17/09/2025
🧡 ЦЭЭЖНИЙ РЕНТГЕН ОНОШИЛГОО ХИЙГДЭЖ БАЙНА 💚
Цээжний рентген зураг нь таны ♥️зүрх, уушиг, судас, амьсгалын зам, болон цээж, нурууны ясны дүрсийг өгдөг. Түүнчлэн цээжний рентген зургаар таны уушиганд болон уушиг орчимд хуримтлагдсан шингэн, уушигны гадуур хуримтлагдсан агаарыг илрүүлнэ.
Хэрэв та цээжээр өвдөх, амьсгаа давчдах, цээжний гэмтэлийн зовиуртайгаар эмнэлэгт хандсан бол 👩⚕️эмч юуны түрүүнд таны цээжний рентген зураг авч шалгана. Цээжний рентген зураг нь таны өвдөлт ♥️ зүрхний, эсвэл уушигны эмгэгтэй холбоотой эсэх, хатгалгаа байна уу, хавирга хугарсан уу, хавдар уу, эсвэл өөр төрлийн эмгэг өөрчлөлт үү гэдгийг ялган оношилоход эмчид тусална.
Зарим тохиолдолд эмчилгээний үр дүнг шалгах, биеийн байдал сайжирч 👍 байна уу, эсвэл улам дордож 👎 байна уу гэдгийг нягтлахын тулд тодорхой хугацааны зайтай хэд хэдэн удаа рентген зураг авч өөрчлөлтийг хянадаг.
💚 ШИНЖИЛГЭЭГ ЯАГААД ХИЙДЭГ ВЭ 🧡
Цээжний рентген шинжилгээ нь оношилгооны түгээмэл арга. 👨⚕️Эмч зүрхний, эсвэл уушигны эмгэг байна гэж үзвэл юуны өмнө цээжний рентген зураг авч шалгадаг. Түүнчлэн эмчилгээний үр дүнг шалгахын тулд цээжний рентген зураг авах нь бий.
Цээжний рентген зургаар таны биед гарсан олон эмгэг өөрчлөлтийг шалгах боломжтой. Үүнд:
✅ Уушигны эмгэг. Уушигны халдварт өвчин, хавдар, уушигнаас гадагш агаар нэвчсэнээс болж уушигны гадна талд агаар хуримтлагдаж уушиг шахагдах (уушигны уналт) зэрэг эмгэгийг цээжний рентгенээр илрүүлнэ. Түүнчлэн эмфизем, эсвэл уйланхайт фиброз зэрэг уушигны архаг өвчин болон эдгээртэй холбоотой хүндрэлүүдийг харж болно.
✅ Зүрхний шалтгаантай уушигны эмгэгүүд. Зүрхний өвчлөлөөс үүдэлтэй уушигны эмгэг, өөрчлөлтүүдийг цээжний рентген зургаас харж болно. Тухайлбал, зүрхний архаг дутагдалаас үүдэлтэй уушиганд шингэн хурах эмгэгийг илрүүлнэ.
✅ Зүрхний ♥️ хэмжээ, хэлбэр. Зүрхний хэлбэр, хэмжээ өөрчлөгдөх нь зүрхний дутагдал, зүрхний орчимд шингэн хуримтлагдах, эсвэл зүрхний хавхлагийн эмгэгтэй холбоотой.
✅ Цусны судаснууд. Зүрх орчмын том судаснуудын (гол судас, уушигны артери болон вений судаснууд) хэлбэр дүрс рентген зурганд харагддаг учир рентген шинжилгээгээр гол судасны цүлхэн (аневризм), судасны бусад эмгэг, зүрхний төрөлхийн гажигийг илрүүлж болно.
✅ Шохойжилт. Зүрх♥️ болон судсанд үүссэн шохойжилтыг цээжний рентген зургаар илрүүлдэг. Ийм шохойжилт нь судсанд өөх тос болон бусад бодисын илүүдэл үүссэн, зүрхний хавхлаг, 👑титэм судас, зүрхний булчин, үнхэлцэгт эмгэг үүссэний шинж тэмдэг болдог. Уушиг дахь шохойжсон зангилаа нь ихэнхдээ өмнөх өвчлөлөөс үлдсэн сорвижилттой холбоотой.
✅ Ясны хугарал. Хавирга, нурууны хугарал болон ясны бусад эмгэгийг цээжний рентген зургаар шалгана.
✅ Хагалгааны дараах хяналт. Цээжний рентген нь зүрх, уушиг, улаан хоолой зэрэг цээжний хөндийн мэс заслын дараах эдгэрэлтийн явцыг хянахад ач тустай. 👨⚕️Эмч ажилбарын явцад суулгасан хязгаарлагч болон гуурсыг рентгенээр харж агаар алдагдаж байгаа эсэх, хий шингэн хуримтлагдсан эсэхийг шалгадаг.
✅ Пэйсмэйкэр, дефибрилятор, катетер. Зүрхний цохилтын хурд, хэмийг хянахын тулд пэйсмэйкер болон дефибриляторыг дамжуулагч утсаар зүрхтэй холбодог. Катетер гэж эм шахах зориулалттай, эсвэл диализэд хэрэглэдэг жижиг гуурсыг хэлдэг. Ийм суулгацууд зөв байрлагдсан эсэхийг хянахын тулд цээжний рентген зураг авдаг.
🧡 ЭРСДЭЛ 💚
Та цээжний рентген зураг авахуулахдаа, ялангуяа ойр ойрхон авахуулсан бол ⚛ цацрагийн ачааллаас болгоомжилж байж болзошгүй. Гэвч цээжний рентген зураг авах үеийн цацрагийн ачаалал туйлын бага, биднийг хүрээлэн буй орчны байгалийн 🌞 фоны цацрагаас ч бага байдаг.
Рентген зураг авахуулахын ач холбогдол хэдийгээр цацрагийн эрсдэлээс хэд дахин илүү боловч олон зураг авахуулахаар бол танд зориулалтын хамгаалалтын хормогч, хаалт хэрэгсэл өгнө. Хэрэв та 🤰жирэмсэн, эсвэл жирэмсэн байж болзошгүй бол энэ талаар эмч, техникчид урьдчилан мэдэгдэх хэрэгтэй. Ингэснээр таны хэвлий хэсгийг шарлагаас хамгаалж зураг авах боломжтой.
💚 БИЕЭ ХЭРХЭН БЭЛДЭХ ВЭ 🧡
Цээжний рентген зураг авахуулахын тулд бэлхүүснээс дээших хувцасыг тайлж, зориулалтын халаад өмсүүлнэ. Хувцас, гоёлын зүйлс нь зургийн чанарт нөлөөлж гажилт үүсгэх тул бүсэлхийнээс дээшхи зүүлт📿, гоёлыг мөн тайлах хэрэгтэй.
🧡 ЗУРГИЙГ ХЭРХЭН АВДАГ ВЭ 💚
Цээжний рентген зураг авахын тулд таныг рентген цацрагийн ⚛үүсгүүр болон цацрагийг бүртгэх хавтангийн хооронд зогсооно. Цээжний эгц урдаас болон хажуугаас харсан зураг авах үед байрлалаа хэд хэд солих хэрэг гардаг.
Эгц урдаас харсан зураг авахуулахад гараа ташаандаа авангаа мөрөө урагш болгож, эсвэл хоёр гараа 🙌 дээш өргөж бүртгэгч хавтангийн өмнө эгцээрээ харж зогсоно. Рентген 👨⚕️техникчийн зааварчилгааны дагуу амьсгалаа гүнзгий авч хэсэг хугацаанд түгжиж хөдөлгөөнгүй зогсоно.
Хажуугаас харсан зураг авахуулахад хажуу тийш эргэж нэг мөрөө хавтан дээр байрлуулж, хоёр гараа толгой дээрээ өргөж зогсоно. Техникчийн👨⚕️ зааварчилгааны дагуу гүнзгий амьсгал авч хэсэг хугацаанд мөн адил түгжинэ.
Рентген зураг авахуулахад ямар нэг өвдөлт, эвгүй мэдрэмж төрөхгүй. Цацраг биеэр нэвтрэхэд мэдрэгдэх зүйл байхгүй. Харин танд зогсох нь хүндрэлтэй бол сууж, эсвэл хэвтэж зураг авахуулах боломжтой.
💚 ҮР ДҮН 🧡
Цээжний рентген зураг нь цээжний хөндийн эд эрхтэнүүдийн хар цагаан дүрс өгнө. Цацрагийг бага нэвтрүүлдэг эд эрхтэн зурган дээр цагаан өнгөтэй, дундуур нь цацраг хялбар нэвтэрдэг эд эрхтэн хар өнгөтэй дүрс өгнө.
Яс нь нягтрал ихтэй учир рентген туяаг муу нэвтрүүлнэ, иймд дүрс нь цагаан өнгөтэй гардаг. Зүрх ♥️мөн адил цайвар дүрстэй гарна. Харин уушиг агаараар дүүрэн, хөндий ихтэй учир цацраг хялбархан нэвтэрнэ, иймд дүрс нь харлалт ихтэй гардаг.
Дүрс оношилгооны эмч 👩⚕️рентген зургийг тайлж уншиж, зүрхний эмгэг, зүрхний орчимд шингэн хуралдсан эсэх, хавдар, уушигны хатгалгаа болон бусад эмгэг байгаа эсэхийг нягталж дүгнэлтээ бичдэг.
Дүрс оношилгооны эмчийн дүгнэлт нь таны эцсийн онош биш❗, харин рентген зураг дээрхи дүрсийн тайлал юм. Таны эмчлэгч эмч энэхүү дүгнэлт болон танд илэрч буй өвчний шинж тэмдэг, зовиур, лабораторийн болон бусад шинжилгээний хариу зэрэг бусад дүгнэлттэй харьцуулан❗ эцсийн онош тавьж, эмчилгээний төлөвлөгөө гаргана.
