20/11/2025
🦠”БИЧИЛ БИЕТНИЙ ТЭСВЭРЖИЛТЭЭС СЭРГИЙЛЭХ “ДЭЛХИЙН 7 ХОНОГ💊
💊Антибиотик гэж юу вэ?
Нян бол бидний биеийн эстэй адил бүтэцтэй бичил биетэн юм. Нянгийн бүтцийг авч үзвэл гадуураа нэг бүрхүүлтэй, дотроо удмын мэдээллээ бас нэг бүрхүүл дотор хадгалсан, энэ 2 бүрхүүлийн хооронд өөрийн амьд явах, өсч үржихэд хэрэгтэй эрхтэнцрүүдийг агуулсан байдаг.
Антибиотик нь нянгийн гадна бүрхүүлийн нийлэгжилтийг зогсоож нянг задалж алах, уургийн нийлэгжилтийг нь зогсоож цаашид өсч үржихгүй болгох гэх мэт төрөл бүрийн аргаар нянгийн эсрэг үйлчилдэг эм юм.
Антибиотик тэсвэржилт хэрхэн үүсдэг вэ?
Бид антибиотик эмчилгээг дутуу хийвэл эсвэл эмчийн зөвлөснөөс бага тунгаар хэрэглэвэл нян антибиотикоос өөрийгөө хамгаалах чадвартай болдог. Мөн энэ олж авсан чадвараа бусад нянд дамжуулдаг. Эдгээрээс дурдвал антибиотик нян руу нэвтрэн орч буй сувгийн бүтцийг өөрчлөх, антибиотикийг өөрийнхөө дотроос гаргадаг шахуурга уурагтай болох, антибиотикийг задалдаг бодис үүсгэх гэх мэт.
Нян антибиотикт тэсвэртэй болох нь бидэнд ямар аюултай вэ?
Тухайн халдвар үүсгэж буй нян тэр антибиотикт тэсвэртэй болсноор халдвар хүндэрч цаашид хоёр, гурван антибиотик хавсарч хэрэглэн улмаар эмчилгээнээс улбаатай гаж нөлөө илрэх магадлал нэмэгддэг. Түүнчлэн хүн өөрөө тэр антибиотикт тэсвэртэй нянгаа бусад хүмүүст, хүүхдүүдэд тараах, эсвэл тэр нян антибиотикт тэсвэртэй чадвараа бусад нянд дамжуулах зэргээр нийгэмд аюул учруулдаг.
Мөн антибиотик тэсвэржилттэй холбоотой хүнд хожим гарч болох нэг уршгийг дурдахгүй өнгөрч болохгүй. Бидний биед ашигтай нянгуудтай маань зэрэгцээд дархлаа суларвал өвчин үүсгэх чадвартай нянгууд бас байдаг. Бид антибиотик хэрэглэх тусам тэдгээр нянгууд антибиотикуудад тэсвэртэй болсоор байх ба хүндээр өвдөх, дархлаа дарангуйлагдах үед энэ нянгууд өвчин үүсгэнэ. Тэр үед бид маш олон антибиотикт тэсвэртэй нянтай тэмцэх хэрэг гарах бөгөөд харамсалтайгаар ялагдах тохиолдол ч бий.
Олон хоног ханиалгасан учраас хүүхэддээ антибиотик өгөх нь зөв үү?
Ханиад, томуу хоёрдогчоор нянгаар хүндэрч антибиотик хэрэглэх тохиолдол гарч болно. Гэхдээ хүний бие өөрөө нянгийн халдварыг даван гарах чадвартай гэдгийг мартаж болохгүй. Тэгэхээр нянгийн хүнд халдварын үед л антиботик хэрэглэдэг.
✅Ирээдүйнхээ төлөө антибиотик эмчилгээнд хариуцлагатай хандацгаая.
