https://www.facebook.com/102238051807713/

Хос тогоруу, Ulaanbaatar (2026)

26/04/2021

👩‍❤️‍👨 ТА ХАРТАЙ ЮУ?🤔

Хардалт бол тийм ч таатай мэдрэмж биш юм. Хүн бүр их бага хэмжээгээр нөгөө хүнээ харддаг. Гэхдээ та бүр хэвийн хэмжээнээс ихээр хардаж, үүнээсээ болоод өөрөө ч тайван байж чаддаггүй бол энэ нийтлэлийг анхааралтай уншаарай.

🟢 Хардалтын үндсэн шалтгаанууд.

1️⃣Өөрийн үнэлгээ доогуур байх
Өөрөөр хэлбэл өөрийгөө дутуу үнэлэх. Та өөрийнхөө давуу талыг олж харахгүй, яагаад таныг хайрлах ёстой вэ, яагаад та өөр хэн нэгний хайрыг хүртэх ёстой вэ гэдгийг төдийлөн сайн ойлгохгүй байгаа учраас. Нөгөө хүн танд хайртай гэдэгт бүрэн дүүрэн итгэж чаддаггүй. Хэзээ нэгэн цагт танд хайргүй нь ил болж дараа нь танийг орхиж явах болно гэдэгт итгэдэг.

2️⃣ Өөртэйгээ адилтгах.
Та өөрөө хэн нэгэнтэй сээтэгнэх дуртай, хамтрагчаа хуурдаг бол түүнийг өөр шигээ адилтгаж болох юм.

3️⃣ Харин 3 дахь шалтгаан бол нэлээд төвөгтэй бөгөөд хүүхэд насаас эхлэлтэй. Ойролцоогоор 4-7 настайд үүсч, насан туршид үлддэг байна. Энэ бол хүүхэд насны сэтгэл зүйн гэмтэл (трамва) юм. Үүнийг хайрын гурвалжин гэж нэрлэе. Энэ юу гэсэн үг вэ? Өөрөөр хэлбэл ээж бид хоёрын хайрын дундуур өөр нэг хүн орж ээжийн намайг хайрлах хайранд саад болдог. Энэ миний аав эсвэл хойд аав, магадгүй ах эгч хэн ч байж болно. Энэ нь дараах шалтгаантай.

• Аав, ээжийн аль нэг нь энэ насанд маш бага анхаарал хандуулж, цаг бага гаргаснаас болж таны сэтгэл зүйн зарим хэрэгцээнүүд (хүлээн зөвшөөрөгдөх, хайрлагдах хэрэгцээ) бүрэн хангагдаж чадаагүй.

• Аав, ээжийн аль нэг нь хэн нэгэнд таниас илүү хайртай байх эсвэл хайраа өөр хүнд илүү түлхүү илэрхийлэх.

Жишээ нь ээж нь охиноо 7 настай байхад дахин гэрлэжээ. Ээж нь хойд аавыг нь өөрөөс нь илүү хайрлах, өөрөөс нь илүү хайрлаж байгаа мэт сэтгэгдэл төрүүлснээс үүдэн энэ гэмтэл үүсчээ. Энд нэг зүйлийг дурдая. Охин хүүхдийн хувьд аав нь анхаараагүй байхад эсвэл эрэгтэй хүүхдийн хувьд ээж нь анхаараагүй байхад сэтгэл зүйн гэмтэл үүснэ гэсэн үг биш юм. Охин хүүхдийн хувьд ээжийн хайр, эрэгтэй хүүхдийн хувьд аавын хайрыг дутуу мэдэрсэн тухай ч асуудлууд энд багтана. Хүүхэд харьцангуй бага балчир байгаа учраас тухайн асуудлыг ухамсарлах, ойлгох, зохицуулах, шийдвэрлэх чадвар байдаггүй байна. Тиймээс энэ асуудлыг сэтгэлийн гүндээ "хадгалж", хэсэг хугацаанд "мартдаг" байна. Энэ нь асуудлыг шийдвэрлэсэн гэсэн үг биш. Тухайн асуудал хүүхдийн сэтгэлд насан туршид нь үлдэж дараа дараагийн хосын харилцаанд ухамсаргүйгээр нөлөөлдөг. Амьдрал үргэлжилсээр хэзээ нэгэн цагт хүүхэд том болж өөрийн гэсэн амьдралыг зохионо, эсвэл үерхэж нөхөрлөнө.

Ямар нэгэн хүнтэй дотно харилцаа тогтооно гэдэг нь тухайн 2 хүнээс гадна дахиад гуравдагч этгээд үргэлж байна гэсэн үг юм. Энэ хэн ч байж болно. Хадам ээж, эгч, найз, ажлын хамтрагч, дэлгүүрийн худалдагч гэх мэт. Хэзээ ч 2 уулханаа дэлхий дээр оршин тогтнож чадахгүй. Өөр бусад хүмүүстэй харилцах шаардлага бас гарна.

Харин энэ үед нөгөө сэтгэлийн гүнд байгаа “хайрын гурвалжин сэрж, амилдаг байна. Хүүхэд насанд мэдэрсэн хайрлагдаагүй мэдрэмж, ээж, аавыгаа өөр хэн нэгнээс харамлаж, хардаж байсан мэдрэмжээ өнөөдрийн хосын харилцаанд ӨӨРИЙН МЭДЭЛГҮЙ чирж авчирдаг, ухамсаргүйгээр түүнтэй адилтгадаг байна.

Мөн энэ үед эхний 2 шалтгаан ч гэсэн илэрч болно. Хэн нэгэн надад хайртай гэдэгт үл итгэж, өөрийгөө дутуу үнэлэх, голох гэх мэт. Голсноосоо болж өөрийгөө сайхан гэдгийг дахин дахин мэдрэхийн тулд өөр бусад хүмүүсээс харилцааг хүсэж, өөр хүнтэй явалдах, хамтрагчаа хуурах тохиолдол илэрч болно. Тэгэхээр хардалтын шалтгаанууд бүгд хоорондоо холбоотой, орооцолдсон байх магадлалтай байдаг.

❌ Тэгвэл хамгийн ярвигтай шалтгаан болох хүүхэд насны гэмтлээс хэрхэн ангижрах вэ?

✅ 1. Хүүхэд насны тэр дурсамжаа эргэн санах, ухамсарлах, цаашлаад тэр дурсамжаас салах;
✅ 2. Дурсамжтай холбоотой бүх сэтгэл хөдлөл, ялангуяа сөрөг мэдрэмжүүдийг гадагшлуулах, өөр өөртэйгээ ярилцах, өнөөдрийн нүдээр өнгөрсөнд хандах;
✅ 3. Одоогийн харилцаатайгаа жиших, харьцуулах. Хүүхэд насны дурсамж одоогийн харилцаа 2 ямар холбоотой болохыг ухамсарлах.

‼️ Мэдээж эцэг эхчүүд хүүхдүүддээ сэтгэл зүйн гэмтлийг үлдээхгүйн тулд хайрлах, гол нь хайртай гэдгээ цаг тухайд нь мэдрүүлэх нь чухал юм.

14/04/2021

Гэрлэсний маргааш юу болдог вэ? Админых нь оролцсон Дундговь аймгийн Гэр бүл хүүхэд залуучуудын хөгжлийн газартай хийсэн ярилцлагыг сонсоорой.
Гэр бүлийн хямрал, залуу гэр бүлийн тухай ярилцсан байгаа шүү :P Баярлалаа

"Гэрлэсний маргааш" сэдвээр сэтгэл судлаач ,"Хос тогоруу" пэйж-ийн админ А.Тэгшжаргал-тай ярилцлаа.

08/03/2021

Хүндэт уншигч та бүхэндээ ОУЭЭХӨ-ийн мэндийг хүргэе! Өдөр бүр жил бүрийн энэ өдөр шиг аз жаргалтай, амар тайван, сэтгэл хангалуун байх болтугай.

Хүндэтгэсэн, Хос Тогоруу.

21/02/2021

ААВЫН ХАЙР БА ИРЭЭДҮЙН НӨХӨР

Эмэгтэй хүн бүр л аавын хайрыг 💖 янз бүрээр мэдэрч өсдөг. Хайраа ил илэрхийлдэг, халамжтай аавууд байхад хайртай гэдгээ тэр болгон хэлээд байдаггүй бидний хэлж заншсанаар “Хайр нь дотроо, Хал нь гаднаа” аавууд бий. Эсвэл аавын хайрыг огт амсаагүй тохиолдлууд ч бидний дунд цөөнгүй байдаг.

Тэгвэл эмэгтэй хүүхдийн /хүний/ эсрэг хүйсийн хүнтэй дотно харилцаа тогтооход аавын хайр, аавтайгаа харилцах харилцаа хэрхэн нөлөөлдөг вэ? шуудхан хэлэхэд ААВТАЙГАА ХАРИЛЦАХ ХАРИЛЦАА ИРЭЭДҮЙН ЭСРЭГ ХҮЙСИЙН ХҮНТЭЙ ХАРИЛЦАХ ХАРИЛЦААГ ТОДОРХОЙЛДОГ. 🤔🤔🤔

🗣🗣 Юуны түрүүнд аав гэдэг бол охиныхоо мэдэх хамгийн АНХНЫ ЭРЭГТЭЙ ХҮН. Охин хүүхэд өөрийн ааваар эрэгтэй хүнийг төсөөлдөг. Түүнээс гадна аав хүн бол охиныхоо БИ ЯМАР ЭМЭГТЭЙ ХҮН БЭ? гэдэг суурь ойлголтыг өгдөг. Бид бүгд нийгмийн харилцаанд, ялангуяа бусадтай харилцах харилцаанд өөрсдийгөө таньж, мэддэг. Бид өөрсдийгөө орчин тойрны хүмүүс бидний талаар юу гэж хэлснээр, хийсэн үйлдлийнхээ үр дагавраар дамжуулан өөрсдийгөө ойлгодог.

ААВУУДЫГ 2 АНГИЛЖ ҮЗЬЕ.
1️⃣ ХАЙРАА НЭЭЛТТЭЙ ИЛЭРХИЙЛДЭГ ААВУУД
Ийм аавууд охиноо тэврэх, үнсэх, туслах, дэмжих, магтах, урмын үгээр тэтгэх, туслах, хэцүү үед сэтгэл санааг нь засах зэргээр хайртай гэдгээ илэрхийлдэг. Ийм харилцаан дунд багаасаа өссөн охидууд өөртөө итгэлтэй, өөрийнхөө үнэ цэнийг мэддэг, сэтгэл хангалуун, муу харилцаануудыг дуусгаж чаддаг, эрэгтэй хүнтэй зөв бөгөөд эерэг харилцааг үүсгэж чаддаг, хувийн орон зайг мэдэрдэг, хайр сэтгэлийн асуудал дээр ихэвчлэн зөв сонголт хийх магадлалтай байдаг. Учир нь аавтайгаа харилцах харилцаа нь БИ БОЛ САЙН ЭМЭГТЭЙ, БИ ХАЙРЛУУЛАХ ЭРХТЭЙ, БИ ХЭН НЭГНЭЭР ХАЙРЛУУЛАХЫН ТУЛД ЗААВАЛ ХИЧЭЭХ АЛБАГҮЙ, ЗӨВХӨН ӨӨРӨӨРӨӨ БАЙХАД ХАНГАЛТТАЙ гэсэн өөрийнхөө талаар МАШ ЭЕРЭГ төсөөллийг бий болгосон байдаг.

2️⃣ ХАЙРАА НЭЭЛТТЭЙ ИЛЭРХИЙЛДЭГГҮЙ ААВУУД
Энэ бүлэгт ямар аавууд багтах вэ? Магадгүй холбоогүй байдаг, хэт завгүй, анхаарал төдийлөн тавьдаггүй, зөвхөн үгэнд орох, онц авч “сайн охин” байснаар нь үнэлдэг, хайртай гэдэг үгийг цөөн хэлдэг, бусадтай харьцуулдаг, голдог, шүүмжилдэг, хатуурхдаг гэх мэт.
Эдгээр охидууд өөртөө итгэх итгэл сул, бусдын хайрыг татахын тулд хүчин чармайлт гаргах хэрэгтэй, өөрөөр хэлбэл би ӨӨРӨӨРӨӨ байхад хэн нэгний хайрыг хүртэх боломжгүй гэж өөрийгөө дутуу үнэлдэг, эрэгтэй хүн халамжлах, энхрийлэх, гоё бэлэг өгөхөд эвгүй санагддаг, эсвэл эсрэгээрээ эрэгтэй хүнээс хэт их халамж анхаарлыг шаарддаг, дутуу мэдэрсэн хайр халамжийг нөгөө хүнээрээ дүүргэхийг хүсдэг, өөрийг нь үнэлдэггүй, үл тоомсорлодог эсвэл бүр хүчирхийлэгч хүнийг сонгох гэх мэт эрсдлүүд үүсдэг байна.

‼️Мэдээж дээрх 2 төрлийн аав аль аль нь ХҮҮХДҮҮДДЭЭ ХАЙРТАЙ, өөрийн гэсэн онцлог, давуу болон сул талуудтай. Хайраа илэрхийлж буй арга нь л өөр юм.

🔆🔆🔆Хэрвээ энэ нийтлэлийг аавууд, ирээдүйн аавууд уншиж байгаа бол Та бүхэн маань охин үрдээ БИ ЧАМД ХАЙРТАЙ, ЧАМАЙГ БАЙГААГААР ЧИНЬ ХАЙРЛАДАГ, ЧИ БОЛ ХАЙРЛУУЛАХ ЭРХТЭЙ САЙХАН ЭМЭГТЭЙ шүү гэдэг ойлголтыг өгч байгаарай. Таны хийсэн жижигхэн үйлдэл охины тань ирээдүйн гэр бүлийн аз жаргал, сэтгэл хангалуун байдалд оруулж буй ҮНЭЛЖ БАРШГҮЙ ХУВЬ НЭМЭР болох юм шүү. Сайн аав байхад олон зүйл шаардлагагүй. Зүгээр л аав маань надад хайртай, юу ч болж байсан хайртай хэвээр байх болно гэдгийг мэдэрдэг байх нь МАШ ЧУХАЛ байдаг шүү.

Хүндэтгэсэн, Хос тогоруу хуудас

01/02/2021

ХАРИЛЦААГАА ХЭРХЭН ЗӨВ ДУУСГАХ ВЭ?

Бид өмнөх нийтлэлд харилцаагаа зөв бөгөөд эерэг дуусгах нь ямар ач холбогдолтой талаар нийтлэсэн. Харин энэ удаад хэрхэн зөв “дуусгах” талаар өгүүлье.

✅Салах шийдвэрийг гаргах
Хэрэв та салах шийдвэр гаргасан бол энэ шийдвэртээ хэр зэрэг итгэлтэй байгаа вэ гэдгээ дахин бодоорой. Хэрэв ямар нэгэн эргэлзээ байвал тэрийгээ заавал тодруулаарай. Үнэхээр салахыг хүсч байна уу? эсвэл хэсэг хугацаанд ганцаараа баймаар байна уу? Өөрөөр хэлбэл салах шийдвэрийг зөвхөн итгэлтэй болсоныхоо дараа гаргаарай. Сэтгэлийн хөдөлгөөнөөр хандаж болохгүй.

✅Салах шалтгаанаа нөгөө хүндээ тайлбарлах
Энэ нь тийм ч амар биш байж болох юм. Гэхдээ юу ч хэлэхгүй "алга болохоос" хамаагүй дээр шүү. Дуудлагыг нь авахгүй байх, мессежинд нь хариу өгөхгүй байх, блок хийх зэрэг нь насанд хүрсэн хүний хийдэг зүйл огт биш. Та өөрт таалагдахгүй, болохгүй байгаа зүйлийг хэлж, салахаас өөр арга зам байхгүй байгааг тайлбарлах хэрэгтэй. Таны гаргаж буй тайлбарууд тодорхой, ойлгомжтой бас шударга байх ёстой гэдгийг санаарай.

✅Нөгөө хүнээ буруутгахгүй байх
Хэдийгээр та 2 салж байгаа ч гэсэн таны өмнө таны хэзээ нэгэн цагт хайрлаж, дурлаж, сайхан дурсамжуудыг хамт бүтээсэн хүн тань байна. тиймээс нөгөө хүндээ хүндэтгэлтэй хандаарай. Нөгөө хүнээ аливаа зүйлд буруутгах нь сул дорой хүний шинж юм.

✅Хэлэх үгээ бэлдэх
Салах тухайгаа хэрхэн хэлэхээ урьдчилж бодож, шаардлагатай бол цаасан дээр бичих нь танд өөртөө итгэлтэй байхад тусална. Мөн сандарсандаа болоод тооцоолоогүй, эвгүй, хамаа намаагүй зүйлийн тухай ярьж, нөгөө хүнээ гомдоохоос сэргийлнэ.

✅Романтик дурсамжаас зайлсхийх
Дурсамж бол хамгийн хэцүү зүйл юм. Та хоёрын хамтдаа алхаж байсан цэцэрлэгт хүрээлэн, хамтдаа өнгөрүүлсэн баярууд, танд барьж байсан сюрпиризүүд гэх мэт... эдгээр зүйлийн талаар дурсах нь салахад саад болдог. Тиймээс тэдгээрийг дурсахаас зайлсхий. Танд дурсах өөр олон зүйл гарч ирнэ.

✅Найзууд болж үлдэхгүй байх
Салсны дараах эхэн үед харилцахгүй байхыг хичээх хэрэгтэй. Учир нь найзуудын харилцаа нь та хоёрыг жинхэнэ ёсоор салахад саад болно. байна. Найзуудын харилцаа нь зөвхөн та 2 салснаа хүлээн зөвшөөрч, бие биенээ хэвийн байдлаар хүлээж авч сурсаны дараа байж болох зүйл юм. Тэр хүртэл аливаа харилцааг зогсоох хэрэгтэй.

24/01/2021

ШИНЭ ХАРИЛЦААНД БЭЛЭН ҮҮ?

🙅🏻‍♀️ Хүн бүр л хэзээ нэгэн цагт хайртай хүнээсээ салж, хэн нэгнийг хаяж, бас хаягдаж байсан туршлагатай бизээ. Салалт бидэнд сэтгэлээр унах, өөртөө итгэлгүй болох, нөгөө хүндээ гомдох, үзэн ядах зэрэг сөрөг сэтгэгдлийг үлдээх нь цөөнгүй. Нэг хүнээс салсан гээд бид насаараа ганцаараа байхгүй, шинэ найз залуу/охинтой болж, эсвэл дахин гэрлэдэг. Мэдээж бид хоёрдахь удаагаа бүтэлгүйтэхийг, эсвэл дахиад шаналахыг хүсдэггүй.

❓❓Тэгвэл яагаад заримдаа бид дахин алдаж, магадгүй экстэйгээ төстэй хүнийг сонгодог вэ?

‼️Шинэ харилцаа амжилттай байх уу үгүй юу гэдэг нь өмнөх харилцаа хэрхэн төгссөн бэ гэдгээс шууд хамаардаг. Өөрөөр хэлбэл бид өмнөх харилцаандаа бүрэн утгаар нь “цэг” тавьж, эерэг төгсгөх нь дахин алдахгүй байх, шинэ харилцааг зөв үүсгэхэд том нөлөө үзүүлдэг.

🔆Жишээгээр тайлбарлая:
Нэгэн залуу Заяаг маш ихээр гомдоон хаяжээ. Анхны хайр нь байсан тул мартахад маш хэцүү, түүнийг, “Яаж ингэж чадаж байнаа” хэмээн бодож, бодох тусам л гомдох сэтгэл Заяад төрнө.
🧠 Энэ үед бидний тархи яах ёстой болдог вэ? СӨРӨГ СЭТГЭГДЛИЙГ ХЭН НЭГЭНД ГАДАГШЛУУЛАХ.(ЗОЛИОСНЫ ХҮНИЙГ ХАЙХ)

Заяа охины хувьд хуучин найз залуу нь одоо байхгүй учраас түүнийг орны хүнийг олох. Өөрөөр хэлбэл шинэ харилцаа эхэлсэн ч өмнөх асуудал үргэлжлэх магадлал өндөр гэсэн үг юм. Жишээгээ үргэлжлүүлье. Заяа шинэ найз залуутай боллоо. Заяа өмнөх найз залуудаа гомдсон хэвээр байгаа тул шинэ найз залуудаа өөрийн гомдлыг тайлах, магадгүй шинэ найз залуугаа хаях гэх мэтээр өөрийн мэдэрсэн зүйлийг түүнд шилжүүлнэ.

🗣🗣Үүнийг тайлбарлая. Бидний үл ухамсарлагдахуй бидний далд хүсэл, хэрэгцээг хангахыг шаардаж байдаг. Гомдсон бол гомдлоо тайлахыг....хайр дутагдсан бол түүнийг эрж хайхыг.... Бид өөрсдөө ч тэр болгон ухамсарладаггүй. Заяа охин шинэ найз залуутай болсон ч өмнөх гомдлоо тайлахын тулд өөрийн ухамсаргүйгээр шинэ найз залуугаа өөрийг нь гомдоох зүйл хийлгэхэд хүргэж, хийлгэсэн хойноо хаяж, эсвэл дахин хаягдана. Энэ бол өмнөх шийдэгдээгүй асуудал дараа дараагийн харилцаанд хэрхэн нөлөөлж болох вэ гэдэг хамгийн энгийн жишээ. Асуудал бүрэн шийдэгдэхгүй бол хэдэн ч удаа давтагдаж мэднэ. Гэрлэлт ч мөн ялгаагүй зүйл юм. Дахин гэрлэхдээ бас л өмнөх харилцаагаа бүрэн утгаар нь төгсгөж байж шинэ хуудас эхлэх нь зөв юм.

💖💖 Өмнөх харилцаандаа бүрэн утгаар нь “цэг” тавьж, эерэг төгсгөх нь дараах хэд хэдэн шинжийг агуулна.
1️⃣Харилцаа дууссан гэдгийг бүх талаар хүлээн зөвшөөрөх
2️⃣Дууссан харилцааг шинэ туршлага гэж хүлээж авах
3️⃣Бүх сөрөг сэтгэгдэл, мэдрэмжийг гадагшлуулсан байх (энэ хамгийн чухал)
4️⃣Салсан хүнтэйгээ нөхөрсөг харилцаатай үлдэх (заавал холбоотой үлдэх албагүй)
4️⃣Тухайн харилцаанд тулгуурлан өөртөө болон бусдад дүгнэлт хийх, цэгнэх

😇үргэлжлэх бий.

2021.01.24 сэтгэл зүйч А.Тэгшжаргал

12/01/2021

Хуудасны нийтлэлийн жагсаалт

👋Сайн байна уу. Юуны түрүүнд “ХОС ТОГОРУУ” хуудсанд нэгдсэнд баярлалаа.

🏗🏘Гэр бүлтэй болох нь байшин барихтай агаар нэг. Байшингийн суурийг зөв тавьж, сэтгэл зүрх, ур ухаан гарган барьж, барьсан хойноо орхилгүй байнга тордож, засвар хийх хэрэгтэй болдог. 🤷‍♀️ Хэрэв үгүй бол тэр байшин гандаж, өнгө зүсээ алдаж, магадгүй эцэс сүүлдээ нуран унадаг..❗️Үүний нэгэн адил гэр бүлийг хүмүүс өөрсдөө бүтээж, хамтдаа урагшилж, нэгэн зүгрүү харж, саад бэрхшээлийг хамтдаа даван туулах хэрэгтэй болдог.⛵️

Үнэхээр ч гэр бүлийн амьдрал👨‍👩‍👧, хосын харилцаа👩‍❤️‍👨, аз жаргал🌸, хайр сэтгэл💚, зөрчил💔, с**с, салалт, хардалт, араар тавилт гээд л гэр бүлийн амьдрал тэр чигээрээ адал явдал юм.
👨‍👩‍👧Миний хувьд залуу гэр бүлүүдийн бас нэгэн төлөөлөл. Нөхөр, охины хамт амьдардаг. Гэр бүл болоод ойролцоогоор 2 жил болж байна. Бусад залуу гэр бүлүүдийн адилаар ирээдүйн амьдралаа төлөвлөж, эхнэр нөхрийн үүргээ биелүүлж, ажил үүргээ хувиарлан, хамтран амьдрах арга ухаанд суралцсаар байна. Мэдээж бид 2 өөр орчинд өсөж, өөр өөрийн гэсэн амьдралыг үзэх үзэлтэй учраас санал зөрөлдөх үе бишгүй байдаг. Гэсэн хэдий ч аль болох хоорондоо нээлттэй ярилцаж, зөвшилцөж, шаардлагатай бол буулт хийх зэргээр асуудлаа бүтээлч аргаар шийдвэрлэхийг хичээдэг.

✅✅✅Энэ хуудсаараа дамжуулан гэр бүл, хосын харилцааны тухай, хэрхэн бие биетэйгээ эвтэй харилцах, хэрхэн тулгарах асуудлыг амжилттай шийдвэрлэх зэргийг шинжлэх ухааны үүднээс тайлбарласан нийтлэл, зөвлөгөөг хүргэх болно.

🥰🥰🥰Та бүхэн ХОС ТОГОРУУ хуудастай хамт байгаарай.

⭕️ ЖИЧ: ХОС ТОГОРУУ хуудсанд оруулсан нийтлэлүүдээ эхнээс нь жагсаалт болгон оруулж байна.

1. 30 ХҮРЧЛЭЭ, АРАЙ ХҮНТЭЙ СУУГААГҮЙ ЮМ БИШ БИЗ???
https://www.facebook.com/khostogoruu.mn/posts/103994414965410
2. ХӨЛ ХОРИАНЫ ҮЕЭР ХЭРХЭН ЭВТЭЙ БАЙХ ВЭ?
https://www.facebook.com/khostogoruu.mn/posts/107892824575569
3. МИНИЙ МӨНГӨ БОЛ МИНИЙ МӨНГӨ, ХАРИН ЧИНИЙ МӨНГӨ БОЛ БИДНИЙХ!!!
https://www.facebook.com/khostogoruu.mn/posts/109254721106046
4. ШИНЭ ХАРИЛЦААНД БЭЛЭН ҮҮ? (үргэлжлэл бий)
https://www.facebook.com/khostogoruu.mn/posts/113438920687626
5. ХАРИЛЦААГАА ХЭРХЭН ЗӨВ ДУУСГАХ ВЭ? https://www.facebook.com/khostogoruu.mn/posts/115400627158122
6 ААВЫН ХАЙР БА ИРЭЭДҮЙН НӨХӨР. https://www.facebook.com/khostogoruu.mn/posts/123728102992041
7. ТА ХАРТАЙ ЮУ
https://www.facebook.com/khostogoruu.mn/posts/162516799113171
Хүндэтгэсэн, сэтгэл судлаач А.Тэгшжаргал

08/01/2021

МИНИЙ МӨНГӨ БОЛ МИНИЙ МӨНГӨ, ХАРИН ЧИНИЙ МӨНГӨ БОЛ БИДНИЙХ!!!
Гэр бүл дэх мөнгөний 💰💰💰 асуудал нь нэг талаас хосуудын төдийлөн ярихыг хүсдэггүй, тэгсэн хэрнээ үнэхээр маргаан үүсэхэд хүргэдэг эмзэг сэдвийн нэг яахын аргагүй мөн. Бид энэ "халуун" сэдвийг хоорондоо ярилцах шаардлагатай бас хэрэгтэй. Ялангуяа залуу гэр бүлүүд, үерхдэг хосууд энэ асуудлаар эрт ярилцах тусам дараа дараагийн үл ойлголцол, маргаан гарахаас урьдчилан сэргийлнэ.

🧐🧐🧐Нэгэн түүхээс хуваалцая!
Эхнэр Дариагийн хувьд олсон мөнгөө гэр бүлийн хамтын дансанд хийж, гарах зардлуудыг нөхөртэйгээ ярилцаж, хамтдаа захиран зарцуулах нь зүй ёсны хэрэг гэж үздэг, харин нөхөр Амраагийн хувьд мөнгөө хамтын дансанд хийх хувийн эрх чөлөөг нь зөрчиж байгаа мэт санагддаг учраас цалин буух тоолонд тэдний хооронд маргаан үүсдэг. Дариа дотроо “яасан хувиа хичээсэн залуу вэ” Харин нөхөр нь “яагаад би өөрийнхөө олсон мөнгийг эхнэртээ өгөх ёстой гэж?” хэмээн 2 талд бие биенийхээ талаар буруу сэтгэгдэлтэй үлдсээр л... Дахиад нэг жишээ. Нэгэн удаа Дариа өөрийнхөө ээжид Амраад хэлэхгүйгээр 50000 төгрөг өгчээ. Энэ тухай мэдсэн Амраа эхнэртээ ууралсан байна. Үүний хариуд Дариа “яагаад би өөрийнхөө ээждээ мөнгө өгч болдогүй юм” хэмээн битүүхэн гомдоно. Яг үнэндээ Амраа Дариаг ээждээ мөнгө өгсөнд биш, өөрт нь хэлэхгүй өгсөнд уурлажээ. Энэ мэтчилэн буруу ойлголтууд хуримтлагдсаар

💣💣💣Бөмбөг хэзээ тэсрэх бол? ❓❓❓

Яагаад ийм зүйл болно вэ ❓❓❓
✅✅✅Хариулт нь маш энгийн. БИД ЭНЭ АСУУДЛААР ТОХИРОЛЦООГҮЙ УЧРААС

⚙️Бидний хүмүүжлийн онцлог, аав ээжийн гэрт хэрэгждэг байсан дүрэм, нийгмийн хэвшмэл ойлголт, хувийн онцлог зэргээс шалтгаалан эхнэр нөхрүүд нэгэн ижил үйлдлийг огт өөр өөрөөр ойлгодог. Өөрөөр хэлбэл Хэн мөнгө олж, хэн түүнийг захиран зарцуулах вэ? Хоол хүнс, амралт, зугаа цэнгэл, боловсрол, эрүүл мэндэд хэр их мөнгийг зарцуулах вэ? Найз нөхөд, хамаатан садандаа мөнгө зээлэх үү? Аав ээждээ мөнгө өгөх үү? гэх мэт асуудлаар өөр өөрийн ойлголт, төсөөлөлтэй байдаг. Хэрвээ танай гэр бүлд мөнгөнөөс болж маргаан гардаг бол энэ асуудлаар ярилцах цаг нь болжээ. Тэгвэл цаас аваад хамтдаа суугаарай. ✍️

1️⃣ Алхам 1.
Дараах асуултуудыг өөрсдөөсөө тус тусдаа асуугаарай. Хариултаа тэмдэглээрэй. Хариултууд ялгаатай байх нь хэвийн зүйл шүү.
1. Мөнгөний талаарх ерөнхий байр суурь? Энэ хэрэглээ юу? Эсвэл амьдралын эцсийн зорилго уу?
2. Хэний олсон орлогоор амьдрах вэ? Зөвхөн нэг хүнийхээ олсон орлогоор уу? Эсвэл 2-уулангийх нь уу?
3. Хуримтлал үүсгэх үү? Хэрвээ хуримтлуулах бол хэдийг юунд?
4. Эхнэр болон нөхөр тус тусдаа өөрийн гэсэн хэдэн төгрөгийг үрж болох вэ?
5. Ямар нэгэн худалдан авалт хийхдээ нөхөр/эхнэртээ хэлэх үү?
6. Их мөнгө үрэх, бага мөнгө үрэх гэдэг нь эхнэр нөхрийн хувьд хэдэн төгрөгийг хэлэх вэ?
7. Эхнэр болон нөхөр хэдэн төгрөгийг, хэр давтамжтайгаар өөрийн аав ээж, ах дүүд өгч болох вэ? Ер нь өгөх ёстой юу?
8. Бусдад мөнгө өгөхдөө нөхрөөсөө/эхнэрээсээ зөвшөөрөл авах уу? Гэх мэт.

2️⃣ Алхам 2. Ялгаатай асуудлуудыг тодруулах, тусад нь авч үзэх

3️⃣ Алхам 3. Зөвшилцөх.
Ялгаатай байгаа асуудлуудыг тусад нь авч үзээд, аль болох та 2 г сэтгэл хангалуун байлгаж чадах шийдлүүдийг хэлэлцэх, зөвшилцөлд хүрэх, шаардлагатай тохиолдолд дүрэм тогтоох.

4️⃣ Алхам 4. Хэрэгжүүлэх.
Бие биедээ урам өгөх, хүлээцтэй хандах

🌸🌸🌸Нэгэн зүйлийг хэлье. Магадгүй гаргасан шийдвэр таныг 100% бүрэн дүүрэн сэтгэл хангалуун байлгаж чадахгүй байж болно. Тэгэхдээ бид хамтдаа амьдарч байгаа учраас, гэр бүлийн нийт эрх ашгийн төлөө зарим зүйл дээр буулт хийх шаардлагатай болдог. Гэр бүл гэдэг бол ганц хүний бус багийн тоглолт юм шүү.

Сэтгэл зүйч А.Тэгшжаргал 2021.01.08

02/01/2021

ХӨЛ ХОРИАНЫ ҮЕЭР ХЭРХЭН ЭВТЭЙ БАЙХ ВЭ?
🦠🦠🦠2019 оны сүүлд Хятад улсад дэгдсэн цар тахлыг дэлхий ертөнцийг ийм хурдан бөгөөд ингэж их өөрчилнө хэмээн хэн ч таамаглаагүй бизээ.
Хүн бүрд шинэ нөхцөл байдалд дасан зохицох шаардлага тулгараад байна. 🧐🧐🧐

Зарим хүмүүсийн хувьд энэ нь шинэ боломжийг нээж өгсөн бол заримд нь орлогогүй болох, гэр бүлийн гишүүдтэйгээ зөрчилдөх, дотоод айдастайгаа нүүр тулах зэрэг хүндхэн асуудал болж хувирсан. Олон хосууд, гэр бүлийн хувьд энэ хүнд хэцүү үе нь хоорондын харилцааны жинхэнэ шалгуур болж байна. Өмнө нь бүгд тус тусын ажлаа хийгээд, хүүхдүүд цэцэрлэг, сургуульдаа яваад, орой гэртээ цуглараад, цагийг хамтдаа өнгөрөөдөг байсан бол харин одоо гэрээсээ сурч, ажиллаж, гэр бүлийнхэнтэйгээ 24 цагийг хамтдаа өнгөрөөх шаардлага гарч байна. Хөл хорио нэг талаас бидэнд халуун ам бүлээрээ байх ховор боломжийг олгож байгаа ч нөгөө талаас маргалдах, үл ойлголцох нөхцөлийг бий болж байна.

Бид яагаад үл ойлголцож, бухимдалтай байна вэ?❓❓❓

✅✅✅Учир нь ямар ч хүн танихгүй орчинд орох, шинэ газар очих, дасаагүй зүйлтэй учрахдаа сандарч, түгшдэг. Цар тахлын улмаас бид яг л ийм өөрсдийн өмнө мэдэрч байгаагүй, шинэ, нөхцөл байдалд ороод байна. Гэрээсээ ажиллаж, онлайнаар суралцах гэх мэт. Энэ шинэ нөхцөл байдал нь өөрөө стрессийг үүсгэх нөхцөл болж байна.

👍👍Тэгвэл хөл хорионы үеэр хэрхэн түгшүүрийг багасгаж, хоорондоо эвтэй байх талаар хэдхэн зөвлөгөөг хүргэе!

1️⃣ Дээр дурдсанчлан мэдэрч буй сөрөг мэдрэмжүүдийг (уур уцаар, тодорхойгүй байдал, түгшүүр) ойр дотныхоо хүмүүст гаргахгүй байх. Жоохон ууртай сууж байтал хэн нэг нь аяга хагаллаа гэж төсөөлье. “Чи яасан салан юм!Болгоомжтой байхад яадаг юм! Бүтэлгүй ш дээ!” хэмээн өөрийн бухимдлыг өөр зүйлээр далимдуулж бусдадаа гаргахгүй байх. Үнэхээр бухимдалтай байвал энэ тухайгаа эхнэр/нөхөртөө хэлэх. “Миний....с болоод уур хүрээд байна” “....зүйлд би бухимдаж байна”, “Миний санаа их зовж байна” гэх мэт. Бид эерэг, сөрөг мэдрэмжүүдийг мэдрэх бүрэн эрхтэй ч түүнийгээ зөв илэрхийлэн гаргах чадварт суралцах нь хамгийн чухал юм шүү.

2️⃣ Гэр бүлийн хөл хорионы үеийн дүрмийг тогтоох. Хэн хэдэн цагт юу хийх вэ? Энэ цагт бусад гишүүд юу хийх вэ? Жишээ нь: нөхөр 10-17 цагийн хооронд ажлаа хийх. Энэ үед бусад гишүүд саад болохгүй. Харин дараа эхнэр нь өөртөө цаг гаргана. Хүүхдүүд ... цагт хичээлээ хийнэ, тоглоно гэх мэт.

3️⃣ Хамтдаа ямар нэг зүйлийг хийх. Гэр бүлийн бүх гишүүд тодорхой зүйлийг хамтдаа хийх. Жишээ нь хамтдаа кино үзэх, харин үзсэнийхээ дараа кино таалагдсан эсэх, хэрвээ чи гол дүрийн оронд байсан бол яах байсан, хэрвээ киноны хоёрдугаар ангийг хийвэл хэрхэн үргэлжлэх байсан бэ гэх мэтээр хоорондоо ярилцах. Хамтдаа хийх нь гэр бүлийн гишүүдийн харилцааг илүү дотно болгоно.

4️⃣ Гэр бүлийн гишүүд, ялангуяа хосууд өдөрт дор хаяж 1 цагийг ганцаараа өнгөрөөх. Бидэнд бусадтай хамт байх, ярилцах хэрэгцээ байдгийн адилаар бас ганцаараа байх хугацаа, орон зай хэрэгтэй, бас шаардлагатай юм. Тиймээс өөрийн дуртай хэсэгт ганцаараа ном унших, дуу сонсох, тэмдэглэл хөтлөх зэргээр өөртөө цаг гаргаарай.

31/12/2020

28/12/2020

30 ХҮРЧЛЭЭ, АРАЙ ХҮНТЭЙ СУУГААГҮЙ ЮМ БИШ БИЗ???
30 хүрлээ ш дээ, хүүхэд чинь оройтлоо! Хүнтэй суу. Эдгээр үгсийг ганц бие бүсгүйчүүд маань гэр бүлийнхэн, найз нөхдөөсөө бишгүй сонссон байхаа. Нээрээ юу билээ? Би яагаад өдийг хэр нь ганцаараа байгаа юм бол? Эсвэл би тийм сонин, хүний анхаарал татахааргүй юм болов уу? ч гэж хүртэл өөрөөсөө асууна. Ажлын хамт олон тэнд нэг ганц бие залуу байна, та хоёр 2 талд ганцаараа явж байхаар нийлээч гэнэ. Ирээдүйн хань ижлийн асуудалд санаа зовохгүй хүн алга. Нөгөө л нэг асуулт.... хүнтэй сууж байна уу? Ашгүй энэ жил ковид гээд цагаан сар болохгүй нь. Бөөн баяр.
Байз....хүлээгээрэй. Бид хамгийн чухал зүйлийг мартаад байгаа юм биш биз??? ӨӨРИЙГӨӨ.
Магадгүй таний араас яг одоо янз бүрийн эрэгтэйчүүд мсж бичиж, болзоонд урьж байгаа байх. Өндөр, нам, царайлаг, мөнгөтэй, эсвэл надад хайртай гэх мэт. Эсвэл үгүй ч байж мэднэ. Өөрийнхөө хайртай биш, өөртөө хайртай хүнтэйгээ суугаарай ч гэх явган яриа бидний дунд байна. Ямар ч байсан та хэн нэгнийг өөрийнхөө хайр хэмээн сонгохоосоо өмнө дараах асуултыг өөрөөсөө асууж, түүндээ үнэнчээр хариулаарай.
Бид хэн нэгэнтэй танилцаж, магадгүй болзож байх үедээ Би энэ хүнд таалагдаж байгаа болов уу? Яавал би таалагдах бол? Ямар хувцас өмсөх үү? Юу гэж хэлэх үү? гэсэн бодлоор заримдаа өөрийн хүсээгүй зүйлд “за” гэж хэлдэг. Тэгвэл энэ мөчөөс хойш больё. Яагаад бид тэр хүнд би таалагдаж байгаа болов уу гэдэгт санаа зовох ёстой гэж? Энэ асуултыг нөгөө хүндээ үлдээе. Тэр хүн хариулаг. Танд тэр хүн үнэхээр таалагдаж байна уу? Та түүнтэй дахин уулзмаар байна уу? Танд түүнтэй хамт байхад сонирхолтой байдаг уу? Энд ТАНЫ ӨӨРИЙН сайн сайхан, аз жаргал, сэтгэл ханамжтай байдлын тухай яригдаж байна. Энэ бол түүний биш, таны сонголт. Та өөрөө өөртөө хамтрагчаа сонгож байна. Тийм учраас асуудалд өөрийн зүгээс хандацгаая! Таалагдахгүй бол тэрийгээ хэлье, шаардлагатай тохиолдолд үгүй гэж хэлье! Бид өөр өөртөө үнэнч хандаж сурсан цагт биднийг тойрон эргэлдэх хосын харилцаанууд утга учиртай, таны хүсдэг эрүүл харилцаа сая нэг биелэлээ олно....

Сэтгэл судлаач А.Тэгшжаргал 2020.12.28

Хос тогоруу

26/04/2021

14/04/2021

08/03/2021

21/02/2021

01/02/2021

24/01/2021

12/01/2021

08/01/2021

02/01/2021

31/12/2020

28/12/2020

Address

Website

Alerts

Contact The Practice

Shortcuts

Share

Category