09/05/2025
ဖတ်ရှုကြည့်ပါ။အတွေးကောင်းတစ်ခုတော့ရမှာပါ။
Credit to နိုင်းနိုင်းစနေ
အလုပ်မှာ နီပေါနိုင်ငံသူတစ်ယောက်နဲ့ ကျွန်မခင်တယ်။ နေတဲ့ ရပ်ကွက်ကလည်း တူတော့ အလုပ်ပြန်ရင် အတူပြန်ဖြစ်တယ်။
ခင်ပြီး သိပ်မကြာဘူး... သူက ရထားထဲ ရောက်ရင် စာအုပ်ထုတ်ဖတ်လာတတ်တာကို ကျွန်မ သတိထားမိတယ်။ ဘာစာအုပ်တွေ ဖတ်သလဲ စပ်စုတော့ သူကလည်း အင်္ဂလိပ်စာတိုးတက်အောင် ငါအခု စာတွေဖတ်နေတယ် ပြောတယ်။ စာအုပ်ဖတ်တာ ကောင်းတဲ့အလုပ်လို့ ကျွန်မပြောပြပြီး သူ့ကို ဖတ်ဖို့ စာအုပ်တချို့နဲ့ မိတ်ဆက်ပေးတယ်၊ အိမ်မှာရှိတဲ့ စာအုပ်တချို့ ပေးတယ်။
သူက အခုမှ စာဖတ်စဆိုတော့ စိတ်ခွန်အားဖြစ်စေတဲ့ စာအုပ်တွေ ဖတ်နေတာ တွေ့တယ်။ ဖတ်ကျင့်ရလာရင် နင် ဝတ္ထု (novel) တွေ ဖတ်တတ်သွားလိမ့်မယ်လို့ ကျွန်မပြောတော့ သူက novel ဆိုတာ ဘာကို ပြောတာလဲ မေးတယ်။ ကျွန်မလည်း ကျွန်မသိသလောက် ပြောပြလိုက်တယ်။
သူက အားတာနဲ့ စာအုပ်ထုတ်ဖတ်တယ်။ ရထားပေါ်မှာ၊ အလုပ်တက်ဖို့ အချိန်လိုသေးရင်လည်း ဖတ်တယ်။
တစ်ရက်မှာ အိမ်အတူပြန်ရင်း ဘာစာအုပ်တွေ ထပ်ဖတ်ဖြစ်နေလဲလို့ သူ့ကို ကျွန်မမေးတော့ သူက .. "မီးမီး စာအုပ်တွေ ဖတ်ရင်း ငါ့အတွေးတွေ တော်တော်ပြောင်းသွားတယ် သိလား.. အရင်ကဆို ငါတော်တော်ဆိုးတာ .. တစ်ခုခုဆို ပြဿနာတက် ငြင်းခုံရတယ်.. မန်နေဂျာတွေနဲ့လည်း ငါအပြိုင်ငြင်းတယ်.. မကောင်းမြင်စိတ် များတယ်" လို့ ပြောတယ်။
ကျွန်မလည်း သူ့အကြောင်း နည်းနည်း သိထား ကြားထားတယ်။ သူတွဲနေတဲ့ သူနဲ့ ထမင်းအတူစား၊ အတူနားတဲ့ မိန်းမကြီးတစ်ယောက် ရှိတယ်။ အဲမိန်းမကြီးက အတွေးဆိုးတွေ ဝင်အောင် ဘေးကနေ ဆွပေး၊ သွေးထိုးပေးတတ်တာကို ကျွန်မသတိထားမိတယ်။
သူ့ကိုတော့ အဲမိန်းမကြီးနဲ့ မပေါင်းနဲ့လို့ ကလေးဆန်ဆန် ကျွန်မ မပြောပါဘူး။ အပျက်ဆောင်တဲ့စကား၊ ညည်းညူတဲ့စကားကို နေ့တိုင်း ကြားနေရင် ကိုယ့်စိတ်ထဲ အတွေးထဲ အပျက်ဆောင် ခံစားချက်တွေ ဝင်လာနိုင်တယ်၊ စာဖတ်တာက ကိုယ့်ကို အတွေးကောင်းတွေ ပေါ်စေတယ်၊ တွေးတောဆင်ခြင်တတ်စေတယ်၊ အမှားအမှန် သိစေတယ်၊ ကိုယ်ချင်းစာတတ်စေတယ်... ဘာညာ ကျွန်မပြောတာပေါ့။
ဒီနောက်ပိုင်း အဲမိန်းမကြီးနဲ့ သူ ထမင်းအတူ ထိုင်မစားတော့တာ တွေ့မိတယ်၊ ကွန်းပလိုင်းတက်တာမျိုးလည်း သိပ်မရှိတော့ဘူး။ သူတို့က လူချင်း မတည့်တော့တာ မဟုတ်ဘဲ စိတ်ချင်း မတည့်တော့လို့ ပြောစရာစကားတွေ နည်းသွားတာဖြစ်မယ်။ ဒါဟာ စာဖတ်ခြင်းရဲ့ အကျိုးရလဒ်ထဲက တစ်ခုပေါ့။ မကောင်းတာကို မကောင်းမှန်း ဆင်ခြင် တွေးတောတတ်သွားတယ်။ စိတ်ရှုပ်စရာတွေကို မကြား နားမထောင်ချင်တော့ဘူး။ ဘယ်သူမှလည်း အကြည်ဓာတ်မရှိတဲ့ စကားမျိုး နေ့တိုင်း မကြားချင်ဘူးလေ။
ရုပ်ရှင်တစ်ကားမှာ ပန်းတစ်ပင်ဟာ တော်တော်နဲ့ ပန်းမပွင့်ဘူး.. အပင်သန်ပေမယ့် ပန်းမပွင့်ဘူး။ ဒါကို ယောက်ျားဖြစ်သူက ပန်းရေလောင်းနေရင်း သူ့မိန်းမပြောခဲ့ဖူးတဲ့ "ပန်းကလည်း သက်ရှိမို့ ပန်းကို ရေလောင်းပြုစုတဲ့အခါ ကောင်းတဲ့ စကားတွေ ပြောပေးရတယ်" ဆိုတဲ့ စကားကို ပြန်သတိရပြီး ရေလောင်းတိုင်း ပန်းကို ချီးကျူးစကားတွေ၊ အားပေးစကားတွေ ပြောပေးတော့ သိပ်မကြာဘူး.. အဲအပင် ပန်းပွင့်သွားတယ်။
ဉာဏ်ရည်နိမ့်တဲ့ သက်ရှိအပင်တောင် ကောင်းတဲ့စကားတွေ ကြားတော့ ပန်းပွင့်သွားတယ်။ ဉာဏ်ရည်မြင့်တဲ့လူလည်း ကောင်းတဲ့စကား၊ ကောင်းတဲ့ခံစားချက်ကို အာဟာရအဖြစ် နေ့တိုင်း လိုအပ်ပါတယ်။ အဲဒီအာဟာရကို စာအုပ်တွေထဲကနေလည်း ရနိုင်ပါတယ်။
