🙏
သစ္စာ (၄) ပါးဟာ ပြဿနာအားလုံးဖြေရှင်းနည်း "The 4-Step Problem Solving Framework" ကြီးပါပဲ။
* ဒုက္ခသစ္စာ (The Problem): ငါ့ဘဝမှာ ဘာတွေ စိတ်ညစ်စရာ၊ အဆင်မပြေတာတွေ ရှိနေလဲ? (Reality ကို အမှန်အတိုင်း လက်ခံပါ)။
* သမုဒယသစ္စာ (The Cause): ဒီပြဿနာတွေ ဘာကြောင့်ဖြစ်တာလဲ? (လိုချင်တပ်မက်မှုကြောင့်လား၊ မျှော်လင့်ချက်တွေများနေလို့လား၊ အကြောင်းတရားကို ရှာပါ)။
* နိရောဓသစ္စာ (The Goal): ဒီပြဿနာတွေ ချုပ်ငြိမ်းသွားရင် ဘယ်လိုအခြေအနေ ရောက်မလဲ? (Peace of Mind ကို မြင်အောင်ကြည့်ပါ)။
* မဂ္ဂသစ္စာ (The Solution): အဲဒီပန်းတိုင်ရောက်ဖို့ ငါ ဘာတွေ လုပ်ရမလဲ? (Action Plan ချပါ)။

🛠️ The Action Plan: မဂ္ဂင် (၈) ပါး (The Toolkit for Success)
ပန်းတိုင်ရောက်ဖို့ ဘယ်လိုလမ်းစဉ်နဲ့ သွားမလဲ? ဘုရားရှင်က ကိရိယာ Tools (၈) မျိုး ပေးထားပါတယ်။ ဒါကို အုပ်စု(၃) ခု ခွဲပြီး ကျင့်သုံးနိုင်ပါတယ်။

အုပ်စု (၁): Wisdom & Mindset (ပညာ - အမြင်မှန်နှင့် အတွေးမှန်)
၁။ သမ္မာဒိဋ္ဌိ (မှန်ကန်တဲ့ အသိအမြင်)
ဘဝမှာ ဘာက အရေးကြီးလဲ၊ ဘာက အမှန်လဲ၊ ဘာက အမှားလဲဆိုတာ ကွဲကွဲပြားပြားသိတာ (Core Values)။ ဘယ်ဟာက ကုသိုလ်လဲ၊ ဘယ်ဟာက အကုသိုလ်လဲ၊ ဘယ်ဟာက မိမိ သူတပါး အများအတွက် အကျိုးစေသလဲ။ ဘယ်အရာက အကျိုးမဲ့စေသလဲ? အကြောင်းအကျိုးကို ဆက်စပ်မြင်တတ်တာပါ။

၂။ သမ္မာသင်္ကပ္ပ (မှန်ကန်တဲ့ အကြံအစည်)
မှန်ကန်တဲ့ ရည်ရွယ်ချက်ပါ။ ကိုယ်လုပ်တဲ့အလုပ်အပေါ်မှာ စေတနာမှန်ဖို့၊ သူတစ်ပါးကို မထိခိုက် မနစ်နာစေဖို့၊ မေတ္တာနဲ့ယှဉ်တဲ့ Growth Mindset နဲ့ တိုးတက်ချင်စိတ်ရှိဖို့ လိုပါတယ်။
🪷🪷🪷

အုပ်စု(၂) : Ethics & Discipline (သီလ - ကိုယ်ကျင့်တရား)
၃။ သမ္မာဝါစာ (မှန်ကန်တဲ့အပြောအဆို)
စကားပြော ဆိုရာမှာ အကျိုးမဲ့တာတွေကို ရှောင်မယ်။ မဟုတ်မမှန်တာ၊ ကုန်းတိုက်တာ၊ ကြမ်းတမ်းတာတွေ ရှောင်မယ်။ ကောင်းတဲ့စကား မှန်ကန်အကျိုးရှိတဲ့ စကားကိုပဲ ပြောဆိုမယ်။ Communication Skill ကောင်းတာဟာ အောက်မြင်မှု အတွက် အဓိက သော့ချက်ပါပဲ။

၄။ သမ္မာကမ္မန္တ (မှန်ကန်တဲ့လုပ်ရပ်)
ကိုယ့်ရဲ့ လုပ်ရပ်တွေက အပြစ်ကင်းသန့်ရှင်းနေရမယ်။ လူမြင်ကောင်းအောင် ဟန်ဆောင်တာမဟုတ်ဘဲ တကယ့် ဖြောင့်မတ်မှု ရှိရပါမယ်။

၅။ သမ္မာအာဇီဝ (မှန်ကန်တဲ့ အသက်မွေးမှု)
အသက်မွေးဝမ်းကျောင်း ဖြူစင်ရမယ်။ သူတစ်ပါး ဒုက္ခရောက်မှ ကိုယ်ကောင်းစားမယ့် အလုပ်မျိုး၊ မတရားတဲ့ နည်းလမ်းနဲ့ ငွေရှာတာမျိုးတွေကို ရှောင်ကြဉ်ပြီး Professional ကျကျ ရပ်တည်တာပါ။
🪷🪷🪷

အုပ်စု (၃): Focus & Mental Strength (သမာဓိ - စိတ်စွမ်းအား)
* ၆။ သမ္မာဝါယာမ (မှန်ကန်တဲ့လုံ့လဝီရိယ):
မကောင်းတာတွေ ဖယ်ရှားပြီး၊ ကောင်းတာတွေ တိုးပွားအောင် ကြိုးစားတာပါ။ ကိုယ့်ရဲ့ Skill တွေကို အမြဲ Upgrade လုပ်နေတာ၊ အားမလျှော့တမ်း ကြိုးစားတာ (Resilience) ပါ။
🪷🪷🪷
၇။ သမ္မာသတိ (မှန်ကန်တဲ့သတိ):
လက်ရှိအချိန်မှာ နေတတ်ခြင်းပါ။ အတိတ်ကို တွေးပြီး ပူမနေဘူး၊ အနာဂတ်ကို တွေးပြီး ကြောက်မနေဘူး။ "Here and Now" မှာ Focus လုပ်ပြီး သတိ-အသိနဲ့နေတာပါ။

၈။ သမ္မာသမာဓိ (မှန်ကန်‌တဲ့စိတ်တည်ကြည်ခြင်း):
စိတ်တည်ငြိမ်မှုပါ။ အလုပ်လုပ်ရင် အာရုံစူးစိုက်မှု (Deep Work/ Flow State) ရအောင် ထားနိုင်ခြင်း။ စိတ်မပျံ့လွင့်မှ ဆုံးဖြတ်ချက် (Decision Making) တွေ မှန်ကန်မှာပါ။
🪷🪷🪷🪷
ဘဝမှာ အောင်မြင်ချင်ရင် ကိုယ့်ကိုယ်ကိုယ် ညှဉ်းပန်းနှိပ်စက်စရာ မလိုသလို၊ အပျော်အပါးမှာပဲ နစ်မွန်းနေလို့လည်း မရပါဘူး။
ဓမ္မစကြာလာ "မဇ္ဈိမလမ်းစဉ်" အတိုင်း Smart ကျကျ၊ Balance ဖြစ်ဖြစ် လျှောက်လှမ်းနိုင်မှသာ စစ်မှန်တဲ့ ငြိမ်းချမ်းမှုနဲ့ တိုးတက် အောင်မြင်မှုကို ရရှိမှာ ဖြစ်ပါတယ်။
မဂ္ဂင် (၈) ပါး ဆိုတဲ့ System ကြီးကို ကိုယ့်ဘဝရဲ့ Operating System (OS) အဖြစ် ထည့်သွင်းလိုက်ပါ။ ဒါဆို တိုးတက်အောင်မြင် ပျော်ရွှင်ငြိမ်းချမ်းမှုကို ရမှာ အသေအချာပါ။

ဓမ္မစကြာလာ ဘဝနေနည်းအနုပညာဖြင့်
ဒုက္ခဆိုတဲ့ပြဿနာတွေကို ရှင်းထုတ်ပြီး နိဗ္ဗာန် (Peace) ဆိုတဲ့ ပန်းတိုင်ဆီသို့ လှမ်းကိုင်နိုင်ကြပါစေ။

ဒီပိုစ်လေးက ညီငယ် ညီမငယ်တွေအတွက် ဓမ္မစက္ကပဝတ္တနသုတ်ကို လက်တွေ့ဘဝနဲ့ ချိတ်ဆက်ပြီး လောကီဘဝမှာ မဟာဗျူဟာကျကျနေထိုင်ခြင်း Strategic Living ရှုထောင့်ကနေ ရေးသားပေးလိုက်တာပါ။

"ဓမ္မစကြာ အဆုံးအမနဲ့အညီ မျှတ လှပသောဘဝကို ပိုင်ဆိုင်နိုင်ကြပါစေ"
ဓမ္မပြည့်ဝ နှလုံးလှပါစေ" 🙏
🛞🛞🛞🛞

မေတ္တာဖြင့်- မေတ္တာခံယူလျက်
အရှင်ဉာဏဝရ(ပါရမီ)




မေတ္တာသုတ်လာ ဘဝနေထိုင်နည်း အနုပညာ 🍀 (The Art of Living) မေတ္တသုတ်ကို ရိုးရာရွတ်ဖတ်ပူဇော်စရာတစ်ခု အနေနဲ့သာမကဘဲ စိတ်ကျန်းမ...
17/01/2026

မေတ္တာသုတ်လာ ဘဝနေထိုင်နည်း အနုပညာ 🍀 (The Art of Living)

မေတ္တသုတ်ကို ရိုးရာရွတ်ဖတ်ပူဇော်စရာတစ်ခု အနေနဲ့သာမကဘဲ စိတ်ကျန်းမာရေး၊ Emotional Intelligence (စိတ်ခံစားမှုဆိုင်ရာ ဉာဏ်ရည်) နဲ့လူမှုဆက်ဆံရေး ရှုထောင့်တွေကနေ ချိတ်ဆက်ပြီး ပိုစ်လေး ရေးပေးလိုက်ပါတယ်။

မေတ္တသုတ် ဆိုတာ ဘုရားစင်ရှေ့မှာ ရွတ်ဖတ်ဖို့သက်သက် မဟုတ်ပါဘူး။ ဒါဟာ ဒီဘက်ခေတ်လူငယ်တွေ အလိုချင်ဆုံးအရာတစ်ခုဖြစ်တဲ့ "Inner Peace & Healthy Relationships" (စိတ်ငြိမ်းချမ်းမှုနဲ့ ကျန်းမာတဲ့ ဆက်ဆံရေး) ကို တည်ဆောက်ပေးတဲ့ ကိရိယာ တစ်ခုပါ။
လူအများစုက မေတ္တာသုတ်မှာပါတဲ့ "သက္ကော ဥဇူစ သုဟုဇူစ.... အစရှိတဲ့ (၁၅) ချက်ကို သတိမထားမိကြပါဘူး။ ဒီအချက်တွေဟာ "လျစ်လျုရှုထားခံရတဲ့ ရတနာတွေ"ပမာ ဖြစ်နေပါတယ်။ ဒီပိုစ်မှာတော့ ခေတ်လူငယ်တွေအတွက် ဒီရတနာ (၁၅)လုံးကို ထုတ်ဖော် အသုံးပြုနည်းကို ရေးမှာပါ။

တကယ်ဆိုရင် မေတ္တာမပို့ခင် ကိုယ့်မှာ ရှိထားရမယ့် Soft Skills , Soft power (၁၅) ချက် ကို မြတ်ဗုဒ္ဓက အရင်သင်ပေးထားတာပါ။ ဒါတွေပြည့်စုံမှ ကိုယ့်မေတ္တာက စစ်မှန်မှာပါ။

(၁) *သက္ကော : စွမ်းဆောင်နိုင်ပါစေ။ မကောင်းတာကို ရှောင်နိုင်စွမ်းရှိသူ၊ ကောင်းတာကို ဆောင်ရွက်နိုင်သူဖြစ်ပါစေ။ (ဒါက ပထမဆုံးနဲ့ အရေးကြီးဆုံးပါ။ နောက်အချက်တွေကလည်း ဒီအချက်ပေါ် အခြေခံပါတယ်)

(၂+၃) * ဥဇူစ သုဟုဇူစ: ကိုယ်ရော စိတ်ပါ ရိုးသားဖြောင့်မတ်ပါ။ မလှည့်စားပါနဲ့။ သူတပါးမပေါ်မှာရော မိမိကိုယ်တိုင်မပေါ်မှာပါ ရိုးသားပါ။
(၄) * သုဝစော စ : ပြောဆိုဆုံးမရ လွယ်ကူသူဖြစ်ပါစေ။ အစွဲကင်းပြီး နားကြီးကြီး နဲ့ နားထောင်တတ်ပါစေ။ Feedback ကို လက်ခံနားထောင်တတ်ပါစေ။

(၅) မုဒု: စိတ်ထား နူးညံ့ပျော့ပျောင်းပါစေ။ မာကျောခက်ထန်နေတာမျိုး၊ ရိုင်းစိုင်းတာမျိုး ရှောင်ပါ။ (Humble & Gentle) မျက်နှာကြီးကိုလည်း တင်းမာ မထားပါနဲ့။

(၆) * အနတိမာနီ: မာနမကြီးပါနဲ့။ မထောင်လွှား၊ မမောက်မာပါနဲ့။ ငါမှ ငါ၊ ငါပဲမှန်တယ်ဆိုတဲ့ အတွေးမျိုး (Narcissistic traits) တွေကို လျှော့ပါ။

(၇)သန္တုဿကော စ: ရောင့်ရဲလွယ်ပါစေ။ လိုချင်တပ်မက်မှုတွေ၊ ရုပ်ဝတ္ထုတွေ နောက်ကို အရမ်းမလိုက်ပါနဲ့။
(၈) သုဘရော စ: မွေးမြူလွယ်သူဖြစ်ပါစေ။ ရှင်သန်လွယ်သူဖြစ်ပါစေ။ ဇီဇာကြောင်သူ မဖြစ်ပါစေနဲ့။
(၉) အပ္ပကိစ္စော စ: အာရုံများစရာ၊ စိတ်ရှုပ်စရာ အရေးမပါတဲ့ အပေါ်ယံကိစ္စတွေကို လျှော့ချထားပါ။
(၁၀) သလ္လဟုကဝုတ္တိ : Simple Lifestyle (ရိုးရှင်းတဲ့ နေထိုင်မှု)ကို ကျင့်သုံးပါ။ Busy life ထက် Meaningful life ကို ဦးစားပေးပါ။

(၁၁) သန္တိန္ဒြိယော စ : ငြိမ်သက် ငြိမ်းချမ်းတဲ့ ဣန္ဒြေရှိပါစေ၊ မေတ္တာဓာတ်ကိန်းနေရင် အကြည်ဓာတ်ကလေးနဲ့ မြင်လိုက်တာနဲ့ အေးချမ်းနေမှာပါ။

(၁၂) နိပကော စ- ရင့်ကျက်တဲ့ ဉာဏ်ပညာရှိပါစေ။
(၁၃) အပ္ပဂဗ္ဘော: ကိုယ်နှုတ်နှလုံး ကြမ်းတမ်းခြင်း မခက်ထန်ပါနဲ့။
(၁၄) ကုလေသွနနုဂိဒ္ဓေါ: တွယ်တာ တပ်မက်မှု ကင်းစင်ပါစေ။

(၁၅) န စ ခုဒ္ဒမာစရေ ကိဉ္စိ, ယေန ဝိညူ ပရေ ဥပဝဒေယျုံ: ပညာရှိသူတော်ကောင်းတို့ ကဲ့ရဲ့ကြတဲ့ ဒုစရိုက်ကို နည်းနည်းလေးမှ မပြုပါနဲ့။

❤️ The Art of Loving-Kindness (မေတ္တာပွားနည်းအနုပညာ) 🍀
ခုလို ကိုယ့်စိတ်ကို ပြင်ဆင်ပြီးပြီဆိုရင်တော့ မေတ္တာ စ ပို့လို့ရပါပြီ။

သုခိနောဝ ခေမိနော ဟောန္တု,
သဗ္ဗသတ္တာ ဘဝန္တု သုခိတတ္တာ။ 🌷
သတ္တဝါအားလုံး ဘေးရန်ကင်းကွာ ကျန်းမာချမ်းသာပါစေ။🌷

* No Drama, No Hate: တစ်ယောက်နဲ့တစ်ယောက် အမုန်းမပွားပါနဲ့။ သူတပါး ဒုက္ခရောက်တာကို လိုလားတဲ့စိတ် (Ill-will) တွေကို ဖယ်ရှားပါ။
* မိခင်တစ်ယောက်က တစ်ဦးတည်းသော သားသမီးကို အသက်ပေးပြီး ကာကွယ်စောင့်ရှောက်သလိုမျိုး... သတ္တဝါအားလုံးအပေါ်မှာ အကန့်အသတ်မရှိတဲ့ မေတ္တာတရာကို (Boundless Love) ထားကြည့်ပါ။

🧘 Mental Health Benefits
မေတ္တသုတ်ကို လက်တွေ့ကျင့်သုံးရင် ဘာရမလဲ?
Toxic Free ဖြစ်ပြီး Positive Vibes တွေပဲ လိုချင်ရင် မေတ္တသုတ်ကို ကျင့်ပါ။

၁။ အိပ်ပျော်လွယ်တယ် (အိပ်မပျော်တဲ့ Insomnia ပြဿနာ ကင်းဝေးတယ်)။
၂။ အိပ်မက်ဆိုးတွေ မမက်ဘူး။
၃။ လူချစ်လူခင် များတယ် (Social interaction ကောင်းလာတယ်)။
၄။ စိတ်တည်ငြိမ်ပြီး (သမာဓိ) အားကောင်းလာတယ်။

ဒါကြောင့်... စိတ်ညစ်စရာတွေများတဲ့ လောကကြီးမှာ ကိုယ့်စိတ်လေး အေးချမ်းနေဖို့၊ ကိုယ့်ပတ်ဝန်းကျင်ကို Positive Energy တွေ ပေးနိုင်ဖို့ "မေတ္တသုတ်" ကို နေ့စဉ် ကျင့်သုံးကြရအောင်။

"လောကကြီး ငြိမ်းချမ်းဖို့ ကိုယ်တိုင်ကစပြီး မေတ္တာရှိဖို့ လိုပါတယ်"

မေတ္တာပြည့်ဝ နှလုံးလှပါစေ 🌷🍀

မေတ္တာဖြင့်- မေတ္တာခံယူလျက်
အရှင်ဉာဏဝရ(ပါရမီ)

​

Address

Yangon

Telephone

+959254470824

Website

Alerts

Be the first to know and let us send you an email when Tyron 's Talking Therapy posts news and promotions. Your email address will not be used for any other purpose, and you can unsubscribe at any time.

Shortcuts

Share

Share on Facebook Share on Twitter Share on LinkedIn
Share on Pinterest Share on Reddit Share via Email
Share on WhatsApp Share on Instagram Share on Telegram