24/02/2026
ယခုရက်ပိုင်း ရန်ကုန်မြို့ရဲ့ လေထုအရည်အသွေး (AQI) ဟာ အန္တရာယ်ရှိတဲ့ အနီရောင်အဆင့်ကို ရောက်ရှိနေပါတယ်။ အပူရှိန်ပြင်းထန်မှုနဲ့အတူ မီးခိုးမြူမှုန်တွေက ကျန်းမာရေးကို ခြိမ်းခြောက်လာနိုင်တဲ့အတွက် မိမိကိုယ်ကိုနဲ့ မိသားစုဝင်တွေကို အထူးဂရုစိုက်ဖို့ တိုက်တွန်းနှိုးဆော်လိုက်ပါတယ်။
လေထုညစ်ညမ်းမှုကြောင့် ချောင်းဆိုးခြင်း၊ ရင်ဘတ်အောင့်ခြင်း၊ အသက်ရှူရခက်ခဲခြင်းတို့အပြင် အပူဒဏ်ကြောင့် မူးဝေမောပန်းတာမျိုးတွေ ဖြစ်တတ်ပါတယ်။ အထူးသဖြင့် ကလေးငယ်တွေနဲ့ အသက်ရှူလမ်းကြောင်း ရောဂါအခံရှိသူတွေအတွက် ပိုမိုသတိထားဖို့ လိုအပ်ပါတယ်။
လေထုညစ်ညမ်းမှုကို ကာကွယ်ဖို့အတွက် -
* အပြင်ထွက်တဲ့အခါတိုင်း သေးငယ်တဲ့ ဖုန်မှုန်တွေကိုပါ စစ်ထုတ်ပေးနိုင်တဲ့ N95 (သို့မဟုတ်) KF94 Mask တွေကို မမေ့မလျော့ တပ်ဆင်ပါ။
* အပြင်ကပြန်လာတိုင်း အဝတ်အစားများကို ချက်ချင်းလဲလှယ်ပြီး ကိုယ်လက်သန့်စင်ပါ။ ဖုန်မှုန်များက ဆံပင်နှင့် အရေပြားပေါ်တွင် ကပ်ငြိနေနိုင်လို့ ဖြစ်ပါတယ်။ မျက်လုံးထဲက ဖုန်မှုန်တွေကို ဖယ်ရှားဖို့ မျက်စဉ်းဆေး ကိုအသုံးပြုနိုင်ပါတယ်။
* အပူဒဏ်နဲ့ လေထုဒဏ်ကို ခံနိုင်ရည်ရှိဖို့ ရေများများသောက်ပေးပါ။
* မလိုအပ်ဘဲ အပြင်ထွက်ခြင်း၊ ပြင်ပမှာ အားကစားလုပ်ခြင်းတွေကို ရှောင်ကြဉ်ပြီး ပြတင်းပေါက်တွေကို လုံအောင်ပိတ်ထားပါ။
* ရင်ကြပ်ဝေဒနာရှင်တွေအနေနဲ့ မိမိတို့ သောက်နေကျ/ရှူနေကျ ဆေးဝါးတွေကို အမြဲဆောင်ထားပြီး လိုအပ်ပါက ဆရာဝန်နဲ့ ချက်ချင်းတိုင်ပင်ပါ။
မိဘပြည်သူများအားလုံး ဘေးအန္တရာယ်ကင်းဝေးပြီး ကျန်းမာသော နေ့ရက်များစွာကို ဖြတ်သန်းနိုင်ပါစေကြောင်း AA Medical Products Limited မှ ဆုမွန်ကောင်းတောင်းရင်း မေတ္တာဖြင့် သတိပေးနှိုးဆော်အပ်ပါတယ်ရှင်။
