25/09/2025
🎓 လောကီဂါထာမန္တန်တွေမှာ ဆရာ ဆိုတဲ့ စကားလုံး ဘာလို့ထည့်ထားတာလဲ 🎓
{ကျွန်တော့်စာတွေက အမြဲနီးပါး ရှည်တတ်ပါတယ်။ အချိန်မရရင် share ထား safe ထားပြီး အေးဆေးမှ ဖတ်ပါ}
ဒါလေးကတော့ ဗဟုသုတပါ။ သိထားရင် လောကီပညာမှာ အသုံးဝင်နိုင်ပါတယ်။ လောကီဂါထာမန္တန်တွေထဲမှာ "တက်ဆရာတက်" "ဝင်ဆရာဝင်" "ကျဆရာကျ" "ပျောက်ဆရာပျောက်" စသဖြင့် "ဆရာ" ဆိုတဲ့ စကားလုံး ထည့်ဆိုလေ့ရှိတာကို သတိထားမိကြမှာပါ။ တချို့လည်း ဆိုသာဆိုနေကြရပေမယ့် ဘာအဓိပ္ပါယ်မှန်း မသိကြတာ များပါတယ်။ တချို့ကျတော့လည်း ကိုယ့်ကိုယ်ကိုယ် ထည့်ဆိုပြီး ကြိမ်းဝါးတာလို့ ထင်နေကြပြန်ပါတယ်။ မမှန်ပါဘူး။ "ငါဆရာ၏ အမိန့်" စသဖြင့် "ငါဆရာ" ဆိုပြီး တိတိကျကျဆိုမှသာ ကိုယ့်ကိုယ်ကိုယ် ရည်ညွှန်းတာ ဖြစ်ပါတယ်။
"ဆရာ" ဆိုပြီး ထည့်ဆိုကြရတဲ့ ရည်ရွယ်ချက်ကတော့ ကိုယ့်ကို ပညာသင်ပေးခဲ့တဲ့ ဆရာဖြစ်သူကို အလေးအမြတ်ပြုရုံသာမကပဲ "ဆရာ့အစွမ်းကို ဓာတ်ကူးယူချင်လို့" ဖြစ်ပါတယ်။ ပဋ္ဌာန်းဆက်သဘောအရ အကျိုးပေးအောင် ထည့်ဆိုတာလို့လည်း မှတ်ယူနိုင်ပါတယ်။ ဂါထာမန္တန်ကို ပိုစွမ်းစေဖို့ အထောက်အကူပြုပါတယ်။ ဥပမာပြောရရင် "ဖုဋ္ဌဿ" အစချီတဲ့ ဂါထာတော်တစ်ပုဒ်တည်းနဲ့ ဆီကို မန်းပြီး ရောဂါအတော်များများကို ကုသပေးနိုင်တဲ့သူရှိတယ်လို့ ဆိုကြပါစို့။ သူက ကိုယ့်ကို ဒီပညာ သင်ပေးလိုက်ပေမယ့် ကိုယ်မန်းတဲ့အချိန်ကျတော့ မစွမ်းဘူး ဖြစ်နေတတ်ပါတယ်။ ဒီလိုဖြစ်နေရင် ပညာသင်ပေးတဲ့ ဆရာကို တိုင်တည်တဲ့အနေနဲ့ အနောက်ကနေ "ပျောက်ဆရာပျောက်" ဒါမှမဟုတ် "ပျောက်စေ ဆရာ ပျောက်စေ" ဆိုပြီး ထည့်ပေးရင် စွမ်းလာနိုင်ပါတယ်။ ဂါထာမန္တန်အားလုံးတော့ ထည့်လို့ မရပါဘူး။ သူ့နေရာနဲ့သူ ရှိပါတယ်။
လောကီဂါထာမန္တန်တွေမှာ "ဥုံ" ထည့်တာကိုလည်း ဒီသဘောတရားအတိုင်း နားလည်ထား၊ ခံယူထားလို့ ရပါတယ်။ "ရှေးဆရာ့ဆရာတွေဟာ ဥုံ ခံရွတ်ပြီး အစွမ်းထက်ခဲ့ကြတယ်၊ ဒါကြောင့် ကိုယ်လည်း ဒီလိုရွတ်တယ်" လို့ သဘောပိုက်လိုက်ရင် ပြည့်စုံနိုင်ပါတယ်။ ဒီဘက်ခေတ်မှာ လူတော်တော်များများက "ဥုံ" ကို "အ၊ ဥ၊ မ" ဒါမှမဟုတ် "အ၊ ဥ၊ အမ်" တွေ ပေါင်းထားတာလို့ပဲ သိထားကြပြီး အပေါ်မှာ ပြောခဲ့သလို ဓာတ်ကူးဖို့ ရွတ်နိုင်တယ်လို့ သိတာ ရှားပါတယ်။ "ဥုံ" အကြောင်းကတော့ ကျယ်ပြန့်လွန်းပြီး အငြင်းပွားစရာတွေ ရှိနိုင်လို့ သိပ်မရေးချင်ပါဘူး။
ယုတ္တိပြရမယ်ဆိုရင် ကိုယ်တစ်ခါမှ မမြင်ဖူးတဲ့ ဟင်းချက်ပစ္စည်းတွေ နိုင်ငံခြားက ရောက်လာတယ်လို့ ဆိုကြပါစို့။ ဒီပစ္စည်းတွေရဲ့ နာမည်လည်း မသိ၊ ဒီပစ္စည်းတွေအကြောင်းလည်း နားမလည်ရင်တောင် ကိုယ့်အရှေ့မှာ လူတစ်ယောက်က ဒီပစ္စည်းတွေနဲ့ ဟင်းကောင်းတစ်ခွက် ချက်ပြတာကို သေသေချာချာ တွေ့ဖူးတယ်၊ သေသေချာချာ မှတ်သားထားတယ်ဆိုရင် သူ့နည်းအတိုင်း ပုံတူကူးပြီး လိုက်လုပ်ရုံနဲ့ ဟင်းကောင်းတစ်ခွက် ဖြစ်လာနိုင်တဲ့ သဘောပါပဲ။
ဒါပေမယ့်လည်း လောကီအစီအရင်တွေ၊ ဂါထာမန္တန်တွေ စွမ်းဖို့ဆိုတာ ဓာတ်ကူးခြင်း တစ်ခုတည်းနဲ့ မရပဲ ပညာကို ခံယူထားမှု၊ နားလည်မှု၊ ကျွမ်းကျင်မှု၊ ကျနမှု စတဲ့အချက်တွေအများကြီးနဲ့လည်း သက်ဆိုင်ပါသေးတယ်။ စွမ်းပါတယ်ဆိုတဲ့ ဆရာ့ဆရာတွေဟာ ပညာတစ်ခုကို ဘက်ပေါင်းစုံကနေ အကြိမ်ကြိမ် စမ်းသပ်လေ့လာပြီးမှ မှတ်သားထားပြီး လုပ်ကြတာဖြစ်လို့ ဆရာဖြစ်သူ လုပ်လိုက်တဲ့ အစီအရင်နဲ့ သာမန်လူ လုပ်လိုက်တဲ့ အစီအရင် တစ်နည်းမဟုတ်တစ်နည်းတော့ ကွာခြားနေပါလိမ့်မယ်။ ပညာဒါနစာတွေထဲကအတိုင်း လိုက်လုပ်ပြီး တချို့က စွမ်းတယ်၊ တချို့က မစွမ်းဘူးဆိုပြီး ပြန်လာပြောကြတာတွေ ရှိလို့ပါ။
နောက်တစ်ခုကတော့ သင်ဆရာ၊ မြင်ဆရာ၊ ကြားဆရာတွေကို ပြစ်မှားမိရင်လည်း မစွမ်းဘူး ဖြစ်တတ်ပါသေးတယ်။ သတိထားစေလိုပါတယ်။ လောကီပညာရဲ့ပင်ကိုယ်သဘောတရားကိုက ဒီအတိုင်း ဖြစ်နေတာပါ။ ၅၅၀ နိပါတ်တော် အမ္ဗဇာတ်မှာ သစ်ပင်တစ်ပင်ကနေ ချက်ချင်းအသီးသီးစေတဲ့ မန္တရားကို ဘုရားလောင်း ဒွန်းစဏ္ဍားဆီက သင်ယူတတ်မြောက်ခဲ့တဲ့ ဒေဝဒတ်လောင်း လုလင်ဟာ အမှန်အတိုင်းမပြောပဲ ဒိသာပါမောက္ခကြီးဆီက သင်ယူခဲ့ကြောင်း ပြောခဲ့လို့ မန္တရားကွယ်ခဲ့ဖူးပါတယ်။ လောကီပညာနယ်ပယ်ထဲက ဆရာ ဆိုတဲ့ စကားလုံးနဲ့ ပတ်သက်တဲ့အကြောင်းအရာအချို့ကို ဗဟုသုတအဖြစ် ပြောပြခဲ့တာပဲ ဖြစ်ပါတယ်။ share သွားစေလိုပါတယ်။ တင်ထားသမျှသည် ကိုယ်တိုင်အားစိုက်ရေးထားတာဖြစ်တဲ့အတွက် အပန်းမကြီးရင် မူရင်းပို့စ်ကို like လေး တစ်ချက်နှိပ်သွားစေချင်ပါတယ်။ နောက်ရက်တွေမှာလည်း လောကီပညာအကြောင်း စာတွေဆက်ရေးသွားဦးမှာမို့ ဖတ်လိုရင် follow လုပ်ထားနိုင်ပါတယ်ခင်ဗျာ။
⬧⬧⬧⬧⬧⬧⬧⬧⬧⬧
✶ ပညာဒါနစာတွေနဲ့ ပတ်သက်ပြီးဖြစ်စေ၊ လောကီပညာအကြောင်းဖြစ်စေ၊ သိချင်တာရှိရင် လာမေးနိုင်ပါတယ်။ မေတ္တာနဲ့ တတ်နိုင်သလောက် ဖြေကြားပေးပါမယ်။
✶ ကိစ္စပေါင်းစုံအတွက် အဟောမေးနိုင်ပါတယ်။ ဆေးဖယောင်းတိုင် အစီအရင်လည်း ပြုလုပ်ပေးပါတယ်။
09780992963 ဖုန်း/viber/telegram
page cb ကနေလည်း ဆက်သွယ်နိုင်ပါတယ်။
