Ярилцах чөлөө төв

Ярилцах чөлөө төв www.yarilts.com
Тойрч суугаад сэтгэл санаагаа ярилцдаг газар. Зөвхөн вэб сайтаар цаг захиална уу. Хүссэн цагтаа ирээд, сэтгэл мэдрэмжийн ярилцлагад оролцоорой.

01/10/2025

Ярилцах чөлөө төвийнхөө бүлгийн ярилцлагуудыг 2025 он дуустал түр завсарлууллаа. Цаашдаа ч завсарласаар байж магадгүй л юм. Ямар ч байсан сэтгэлд орон зайгаа эзэлсээр байх ажил билээ. Хамгийн амттай ажил минь байлаа. Ярилцах чөлөө төв бол хүмүүс тэр бүр ярилцдаггүй хувь хувийн үнэнийг экстрим байдлаар нээдэг, сэтгэл мэдрэмжээ дэлгэж хүлээн зөвшөөрдөг радикал хөдөлгөөн юм шүү уг нь. Хөдөлгөөн гэж нэрлэх сүржин мэт боловч, нэгэнт эхэлсэн зарим зүйл (хөдөлгөөн) дуусдаггүй ч байж болох юм.
Жинтэй, тод томруун нийгмийн хөдөлгөөн өрнүүлэхэд хүч минь хүрэлгүй дороо удаан эргэлээ. Эмзэг, сулхан байдлаар эрслэн тэмцсээр байлаа. Үйл ажиллагаа маань 21 сар явагджээ.
Энэ үйл ажиллагаа хувь хүний минь хувьд хашгираан байлаа. Энэ бол миний хөгжим байлаа. Энэ миний роман байлаа. Миний бүтээл туурвил байлаа.
Бас миний гуйлга байлаа. Үл таних хүмүүсээс үнэн үг, сэтгэл, ойлголцол гуйсан гуйлгачин шиг суулаа, хүлээлээ. Худал хуурмагийг сөрсөн тэрслэл байлаа. Гэнэрхэл байлаа. Ялалт ялагдал аль аль нь байлаа. Сайхан байлаа.
Гунигтайгаар ийн бичиж байгаа ч, сэтгэл зүрхэндээ ойр аятай сайхан цагууд олон байсан. Ярилцсан, ярилцана даа гэж боддог байсан хүмүүстээ баярлалаа. Ярилцсан хүн бүр миний ертөнцийг тэлсэн. Дэмжиж тусалж байсан хол ойрын олон хүнд баярлалаа. Сүүлийн жил гаруй хугацаанд тогтож байрласан жижигхэн өрөөндөө талархлаа.

01/10/2025

2025 оныг дуустал бүлгийн ярилцлага түр завсарлаж байна.

20 жилийн өмнө Монголд сэтгэл зүйн төв бараг байгаагүй. СЭМҮТ-ийг эс тооцвол 2хон хувийн эмнэлэг дээр сэтгэц засал хавс...
29/09/2025

20 жилийн өмнө Монголд сэтгэл зүйн төв бараг байгаагүй. СЭМҮТ-ийг эс тооцвол 2хон хувийн эмнэлэг дээр сэтгэц засал хавсарга эмчилгээ байдалтай байсан нь 2004-2005 оны Лавлах шар номноос харагддаг. Харин дараагийн 20 жилийн тухай төсөөлбөл:
Сэтгэл зүйн асуудал улам даймширч, нийгэмд хямрал нүүрлэх нь гарцаагүй. 90 онд монголд болсон нийгэм соёлын эрс шилжилт шиг, түүнээс ч дутуугийн том хувьсгал шилжилт нийгмийн сэтгэл зүйд цочир тусах, хүндээр нөлөөлөх магадлалтай.
Өнөөдөр энэ шилжилтийн эхэн үеийг бид мэдэрсээр байна.
Чухалчилж хэлэлцэх ёстой, хийх ёстой зүйл бол ирэх жилүүдэд бэлтгэх, сэтгэл зүйн асуудлыг туулж гардаг, тусалдаг, дэмждэг нийгмийн төвлөрсөн бус тогтолцоо.

24/09/2025

Манай төв фэйсбүүк хуудсаа хаачихвал, фэйсбүүкийг орчихвол.. их зохимжтой юм шиг санагддаг. Хүмүүс сургаар сонсдог, мэддэг, зүгээр л зориод ирдэг, ирээд ярилцчихдаг тийм газар болчих юмсан.
Бид асар их цагийг энэ платформ дээр үрж, ямар ч зорилгогүй скролдсоор он цаг урссаар байгаа санагдах юм.
Ярилцах, гүнзгий ярилцах, сэтгэлийнхээ чөлөөг мэдрэх гэдэг маань фэйсбүүкийн үл тасрах шуугианаас чанх эсрэг зүйл шүү дээ. Энд гоё контент хиймээргүй байна, энд сайхан юм бичмээргүй байна, мартагдахын нэмэр орхигдохын нэмэр.
Хэн нэгний хэлсэн үгийг удаан санах сайхан шүү дээ. Хэл үгсийн тасралтгүй шуугиан биднийг ой санамжгүй, сэтгэлийн чөлөөгөөгүй болгож байна даа.
Удахгүй энэ фэйсбүүкийг орхих болноо, амлая : ))

Маргааш Сүхбаатарын талбайд Номын баяр дээр уулзья. Бие биенийхээ сэтгэл мэдрэмжийг уншъя. Өөр өөрийн өвөрмөц ганц роман...
20/09/2025

Маргааш Сүхбаатарын талбайд Номын баяр дээр уулзья. Бие биенийхээ сэтгэл мэдрэмжийг уншъя. Өөр өөрийн өвөрмөц ганц романыхаа зарим хуудсаас дэлгэе.

16/09/2025

Энэ 7 хоногийн ярилцлагууд хойшлогдлоо.

16/09/2025

Жигшүүрт хэрэг нийгмийг цочирдуулаад байгаа билээ. Хэн ч зэвүүцэм байдалтай харагдах зураг нь сошл сүлжээнд тарж, олны үзэн ядалтын бай болоод буй эмэгтэй манай төв дээр 2 хоногийн өмнө ирсэн юм. Би сошлд бичигдэж буй зүйлийн талаар ямар ч ойлголтгүй байсан. Ирсэн хүнтэй шүүмж зөвлөгөөгүй ярилцаж, сонсож, сэтгэл санаанд нь дэм үзүүлэх л зорилготой билээ манайх. Манайх гээд байгаа нь хэдэн сандал тойруулж тавиад, хүмүүсийн сэтгэл дотрох хөндүүр зовиураа уудлан ярихыг дэмждэг жижигхэн өрөө төдий. Би энэ жижигхэн өрөөг сайн дураараа эрхлэн явуулдаг хүн нь.
Хоёр хоногийн өмнө тэр эмэгтэйтэй юу ярилцсан талаар энд би бичихгүй. Хэрхэн ярилцсан тухайгаа цухас бичих шалтгаан байна. Эцэст нь яагаад ингэж бичих болсноо ч тайлбарлана.
Ням гарагийн үдээр тэр манай төвд ирсэн. Удаан уйлсан бололтой хамар нь улайчихсан, сэтгэл санааны хувьд нэлээн тогтворгүй яваа болов уу гэмээр охинтой яриа эхлэхээсээ өмнө хэсэг чимээгүй суусан. Ярилцлагын төвөө ерөнхий танилцуулаад, чөлөөтэй ярьж уужирч болохыг сануулсан. Тэр шууд ярьж чадахааргүй, сэтгэл нь үймсэн байсан. Нулимас нь үе үе урсаж байсан. Юу тохиолдсныг нь, ямархуу байгаа нь асуух илүүц байсан. Гүйцэт амьсгалахад нь туслаж, ахуй орчинд анхаарлыг нь шилжүүлэхийн тулд, сандал салфетканы хайрцаг хүртэл тэмтрүүлсэн. Аажмаар ярьж болохоор болсон. Ярьж болмоор боловч ярих хэлэх илэрхийлэх үг олдохгүй байгаа бололтой хэсэг суусан.
Би "Сошлд болж буй зүйлийн талаар юу ч мэдэхгүй, мэдээлэл аваагүй байгаа тухайгаа хэлж, зарим зүйлийг хэлж илэрхийлэх боломжгүй байж болох тухай ойр зуур юм ярьж, заавал ярих ч шаардлагагүй гэж түүнд хэлсэн байх. Гэхдээ яриа өрнөсөн. Ярианд оролцогч өөр нэгэн хүн байсан нь охины ах нь. Ах нь надад юу болоод байгаа тухай ерөнхий мэдээллийг өгсөн. Дүүгээ манайд авчирсан энэ хүн манай ярилцлагад өмнө нь нэлээн хэдэн удаа оролцож байсан юм.
Ийм 3-н хүнтэй ярилцлага 2 цаг орчим болоод дуусав. Маргааш орой нь Ах нь залгаж, өөрийн үнэнээ илэрхийлж олон нийтрүү хандаж манай төвөөс ярилцмаар байна гэж хүсэлт тавьсан. Би Чөлөө төвд шууд хамааралгүй сэдэв гэж эргэлзэж байсан ч, шийдвэр гаргаж, сая хамт лайв хийлээ. Бэлдэж төлөвлөсөн зүйлгүй, байгаараа байж санаа бодлоо хуваалцах гэж үзлээ, нуршуу чанаргүй лайв болсон байх. Оролцогчийнхоо дуу хоолойг өөрийнх нь хүсэлтээр гадагш гаргасан, нийгэмрүү хандсан хачин ярилцлага маягийн юм боллоо. Тэвчээртэй үзсэн хүмүүс нэгийг бодож, хоёрыг тунгаана биз ээ.

29/08/2025

Хүмүүсийн л адил, Ярилцах чөлөө төв ч бас сэтгэлийн шарх авдаг, хямардаг, миардаг. Гэрээсээ гармаагүй санагдахын адил, хаалгаа нээмээргүй санагдах өдрүүд ч тохиолддог. Салалт, урам хугарах, ганцаардах, хоосон амлах, өөрийгөө шүүх, итгэл алдрах гээд олон зүйл Чөлөө төвд тохиолдсон. Чөлөө төв бас эрч хүчийг мэдэрч, эрдэж бардаж, эрсдэл хийж, эг маггүй инээж хөхөрч, үдшийн гудамжаар хөлчүүрэн алхаж, маргааш нь шартаж үзсэн. Чөлөө төв өнгөрсөн жил мөрөөдөж, асаж, шатаж, шаналж, халуурч, дурлаж явсан. Энэ жил Чөлөө төв санаа алдамтгай, хүлээмтгий, салалтын дараа хүн завгүй байж хэцүү мэдрэмжээсээ зугтдагын адил ажил ихтэй, ядрамтгай, гүриймтгий байна. Чөлөө төв хүндээр санаа алдлаа.
Чөлөө төвийн цагаан сандлууд давхардагдан эвхэгдсэн байдалтай байна. Үйл ажиллагаа эхлээд удаагүй байхдаа хэвлүүлсэн хуучин хуваарь бүхий сурталчилгааны стенд өчигдөр эвдэрч унасан. Бас дугуй тэмдэг лого нэр маань хэмх үсэрсэн. Юм жамаараа өөрөө хэмхэрч эвдэрнэ гэж юу байх билээ. Тэгэхээр хөөрхий Чөлөө төв өчигдөр тэсэрсэн, дэлбэрсэн. Хөөрхий ч юу байхав, уурласан, уураа барьж чадаагүй. Чөлөө төв ч юу байхав, өнөө Тэгшжаргал уурласан.
Өнгөрсөн жил ч бас ингэж тэсрээд, нэг сандлынхаа хөлийг нуга савчихсан. Тэр сандлын халцарсан будагтай, буцааж тэгшилсэн хөл бүтэн жил гаруй хугацаанд дажгүй шүү бас ч. Хүн өөрийгөө уучлах, тохиолдсон зүйлээ хүлээн зөвшөөрөхөд багагүй хугацаа зарцуулж заримдаа нэлээн гацдаг. Чөлөө төв өнгөрсөн жилийн 10 сараас эхэлж гацсан, тасалдсан, гэртээ бүгсэн хүн шиг идэвхгүй байсан. Энэ хугацаанд Манай төвийг орхиогүй, цувж ирсээр байсан хүмүүстээ талархъя.
Чөлөө төв гэнэтийн шийдвэр гаргамтгай. Гэхдээ, үйл ажиллагаагаа амархан зогсоочихгүй л болов уу.
Яагаад гэвэл яг энэ хүүрнэн буй бодит байдал их чухал юм. Новшийн үнэнээ дэлгэх гэж, түүний цаана байгаа эмзэглэгч сэтгэлээ тэмтрэх гэж Чөлөө төвийн ярилцлагууд явагддаг. Энэ үнэнээс л, хол зугтахыг хүсэхгүй байна. Ийм үнэн, ийм эмзэглэлтэй хүмүүс учирдаг, хуваалцдаг байх орон зай байхыг хүссэн юмсан.
Тиймээс, 9-р сард уулзацгаая. Цөөхүүлээ, хэдүүлхнээ ярилцаж л байя.

25/08/2025

Намар айсуй.
Ярилцлагаа идэвхжүүлэх үү?
Та нар бэлэн үү..

Address

Ulaanbaatar

Telephone

+97691913618

Website

Alerts

Be the first to know and let us send you an email when Ярилцах чөлөө төв posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Ярилцах чөлөө төв:

Shortcuts

Share

Share on Facebook Share on Twitter Share on LinkedIn
Share on Pinterest Share on Reddit Share via Email
Share on WhatsApp Share on Instagram Share on Telegram

Category