24/02/2025
ဆီးချို သွေးချို ရောဂါနှင့် လွဲမှားသော
အယူအဆများ အကြောင်းသိကောင်းစရာ...🩸
✖ ဆီးချိုသွေးချိုရောဂါသည် မျိုးရိုးရှိသူများတွင်သာ ဖြစ်နိုင်သည်။
✔ မှားယွင်းသောအယူအဆဖြစ်ပါသည်။ ဆီးချိုမျိုးရိုးရှိသူများသည် ဆီးချိုမျိုးရိုး မရှိသူများထက် ပို၍ ဆီးချို သွေးချိုရောဂါ ပိုမိုဖြစ်နိုင်ကြသည်။ သို့သော် မျိုးရိုးမရှိသော်လည်း စားသောက်နေထိုင်မှုပုံစံ မှားနေကြသူများသည် ဆီးချိုမျိုးရိုး မရှိလင့်ကစား ဆီးချို သွေးချိုရောဂါ ဖြစ်လာနိုင်ကြသည်။ ဆီးချိုမျိုးရိုး ရှိရှိ / မရှိရှိ ကျန်းမာရေးနှင့် ညီညွတ်သော စားသောက်နေထိုင်နိုင်မှုက အရေးအကြီးဆုံးဖြစ်ပါသည်။ . . . .
✖ အဝလွန်သူများသာ ဆီိးချိုသွေးချိုဖြစ်နိုင်သည်။
✔ အဝလွန်သူများက သာမန်လူများထက် ပို၍ ဆီးချို သွေးချို အဖြစ်များကြသော်လဲ ပုံမှန်ကိုယ်အလေးချိန် ရှိသူများနှင့် ပိန်သူများသည် ဆီးချိုသွေးချိုရောဂါ မဖြစ်ဘဲမနေကြပါ။ ကျန်းမာရေးနှင့် မညီညွတ်သော စားသောက်နေထိုင်မှုများက ပိန်သူများ၊ အဝမလွန်ကဲသူများကိုပါ ဆီးချို သွေးချို ဖြစ်စေနိုင်ပါသည်။ . . . .
✖ မြို့တွင်နေထိုင်သူများသာ ဆီးချို သွေးချို ဖြစ်နိုင်သည်။
✔ မြို့ပြများတွင် နေသူများသည် ကျေးလက်ဒေသတွင် နေထိုင်ကြမှုများထက် နှစ်ဆပို၍ ဆီးချို သွေးချို ဖြစ်နိုင်ကြပါသည်။ လူနေမှုပုံစံ ကွာခြားခြင်းကြောင့် ပိုမိုဖြစ်ပွားရခြင်း ဖြစ်ပါသည်။ သို့ရာတွင် ဆီးချို သွေးချို ရောဂါသည် ကျေးလက်၊ နယ်ဒေသများတွင် နေသူများကိုလည်း လွတ်ငြိမ်းချမ်းသာမပေးပါ။ ရောဂါဖြစ်နိုင်ပါသည်။ . . . .
✖ ချမ်းသာသူများသာ ဆီးချိုဖြစ်သည်။
✔ လွန်စွာမှားယွင်းပါသည်။ ဆီးချို သွေးချို ရောဂါသည် ဆင်းရဲ ချမ်းသာမရွေး လူအားလုံးတွင် ဖြစ်နိုင်ပါသည်။ ဆင်းရဲသူများတွင် ဆီးချိုသွေးချိုရောဂါ ဖြစ်ပေါ်လာလျှင်၊ ရောဂါ၏ဒါဏ်ကို ပိုမိုခံစားရကြောင်း သုတေသနပြုချက်များအရ သိရှိရပါသည်။ . . . .
✖ ဆီးချို သွေးချို ရောဂါကို ကာကွယ်၍ မရပါ။
✔ ဆီးချို သွေးချိုရောဂါကို ကျန်းမာရေးနှင့် ညီညွတ်အောင် စားသောက်နေထိုင်ခြင်း အဝမလွန်ကဲလာအောင် ကာကွယ်တားဆီးခြင်း၊ ကိုယ်လက်လှုပ်ရှားလေ့ကျင့်ခန်းများကို ပုံမှန်ပြုလုပ်ခြင်းအားဖြင့် ၅၈% အထိ ကွာကွယ်တားဆီးနိုင်ကြောင်း တွေ့ရှိထားကြပါသည်။ . . . .
✖ ဆီးချို သွေးချို ဖြစ်သူတိုင်း လူဖြစ်ရကျိုးရှုံးကြသည်။
✔ ဆီးချို သွေးချို ဖြစ်လာသော်လည်း တတ်ကျွမ်းနားလည်သူ ဆရာဝန်များနှင့် ထိရောက်စွာကုသမှုခံယူခြင်းဖြင့် ဆီးချို သွေးချို ရောဂါ၏ နောက်ဆက်တွဲရောဂါများ မဖြစ်ပေါ်လာအောင်၊ လူစဉ်မမီ မဖြစ်ရအောင်၊ လူသက်တမ်းကို သက်တမ်းစေ့ နေထိုင်နိုင်ရအောင် ကုသထား၍ရပါသည်။ . . . .
✖ ဆီးချိုသွေးချိုဖြစ်သူများသည် ရောဂါမရှိသူများကဲ့သို့ ပုံမှန်လူ့ဘဝကို နေထိုင်နိုင်ကြခြင်းမရှိပါ။
✔ ဆီးချိုသွေးချိုရှိလင့်ကစား တက်ကျွမ်းနားလည်သူများနှင့် ထိထိရောက်ရောက်ကုသခြင်း၊ ပုံမှန်စစ်ဆေးမှု့များ ခံယူနေခြင်းများအားဖြင့် ဆီးချိုရှိသော်ငြားလည်း ပုံမှန်လူများကဲ့သို့ပင် ပုံမှန်လူ့ဘဝကို နေထိုင်သွားနိုင်မည်ဖြစ်ပါသည်။ . . . .
✖ ဆီးချိုသွေးချိုရောဂါကို အနောက်တိုင်းဆေးဝါးများဖြင့် ကုသမည့်အစား သစ်ဥ၊ သစ်ဖု၊ သစ်ရွက်များဖြင့် တိုင်းရင်းဆေးနည်းများဖြစ်သာ ကုသသင့်သည်။
✔ အနောက်တိုင်းဆေးဝါးများသည် ဆေးဝါးတစ်ခုကို ဆီးချိုလူနာများတွင် ပေးရန် သင့်၊ မသင့် စနစ်တကျစမ်းသပ်မှု့များ ပြုလုပ်ထားပြီးမှ လူနာများကုသရေးတွင် အသုံးပြုကြသဖြင့် လုံခြုံစိတ်ချရခြင်း ရှပါသည်။ သစ်ဥ၊ သစ်ဖုများနှင့် တိုင်းရင်းဆေးများကမူ ဆီးချိုသွေးချိုလူနာများတွင် ကုသရန် အစွမ်းအာနိသင်ထက်ကြောင်းနှင့် ဘေးအန္တရာယ်ကင်းကြောင်း စနစ်တကျ သုတေသနပြုထားမှု များစွာအားနည်းကြပါသည်။ ထို့ကြောင့် စနစ်တကျ သုတေသနပြုထားသော အနောက်တိုင်းဆေးဝါးများကိုသာ ယုံကြည်အားကိုး၍ စနစ်တကျ ကုသမှုခံယူသင့်ကြပါသည်။ . . . .
✖ ဆီးချိုသွေးချိုကို ကုလည်းမထူးပါ၊ သက်တမ်းတိုမည်သာဖြစ်ပါမည်။
✔ ဆီးချိုသွေးချိုရောဂါကို ထိရောက်စွာ ကုသမှုမခံယူလျှင် သာမန်အားဖြင့် လူုသက်တမ်း ၁၀နှစ်မှ ၁၂နှစ်ခန့် တိုနိုင်ပါသည်။ သို့ရာတွင် စနစ်တကျ ကုသမှုခံယူခဲ့လျှင် သာမန်လူများကဲ့သို့ သက်တမ်းစေ့ နေနိုင်ပါသည်။ . . . .
✖ ဆီးချိုသွေးချို ကုသရေး၊ ကာကွယ်ရေးသည် ဆီးချိုသွေးချိုရောဂါရှိသူများနှင့်သာ သက်ဆိုင်သည်။
✔ လွန်စွာမှားယွင်းပါသည်။ ဆီးချိုသွေးချို ကာကွယ်ရေးလုပ်ငန်းစဉ်များတွင် ဆီးချိုသွေးချိုရောဂါရှိသူများသာမက ၎င်းတို့၏မိသားစုများနှင့် အခြားဆီးချိုမရှိသူများကပါ မိမိ၏ အရေးကိစ္စအနေဖြင့် ပူးပေါင်းပါဝင်ကြရမည် ဖြစ်ပါသည်။ ဆီးချိုသွေးချိုကာကွယ်ရေးတွင် လူတိုင်း၏ အရေးကိစ္စဖြစ်ပါသည်။
■ မြန်မာနိုင်ငံဆီးချိုသွေးချိုရောဂါအသင်း ■
ပြန်လည်မျှဝေရေးသားသူ - အလင်းစစ်
(ဆီးချိုသွေးချိုရောဂါခံစားနေရတိုင်း စိတ်ဓာတ်မကျပါနဲ့ စနစ်တကျကုသပါက သက်သာ ပျောက်ကင်းစေပါသည်။)
