08/01/2025
Сэтгэл гутралаас хэрхэн гарах вэ гэж хүмүүс их асууж, мөн сошлоор бичсэн байдаг.
Би өөрөө мэргэжлийнхээ хувьд биш, хүнийхээ хувьд энэ хар ангал шиг, бүх зүйл сонирхолгүй болгодог энэ сэтгэлийн төлөвөөс аажмаар гарахдаа ашигласан аргуудаасаа бичье. Зарим хүнд хэрэг болж магад.
1.Орчноо бохирдуулагч хүмүүсээс цэвэрлэх. Гутрал ямар нэгэн өдөөгчтэй байх магадлалтай. Таныг хэмлэж, муу мэтээр итгүүлдэг хүмүүс, эсхүл мөрөөдлийг чинь дэмждэггүй, байнга бүтэхгүй гэж итгүүлдэг. Миний хувьд эдгээр токсик хүмүүсийг шууд амьдралаасаа блок хийсэн. Эдгээр хүмүүс мөн зуумтгай, дйилэх гэж улайрдаг, чамд муу муухайг мэдрүүлэх хүсэлтэй, мөн чиний хямралаас тэжээгддэг тул чамайг орхихгүй, элдэн хөөж, буруутгаж ярих, муулах бүр цагдаад ч өгч болно. Гол нь тууштай татгалзах. Эдгээр хүмүүс нь таны ойрын хүн ч байж болно. Ээж, аав, эхнэр нөхөр.. өөрийгөө эсхүл хүүхдээ бодоод татгалзах хэрэгтэй бол, татгалзах нь зүйтэй гэж би хувьдаа хэлнэ. Тэнэг коммент үлдээдэг хүмүүсийг ч блоколдог.
2.Бясалгал-дотроо цэвэрлэх. Сэтгэл зүй удаан хугацаанд хямарсан тул, сэтгэл хөдлөл, дотоод бодлын орчин ёстой тамын ертөнц шиг болсон байдаг. Нөгөө муухай хэмлэдэг хүмүүсийн дуу хоолой нь таны дотор нутагшиж, юм хийх бүрт таны дотроос гарч ирж магад. Энэ үед БЯСАЛГАЛ маш үр дүнтэй. Бясалгах нь дотоод ертөнцөө хаана юу байгаагаа ойлгож, мэдрэлийн болон бодлын аксис ээ цэвэрлэх, илүү дутуу дуу хоолойг харанхуй өрөөнд түгжиж, шинэ дуу хоолой бойжих орон зай үүсгэнэ. Би бясалгал хийж сураад, дархан урлал сурсан. Дархан урлал анхаарал, гар, мэдрэл, бодол нэг цэгт төвлөрүүлдэг гоё эрдэм байсан. Ер нь аливаа гар урлал, хобби хэрэгтэй.
3.Нойр. Эрт орондоо орж унтах, чимээгүй тухтай орчинд, маргаашийн ажил даалгавар санагдуулахгүй, зүгээр гоё орчин бүрдүүлээд орондоо эрт орж нойроо хангалттай авч байх. Нор дутуу бол та гутралаас гарах гээд мянга сэтгэл зүйч дээр очоод ч нэмэргүй
4.Нар. Нар бол үнэхээр гайхамшигтай байгалийн эм. Би боломж гарвал наранд биеээ ээдэг, зуны саруудад өглөө босч наранд биеээ ээдэг, өвөл нарны элчийг нүд, гарын алга нүүрээрээ сайтар өдрийн турш авдаг. Нар үзэх нь дотооп шүүрлийн ажиллагаа, дааварт эерэг нөлөө үзүүлдэг тул, механикаар гутралаа шарж устгаж бга гээд л ойлгочих. Нар үнэхээр гайхамшигтай. Өвөө маань намайг байнга ууланд дагуулж алхадаг байсан нь бас их хэрэгтэй бага насны дадал болж таарсан. Сэтгэл гутарсан үед хөлсөө гаргаад өндөрт гараад алсыг харахад бүх зүйл уужирч, толгой өөрөөр ажилладаг. Бидний энэ уул хадаар авирдаг соёл үнэхээр гоё.
5.Цэцэг ногоо тарьж арчлах. Цэцэг ногоо бол өнөө цагийн хурдтай нийгмийн хэмнэлээр биш, тогтуун байгалийн хэмнэлээр амьдардаг сайхан зүйл шүү дээ. Хүн бусдад сайн сайхан зүйл хийж байж сэтгэл санаа сэргэдэг. Үүнтэй ижил цэцэг ногоогоо арчлаад бай.
6.Бусдад зүгээр туслах. Зүгээр л бусдад хариу нэхэлгүй тус бол. Танихгүй хүмүүсдээ. Зарим хүн хүнд хуучин хувцасаа өгчөөд, нөгөө хүнийг цааш нь зарсан бна гэж уурлаад байдаг. Та хүнд юм өгсөн бол тэгээд л харилцаа дуусах ёстой байтал, хувцас өгсөн тул, нөгөө хүнээ бүр хянаж, хэрхэхийг нь заах эрхтэй гээд бодчихсон хүмүүс байдаг. Хэрвээ та ингэж байгаа бол, та гутралаас гарахгүй, айдсаараа сэтгээд бга нь илт байна. Тиймээс хүнд зүгээр тус болж сурах хэрэгтэй. (Би сардаа нэг удаа хандив өгнө гээд жижиг төсөв гаргадаг)
7. Сүүлийн жил ашиглаагүй хувцас, эд хогшил байвал ахиж хэрэглэхгүй байх магадлалтай тул, гэрээ хог новшноос нь салгах хэрэгтэй. Үүнд гэхдээ гоё дурсамж агуулсан зүйлсийг оруулахгүй. Хүүхдийн бага насны хувцас нь гоё дурсамж сэдрээдэг бол, хадгалах нь зүйтэй.
8.Биеээ үзүүл, биенд өвчтэй зовиуртай газар байвал оношлуулж, мэдэж авч, чадвал эмчлүүл. Өвчин гутрал хоёр бас хөтлөлцөж байдаг гэдгийг санах хэрэгтэй. Биеийн тааламжтай байдал их чухал гэдгийг мөн ойлгосон. Сардаа нэг удаа барианд ордог, хамаг мэдрэл гоё тайвширдаг. Мөн даавар тэнцвэргүй байвал өдөрт 30 мин хөлсөө гаргаад байвал даавар тэнцвэрждэг тул, эм ууж хэзээ эдгэхээ хүлээх биш, механикаар биеээ илааршуул.
9. Би надад зүгээр л сайхан, сайн хандаж байсан хүмүүсээ эргэж хайж, тэр хэдээрээ нийгмээ бүтээсэн. Харамсалтай нь хамгаас хайртай хэд маань нас барсан тул, одоо тэр хэдийгээ сайнаар дурсаж, надад заасан, энэрч хайрласан гоё мөчүүдийг байн байн бодож сэтгэлээ эерэгээр цэнэглэдэг..
Эцэст нь хэлэхэд гутрал долоо хоногийн дотор, сарын дотор арилдаг зүйл биш. Жилээр дамнаж болно. Зарим хүн насаараа хроник гутралтай өнгөрч болдог. Энэ нь бага насандаа үзсэн хүчирхийлэл, багш нарын дээрэлхэлт, үе тэнгийнхний ганцаардуулалт г.м-с үүсээд тусламж аваагүй байх боломжтой.
Алхам алхмаар..
